1-3. (a) Boasa diadili akka apostel di jolo ni Sanhedrin, jala aha do sebenarna masalah ni nasida? (b) Boasa porlu taboto tanggapan ni akka apostel i?

 DIADILI ma akka apostel ni Jesus di jolo ni mahkamah agung Sanhedrin. Muruk hian do akka hakim i tu nasida. Boasa? Si Josep Kayapas, sintua ni malim jala ketua ni Sanhedrin i mandok tu nasida, “Nungnga takkas diorai hami hamu asa unang diajari hamu akka halak marhite goar i. Alai ida ma, nungnga rarat ajaranmuna i tu sude huta na di Jerusalem. Jala hami do disalahon hamu tu parmate ni bawa i.” (Ul. 5:28) Alani muruk ni ketua Sanhedrin i, sappe dang boi didok ibana goar ni Jesus. Jadi diparettahon do akka apostel i asa unang marbarita na uli be. Molo dang olo, dihukum ma nasida.

² Sebenarna sian Jesus do tugas ni nasida i jala na disuru Debata do Jesus mangulahon i. (Mat. 28:18-20) Boha do tanggapan ni akka apostel tikki diorai nasida marbarita? Gabe so do nasida marbarita ala mabiar tu ancaman ni akka hakim i? Manang barani do nasida torus marbarita na uli? Masalahna sebenarna, lebih taat do nasida tu Debata manang tu jolma? Apostel Petrus ma na mewakili sude apostel lao mangalusi hakim i. Barani do ibana makkatai jala tegas do hatana.

³ Pasti tertarik do hita naeng mamboto songon dia tanggapan ni akka apostel i. Alana sarupa do tugasta dohot nasida, i ma marbarita na uli. Jala adong do tantangan na tahadapi tikki mangulahon tugas on. (Mat. 10:22) Berupaya do akka na menentang i membatasi manang mangorai ulaonta. Jadi molo taparrohahon sikap ni akka apostel tikki diadili di jolo ni Sanhedrin, gabe taboto ma aha na ikkon taulahon. a

4, 5. Boasa “cemburu” si Kayapas dohot akka halak sian sekte Saduse tu akka apostel?

⁴ Taingot ma tikki parjolo sahali nasida diorai marbarita, dialusi si Petrus dohot si Johannes ma, “Dang tarbahen hami mangulahon hatamuna i. Ikkon dipaboa hami do aha naung diida hami dohot na  dibege hami.” (Ul. 4:20) Jadi dung diadili nasida di jolo ni Sanhedrin, pittor marbarita do si Petrus, si Johannes, dohot sude apostel na asing di bagas joro. Dibahen nasida ma mukjizat, dipamalum na marsahit, jala diusir akka suru-suruan na jahat. “Di Terras ni si Salomo”, di sabola timur ni bagas joro do diulahon nasida i. Ai disi do godang halak Jahudi marpungu. Bahkan bayangan ni si Petrus pe, boi do pamaluppon na marsahit. Jala godang do sian akka na dipamalum i olo manangihon barita na uli. Alani i ma, “lam tamba do godang ni akka bawa dohot akka borua na porsea tu Tuan i”.—Ul. 5:12-15.

⁵ Gabe “cemburu” ma si Kayapas dohot akka halak na mangihutton sekte Saduse. Diparettahon nasida ma asa dipenjarahon akka apostel. (Ul. 5:17, 18) Boasa? Ai diajarhon akka apostel do naung hehe Jesus. Hape halak Saduse dang porsea tu haheheon. Diajarhon akka apostel do muse holan halak na porsea tu Jesus do na boi diselamatton. Jadi molo lam godang halak Jahudi na porsea jala mambahen Jesus gabe Pamimpin ni nasida, olo do gabe ro halak Rom manghukum halak Saduse. On do na dihabiari nasida. (Joh. 11:48) Alani i, marsitutu ma halak Saduse pasohon ulaon ni akka apostel i.

6. Ise do na berupaya manghasut akka halak saonari on asa menganiaya naposo ni Jahowa, jala boasa dang pola tarsonggot hita disi?

⁶ Saonari on pe, akka pamimpin agama do na manghasut akka halak asa menganiaya naposo ni Jahowa. Jotjot do dipakke nasida kedudukanna lao manuru pamaretta manang media asa pasohon ulaonta marbarita. Dang pola tarsonggot hita disi, ala memang barita na tapaboa i mambahen halak gabe mamboto dia na sittong. Jadi akka halak na tulus rohana, pasti dang olo be mangihutton ajaran ni agama palsu. (Joh. 8:32) Alani i ma, gabe cemburu jala sogo roha ni akka pamimpin agama tu naposo ni Jahowa.

