PASAL 23
“Tangihon Hamu ma jo Hatorangankon”
Si Paulus mambela haporseaonna di jolo ni godang halak na muruk dohot di jolo ni Sanhedrin
Dibuat sian Ulaon ni Apostel 21:18–23:10
1, 2. Aha do tujuan ni si Paulus tu Jerusalem, jala aha do na lao dihadapi ibana disi?
LAO ma si Paulus tu akka dalan na di Jerusalem. Sada kota na bersejarah do Jerusalem di naposo ni Debata. Hampir sude do penduduk ni kota on bangga tu Jerusalem alani keistimewaanna, termasuk halak Kristen. Ujungna dang diihutton nasida be petunjuk ni Jahowa na terbaru. Jadi si Paulus mangida dang holan di parhepengon nasida porlu diurupi, alai hubungan ni nasida tu Jahowa pe porlu do dipadenggan. Alani i ma tikki di Epesus si Paulus, nga direncanahon ibana naeng ro muse tu Jerusalem. (Ul. 19:21) Nang pe diboto si Paulus na lao tarancam ngoluna disi, alai tetap do ibana ro tu Jerusalem.
2 Aha do na dihadapi si Paulus di Jerusalem? Targanggu do roha ni akka dongan di huria alani barita na so tutu taringot ibana. Asing ni i, ro do tantangan na balga sian akka musu ni Kristus. Ditudu do si Paulus mangulahon na jahat, dipukkuli do ibana, jala diancam lao dipamate. Nang pe borat situasina, dipakke si Paulus do kesempatan i patorakkon hasittongan. Rendah hati do ibana, barani, jala togu do haporseaonna tikki makkatai di jolo ni godang halak. Gabe sitiruon do on tu hita.
“Dipuji Nasida ma Debata” (Ul. 21:18-20a)
3-5. (a) Ise do na dijuppangi si Paulus dung sahat di Jerusalem, jala aha do na diceritahon ibana? (b) Songon dia do perasaan ni akka halak mambege cerita ni si Paulus, jala aha do na boi taparsiajari sian i?
3 Sadari dung sahat si Paulus di Jerusalem, lao ma ibana dohot akka donganna manjuppangi akka sintua. Tikki i, dang adong dipaboa goar ni apostel. Mungkin nga lao nasida sude melayani tu negara na asing. Alai disi dope si Jakobus anggi ni Jesus. (Gal. 2:9) Si Jakobus do ra na mamimpin rapat tikki ro si Paulus, jala dohot do “sude sintua” di rapat i.—Ul. 21:18.
4 Dijalang si Paulus ma akka sintua i. Dung i, “diceritahon ibana ma takkas tu nasida akka naung dibahen Debata di tonga-tonga ni bangso na asing marhite ulaonna marbarita”. (Ul. 21:19) Pasti las do roha ni nasida mambege i. Saonari pe las do rohatta mambege laporan na denggan taringot ulaon marbarita di liat portibi on.—Poda 25:25.
5 Pasti dipaboa si Paulus do taringot sumbangan na dilehon akka huria na di Eropa. Dung diboto nasida balga ni holong ni akka dongan i, gabe tersentuh ma nasida. Ujungna, “dipuji [akka sintua i] ma Debata”. (Ul. 21:20a) Saonari on godang do donganta na hona bencana alam manang marsahit na posi. Tersentuh do roha ni nasida manjalo bantuan dohot hata na patoguhon roha.
Godang Dope na “Mangihutton Patik i” (Ul. 21:20b, 21)
6. Masalah aha do na dipaboa akka sintua i tu si Paulus?
6 Dipaboa akka sintua i ma tu si Paulus na adong masalah di Judea berkaitan tu ibana. Nasida mandok, “Ale Paulus, dongannami, nungnga diida ho be songon dia marribu halak Jahudi gabe porsea jala sian nasa rohana do nasida mangihutton Patik i. Alai songon on do barita naung dibege nasida taringot tu ho, ‘Diajarhon si Paulus do tu sude halak Jahudi na tinggal di tonga-tonga ni bangso na asing asa unang diulahon nasida patik ni si Musa. Diajarhon ibana do muse asa unang disunat anakkon ni nasida, jala asa unang diihutton nasida adat naung diulahon sian najolo.’” a—Ul. 21:20b, 21.
