1, 2. Aha do na lao diulahon si Saulus di Damaskus?

 MARDALAN ma sakelompok bawa tu Damaskus. Kejam do nasida jala jahat. Naeng dilului nasida do akka sisean ni Jesus jala disarat sian jabu ni nasida, diikkat, dipaila, jala diboan tu Jerusalem asa dihakimi di jolo ni Sanhedrin.

² Si Saulus do pamimpin ni kelompok i, jala terlibat do ibana tu parmate ni sasahalak. a Sebelumna, setuju do ibana asa dilempari si Stepanus sappe mate jala diida do na diulahon akka donganna i. (Ul. 7:57–8:1) Dang puas ibana holan menganiaya akka sisean ni Jesus na di Jerusalem, alani i ma naeng lao ibana tu inganan na asing. Ai dianggap do akka sisean i songon ancaman jala naeng dipamate ibana ma sude akka halak na mangihutton “Dalan ni Tuan i”.—Ul. 9:1, 2; ida ma kotak “ Wewenang ni si Saulus di Damaskus”.

3, 4. (a) Aha do na terjadi tu si Saulus? (b) Aha do sukkun-sukkun na lao tabahas?

³ Toppu ma ro cahaya sian langit tu sakaliling ni si Saulus. Diida akka donganna i do cahaya i, alai dang diboto nasida mandokkon manang aha alani tarsonggotna. Gabe buta ma si Saulus, madabu ma ibana tu tano, dang boi be diida ibana manang aha. Alai dibege si Saulus ma adong soara sian langit na mandok, “Saulus, Saulus, boasa dibahen ho na haccit tu au?” Didok si Saulus ma, “Ise do ho Tuan?” Dialusi ibana ma, “Jesus do au, na disiksami.” Pasti tarsonggot hian do si Saulus mambege soara i.—Ul. 9:3-5; 22:9.

⁴ Aha ma na boi taparsiajari sian alus ni Jesus tu si Saulus? Aha do na boi taparsiajari sian pertobatan ni si Saulus? Songon dia do huria Kristen di tikki i memanfaatton situasi na dame, jala aha do parsiajaran na boi tabuat sian i? Lao tabahas ma sukkun-sukkun on.

5, 6. Aha do na boi taparsiajari sian hata ni Jesus tu si Saulus?

⁵ Tikki dipaso Jesus si Saulus di dalan na tu Damaskus, dang didokkon Jesus tu ibana, “Boasa dibahen ho na haccit tu akka siseanku?”  Alai didok do, “Boasa dibahen ho na haccit tu au?” (Ul. 9:4) Jadi dirasahon Jesus do penganiayaan na dibahen tu akka siseanna i.—Mat. 25:34-40, 45.

⁶ Molo dianiaya hamu alani haporseaonmuna, pos ma rohamuna diboto Jahowa dohot Jesus do situasimuna i. (Mat. 10:22, 28-31) Sahat tu saonari, dang disingkirhon Jahowa dope penganiayaan i. Alai taingot ma, diparrohahon Jesus do aha na dibahen si Saulus tikki dipamate si Stepanus, jala diida do songon dia si Saulus manarat akka siseanna na di Jerusalem sian jabu ni nasida. (Ul. 8:3) Nang pe dang campur tangan Jesus tu situasi na masa di tikki i, alai marhite Jesus dilehon Jahowa do tu si Stepanus dohot tu akka sisean na asing gogo na dihaporluhon asa boi nasida tetap setia.

7. Aha do na ikkon diulahon hamu asa boi martahan menghadapi penganiayaan?

⁷ Adong do na ikkon diulahon hamu asa boi tetap martahan nang pe dianiaya. (1) Bertekad ma hamu asa tetap setia, dang soal aha na terjadi. (2) Pangido ma bantuan ni Jahowa. (Plp. 4:6, 7) (3) Unang ma balas dendam, ala holan Jahowa do na marhak mambalos sudena i. (Rom 12:17-21) (4) Pos ma rohamuna bahenon ni Jahowa do hamu margogo menghadapi sude penganiayaan sahat tu na disalpuhon sudena i.—Plp. 4:12, 13.