7, 8. Aha do pengaruh ni hata ni suru-suruan i tu akka apostel, jala aha do na porlu tapikkirhon?

⁷ Sebelum diadili akka apostel i, dipenjarahon ma nasida. Mungkin ro do tu pikkiran ni nasida satokkin nai dihukum mate nama nasida. (Mat. 24:9) Alai di borngin i dang disangka nasida “ro ma suru-suruan ni Jahowa mambukka akka pintu ni penjara i”. b (Ul. 5:19) Didokkon suru-suruan i ma tu nasida, ‘Lao ma hamu tu bagas joro, jala toktong ma paboa barita na uli i.’ (Ul. 5:20) Paretta ni suru-suruan i paposson roha ni akka apostel, na sittong do na diulahon nasida saleleng on. Jala on paposson roha ni akka apostel asa tetap barani marbarita dang soal aha na masa. Ujungna “masuk ma nasida tu bagas joro manogotna i jala mangajari ma nasida disi”.—Ul. 5:21.

⁸ Porlu do tapikkirhon on, ‘Hutiru do haporseaon dohot habaranion ni akka apostel tikki adong na mangorai au marbarita?’ Pasti lam barani do hita ‘patorakkon taringot tu Harajaon ni Debata’, ala taboto didongani suru-suruan do hita mangulahon ulaonta on.—Ul. 28:23; Pgk. 14:6, 7.

9-11. Aha do tanggapan ni akka apostel tikki disuru Sanhedrin nasida pasohon ulaon marbarita, jala songon dia do alus ni akka apostel i gabe sada prinsip na ikkon diihutton halak Kristen?

⁹ Nungnga siap be si Kayapas dohot akka hakim ni Sanhedrin menangani kasus ni akka apostel. Disuru nasida ma akka petugas mangalap akka apostel i. Ai dang diboto halak i dope na masa di penjara. Pasti tarsonggot do nasida tikki diida dang di bagasan penjara be akka apostel i. Hape tarkucci do pintu ni penjara i jala “jongjong do disi akka panjaga”. (Ul. 5:23) Alai dang leleng, diboto kepala ni panjaga ni bagas joro ma, naung ro muse akka apostel tu bagas joro lao paboahon barita taringot Jesus Kristus. Hape ulaon i do na mambahen nasida dipenjarahon. Pittor lao ma kepala ni panjaga i dohot akka petugas i tu bagas joro lao mamboan akka apostel tu jolo ni Sanhedrin.

¹⁰ Songon na dipaboa di mula ni pasal on, disuru akka pamimpin agama na muruk i do asa unang marbarita be akka apostel. Aha do tanggapan ni nasida? Barani do si Petrus mandok, “Debata do parhuasonami. Urrikkot do di hami mangoloi Ibana sian jolma.” (Ul. 5:29) Sikap ni akka apostel on ma na ikkon diihutton sude halak Kristen. Dang porlu taoloi pamaretta molo paretta ni nasida maralo tu lomo ni roha ni Debata. Alani i molo diorai “pamaretta” hita marbarita, dang taoloi i ala sian Debata do tugas i. (Rom 13:1) Justru marbisuk do hita mangalului kesempatan asa boi paboahon barita Harajaon tu halak na asing.

¹¹ Gabe muruk hian do akka pamimpin agama i dung dibege nasida alus ni akka apostel i. “Gabe naeng dibunu” nasida ma akka apostel i. (Ul. 5:33) Di tikki i hira na so adong be kesempatan ni akka apostel i malua. Pasti dipamate nama nasida. Alai dang disangka nasida adong do na mangurupi.

12, 13. (a) Aha do na didokkon si Gamaliel tu akka halak di pengadilan i, jala boha do tanggapan ni nasida? (b) Songon dia do cara ni Jahowa mangurupi naposona saonari, jala aha do na ikkon torus taingot molo pe hita ‘marsitaonon ala mangulahon na sittong’?

¹² Makkatai ma si Gamaliel, “sahalak guru na mangajarhon Patik jala dipasangap  sude jolma”. c Bahkan tikki ‘disuru ibana asa diboan satokkin akka apostel tu luar’, dioloi akka halak na disi do. (Ul. 5:34) Dipaboa si Gamaliel ma contoh taringot kelompok pemberontak na masa najolo. Gabe so do kelompok i dung mate pamimpinna. Jadi berdasarkan peristiwa i, disuru si Gamaliel ma asa dipasombu akka hakim di pengadilan i ulaon ni akka apostel i, ala nungnga mate Jesus, Pamimpin ni nasida. Porsea do akka hakim i tu hata ni si Gamaliel, ai didok ibana do, “Unang ma pola gugai hamu nasida. Pasombu hamu ma songon i. Ai molo sian jolma do ulaon ni nasida i, dang marhasil i. Alai molo sian Debata do i, dang tolap hamu mangorai nasida. Ra, boi do gabe Debata na dialo hamu.” (Ul. 5:38, 39) Diihutton akka hakim i do hata ni si Gamaliel i. Alai disuru nasida do asa dilissingi akka apostel i jala “diorai ma nasida mangajari akka halak marhite goar ni Jesus”.—Ul. 5:40.