7, 8. (a) Songon dia do cara pandang ni godang halak Kristen Jahudi tu Patik ni si Musa? (b) Boi dope nasida memenuhi syarat gabe halak Kristen nang pe sala cara marpikkirna?
7 Nungnga lobi sian 20 taon dang marlakku be Patik ni si Musa. Attong boasa godang dope halak Kristen na mangihutton i? (Kol. 2:14) Taon 49 M rapat do akka apostel dohot akka sintua di Jerusalem. Dikirim nasida ma surat tu akka huria. Dipaboa ma na so porlu be disunat halak Kristen na sian bangso na asing, jala dang porlu be didalatton Patik ni si Musa. (Ul. 15:23-29) Alai ala dang adong dipaboa di surat i taringot halak Kristen Jahudi, godang do sian nasida na so mamboto dang marlakku be Patik ni si Musa.
8 Jadi sala paham do halak Jahudi tu isi ni surat i. Attong boi dope nasida tetap gabe halak Kristen? Boi. Alana nasida dang songon halak na manomba dewa-dewi jala na torus mangulahon kebiasaan agama ni nasida na sebelumna. Asing ni i, Jahowa do na mangalehon Patik ni si Musa, jadi dang adong na sala sian isi ni Patik i. Alai Patik ni si Musa berkaitan tu parjanjian ni Jahowa dohot halak Israel najolo. Hape halak Kristen dang mangihutton parjanjian i be, alai parjanjian na imbaru nama. Jadi dang adong be gunana mangihutton Patik ni si Musa. On ma na hurang diattusi halak Kristen Jahudi i, jala on patuduhon hurang do pos ni roha ni nasida tu huria Kristen. Alani i, porlu do disesuaihon nasida cara marpikkirna tu pemahaman na terbaru taringot hasittongan. b—Jer. 31:31-34; Luk. 22:20.
“Na So Tutu Barita na Dibege Nasida” (Ul. 21:22-26)
9. Aha do na diajarhon si Paulus taringot Patik ni si Musa?
9 Ditudu do si Paulus mangajarhon tu sude halak Jahudi na tinggal di tonga-tonga ni bangso na asing “asa unang disunat anakkon ni nasida, jala asa unang diihutton nasida adat naung diulahon sian najolo”. Boasa sappe adong barita i? Tikki i, si Paulus do apostel na dipillit marbarita tu akka bangso na asing. Jadi ibana ma na paboahon molo naeng gabe halak Kristen halak na so Jahudi, dang porlu be nasida mandalatton Patik. Didok ibana do muse, sala do molo adong na mamaksa halak Kristen na so Jahudi asa disunat lao mambuktihon na dioloi nasida Patik ni si Musa. (Gal. 5:1-7) Marbarita do tong si Paulus tu halak Jahudi di akka kota na dikunjungi ibana. Dipatorang do tu nasida molo hamatean ni Jesus mambahen dang marlakku be Patik ni si Musa, jala marhite haporseaon do sasahalak didok mangulahon na sittong, dang ala mandalatton Patik.—Rom 2:28, 29; 3:21-26.
10. Songon dia do si Paulus patuduhon na seimbang pandanganna taringot Patik ni si Musa dohot sunat?
10 Nang pe songon i, dang dihakimi si Paulus akka halak na tetap mandalatton piga-piga kebiasaan ni halak Jahudi. Misalna dang karejo di ari Sabat, manang dang mangallang sipanganon na diorai di Patik ni si Musa. (Rom 14:1-6) Jala dang adong dibahen ibana aturan taringot sunat. Justru disuru do si Timoteus disunat asa unang curiga halak Jahudi tu ibana ala halak Junani bapakna. (Ul. 16:3) Jadi keputusan pribadi do taringot disunat. Hea do didok ibana tu halak Galatia, “Dang rikkot disunat manang na dang. Alai haporseaon na dipatudu marhite holong i do na urrikkot.” (Gal. 5:6) Jadi molo adong halak na mandok ikkon disunat do sasahalak asa boi mandalatton Patik jala asa las roha ni Jahowa, dang toho i. Justru i patuduhon na hurang do haporseaonna.