8, 9. Boha do hira-hira perasaan ni si Ananias tikki dilehon Jesus tugas tu ibana?

⁸ Dung dipaboa Jesus ise ibana, didokkon ma muse tu si Saulus, “Saonari jongjong ma ho jala lao ma ho tu kota. Disi pe dipaboa tu ho aha na ikkon ulahononmu.” (Ul. 9:6) Ala dang boi diida si Saulus manang aha, ditogu-togu ma ibana tu penginapan na di Damaskus. Marpuasa jala martangiang ma ibana disi saleleng tolu ari. Di tikki masa i, dipaboa Jesus ma tu sahalak sisean na di kota i aha na masa tu si Saulus. Goar ni sisean i, si Ananias jala ‘sude do halak Jahudi na di Damaskus mamuji ibana’.—Ul. 22:12.

 ⁹ Mungkin tarsonggot jala bingung do si Ananias tikki i! Alana Jesus Kristus, Ulu ni huria naung dipahehe i, makkatai langsung tu ibana jala mamillit ibana mangulahon tugas na istimewa. Alai borat do tugas i. Tikki disuru si Ananias makkatai tu si Saulus, didok ibana ma, “Tuan, nungnga godang na hubege taringot tu ibana. Godang do dibahen ibana na jahat tu akka halak na badiami di Jerusalem. Jala dipaloas malim kepala do ibana manakkup sude na manjou goarmu di inganan on.”—Ul. 9:13, 14.

10. Songon dia do cara ni Jesus menanggapi si Ananias?

¹⁰ Tikki dipaboa si Ananias na khawatir ibana, dang gabe muruk Jesus. Justru dipaboa Jesus do petunjuk na jelas dohot alasanna boasa disuru si Ananias mangulahon tugas i. Dipaboa ma aha na lao masa tu si Saulus.  Jesus mandok, “Nungnga hupillit ibana lao marbarita na uli taringot tu au tu akka bangso, tu akka raja, dohot tu halak Israel. Ai takkas ma patuduhonokku tu ibana akka hasusaan na ikkon taononna alani goarhu.” (Ul. 9:15, 16) Pittor dioloi si Ananias ma Jesus. Dijuppangi ma si Saulus jala didok ma, “Saulus, dongan, Tuan Jesus do na manuru au ro tuson. Ibana do na diida ho tikki di pardalanan i. Disuru ibana do au ro tuson asa boi ho marnida muse jala asa digohi tondi parbadia ho.”—Ul. 9:17.

11, 12. Aha ma na boi taboto sian akka peristiwa na masa tu si Ananias dohot si Saulus?

¹¹ Adong do hatorangan na paposson rohatta sian peristiwa na terjadi tu si Ananias dohot tu si Saulus. Misalna, gabe taboto ma na torus do Jesus aktif mangalehon petunjuk tu ulaon marbarita, songon na dijanjihon ibana. (Mat. 28:20) Nang pe saonari dang langsung Jesus makkatai tu akka halak, alai dilehon ibana do petunjuk taringot ulaon marbarita marhite naposo haposan, ai nasida do na dipillit mangurus naposo ni Debata. (Mat. 24:45-47) Sesuai tu petunjuk na dilehon Punguan na Mangaradoti Organisasi, dilului akka penyiar dohot akka perintis do akka halak na naeng mananda Kristus. Songon na dibahas di pasal sebelumna, godang do halak na martangiang asa adong na mangurupi nasida mangattusi isi ni Bibel jala ujungna dikunjungi Saksi Jahowa ma nasida.—Ul. 9:11.

