1-6. Ceritahon ma pengalaman ni akka Saksi Jahowa na marbarita na uli dang soal songon dia situasina.

 ADONG sahalak Saksi Jahowa na poso di Ghana na margoar si Rebecca. Jotjot do ibana marbarita na uli di sikkolana. Sai diboan ibana do akka publikasi di tasna. Tikki jam istirahat, dilului do kesempatan lao marbarita tu akka donganna. Jala adong do dongan sakalasna na marsiajar Bibel dohot ibana.

² Di Pulau Madagaskar di pesisir timur ni Afrika, adong dua perintis na torus marbarita tu sada huta na terpencil. Ikkon mardalan pat ma nasida hira-hira 25 kilometer asa sahat tu huta i nang pe mohop ari. Adong do piga-piga halak di huta i na berminat marsiajar Bibel.

³ Lomo do roha ni akka Saksi di Paraguay naeng marbarita tu akka halak na tinggal di sepanjang Sungai Paraguay dohot Sungai Paraná. Jadi kerja sama ma nasida dohot akka relawan sian 15 negara lao mambahen sada kapal. Kapal i muatanna 45 ton jala siat do 12 halak di bagasan. Jadi kapal i ma na dipakke nasida lao marbarita tu akka halak na tinggal di daerah na maol dijangkau.

⁴ Di Alaska, di belahan bumi bagian utara, dimanfaatton akka Saksi do kesempatan lao marbarita na uli tu akka wisatawan saleleng musim panas. Tikki mohop cuaca, marroan do akka kapal pesiar mamboan wisatawan sian marragam negara. Tikki sahat kapal i nungnga disi akka Saksi lao marbarita. Dipajang nasida do akka publikasi na menarik di marragam bahasa. Jala dipakke do pesawat lao menjangkau akka halak na tinggal di daerah terpencil. Alani i sahat ma barita na uli tu akka halak na tinggal di Aleut, Atabaskan, Simsian, dohot Tlingit.

⁵ Adong sahalak Saksi na margoar si Larry di Texas, AS. Cacat do ibana alani kecelakaan, jadi tinggal ma ibana di panti wreda. Disi ma ibana marbarita na uli. Nang pe ikkon markursi roda, alai sibuk do ibana marbarita. Las do rohana paboahon taringot Harajaon ni Debata. Dipaboa ibana do molo di Harajaon i haduan boi do ibana mardalan muse.​—Jes. 35:5, 6.

 ⁶ Adong do sekelompok Saksi na ikkon markapal saleleng tolu ari sian Mandalay, lao menghadiri parpunguan wilayah di Myanmar bagian utara. Semangat do nasida marbarita na uli. Diboan nasida do akka publikasi jala dibagihon ma i tu akka penumpang di kapal i. Tikki so kapal i di sada kota manang huta, pittor hatop do nasida turun jala marbarita di daerah i. Dibagihon nasida ma akka sijahaon. Dung mulak nasida tu kapal, marbarita ma muse nasida tu penumpang na baru nakkok tu kapal i. Hira daerah na baru ma i di nasida.

7. Songon dia do cara na dipakke naposo ni Jahowa lao marbarita, jala aha do tujuan ni nasida?

⁷ Songon akka contoh nakkin, di liat portibi on semangat do sude sisomba Jahowa lao ‘patorakkon taringot Harajaon ni Debata’. (Ul. 28:23) Marbarita do nasida sian jabu tu jabu, di dalan, marhite surat dohot telepon. Sai dilului nasida do kesempatan lao paboahon taringot Harajaon ni Debata tikki di bus, di taman, manang tikki istirahat di parkarejoanna. Nang pe marasing-asing carana, alai sarupa do tujuanna, i ma pasahatton barita na uli tu manang ise pe na dijuppangi nasida.​—Mat. 10:11.

8, 9. (a) Boasa ulaon marbarita na uli on boi didok sada mukjizat? (b) Sukkun-sukkun aha do na porlu tapikkirhon, jala songon dia do asa taboto alusna?

⁸ Ulaon marbarita on nungnga diulahon di lobi sian 235 negeri. Jadi hamu akka na manjaha bukku on, termasuk do hamu sada sian akka parbarita i? Molo dohot do hamu, berarti nungnga berperan hamu di ulaon na istimewa on. Nang pe adong marragam tantangan songon pelarangan sian pamaretta manang penganiayaan, toktong do Saksi Jahowa marbarita na uli taringot Harajaon ni Debata tu sude bangso. Jadi boi didok sada mukjizat do boi sahat barita i tu liat portibi on.

⁹ Porlu do tapikkirhon sukkun-sukkun on: Nang pe adong tantangan dohot paraloan sian Sibolis, alai boasa boi torus hita marbarita? Asa taboto alusna, taida ma jo aha na masa di abad na parjolo. Alana Saksi Jahowa saonari mangalanjutton ulaon ni nasida.