¹³ Songon na masa najolo, saonari pe boi do dipakke Jahowa akka halak na sangap songon si Gamaliel mangurupi naposona. (Poda 21:1) Dipakke Jahowa do tondi parbadiana mangonjar roha ni akka pejabat, hakim, dohot na mambahen peraturan asa sesuai tindakan ni nasida tu lomo ni roha ni Jahowa. (Neh. 2:4-8) Alai molo pe dipasombu hita ‘marsitaonon ala mangulahon na sittong’, adong dua hal na ikkon torus taingot. (1 Ptr. 3:14) Na parjolo, dilean Debata do gogo asa sanggup hita martahan mangadopi sitaonon. (1 Kor. 10:13) Na paduahon, dang boi akka musu pasohon ulaon ni Debata.—Jes. 54:17.

14, 15. (a) Songon dia do perasaan ni akka apostel dung dilissingi nasida, jala boasa boi songon i? (b) Ceritahon ma sada pengalaman taringot naposo ni Jahowa na toktong marlas ni roha nang pe menghadapi penganiayaan.

¹⁴ Dung dilissingi akka apostel i, gabe hurang semangat do nasida marbarita? Daong. Didok di Bibel, dung lao akka apostel i sian jolo ni Sanhedrin, “marlas ni roha do nasida”. (Ul. 5:41) Boasa “marlas ni roha” nasida? Pasti ma dang ala dilissingi. Alai ala boi dipartahatton nasida haporseaonna tu Jahowa jala boi diihutton teladan ni Jesus.—Mat. 5:11, 12.

¹⁵ Songon halak Kristen di abad na parjolo, hita pe boi do marlas ni roha nang pe menghadapi sitaonon tikki marbarita na uli. (1 Ptr. 4:12-14) Memang dang lomo rohatta diancam, dianiaya, manang dipenjarahon. Alai pasti las do rohatta molo boi tapartahatton haporseaotta tu Jahowa nang pe dianiaya. Misalna si Henryk Dornik, tetap do setia ibana tu Jahowa nang pe saleleng martaon-taon menghadapi penganiayaan na massai kejam sian pamaretta. Di bulan Agustus 1944, diputusson pamaretta ma asa dibahen ibana dohot abangna tu kamp konsentrasi. Didok akka na menentang i ma tu nasida, “Percuma do molo tajujui nasida maninggalhon haporseaonna. Ai las do roha ni nasida molo ikkon mate alani haporseaonna i.” Didokkon si Dornik ma, “Dang lomo rohakku mate. Alai las do rohakku boi hupartahatton haporseaokku tu Jahowa nang pe ikkon marsitaonon.”—Jak. 1:2-4.

16. Aha do buktina na semangat akka apostel marbarita na uli, jala songon dia do hita maniru nasida?

 ¹⁶ Dung dipaulak akka apostel sian pengadilan, pittor lao do muse nasida marbarita na uli. “Ganup ari do nasida di bagas joro, toktong do nasida lao sian jabu tu jabu . . . paboahon barita na uli taringot tu Kristus Jesus.” d (Ul. 5:42) Dang mabiar nasida, alai semangat do nasida mangulahon i. Songon na diparettahon Jesus, marbarita do nasida tu jabu-jabu ni halak. (Mat. 10:7, 11-14) Alani i gabe rarat ma barita na uli i tu sude luat na di Jerusalem. Saonari pe diihutton Saksi Jahowa do cara na sarupa. Marbarita do hita sian jabu tu jabu, jala lomo do rohatta asa sude halak mambege barita na uli. Dipasu-pasu Jahowa do ulaonta on? Ido. Di tikkitta saonari on, adong marjuta halak na menyambut barita Harajaon i. Jala godang do sian nasida na parjolo sahali mambege barita na uli ala adong Saksi Jahowa na ro tu jabu ni nasida.

17-19. Aha do masalah na boi mambahen huria gabe dang marsada, jala aha do na diulahon akka apostel lao pasaehon masalah i?

