1-3. (a) Boha do ceritana umbahen gabe mate si Eutikus? (b) Aha do na diulahon si Paulus, jala sian peristiwa i aha do na taboto taringot ibana?

 MARPUNGU ma si Paulus dohot godang halak di sada kamar parginjang di Troas. Leleng do ibana makkatai tu akka dongan disi alana on nama parpudi sahali ibana rap dohot nasida. Nungnga tonga borngin di tikki i. Godang do dibahen lampu minyak di ruangan i. Gabe lam mohop jala lam sesak ma ruangan i. Alai adong ma doli-doli na margoar si Eutikus hundul di jandela ni ruangan i. Tikki makkatai si Paulus, mondok-ondok ma ibana jala madabu sian tingkat tolu.

² Ala sahalak dokter do si Lukas, ibana do ra na parjolo turun mangida keadaan ni doli-doli i. Tikki diangkat si Eutikus, ‘nga mate be ibana’. (Ul. 20:9) Alai masa do sada mukjizat di tikki i. Manukkap ma si Paulus di atas ni doli-doli i jala dihaol. Didok ma, “Unang pola marsak hamu, nungnga mangolu ibana muse.” (Ul. 20:10) Dipahehe si Paulus ma si Eutikus.

³ Sian peristiwa on, tarida do na diurupi tondi parbadia ni Debata si Paulus. Memang, dang boi disalahon si Paulus alani parmate ni si Eutikus i. Alai dang lomo roha ni si Paulus gabe marsak akka dongan alani parmate ni doli-doli i, manang gabe adong na tersandung. Dipatogu si Paulus ma huria i asa toktong semangat nasida marbarita na uli dung lao ibana. Sian on takkas ma tarida na martanggung jawab do si Paulus. Dang lomo rohana molo gabe mate sasahalak alani ulaonna. Alani i ma didok ibana, “Dang martanggung jawab be au tu parmate ni manang ise pe.” (Ul. 20:26) Saonari tabahas ma songon dia si Paulus gabe teladan di hita taringot on.

4. Peristiwa aha do na baru dialami si Paulus?

⁴ Songon naung tabahas di pasal sebelumna, gabe guttur do akka halak ala marbarita na uli si Paulus di Epesus. Godang do tukkang perak na disi muruk tu ibana. Alana nasida mangalului uttung marhite  paturehon patung Artemis na disomba akka halak. Didok do di Ulaon ni Apostel 20:1, “Dung salpu na gaor i, dijou si Paulus ma akka sisean i. Dipatogu ibana ma nasida jala dipaboa ma na naeng lao nama ibana. Dung i, borhat ma ibana tu Makedonia.”

5, 6. (a) Sadia leleng do si Paulus tinggal di Makedonia, jala aha do na diulahon ibana tu akka dongan na disi? (b) Songon dia do sikap ni si Paulus tu akka dongan sahaporseaonna?

⁵ Tikki di pardalanan naeng tu Makedonia i, so ma si Paulus satokkin di pelabuhan Troas. Berharap do ibana boi pajuppang dohot si Titus, alana sebelumna si Titus lao tu Korint. (2 Kor. 2:12, 13) Alai ala dang marna ro si Titus, borhat ma si Paulus tu Makedonia. Hira-hira sataon ma ibana disi jala “dilehon ibana do akka hata na patoguhon roha ni akka sisean”.  a (Ul. 20:2) Ujungna, ro ma si Titus tu Makedonia mandapotton si Paulus. Dipaboa ibana do na denggan tanggapan ni akka dongan na di Korint tu surat ni si Paulus na parjolo. (2 Kor. 7:5-7) Alani i ma, dibahen si Paulus muse suratna na paduahon tu nasida, i ma surat 2 Korint.

⁶ Songon na disurat si Lukas, kunjungan ni si Paulus tu Epesus dohot Makedonia “patoguhon roha” ni huria na disi. On patuduhon holong hian do  roha ni si Paulus tu nasida. Berbeda do sikap ni si Paulus sian halak Parise na leas mangida akka halak. Alai molo si Paulus dianggap do nasida sude dongan sakarejo ni Debata. (Joh. 7:47-49; 1 Kor. 3:9) Bahkan dipatudu ibana do holong tikki mangalehon sipasingot tu nasida.—2 Kor. 2:4.