10. Tu ulaon aha do dibaktihon Jesus dirina, jala boi do holan Jesus na pasaehon ulaon i?

¹⁰ Jesus Kristus do na membentuk huria Kristen. Dibaktihon do dirina lao marbarita na uli taringot Harajaon ni Debata. On do ulaon na uppetting di ngoluna. Ai hea do didok ibana, “Di akka kota na asing pe ikkon baritahonokku do barita na uli taringot tu Harajaon ni Debata, ai alani i do au disuru.” (Luk. 4:43) Diboto Jesus do dang boi holan ibana sandiri na pasaehon tugas on. Sebelum mate Jesus, disurirakkon ibana do molo barita Harajaon on lao dibaritahon “tu sude bangso”. (Mrk. 13:10) Alai songon dia do i diulahon, jala ise do na mangulahon i?

11. Tugas aha do na dilehon Jesus tu akka siseanna, jala aha do bantuan na dilehon tu nasida?

 ¹¹ Dung dipahehe Jesus, dipataridahon ibana do dirina tu akka siseanna, jala dilehon do tu nasida sada tugas na massai penting. Didok ibana, “Lao ma hamu, bahen hamu ma saluhut halak sian nasa bangso gabe siseanku. Didi hamu ma nasida di bagasan goar ni Ama, Anak, dohot tondi parbadia. Ajari hamu ma nasida mangulahon sude naung huparettahon tu hamu. Ida ma, sai na donganakku do hamu sahat tu panutup ni jaman on.” (Mat. 28:19, 20) Hata “sai na donganakku do hamu”, patuduhon na lao urupan ni Jesus do nasida tikki marbarita na uli dohot mambahen sisean. Porlu do nasida diurupi. Alana nga disurirakkon Jesus hian na lao “sogo ma roha ni sude jolma” tu nasida. (Mat. 24:9) Asing ni i sebelum naik Jesus tu surgo, dipaboa ibana do na lao urupan ni tondi parbadia nasida asa margogo lao gabe saksina “sahat tu ujung ni tano on”.​—Ul. 1:8.

12. Aha do sukkun-sukkun na porlu taboto alusna, jala boasa porlu taboto alusna?

¹² Porlu do taboto alus ni sukkun-sukkun on: Boha do tanggapan ni akka apostel ni Jesus dohot akka sisean di abad na parjolo tu tugas on? Sanggup do nasida pasahatton barita na uli taringot Harajaon, nang pe otik nasida jala mangadopi penganiayaan? Tutu do diurupi Jesus dohot tondi parbadia nasida lao mambahen sisean? Boi ma taboto alusna sian bukku Ulaon ni Apostel. Jala penting do taboto alusna. Alana didok Jesus torus do diulahon tugas on “sahat tu panutup ni jaman on”. Alani i sude halak Kristen, termasuk hita na mangolu di ari parpudi ikkon marbarita na uli. Jadi penting do taboto sejarah na disurat di bukku Ulaon ni Apostel.

13, 14. (a) Ise do na manurat bukku Ulaon ni Apostel, jala sian dia do dapotna akka informasi na disurat di bukku i? (b) Aha do isi ni bukku Ulaon ni Apostel?

¹³ Ise do na manurat bukku Ulaon ni Apostel? Memang dang adong dipaboa di bukku i ise na manurat. Alai sian hata pamukka di bukku i takkas ma taboto, sarupa do na manurat bukku Ulaon ni Apostel on tu na manurat Injil Lukas. (Luk. 1:1-4; Ul. 1:1, 2) Alani i sian najolo si Lukas do na dianggap panurat ni bukku Ulaon ni Apostel. Sahalak “pangubati” do ibana jala ahli sejarah na teliti. (Kol. 4:14) Sian bukku on taboto ma akka peristiwa na masa saleleng hira-hira 28 taon, mulai sian naik Jesus tu surgo taon 33 M sahat tu na dipenjarahon si Paulus di Rom sekitar taon 61 M. Di bukku i digatti si Lukas do hata “nasida” gabe “hami”. On patuduhon diida ibana do godangan peristiwa na disurat disi. (Ul. 16:8-10; 20:5; 27:1) Ala ahli sejarah na teliti do si Lukas, pasti informasi na dapotna langsung sian si Paulus, si Barnabas, si Pilippus dohot akka halak na goarna disurat di bukku i.

¹⁴ Aha do isi ni bukku Ulaon ni Apostel? Sebelumna di Injil Lukas, disurat  si Lukas do taringot aha na didok jala diulahon Jesus. Alai di bukku Ulaon ni Apostel, disurat si Lukas do taringot aha na didok jala diulahon akka sisean ni Jesus. Di bukku on disurat do boi do diulahon nasida tugas na luar biasa, hape sasittongna godangan sian nasida ‘dang parsikkola’. (Ul. 4:13) Sian bukku on ma taboto songon dia huria Kristen mulana dibentuk jala berkembang. Dipaboa do muse songon dia halak Kristen di abad na parjolo marbarita, cara na dipakke nasida, dohot cara pandang ni nasida tu ulaon i. (Ul. 4:31; 5:42) Sian bukku on boi ma taida songon dia tondi parbadia mangurupi nasida marbarita. (Ul. 8:29, 39, 40; 13:1-3; 16:6; 18:24, 25) Dibahas do muse taringot topik utama ni Bibel, i ma Harajaon ni Debata na lao pabadiahon goar ni Debata jala songon dia ulaon marbarita boi marhasil nang pe godang tantangan.​—Ul. 8:12; 19:8; 28:30, 31.