¹² Diulahon si Ananias do tugas i jala ujungna dipasu-pasu ma ibana. Molo hamu torus do marbarita na uli nang pe sipata mabiar? Adong do na mabiar marbarita sian jabu tu jabu ala ikkon manjuppangi halak na so ditanda nasida. Adong do na maol marbarita di daerah bisnis, di dalan, lewat telepon dohot surat. Nang pe mabiar si Ananias, alai dianggap ibana do tugas na istimewa mangurupi si Saulus mandapot tondi parbadia. b Ujungna marhasil ma si Ananias ala porsea ibana tu Jesus, jala dianggap ibana si Saulus i dongan sahaporseaonna. Songon si Ananias, hita pe boi do marhasil nang pe sipata mabiar hita. Pos ma rohatta urupan ni Jesus do hita di ulaon marbarita. Tapatudu ma na asi rohatta tu akka halak, jala taanggap ma sude halak termasuk na marsogo ni roha tu barita na uli, calon dongan sahaporseaotta.—Mat. 9:36.

13, 14. Aha do na boi diparsiajari akka halak na so tardidi dope sian si Saulus?

¹³ Pittor diulahon si Saulus do na dipelajarina i. Dung dipamalum ibana, tardidi ma si Saulus jala berupaya ma ibana akrab tu akka sisean na di Damaskus. Alai dang holan i, “pittor dibaritahon ibana ma di akka sinagoga, na Anak ni Debata do Jesus i”.—Ul. 9:20.

 ¹⁴ Molo marsiajar Bibel dope hamu saonari alai dang tardidi dope, olo do hamu maniru si Saulus? Dibahen si Saulus do keputusan na tegas jala pittor tardidi do ibana. Pasti taronjar do rohana mangulahon i ala langsung do diida ibana mukjizat na dibahen Kristus. Alai halak na asing pe sebenarna diida do mukjizat na diulahon Jesus. Misalna diida halak Parise do dipamalum Jesus sahalak bawa na mate tanganna sabbariba, jala godang do sian halak Jahudi na mamboto na dipahehe Jesus do si Lasarus. Alai godang do sian nasida na leas rohana mangida mukjizat i, bahkan gabe sogo rohana tu Jesus. (Mrk. 3:1-6; Joh. 12:9, 10) Alai anggo si Saulus, olo do ibana muba dang songon halak na asing i. Boasa? Alana lebih taat do ibana tu Debata sian apala tu jolma. Asing ni i, massai diargai ibana do asi ni roha na dipatuduhon Kristus tu ibana. (Plp. 3:8) Jadi molo naeng ditiru hamu si Saulus, unang ma pasombu manang aha pe pasohon hamu marbarita jala mangabbati hamu tardidi.

15, 16. Aha do na diulahon si Saulus di akka sinagoga, jala songon dia do tanggapan ni akka halak Jahudi di Damaskus tu ibana?

¹⁵ Boi do dibayakkon hamu songon dia perasaan ni akka halak na mambege tikki dibaritahon si Saulus taringot Jesus di akka sinagoga? Pasti adong do na tarsonggot jala muruk tu ibana. Adong do na mandok, “Ai dang ibana na mambahen marsitaonon halak na manjou goar ni Jesus di Jerusalem?” (Ul. 9:21) Dipaboa si Saulus ma boasa muba sikapna jala boi do “takkas dipatuduhon ibana, Jesus i do Kristus”. (Ul. 9:22) Nang pe songon i, dang tarbukka dope roha ni nasida. Ai sombong do nasida jala tradisi do na uppetting di nasida. Alai, dang menyerah si Saulus.

¹⁶ Nungnga salpu tolu taon. Alai tetap dope sogo roha ni akka halak Jahudi na di Damaskus tu si Saulus. Berupaya do nasida naeng mambunu ibana. (Ul. 9:23; 2 Kor. 11:32, 33; Gal. 1:13-18) Tikki tarboto rencana ni nasida i, diputusson si Saulus ma maninggalhon kota i. Dipaturun ma ibana marhite sada karanjang sian lubang na di tembok ni kota. Si Lukas manurat, ‘akka sisean ni si Saulus’ do na mangurupi ibana lari di borngin i. (Ul. 9:25) Sian hatorangan on taboto ma, adong do piga-piga halak di Damaskus na olo manjalo barita na uli na dipaboa si Saulus jala gabe sisean ni Kristus.