11. Aha do saran ni akka sintua tu si Paulus, jala aha do na berkaitan tu ulaon i? (Ida surat na di toru.)
11 Nang pe dang sittong barita i, tetap do marsak halak Jahudi mambege i. Alani i ma dilean akka sintua saran tu si Paulus, “Adong do dison opat halak bawa naung mambahen sada janji tu Debata. Lao ma ho rap dohot nasida, ulahon hamu ma ulaon paiasson diri jala garar ma na porlu di nasida, asa digusting nasida obuk ni nasida. Dung i diboto sude halak ma na so tutu barita na dibege nasida taringot tu ho, ai diihutton ho do na di Patik i.” c—Ul. 21:23, 24.
12. Songon dia do si Paulus patuduhon na olo ibana kerja sama jala mangihutton saran ni akka sintua na di Jerusalem?
12 Boi hian do didok si Paulus, dang akka barita taringot ibana na gabe parsoalan, alai cara pandang ni halak Jahudi tu Patik i do. Nang pe songon i, saleleng dang adong prinsip ni Debata na dilanggar, olo do ibana mangihutton saran ni akka sintua i. Sebelumna hea do disurat ibana songon on, “Nang pe dang huihutton Patik ni si Musa, alai molo rap au dohot halak na mangihutton patik i, gabe songon halak na mangihutton patik i ma au, asa boi huurupi nasida.” (1 Kor. 9:20) Kerja sama do si Paulus dohot akka sintua di Jerusalem. Olo do ibana gabe songon “halak na mangihutton patik”. Teladan na denggan do on di hita saonari. Ikkon rade do hita kerja sama dohot akka sintua jala unang ma tapaksahon keinginatta.—Heb. 13:17.
Molo dang adong prinsip ni Bibel na dilanggar, mengalah do si Paulus. Songon i do hamu?
“Dang Loason Mangolu Jolma Sisongon on!” (Ul. 21:27–22:30)
13. (a) Aha do na mambahen gabe guttur di bagas joro? (b) Boasa boi selamat si Paulus?
13 Dung naeng sae ulaon paiasson diri i, diida halak Jahudi na sian Provinsi Asia ma si Paulus di bagas joro. Ditudu ma ibana mamboan halak na so Jahudi tu bagas joro. Dung i dihasut ma akka halak asa mambahen hagutturon disi. Molo dang ro hian komandan tentara ni Rom, pasti nga mate si Paulus dipukkuli. Gabe ditahan komandan i ma si Paulus, jala opat taon dukkon i pe baru dibebasson ibana. Tikki disukkun komandan i tu halak Jahudi boasa diserang nasida si Paulus, marsurak ma akka jolma i. Adong na mandok songon on, na deba mandok songon an. Alani gaorna, gabe so diboto komandan i be aha sasittongna na masa. Alani i diboan ma si Paulus tu markas ni tentara i. Tikki naeng masuk tu markas i didok si Paulus ma, “Paloas ma jo au makkatai tu akka jolma i.” (Ul. 21:39) Dipaloas komandan i do, jala barani do si Paulus mambela haporseaonna.
14, 15. (a) Aha do na dipatorang si Paulus tu halak Jahudi? (b) Aha do na diulahon komandan tentara i lao mamboto alasan ni halak Jahudi menyerang si Paulus?