7. Songon dia do akka sintua dohot pengawas wilayah maniru teladan ni si Paulus?

⁷ Saonari berupaya do akka sintua di huria dohot pengawas wilayah maniru teladan ni si Paulus. Tujuan ni nasida mangalehon nasehat, lao mangurupi akka dongan do. Berupaya do nasida sapakkilalaan jala dang fokus tu kesalahanna. Sahalak pengawas wilayah na marpengalaman mandok, “Sebenarna lomo hian do roha ni akka dongan mangulahon na sittong, alai dang mura i. Jotjot do nasida khawatir, mabiar, jala merasa dang mampu.” Jadi, porlu do dipatogu akka pengawas halak na makkilala sisongon i.—Heb. 12:12, 13.

8, 9. (a) Boasa dang jadi si Paulus markapal tu Siria? (b) Boasa sogo roha ni halak Jahudi tu si Paulus?

⁸ Dung sian Makedonia, lao ma si Paulus tu Korint. b Saleleng tolu bulan ma ibana tinggal disi. Tikki di Kenkrea, direncanahon ibana do naeng markapal tu Siria. Jala sian i ma ibana naeng lao tu Jerusalem lao mamboan sumbangan tu akka dongan na makkaporluhon. c (Ul. 24:17; Rom 15:25, 26) Alai dang saut rencana i, alana di Ulaon ni Apostel 20:3 didok, “Dibege ibana ma naung dibahen halak Jahudi rencana lao mambunu ibana.”

⁹ Wajar do sogo roha ni halak Jahudi tu si Paulus alana dianggap nasida do ibana murtad. Jala si Krispus pamimpin ni sinagoga na di Korint pe dohot do gabe halak Kristen. (Ul. 18:7, 8; 1 Kor. 1:14) Asing ni i tikki dilaporhon nasida si Paulus tu si Gallio, gubernur ni Akaya i, ditolak do nasida. (Ul. 18:12-17) Jadi ala diboto nasida si Paulus naeng markapal sian Kenkrea, dibahen nasida ma rencana lao mambunu ibana disi. Alai aha do na diulahon si Paulus?

10. Boasa dang jadi si Paulus borhat sian Kenkrea?

¹⁰ Dang jadi si Paulus lewat sian Kenkrea. Gabe lewat sian Makedonia ma ibana asa boi selamat jala asa aman hepeng sumbangan na diboanna i. Memang, pardalanan lewat darat pe berbahaya do. Najolo godang do akka pangarampok di dalan, bahkan penginapan pe dang selalu aman. Alai dipillit si Paulus do pardalanan lewat darat daripada sian Kenkrea asa unang pajuppang ibana dohot akka halak na naeng mambunu ibana i. Dang sahalak ni si Paulus lao, alai didongani si Aristarkus, si Gayus, si Sekundus, si Sopater, si Tikikus, Si Timoteus, dohot si Tropimus do ibana.—Ul. 20:3, 4.

11. Songon dia do halak Kristen saonari maniru Jesus tikki marbarita?

 ¹¹ Songon si Paulus, porlu do hita hati-hati tikki marbarita. Di daerah tertentu dang denggan holan sahalakta marbarita. Porlu do berkelompok manang paling tidak dua halak. Memang ikkon tahadapi do penganiayaan. (Joh. 15:20; 2 Tim. 3:12) Alai molo boi, tahindari ma situasi na berbahaya. Taingot ma contoh ni Jesus. Tikki naeng didangguri akka musu Jesus di Jerusalem, ‘martabuni do Jesus jala lao do ibana sian bagas joro i’. (Joh. 8:59) Jala tikki naeng dibunu halak Jahudi ibana, ‘dang mardalani be Jesus di jolo ni godang halak, di tonga-tonga ni halak Jahudi. Alai, lao ma ibana sian i tu inganan na jonok tu padang gurun’. (Joh. 11:54) Diboto Jesus do na ikkon menghadapi penganiayaan ibana. Alai masuk akkal do ibana. Molo boi dope, dihindari do bahaya. Songon i do tong na diulahon halak Kristen saonari.—Mat. 10:16.

12, 13. (a) Songon dia do perasaan ni akka dongan tikki dipahehe si Eutikus? (b) Aha do na boi menghibur hita molo adong keluargatta na mate?

¹² Marsirang do si Paulus dohot rombonganna i dung dilewati nasida Makedonia. Alai marpungu ma muse nasida di Troas. d Didok di Bibel, “Dung lima ari di pardalanan, pajuppang ma hami dohot nasida di Troas.” e (Ul. 20:6) Disi ma dipahehe si Paulus doli-doli na margoar si Eutikus. Pasti “massai las do roha” ni akka dongan tikki diida nasida mulak mangolu muse si Eutikus.—Ul. 20:12.