17. (a) Songon dia do tanggapan ni akka halak tu barita na uli? (b) Aha do na ikkon torus taulahon, jala boasa?

¹⁷ Tikki tapaboa aha na taparsiajari tu keluargatta, tu donganta, dohot tu na asing, berharap do hita jaloon ni nasida hasittongan i. Memang adong do na manjalo, alai godangan do na so olo. Bahkan olo do gabe sogo roha ni anggota keluargatta tu hita. (Mat. 10:32-38) Alai molo torus hamu marsiajar asa lam terampil paboahon barita na uli, jala molo tetap dijaga hamu pangalahomuna, boi do akka halak na marsogo ni roha hian gabe muba.—Ul. 17:2; 1 Ptr. 2:12; 3:1, 2, 7.

18, 19. (a) Aha do hasilna ala dibela si Barnabas si Saulus? (b) Boha do hita maniru si Barnabas dohot si Saulus?

 ¹⁸ Sahat ma si Saulus di Jerusalem. Tikki didok si Saulus naung gabe sisean ni Jesus ibana, dang porsea halak Kristen na disi. Alani i dipatorang si Barnabas ma na tutu do hata ni si Saulus i. Ujungna gabe porsea ma akka apostel jala dijalo nasida ma si Saulus. Dung i gabe rap ma si Saulus tinggal dohot nasida. (Ul. 9:26-28) Marbisuk do si Saulus jala dang maila ibana paboahon barita na uli. (Rom 1:16) Barani do ibana marbarita di Jerusalem. Alani i tarsonggot ma halak Jahudi na disi dung diboto nasida naung gabe sisean ni Kristus si Saulus. Hape ibana hian do na mamimpin akka halak menganiaya sisean ni Jesus disi. Alani i dibahen nasida ma rencana lao mambunu si Saulus. Tikki diboto akka dongan sahaporseaon taringot i, “diboan nasida ma [si Saulus] tu Kaesarea jala dipaborhat ma ibana tu Tarsus”. (Ul. 9:30) Dioloi si Saulus do pengaturan na dibahen Jesus marhite huria. Hasilna marlas ni roha ma si Saulus dohot huria i.

¹⁹ Taida nakkin berinisiatif do si Barnabas lao mangurupi si Saulus. Alani haburjuon ni si Barnabas, tottu gabe lam akrab ma nasida na dua. Ditiru hamu do si Barnabas? Rela do hamu mangurupi akka penyiar na baru di huria? Misalna, bekerja sama do hamu dohot nasida tikki marbarita? Diurupi hamu do nasida asa lam maju secara rohani? Molo diulahon hamuna i, gok ma pasu-pasu jaloonmuna. Molo penyiar na baru do hamu di huria, olo do hamu maniru si Saulus? Olo do hamu manjalo bantuan ni akka dongan? Molo kerja sama hamu dohot akka dongan na lebih berpengalaman, lam malo ma hamu marbarita, lam tamba ma las ni rohamuna, jala lam akrab ma hamu dohot akka dongan di huria.

20, 21. Songon dia do naposo ni Debata najolo dohot saonari memanfaatton situasi na “dame” di inganan ni nasida?

²⁰ Dung bertobat si Saulus, “lam dame . . . ma sude huria di Judea, di Galilea, dohot di Samaria”. (Ul. 9:31) Boha do akka dongan memanfaatton situasi na dame di tikki i? (2 Tim. 4:2) Didok di Bibel, dipatogu akka apostel dohot akka pengawas ma huria na disi. Ujungna “dihabiari nasida do Jahowa di parngoluon ni nasida jala diihutton nasida do tudu-tudu ni tondi parbadia”. Contohna dipakke si Petrus do tikkina lao patoguhon akka sisean na di Kota Lidda, di Dataran Saron. Hasilna gabe godang ma halak na di kota i porsea “tu Tuan i”. (Ul. 9:32-35) Fokus do akka sisean tu ulaon marbarita, berupaya do nasida marsiurupan asa lam denggan di ulaon i. Hasilna, “lam tamba ma godang ni sisean” di huria.