14 Makkatai ma si Paulus di bahasa Heber, gabe sip ma akka jolma i. Didok ma, “Tangihon hamu ma jo hatorangankon.” (Ul. 22:1) Dipatorang si Paulus ma songon dia ibana gabe sisean ni Kristus. Takkas do i diboto piga-piga halak Jahudi na disi. Dipaboa ibana do na hea ibana diajari si Gamaliel, guru na sangap i. Dianiaya ibana do siihutton Kristus. Alai tikki lao ibana dohot akka donganna tu Damaskus, mandapot parnidaan ma ibana sian Kristus naung dipahehe, jala makkatai ma Kristus tu ibana. Diida akka donganna i do adong cahaya sian langit. Holan soara do na dibege nasida, alai dang diattusi lapatanna. (Ida keterangan tambahan sian nwtsty-IN di Ul. 9:7; 22:9.) Alani i gabe buta ma si Paulus, jala ikkon ditogu-togu akka donganna tu Damaskus. Pajuppang ma ibana disi dohot si Ananias, sahalak Jahudi, jala dipamalum ma si Paulus marhite mukjizat.
15 Dipaboa si Paulus ma muse, dung mulak ibana tu Jerusalem mandapot parnidaan ma ibana sian Jesus di bagas joro. Mambege i gabe muruk ma halak Jahudi, jala marsurak ma nasida, “Pamate ma ibana! Dang loason mangolu jolma sisongon on!” (Ul. 22:22) Lao menyelamatton si Paulus, disuru komandan tentara i ma diboan si Paulus tu markas. Disuru ma muse asa disukkuni nasida si Paulus huhut dilissingi, asa diboto komandan i alani aha ibana ikkon dipamate. Alai ala warga negara Rom do si Paulus, dipangido ibana ma perlindungan hukum. Jadi marsogotna i disuru komandan i ma diboan ibana tu Sanhedrin, i ma mahkamah agung Jahudi. Saonari pe dipakke sisomba Jahowa do hukum lao mambela haporseaonna.—Ida ma kotak “ Hukum ni Halak Rom Dohot Warga Negara Rom”, dohot “ Perjuangan Hukum ni Saksi Jahowa”.
“Halak Parise do Au” (Ul. 23:1-10)
16, 17. (a) Aha do na terjadi tikki makkatai si Paulus di jolo ni Sanhedrin? (b) Aha do na boi taboto taringot sifat ni si Paulus sian alusna i?
16 Makkatai ma si Paulus di jolo ni Sanhedrin. Didok ma, “Hamu akka haha anggikku, sahat tu sadari on, ias do panggora ni rohakku tikki mangulahon sude ulaonku di jolo ni Debata.” (Ul. 23:1) Alai dang boi be dilanjutton ibana hatana i, alana tikki mambege i, “disuru Sintua ni Malim Ananias ma halak na jongjong di labbung ni si Paulus i mamastappon pamanganna”. (Ul. 23:2) Na menghina si Paulus do sintua ni malim i disi. Jala tarida ma na so adil ibana. Alana gabe hira pargabus ma si Paulus, hape so adong dope didok ibana manang aha. Didok si Paulus ma, “Pastapon ni Debata ma ho, e halak na munafik! Hundul do ho nuaeng mangadili au mamakke Patik i. Alai boasa gabe dilanggar ho Patik i? Ai disuru ho do halak mamastap au.”—Ul. 23:3.
17 Tarsonggot do sude halak mambege hata ni si Paulus i. Didok nasida ma, “Na dileai ho do sintua ni malim ni Debata?” Alai denggan do dialusi si Paulus nasida. Rendah hati do si Paulus jala diargai ibana do Patik. Didok do, “Hamu akka haha anggikku, dang huboto na sintua ni malim ibana. Ai tarsurat do, ‘Unang ma leai pamimpin ni bangsomuna.’” d (Ul. 23:4, 5; 2 Mus. 22:28) Ala diboto si Paulus halak Parise dohot halak Saduse do anggota ni Sanhedrin i, didok ibana ma, “Hamu akka haha anggikku, halak Parise do au jala halak Parise do akka ompukku. Alai diadili do au saonari, ala porsea au na boi mulak mangolu halak naung mate.”—Ul. 23:6.
