PASAL 20
Lam Rarat do Hata i nang pe Adong Penganiayaan
Na diulahon si Apollos dohot si Paulus asa lam rarat barita na uli
Dibuat sian Ulaon ni Apostel 18:23–19:41
1, 2. (a) Tantangan aha do na diadopi si Paulus dohot akka donganna di Epesus? (b) Aha do na lao tabahas di pasal on?
BIDANG do dalan di Epesus, godang do toko disi, jala godang do halak mardalan sian i. Di tikki i gaor hian do situasi di Epesus, marlarian do akka halak di dalan. Marpungu ma akka halak na muruk jala dibahen ma guttur kota i. Adong dua dongan ni si Paulus na ditakkup jala disarat nasida. Lao do akka halak na muruk i tu amfiteater na balga na di kota i, siat do disi 25.000 halak. Godang do na so mamboto boasa masa hagutturon i. Alai curiga do nasida molo parsoalan on berkaitan tu kuil dohot dewi Artemis na disomba nasida. Alani i mulai ma gogo didok nasida, “Dipuji ma Artemis, debata ni halak Epesus!”—Ul. 19:34.
2 Dipakke Sibolis do cara kekerasan lao pasohon ulaon marbarita. Memang dang holan on cara na dipakke ibana. Di pasal on tabahas ma piga-piga taktik ni Sibolis lao pasohon ulaonta marbarita jala mambahen halak Kristen asa unang marsada. Alai na uppetting taida ma annon, gagal do sude taktikna i. “Alani huaso ni Jahowa, lam rarat ma hata i jala lam balga ma labana tu akka jolma.” (Ul. 19:20) Boasa dang mampan taktik ni Sibolis i? Ala Jahowa do na mangurupi nasida, sarupa songon hita saonari. Alai tetap do ikkon taihutton petunjuk na dilehon. Boi do tondi parbadia mangurupi hita patuduhon akka sifat na denggan asa marhasil hita di ulaon marbarita. Na parjolo, tabahas ma sitiruon sian si Apollos.
“Godang do Diboto Ibana Taringot tu Surat na Badia” (Ul. 18:24-28)
3, 4. Aha do na hurang diida si Akuila dohot si Priskilla sian si Apollos, jala aha do na diulahon nasida?
3 Di pardalanan utusan injil ni si Paulus na patoluhon, borhat ma ibana tu Epesus. Nungnga parjolo sahat si Apollos di kota i. Halak Jahudi do ibana, alai asalna sian Kota Aleksanderia na di Mesir. Godang do kelebihan ni si Apollos. Malo do ibana makkatai, jala “godang do diboto ibana taringot tu Surat na Badia”. Asing ni i, “diurupi tondi parbadia do ibana jala songon api na marsigorgor” do semangatna. Barani do ibana makkatai di jolo ni halak Jahudi na di sinagoga.—Ul. 18:24, 25.
4 Disi do si Akuila dohot si Priskilla tikki na makkatai i si Apollos. Las do roha ni nasida mambege i ala “sittong do sude na diajarhon ibana taringot tu Jesus. Alai holan pandidion ni si Johannes dope na takkas diboto ibana”. Jadi diboto si Akuila dohot si Priskilla do, adong dope ajaran na penting na so diboto ibana. Nang pe si Akuila dohot si Priskilla dang timbo sikkolana jala holan mambahen tenda karejona, dang mabiar nasida manang maila lao makkatai tu si Apollos. Justru “ditogihon nasida ma ibana makkatai . . . Dipatorang nasida ma dalan ni Debata tu ibana asa lam takkas diattusi ibana”. (Ul. 18:25, 26) Boha do tanggapan ni si Apollos? Dipatuduhon ibana do sifat na massai penting di halak Kristen, i ma serep ni roha manang rendah hati.
5, 6. Aha do na mambahen si Apollos lam marguna di jolo ni Jahowa, jala aha do na boi tatiru sian ibana?
5 Ala olo si Apollos diurupi si Akuila dohot si Priskilla, gabe lam marguna ma ibana di Jahowa. Lao ma ibana tu Akaya, “godang do diurupi” ibana halak Kristen na disi. Godang do halak Jahudi na disi na mandok, molo Jesus i dang Messias na dijanjihon. Alai si Lukas manurat, “Barani do [si Apollos] patuduhon di jolo ni godang halak na sala ajaran ni halak Jahudi i. Dipatuduhon ibana do takkas marhite Surat na Badia, Jesus i do Kristus.” (Ul. 18:27, 28) Pasti massai denggan do pengaruh ni si Apollos tu akka huria. Gabe lam rarat do ‘hata ni Jahowa’. Aha ma na boi tatiru sian ibana?