¹⁷ Adong do masalah na asing na dihadapi huria na baru dibentuk on. Alai sian bagasan do masalah i. Aha ma i? Godang do sisean na tardidi i na ro sian luat na dao. Jadi ikkon leleng do nasida tinggal di Jerusalem asa boi godang marsiajar. Alani i rade do akka sisean na tinggal di Jerusalem mangalehon hepeng tu nasida asa boi memenuhi kebutuhan ni nasida, songon sipanganon dohot na asing. (Ul. 2:44-46; 4:34-37) Di tikki i adong ma masalah. Adong akka ina na mabalu na marbahasa Junani, “na so disarihon tikki dibagi sipanganon siganup ari”. (Ul. 6:1) Hape akka ina na mabalu na marbahasa Heber, disarihon do. Hira na so adil ma pembagianna di tikki i. Jadi masalah sisongon on ma na boi mambahen huria gabe dang marsada.

 ¹⁸ Akka apostel do na gabe punguan na mangaradoti organisasi di tikki i. Diattusi nasida do dang denggan molo ‘dipaso nasida mangajarhon hata ni Debata holan ala naeng mambagi-bagihon sipanganon’. (Ul. 6:2) Jadi lao pasaehon masalah i, dipangido nasida ma asa dilului pitu bawa “na digohi tondi parbadia, jala na marbisuk” lao mangaradoti “ulaon na rikkot on”. (Ul. 6:3) Tugas ni akka bawa na memenuhi syarat on dang holan mambagihon sipanganon. Alai nasida do tong na maniop hepeng, manuhor akka barang, jala ikkon teliti do nasida mambahen catatan taringot i. Goar ni sude akka bawa na dipillit i, goar ni halak Junani do. Tujuanna ra asa mura do akka ina na mabalu i manjalo nasida. Dung dipikkiri jala ditangiakkon, dilantik akka apostel ma pitu bawa i lao mangaradoti “ulaon na rikkot on”. e

¹⁹ Bawa na pitu i ma na mangatur pembagian sipanganon. Alai porlu dope nasida marbarita na uli? Porlu. Buktina, adong do sada sian bawa na dipillit i na margoar si Stepanus. Parbarita na uli na marbisuk jala barani do ibana. (Ul. 6:8-10) Asing ni i si Pilippus, ditanda do ibana “sahalak parbarita na uli”. (Ul. 21:8) Jadi, parbarita na semangat do bawa na pitu i.

20. Songon dia do naposo ni Jahowa saonari mangihutton cara na dibahen akka apostel?

²⁰ Saonari diihutton naposo ni Jahowa do cara na dibahen akka apostel i. Dipillit akka sintua do akka bawa na marbisuk jala na mangandalhon tondi parbadia lao mandalatton tanggung jawab di huria. Marhite petunjuk sian Punguan na Mangaradoti Organisasi, dilantik ma akka bawa i lao gabe sintua  dohot parhobas di huria mangihutton persyaratan na adong di Bibel. f (1 Tim. 3:1-9, 12, 13) Jadi boi tadok, tondi parbadia do na mangalantik nasida. Kerja keras do nasida mangurus godang ulaon na rikkot. Contohna, diatur akka sintua do asa adong na mangurupi donganta naung matua. (Jak. 1:27) Adong do muse akka sintua na mangurupi pembangunan Bale Harajaon, mengorganisasi akka parpunguan, jala adong na gabe Panitia Penghubung Rumah Sakit. Godang do tong tugas ni akka parhobas. Diurupi nasida do akka sintua asa denggan mangulahon tugas penggembalaan dohot mangajari di huria. Alai ikkon seimbang do nasida mandalatton tanggung jawabna di huria dohot tugasna marbarita na uli.—1 Kor. 9:16.

21, 22. Aha do buktina na dipasu-pasu Jahowa huria na baru on?

²¹ Nang pe huria na baru on menghadapi penganiayaan sian luar, jala adong masalah sian bagasan, alai marhasil do nasida menghadapi i ala diurupi Jahowa. Dipasu-pasu Jahowa do ulaon ni nasida i. Ai didok do di Bibel, “Gabe lam rarat ma hata ni Debata jala lam tamba godang ma akka sisean di Jerusalem. Jala godang do akka malim na mangihutton haporseaon i.” (Ul. 6:7) Adong dope laporan na asing na paboahon kemajuan ni huria i na disurat di bukku Ulaon ni Apostel. (Ul. 9:31; 12:24; 16:5; 19:20; 28:31) Saonari on pe, pasti las do rohatta mambege laporan taringot kemajuan ni ulaon marbarita di liat portibi on.

²² Dang menyerah pamimpin agama menganiaya halak Kristen di abad na parjolo M, justru lam kejam do nasida. Satokkin nai si Stepanus ma naeng dianiaya nasida, songon na lao tabahas di pasal na mangihut.