Songon si Paulus, talului do persamaan tikki makkatai dohot halak nang pe beda agamatta tu nasida
18. Boasa didok si Paulus ibana halak Parise, jala songon dia do hita maniru ibana tikki marbarita?
18 Boasa didok si Paulus ibana halak Parise? Ibana mandok, “Halak Parise do akka ompukku.” Jadi keluargana mangihutton ajaran ni halak Parise do. Alani i ma godang halak manganggap si Paulus halak Parise. e Attong boasa dikaitton si Paulus haporseaonna tu ajaran ni halak Parise? Menurut sada laporan, porsea do halak Parise na torus mangolu tondi ni halak naung mate jala molo burju ibana, dipahehe do muse ibana gabe jolma. Alai dang songon i haporseaon ni si Paulus. Tu haheheon na diajarhon Jesus do ibana porsea. (Joh. 5:25-29) Jadi na disetujui si Paulus sian ajaran ni halak Parise, i ma adong do harapan tu halak naung mate. Dang songon halak Saduse na so porsea boi halak na mate mulak mangolu muse. Penalaran na sarupa boi do tapakke tikki marbarita tu halak Katolik manang Protestan. Boi do tadokkon sarupa do hita songon nasida, porsea tu Debata. Memang hita dang porsea tu debata Tritunggal, ala dang sesuai i tu ajaran ni Bibel. Alai sarupa do hita songon nasida, sama-sama porsea adong Debata.
19. Boasa gabe gaor akka halak na di Sanhedrin i?
19 Gabe marsoal ma anggota ni Sanhedrin i mambege hata ni si Paulus. Didok di Bibel, “Gabe gaor ma na pungu i. Jongjong ma piga-piga siboto surat sian punguan ni Parise. Muruk ma nasida jala ninna ma, ‘Dang adong dapotnami na sala dibahen ibana. Na adong do ra suru-suruan makkatai tu ibana.’” (Ul. 23:9) Tikki didok adong suru-suruan na makkatai tu si Paulus, gabe muruk ma halak Saduse, ala dang porsea nasida adong suru-suruan. (Ida ma kotak “ Halak Saduse Dohot Halak Parise”.) Ala tamba gaor situasina, diboan komandan tentara ni Rom i ma si Paulus asa selamat ibana. (Ul. 23:10) Alai tetap dope dang sae masalah i. Adong dope bahaya na diadopi si Paulus. Aha ma i? Taida ma di pasal berikutna.
a Ala godang do halak Kristen Jahudi tikki i, godang do huria na marpungu di jabu ni akka dongan.
b Piga-piga taon dukkon i, dibahen si Paulus ma surat tu halak Heber. Dipaboa ma aha na mambahen undenggan parjanjian na imbaru i sian Patik ni si Musa. Hatorangan di surat i, boi do dipakke halak Kristen Jahudi mangalusi halak na mamaksa nasida mangihutton Patik ni si Musa. Jala i pe patoguhon haporseaon ni halak Kristen na sebelumna manganggap ikkon didalatton do Patik ni si Musa.—Heb. 8:7-13.
c Sahalak pakar mandok dibahen akka bawa on do ra janji lao gabe halak Nasir tu Jahowa. (4 Mus. 6:1-21) Memang dang marlakku be Patik ni si Musa na mambahen pengaturan taringot parjanjian sisongon i. Alai dihilala si Paulus dang sala molo didalatton nasida janjina i tu Jahowa. Alani i ma, dang sala menurut ibana mandongani nasida jala manggarar akka na porlu tusi. Dang dipaboa janji taringot aha i, alai pasti dang olo si Paulus mangalehon pelean binatang songon na ikkon diulahon halak Nasir, ala dang boi i manesa dosa. Dung dipelehon Kristus hangoluanna na sempurna, dang marlakku be pelean binatang lao manesa dosa. Jadi pos do rohatta, dang diulahon si Paulus manang aha pe na maralo tu panggora ni rohana.
d Adong na mandok, nga hurang denggan pamerengan ni si Paulus, jadi dang takkas diida ibana sintua ni malim. Manang ala nga leleng ibana dang di Jerusalem, dang diboto ibana ise sintua ni malim di tikki i. Manang ala godang halak disi, dang diboto si Paulus ise na manuru halak mamastap ibana.