6 Sude do halak Kristen porlu patuduhon serep ni roha. Marasing-asing do kemampuanta. Adong do naung berbakat sian mulai tubu, lebih berpengalaman, manang unggodang parbinotoanna. Alai dang soal sadia balga kelebihanta, uppetting do serep ni roha. Molo dang serep rohatta, boi do gabe hancur hita. Boi do kelebihanta i mambahen tubu ginjang ni roha, sarupa songon suan-suanan na marraccun na tubu di tano na subur. (1 Kor. 4:7; Jak. 4:6) Molo rendah hati, taanggap do halak na asing untimbo sian hita. (Plp. 2:3) Dang kesal hita tikki dipasingot, manang sogo rohatta molo diajari. Dang olo hita berkeras tu pandapotta sandiri, ala pos do rohatta pasti diurupi tondi parbadia do organisasina mandapot petunjuk na sittong. Molo tetap rendah hati, pakkeon ni Jahowa dohot Anakna ma hita mangulahon lomo ni rohana.—Luk. 1:51, 52.
7. Songon dia do si Paulus dohot si Apollos gabe sitiruon tu hita?
7 Molo rendah hati, dang olo hita bersaing dohot na asing. Songon na masa di huria di abad na parjolo, berupaya do Sibolis mambahen nasida dang marsada. Taboto do halak na malo si Apollos dohot Apostel Paulus. Seandaina bersaing nasida boi do i manegai huria. Sebenarna mura do i terjadi, alana adong do halak Kristen di Korint na mulai mandok, “Sisean ni si Paulus do au.” Na deba mandok, “Sisean ni si Apollos do au.” Na dijujui si Paulus dohot si Apollos do nasida asa songon i? Daong. Rendah hati do si Paulus. Diakkui ibana do na massai balga peran ni si Apollos tu ulaon marbarita. Dilehon si Paulus do godang tanggung jawab tu si Apollos. Jala si Apollos pe rade do mangihutton petunjuk sian si Paulus. (1 Kor. 1:10-12; 3:6, 9; Tit. 3:12, 13) Ala serep do roha ni nasida na dua jala torus kerja sama, gabe sitiruon do nasida tu hita.
“Marsitutu Paposson Roha ni Nasida Taringot tu Harajaon ni Debata” (Ul. 18:23; 19:1-10)
8. Dalan na dia do na dipillit si Paulus tikki naeng mulak muse ibana tu Epesus, jala boasa?
8 Nungnga marjanji si Paulus lao mulak muse tu Epesus, jala ditepati do janjina i. a (Ul. 18:20, 21) Alai, boha do carana mulak tusi? Nungnga di Antiokia Siria ibana, jadi boi hian do dipillit dalan na unjonok tusi, i ma langsung markapal sian Seleukia tu Epesus. Alai dang i dalan na dipillit ibana, justru didalani ibana do “akka huta na dao sian kota” sebelum sahat di Epesus. Menurut perkiraan, pardalanan ni si Paulus on boi do sappe marribu kilometer! Jala disurat do pardalananna on di Ulaon ni Apostel 18:23 dohot 19:1. Boasa dalan i dipillit si Paulus? Tujuanna asa boi ‘dipatogu ibana sude sisean na adong disi’. (Ul. 18:23) Sarupa songon pardalanan utusan injilna na parjolo dohot na paduahon, godang do pengorbanan na ikkon dibahen ibana, alai dang sia-sia i sude. Songon i do semangat na dipatudu pengawas wilayah dohot istri ni nasida saonari. Diargai hamu do holong dohot pengorbanan ni nasida?
9. Boasa ikkon tardidi muse akka sisean i, jala aha do na boi tatiru sian nasida?
9 Dung sahat si Paulus di Epesus, pajuppang ma ibana dohot akka sisean ni si Johannes Pandidi, hira-hira 12 halak. Jala mangihutton pandidion ni si Johannes do nasida tardidi. Hape dang marlakku be pengaturan i. Asing ni i, holan saotik do na diboto nasida taringot tondi parbadia, manang dang diboto dope sama sekali. Jadi dipaboa si Paulus ma tu nasida petunjuk terbaru. Rendah hati do nasida songon si Apollos, lomo do rohana marsiajar. Dung tardidi di bagasan goar ni Jesus, dijalo nasida ma tondi parbadia jala boi ma nasida mambahen mukjizat. Sian on taboto ma, molo taihutton petunjuk na terbaru sian organisasi ni Jahowa, pasti godang do tajalo pasu-pasu.—Ul. 19:1-7.