15. Aha do manfaatna molo taparsiajari bukku Ulaon ni Apostel?

¹⁵ Pasti longang do rohatta jala lam togu do haporseaotta molo taparsiajari bukku Ulaon ni Apostel. Hona do tu rohatta molo tarimangi habaranion dohot semangat ni akka halak Kristen najolo. Gabe tergerak ma hita maniru haporseaon ni nasida. Jala gabe lam rade ma hita mangulahon tugasta mambahen sisean. Jadi bukku na dijaha hamu saonari on, dirancang lao mangurupi hamu mamparsiajari bukku Ulaon ni Apostel.

16. Aha do tujuan utama ni bukku on?

¹⁶ Aha do tujuan utama ni bukku on? Adong tolu: (1) Paposson rohatta na diurupi Jahowa do hita marhite tondi parbadiana lao marbarita dohot mambahen sisean. (2) Mambahen hita lam semangat marbarita ala mamparsiajari teladan ni akka halak Kristen di abad na parjolo. (3) Mangurupi hita asa lam mangargai organisasi ni Jahowa dohot akka halak na manguluhon hita di ulaon marbarita nang di huria.

17, 18. Songon dia do bukku on disusun, jala akka aha do fitur ni bukku on?

¹⁷ Songon dia do bukku on disusun? Bukku on dibagi gabe ualu bagian. Ganup bagian mambahas sabagian isi ni bukku Ulaon ni Apostel. Di akka pasal berikutna dang na lao dibahas bukku Ulaon ni Apostel ayat per ayat. Alai tujuanna mambuat parsiajaran sian akka peristiwa na di bukku i, jala mangurupi hita menerappon i. Di bagian awal ni ganup pasal dipaboa do inti ni pembahasan di pasal i. Jala adong do kutipan ayat na patuduhon bagian na dia sian bukku Ulaon ni Apostel na dibahas.

¹⁸ Adong do muse fitur na asing di bukku on na mangurupi hita lao mamparsiajari Bibel. Adong akka gambar na bagak na manggombarhon akka peristiwa na disurat di bukku Ulaon ni Apostel. Gabe boi ma dibayakkon hamu akka peristiwa i huhut dirimangi hamu ayatna di Bibel. Di godang pasal, adong do akka kotak na marisi keterangan na marguna tu hita. Adong do  kotak na mambahas taringot sasahalak na disurat di Bibel jala na gabe teladan di hita. Adong do kotak na mambahas taringot akka inganan, peristiwa, kebiasaan, manang taringot halak na asing na disurat di bukku Ulaon ni Apostel.

19. Aha do na porlu taulahon ganup tikki?

¹⁹ Bukku on boi mangurupi hamu lao memeriksa diri. Dang soal nungnga sadia leleng hamu gabe parbarita Harajaon, ganup tikki porlu do hamu mangarimangi muse aha do na uppetting di ngolumuna. Jala songon dia do sikapmuna tu tugas lao marbarita. (2 Kor. 13:5) Sukkun ma dirimuna, ‘Marbarita na uli dope na uppetting di ngolukku songon tikki baru tardidi au? (1 Kor. 7:29-31) Semangat jala pos do rohakku marbarita? (1 Tes. 1:5, 6) Berupaya do au sian nasa tolappu marbarita jala mambahen sisean?’​—Kol. 3:23.

20, 21. Boasa saonari lam penting tugasta lao marbarita, jala aha do tekadta?

²⁰ Sai taingot ma nungnga dilehon tu hita tugas na massai penting, i ma marbarita jala mambahen sisean. Lam penting do tugas on di tikkitta saonari on. Nungnga lam jonok be panutup ni jaman on, jadi otik nai nama tikki. Godang dope akka halak na porlu taurupi asa boi selamat. Memang dang taboto sadia godang nai halak na olo manjalo barita na uli. (Ul. 13:48) Alai tanggung jawabta do lao mangurupi nasida sebelum tarlambat.​—1 Tim. 4:16.

²¹ Jadi massai penting do hita maniru teladan dohot semangat ni akka parbarita Harajaon di abad na parjolo. Molo manat diparsiajari hamu bukku on, gabe lam semangat jala barani ma hamu marbarita. Sai anggiat ma lam balga tekadmuna asa toktong ‘patorakkon taringot Harajaon ni Debata’.​—Ul. 28:23.