²¹ Di ujung ni abad na padua puluhon, godang do Saksi Jahowa memanfaatton situasi na “dame” di negara ni nasida. Alana di tikki i toppu do berakhir akka pamarettaon naung marpulu taon menindas naposo ni Debata. Jala dicabut manang dilonggarkan do piga-piga pengaturan na mangorai  ulaonta marbarita. Marpulu ribu Saksi Jahowa di tikki i memanfaatton situasi on lao marbarita tu sude halak. Luar biasa do hasilna!

22. Aha do na ikkon diulahon hamu molo dang diorai ulaon marbarita di negaramuna?

²² Molo dang diorai ulaon marbarita di ingananmuna, denggan do dipakke hamu kesempatan i? Tottu las do rohatta molo adong kebebasan beragama di negaratta. Alai tetap do adong na boi mambahen hita dang fokus tu ulaon marbarita. Contohna boi do digoda Sibolis hita asa mangalului hamoraon. (Mat. 13:22) Jadi unang ma hita sappe tersimpangkan. Denggan ma tapakke situasitta na dame saonari. Taanggap ma i kesempatan na denggan lao marbarita jala mangurupi akka dongan di huria, ai boi do toppu berubah situasi.

23, 24. (a) Aha do na boi taparsiajari sian peristiwa na masa tu si Tabita? (b) Aha do na porlu taupayahon saonari?

²³ Taida ma aha na masa tu sahalak sisean na margoar si Tabita, manang si Dorkas. Ibana tinggal di Joppe, sada kota na jonok tu Lidda. Sahalak borua na setia do ibana. Dipakke ibana do tikki dohot artana lao melayani Jahowa. “Godang do akka na denggan diulahon ibana jala diurupi do akka na pogos.” Alai toppu ma ibana marsahit jala mate. c Gabe lungun hian do roha ni akka sisean na di Joppe i, tarlumobi akka ina na mabalu na hea diurupi ibana. Dipeakkon ma bakkena di sada jabu, dung i sahat ma si Petrus. Dibahen ibana ma mukjizat na so hea dope diulahon akka apostel ni Jesus na asing. Martangiang ma si Petrus jala mulak mangolu ma si Tabita! Dijou si Petrus ma akka ina na mabalu dohot akka sisean na asing masuk tu kamar. Dipatudu ma naung mulak mangolu si Tabita. Pasti las hian ma roha ni nasida. Pasti lam togu do haporseaon ni nasida alani peristiwa on jala gabe siap ma nasida menghadapi tantangan na lao masa satokkin nai! Ujungna “rarat ma barita i tu sude luat na di Joppe, gabe godang ma halak na porsea tu Tuan i”.—Ul. 9:36-42.

²⁴ Adong dua parsiajaran na penting na boi tabuat sian peristiwa na masa tu si Tabita. (1) Holan parsatokkinan do ngolutta saonari. Jadi penting do tabahen goar na denggan di jolo ni Debata saleleng mangolu hita! (Pjm. 7:1) (2) Pasti boi do halak na mate mulak mangolu. Diparrohahon Jahowa do haburjuon na dipatudu si Tabita jala dipasu-pasu ma ibana.  Kerja kerasta pe diparrohahon Jahowa do. Jadi pos ma rohatta paheheon ni Debata do hita molo tung pe hita mate sebelum Armagedon. (Heb. 6:10) Jadi “susa” manang “dame” situasitta saonari, torus ma hita berupaya paboahon barita na uli taringot Kristus.—2 Tim. 4:2.