10. Boasa gabe pinda si Paulus sian sinagoga tu auditorium, jala aha do na boi tatiru sian ibana?
10 Saleleng tolu bulan, barani do si Paulus torus marbarita tu akka halak di sinagoga. Ibana “marsitutu paposson roha ni nasida taringot tu Harajaon ni Debata”. Alai, adong do piga-piga halak na jogal rohana jala marsogo ni roha tu barita i. “Diissaki nasida do Dalan ni Tuan i”, ujungna ditinggalhon si Paulus ma nasida. Lao ma ibana marbarita tu auditorium ni sikkola. (Ul. 19:8, 9) Jadi molo adong halak na sian sinagoga i naeng mambege barita na uli, ikkon ro do nasida tu auditorium i. Songon si Paulus, tikki marbarita dang olo hita pahabisson tikki lao berdebat, manang makkatai tu halak na so olo manjalo barita na uli. Ai godang dope na porlu mambege i.
11, 12. (a) Aha do buktina na kerja keras si Paulus tikki marbarita? (b) Songon dia do Saksi Jahowa saonari maniru si Paulus?
11 Mungkin tiap ari do si Paulus makkatai di auditorium i, hira-hira mulai sian jam 11.00 siang sappe jam 4.00 sore. (Ida keterangan tambahan sian nwtsty-IN di Ul. 19:9.) Di jam sisongon i do godang halak dang sibuk, ala istirahat karejo lao mangan. Alai biasana mohop do ari. Bayakkon ma molo tiap ari songon i si Paulus marbarita saleleng dua taon. Berarti lobi sian 3.000 jom ma ibana marbarita. b Alani i ma lam rarat hata ni Jahowa tu godang halak. Kerja keras do ibana jala malo mangatur tikkina. Disesuaihon do jadwalna asa boi marbarita di tikki na cocok tu akka halak na disi. Hasilna, “sude ma halak na di Provinsi Asia mambege hata ni Tuhan i dohot ma i halak Jahudi nang halak Junani”. (Ul. 19:10) Benar-benar diupayahon ibana do marbarita tu sude halak.
Berupaya do hita mamakke marragam cara asa boi marbarita tu akka halak
12 Saonari pe, kerja keras do Saksi Jahowa jala disesuaihon do waktuna lao marbarita. Berupaya do nasida manjuppangi akka halak didia pe jala sadihari pe. Marbarita do hita di dalan, di pasar, dohot di tempat parkir. Marbarita do hita lewat telepon dohot surat. Jala tikki marbarita sian jabu tu jabu, berupaya do hita manjuppangi akka halak tikki di jabu nasida.
“Lam Rarat” do Hata ni Debata nang pe Adong Suru-suruan na Jahat (Ul. 19:11-22)
13, 14. (a) Aha do na dipatuduhon Jahowa marhite si Paulus? (b) Aha do ulaon na sala na dibahen anak ni si Sikewa, jala songon dia do cara marpikkir ni akka halak saonari?
13 Sian surat ni si Lukas, tarida do na marhasil si Paulus di ulaon marbarita. Apalagi sai dipatuduhon Debata do “akka tanda halongangan na massai balga” marhite ibana. Ai holan sapu tangan manang pakkean naung dipakke si Paulus pe dibahen tu akka na marsahit, malum do nasida. Bahkan kaluar do suru-suruan na jahat i sian akka jolma. c (Ul. 19:11, 12) Alani akka mukjizat on, godang do halak tertarik manangihon barita na uli, alai dang sude denggan tanggapanna.
14 Di tikki i, “adong do halak Jahudi na markaliling tu akka huta lao palaohon akka suru-suruan na jahat”. Naeng ditiru nasida do mukjizat ni si Paulus. Dicoba do palaohon i mamakke goar ni Tuan Jesus. Dipaboa si Lukas do ise nasida, i ma pitu anak ni si Sikewa. Keluarga ni malim do nasida. Didok suru-suruan na jahat i ma tu nasida, “Hutanda do Jesus, hutanda do si Paulus, alai ise do hamu?” Diserang halak na disonggopi suru-suruan na jahat i ma nasida. Mangakkat ma ibana songon binatang buas, diranggut ma nasida, gabe lari ma nasida ala nungnga lukka jala telanjang. (Ul. 19:13-16) Pasti lam rarat ma ‘hata ni Jahowa’ alani na masa i. Ai gabe takkas ma diida halak na berbeda huaso na dilehon tu si Paulus dohot huaso na dipakke akka pamimpin agama na so sittong i. Saonari pe godang do cara marpikkir ni halak na sala. Didok do nungnga cukkup be holan manjou goar ni Jesus, manang mangakku dirina “halak Kristen”. Alai Jesus mandok, holan na mangulahon lomo ni roha ni Damang i do na boi mangolu salelengna.—Mat. 7:21-23.