¹³ Dang adong be mukjizat sisongon i saonari. Alai ‘massai las do rohatta’ alani harapan haheheon, khususna molo adong keluargatta naung mate. (Joh. 5:28, 29) Memang ala dang sempurna, mate do muse si Eutikus. (Rom 6:23) Alai akka halak na dipahehe di tano na imbaru, boi do mangolu salelengna. Asing ni i dang na lao mate be akka halak na dipahehe lao mamaretta rap dohot Jesus di surgo. (1 Kor. 15:51-53) Jadi dang soal hita bagian sian na dimiahi manang ‘biru-biru na asing’, pasti ‘massai las do rohatta’ alani haheheon.—Joh. 10:16.

14. Aha do na didok si Paulus tu akka sintua sian huria Epesus tikki pajuppang nasida di Miletus?

¹⁴ Lao ma si Paulus dohot akka donganna i sian Troas tu Asos, dung i tu Metilene, tu Kios, tu Samos, dohot tu Miletus. Rencana ni si Paulus nungnga  sahat ibana di Jerusalem tikki perayaan Pentakosta. Alani i ma dipillit ibana kapal na so pola singgah be di Epesus. Alai ala naeng makkatai ibana dohot akka sintua sian huria Epesus, dipangido ibana ma asa pajuppang nasida di Miletus. (Ul. 20:13-17) Dung sahat disi didok si Paulus ma tu nasida, “Takkas do diboto hamu songon dia ngolukku di tonga-tongamuna mulai sian na sahat au di Provinsi Asia on. Mardongan serep ni roha dohot ilu-ilu, songon hatoban do au marhobas tu Tuhan i. Jala godang do hasusaan na ro tu au sian halak Jahudi na jahat. Nang pe songon i, dang hea hutahan dirikku lao paboahon akka na denggan tu hamu. Toktong do huajari hamu di jolo ni godang halak dohot sian jabu tu jabu. Takkas do hupaboa tu halak Jahudi dohot tu halak Junani na ikkon muba nasida, ikkon manomba Debata, jala porsea tu Tuanta Jesus.”—Ul. 20:18-21.

15. Boasa marbarita sian jabu tu jabu cara utama na dipakke Saksi Jahowa lao marbarita?

¹⁵ Saonari pe godang do cara lao marbarita tu godang halak. Songon si Paulus berupaya do hita manjuppangi akka halak manang didia pe, di halte bus, di dalan, manang di pasar. Alai tetap do sian jabu tu jabu cara utama ni Saksi Jahowa marbarita. Boasa? Alana molo marbarita hita sian jabu tu  jabu, lam godang ma kesempatan ni sude halak mambege barita na uli. On patuduhon dang dibeda-bedahon Jahowa manang ise pe. Jala halak na tulus rohana boi mandapot penghiburan sian Bibel na sesuai tu situasina. Marbarita sian jabu tu jabu pe, boi patoguhon haporseaotta jala mambahen hita lam bertekun. Jadi ditanda halak do hita alani semangatta marbarita “di jolo ni godang halak dohot sian jabu tu jabu”.

16, 17. Aha do buktina na barani si Paulus, jala songon dia do halak Kristen saonari maniru ibana?

¹⁶ Dang diboto si Paulus bahaya aha na lao dihadapi ibana di Jerusalem. Jala dipaboa ibana do i tu akka sintua na di Epesus i. Alai didok ibana do, “Nang pe songon i dang penting di au ngolukku, asal ma boi huulahon sude ulaonku jala hupasae ulaon naung hujalo sian Tuan Jesus, i ma paboahon barita na uli taringot tu asi ni roha ni Debata na massai balga i.” (Ul. 20:24) Jadi torus do si Paulus barani marbarita. Dang adong manang aha pe na mangabbati ibana mangulahon i nang pe adong situasi na borat, songon sahit manang paraloan.

¹⁷ Saonari marasing-asing do situasi na dihadapi halak Kristen. Adong do na diorai marbarita jala dianiaya pamaretta. Adong muse na ikkon berjuang menghadapi sahit na parah dohot sahit mental. Akka na poso pe menghadapi godaan sian akka donganna di sikkola. Alai dang soal songon dia situasina, toktong do setia Saksi Jahowa songon si Paulus, jala bertekad do nasida torus “paboahon barita na uli”.

18. Boasa didok si Paulus dang martanggung jawab ibana tu parmate ni manang ise pe, jala aha do na ikkon diulahon akka sintua di Epesus lao maniru ibana?