15. Songon dia do hita boi maniru halak Kristen na di Epesus?
15 Godang do halak mamboto peristiwa na masa tu anak ni si Sikewa i. Hasilna, godang ma na gabe halak Kristen, jala ditinggalhon nasida ma akka ulaon spiritisme. Terkenal do halak na di Epesus mamakke ilmu gaib. Sering do dipakke nasida jimat dohot jampi-jampi, jotjot do i dibahen dalam bentuk tulisan. Alai dung na masa i, taronjar ma roha ni halak Epesus mambuat sude bukku ilmu gaib ni nasida, jala dibakkar ma i di jolo ni godang halak. Molo dietong mamakke nilai ni hepeng saonari, marpulu ribu dolar ma arga ni akka bukku i. d Si Lukas manurat, “Alani huaso ni Jahowa, lam rarat ma hata i jala lam balga ma labana tu akka jolma.” (Ul. 19:17-20) Takkas ma massai balga do huaso ni Jahowa jala dang marlapatan akka ilmu gaib i. Sitiruon na denggan do halak Kristen na setia na di Epesus i. Saonari pe godang do ulaon spiritisme, jadi molo adong barangta na berkaitan tusi, tatiru ma halak Epesus, tabolokkon ma i dang soal sadia argana. Tapadao ma diritta sian ulaon sisongon i.
“Godang ma Halak na Gaor” (Ul. 19:23-41)
“Hamu akka dongan, takkas do diboto hamu sian on do ro godang hepengta.”—Ulaon ni Apostel 19:25
16, 17. (a) Songon dia do si Demetrius mempengaruhi pikkiran ni akka halak di Epesus? (b) Aha do buktina na fanatik halak Epesus tu agamana?
16 Saonari tabahas ma taktik ni Sibolis na disurat si Lukas. Didok, “Godang ma halak na gaor alani Dalan ni Tuan i.” Dang na palobihu hatana i. e (Ul. 19:23) Si Demetrius, sahalak tukkang perak do na parjolo mambahen masalah on. Berupaya do ibana mempengaruhi pikkiran ni tukkang perak na asing. Didok ibana ma, “Sian [akka patung] on do ro godang hepengta.” Dipaboa si Demetrius ma molo barita ni si Paulus i mambahen rugi bisnis ni nasida, alana dang manomba patung halak Kristen. Dijujui ibana do muse asa bangga nasida gabe halak Epesus, jala ikkon dipartahatton do dewi Artemis dohot kuilna i ala i do na disomba sude jolma di portibi on. Jadi si Demetrius mandok molo porsea akka halak tu si Paulus, gabe ‘dang marguna’ be i.—Ul. 19:24-27.
17 Marhasil do si Demetrius, gabe muruk do akka tukkang perak i. Marsurak ma nasida mandok, “Dipuji ma Artemis, debata ni halak Epesus!” Gabe gaor ma kota i. Marpungu ma godang halak, songon na diceritahon di bagian awal ni pasal on. f Ala barani jala rela berkorban do si Paulus, naeng ro do ibana tu amfiteater lao makkatai tu nasida. Alai marsitutu do akka sisean mangorai ibana lao tusi. Ro ma sahalak bawa na margoar si Aleksander. Jongjong ma ibana di jolo ni akka jolma i, berupaya do ibana makkatai tu nasida. Ala halak Jahudi do ibana, mungkin naeng dipatorang ibana do aha beda ni halak Jahudi dohot halak Kristen. Alai dang parduli akka jolma na mangamuk i tu hatana i. Ai dung diboto nasida ibana halak Jahudi, disuru do ibana turun jala didok nasida ma gogo, “Dipuji ma Artemis, debata ni halak Epesus!” Mulak-ulak ma i didok nasida saleleng dua jom. Saonari pe, godang do halak na fanatik tu agamana, bahkan sappe dang masuk akkal tindakanna.—Ul. 19:28-34.
18, 19. (a) Songon dia do pejabat ni kota i boi marhasil mambahen tenang halak na gaor i? (b) Songon dia do pejabat ni pamaretta saonari sipata melindungi naposo ni Jahowa, jala aha do na ikkon taulahon?
18 Ujungna, marhasil ma sahalak pejabat na massai sangap di kota i mambahen tenang jolma na gaor i. Malo do ibana, diboto do paposson roha ni akka jolma i. Didok ibana ma tu halak Epesus i na so tarancam kuil dohot dewi Artemis ni nasida dibahen halak Kristen. Dipaboa do na so adong ulaon na jahat dibahen si Paulus dohot akka donganna tu kuil ni Artemis i, jala molo terjadi pe i, adong do peraturan na dibahen pamaretta lao pasaehon i. Dipasingot do muse halak Epesus i, na boi nasida dituntut ala nungnga mambahen guttur kota i, jala tindakanna i dang sesuai tu hukum ni halak Rom. Ujungna, bubar ma nasida. Mambege hata ni pejabat i, pittor hatop do nasida tenang, songon hatop ni nasida muruk.—Ul. 19:35-41.
19 Dang holan sahali on adong pejabat na marbisuk melindungi akka sisean ni Jesus. Hea do Apostel Johannes mandapot parnidaan taringot na terjadi saleleng ari parpudi on. Di parnidaan i adong do tano na manggombarhon bagian sian pamarettaon ni portibi on na mamboddut sunge, na manggombarhon penganiayaan ni Sibolis tu sisean ni Jesus. (Pgk. 12:15, 16) Tutu do on terjadi. Di godang kasus, taronjar do roha ni hakim lao melindungi hak ni Saksi Jahowa beribadat dohot marbarita na uli. Tottu berpengaruh do pangalahotta tu hasil keputusan i. Pangalaho ni si Paulus na denggan mambahen ibana direspek piga-piga pejabat di Epesus, jala gabe taronjar roha ni nasida melindungi ibana. (Ul. 19:31) Jadi parohon na denggan do molo berupaya hita jujur jala mangargai manang ise pe na tajuppangi. Ai dang taboto sadia balga pengaruhna.
20. (a) Songon dia do perasaanmuna tikki diida hamu lam rarat hata ni Debata di abad na parjolo dohot saonari on? (b) Aha do na ikkon diulahon hamu asa lam rarat hata ni Jahowa i?
20 Pasti longang do rohatta tikki taida songon dia huaso ni Jahowa mambahen ‘lam rarat hatana jala lam marlaba’ tu godang halak di abad na parjolo. Apalagi saonari, taida do songon dia Jahowa mambahen lam rarat hatana i. Lomo do rohamuna terlibat tu tugas na istimewa on? Dang soal sadia godang na boi taulahon, marsiajar ma hita sian akka contoh naung tabahas i. Tetap ma rendah hati, jala torus ma taihutton petunjuk na dibahen organisasi ni Jahowa. Torus ma hita kerja keras, tapadao ma ulaon spiritisme. Tabahen ma sian nasa tolapta lao marbarita na uli. Berupaya ma hita tetap jujur jala mangargai sude halak na tajuppangi.
a Ida ma kotak “ Epesus—Ibukota ni Asia”.
b Di Epesus do muse disurat si Paulus surat 1 Korint.
c Mungkin sapu tangan na nidokna dison, i ma kain na diikkat si Paulus di uluna manang di dahina, asa unang maneteki karingatna tu matana. Jala pakkean na nidokna dison bisa jadi celemek na dipakke si Paulus tikki karejo mambahen tenda, biasana pagi-pagi do dikarejohon ibana i.—Ul. 20:34, 35.
d Dipaboa si Lukas do nilaina, sekitar 50.000 hepeng perak. Molo hepeng dinar do i, berarti sarupa ma on tu gaji karejo 50.000 ari, manang hira-hira saleleng 137 taon, i pe molo karejo pitu ari di bagasan saminggu.
e Adong na mandok mungkin alani peristiwa on do umbahen didok si Paulus tu halak Korint, “Dang hurippu hami be boi hami mangolu.” (2 Kor. 1:8) Alai boi do peristiwa na asing na dipaboa si Paulus dison. Tikki disurat si Paulus, ‘Hualo do akka binatang buas na di Epesus’, bisa jadi tutu do ibana mangalo akka binatang buas di stadion, manang holan tudosan do i na manggombarhon akka halak na marsogo ni roha tu ibana.—1 Kor. 15:32.
f Massai kuat do hubungan ni kelompok ni tukkang perak i. Hira-hira saabad dukkon i, terjadi do hagutturon na sarupa di Epesus dibahen kelompok ni tukkang roti. Jadi massai kuat do hubungan ni nasida.