¹⁸ Dipaboa si Paulus do tu akka sintua na sian Epesus i mungkin on nama parpudi sahali nasida pajuppang. Dung i dilehon si Paulus ma nasehat tu nasida jala dipaboa do na parduli ibana tu nasida. Didok ibana, “Dang martanggung jawab be au tu parmate ni manang ise pe . . . Ai dang hea hutahan dirikku lao paboahon tu hamu sude lomo ni roha ni Debata.” Songon dia ma akka sintua i maniru si Paulus? Didok ibana, “Parrohahon hamu ma dirimuna dohot sude punguan i. Ai marhite tondi parbadia, nungnga dipillit hamu gabe pengawas di nasida. Parmahani hamu ma huria ni Debata, ai nungnga ditobus nasida marhite mudar ni Anakna.” (Ul. 20:26-28) Dipasingot si Paulus do muse na lao ro ma “akka serigala na jahat” tu tonga-tonga ni huria “mangajarhon ajaran na so sittong, asa gabe mandao akka sisean sian punguan i jala mangihutton nasida”. Jadi aha ma na ikkon diulahon akka sintua? Didok si Paulus, “Jaga ma hamu. Jala ingot hamu ma, saleleng tolu taon on torus do huajari hamu ganup marsada-sada arian nang borngin mardongan ilu-ilu.”—Ul. 20:29-31.

19. Aha do na masa di ujung ni abad na parjolo, jala songon dia do i berkembang sahat tu saonari?

 ¹⁹ Di ujung ni abad na parjolo, nungnga ro be “akka serigala na jahat” i. Hira-hira taon 98 M, disurat Apostel Johannes do, “Gariada saonari pe, nungnga godang tarida antikristus i. . . . Ditadikkon nasida do hita, ala dang donganta nasida. Molo donganta do nasida, toktong do nasida rap dohot hita.” (1 Joh. 2:18, 19) Di abad na patoluhon, lam godang ma halak na murtad jala gabe adong ma akka gareja na mangakku Kristen. Di abad na paopatton, diresmihon Kesar Konstantin ma akka gareja i gabe Kristen. Dibahen ibana ma ibadat ni halak kafir gabe bagian sian ibadat ni halak “Kristen”. Jadi memang “ajaran na so sittong” do na diajarhon akka pamimpin agama i. Sahat tu saonari adong dope pengaruh ni akka halak na murtad i. Tarida ma i sian ajaran dohot kebiasaan na diulahon akka halak na mangakku Kristen.

20, 21. Aha do na diulahon si Paulus asa boi mangurupi huria, jala songon dia do akka sintua maniru ibana?

²⁰ Di pudian ni ari, adong do akka halak na mambuat uttung sian akka dongan di huria. Alai dang songon i si Paulus. Kerja keras do ibana memenuhi kebutuhanna asa unang gabe beban tu huria. Jadi karejo pe si Paulus lao mangurupi akka dongan do, dang asa mamora. Dijujui ibana do akka sintua na di Epesus i asa maniru semangatna na rela berkorban. Didok ibana, “Ikkon urupanmuna do na gale. Ingot hamu ma hata ni Tuan Jesus na mandok, ‘Umlas do roha ni halak na mangalehon sian na manjalo.’”—Ul. 20:35.

²¹ Songon si Paulus, rela berkorban do akka sintua, dang songon pamimpin ni gareja na mambuat uttung sian akka jemaatna. Alai anggo akka sintua on, martanggung jawab do nasida mangurus “huria ni Debata” jala dang dibuat uttung sian i. Dang adong gunana marginjang ni roha manang bersaing di huria alana dang na lao marhasil akka halak na “pasangappon diri sandiri”. (Poda 25:27) Jala marlea do akka siginjang roha.—Poda 11:2.

22. Aha do na mambahen holong roha ni akka sintua na di Epesus tu si Paulus?

²² Ala tulus do roha ni si Paulus mangurupi akka dongan, gabe holong ma roha ni nasida tu ibana. Alani i ma tikki naeng borhat ibana, “tangis ma nasida sude, dihaol, jala diumma nasida ma si Paulus”. (Ul. 20:37, 38) Saonari pe massai taargai do akka dongan na rela berkorban songon si Paulus. Dilehon nasida do tikki, arta, dohot gogo lao mangurupi akka dongan di huria. Gabe sitiruon do si Paulus di hita, alani i cocok do ibana mandok, “Dang martanggung jawab be au tu parmate ni manang ise pe.”—Ul. 20:26.