PASAL 6
“Gok do Huaso Dohot Asi ni Roha ni Debata” di si Stepanus
Marsiajar sian si Stepanus na barani mambela haporseaonna di jolo ni Sanhedrin
Dibuat sian Ulaon ni Apostel 6:8–8:3
1-3. (a) Situasi songon dia do na dihadapi si Stepanus, jala songon dia do perasaanna menghadapi i? (b) Sukkun-sukkun aha do na porlu taboto alusna?
JONGJONG ma si Stepanus di jolo ni akka hakim. Massai balga do ruangan pengadilan i, jonok do i tu bagas joro di Jerusalem. Adong 71 anggota ni Sanhedrin, hundul ma nasida sude membentuk setengah lingkaran lao mangadili si Stepanus. Akka halak na sangap do hakim i, balga do huasona, jala sogo do roha ni nasida tu si Stepanus, sisean ni Jesus i. Sintua Malim Kayapas do na manjou sude hakim i asa marpungu. Jala piga-piga bulan sebelumna, si Kayapas do tong ketua ni Sanhedrin tikki dipamate Jesus. Attong mabiar do si Stepanus tikki diadili?
2 Heran do sude hakim i mangida si Stepanus, alana “songon bohi ni suru-suruan do bohina” diida nasida. (Ul. 6:15) Artina sarupa do perasaan ni si Stepanus songon perasaan ni suru-suruan. Tikki dipaboa suru-suruan paretta ni Jahowa, dang hea nasida mabiar. Songon i ma nang si Stepanus, tenang do ibana diida akka hakim i jala dame do rohana. Boasa boi songon i?
3 Halak Kristen saonari pe, porlu do mamboto alus ni sukkun-sukkun i. Porlu do muse taboto aha do na mambahen sappe diadili si Stepanus? Songon dia do ibana mambela haporseaonna di jolo ni nasida? Jala aha do na boi tatiru sian ibana?
“Dihasut Nasida ma Akka Halak” (Ul. 6:8-15)
4, 5. (a) Songon dia do si Stepanus gabe teladan na denggan di huria? (b) Aha do artina “gok do huaso dohot asi ni roha ni Debata” di si Stepanus?
4 Teladan na massai denggan do si Stepanus tu huria Kristen na baru i. Sian Pasal 5 nga taboto termasuk do si Stepanus on sada sian pitu bawa na rela mangurupi akka apostel. Lam takkas do muse tarida na rendah hati ibana tikki mamakke huaso na dilean tu ibana. Songon na dipaboa di Ulaon ni Apostel 6:8, dibahen ibana do “godang tanda halongangan” songon apostel na asing. Dipaboa do muse na “gok do huaso dohot asi ni roha ni Debata” di ibana. Aha do artina?
5 Hata Junani na dipakke tu hata “asi ni roha ni Debata” boi do tong diterjemahon gabe “palasson roha”. Jadi on patuduhon halak na burju do si Stepanus, lambok, jala lomo do roha ni halak mardongan tu ibana. Sian carana makkatai, boi do diboto halak na tulus rohana pasahatton hasittongan i. Jala pos do roha ni nasida molo na diajarhonna i marguna tu akka halak. Gok do huaso ni Jahowa di si Stepanus, tarida do i sian kerendahan hatina mangoloi petunjuk ni Jahowa. Dang gabe ginjang rohana nang pe boi ibana mambahen mukjizat jala malo mangajari. Alai diulahon ibana do i sude lao parohon pujian tu Jahowa jala lao patuduhon holong tu akka halak. Jadi dang heran hita boasa akka musu manganggap ancaman na massai balga si Stepanus di nasida.
6-8. (a) Aha do dua tuduhan na dibahen tu si Stepanus, jala boasa didok nasida songon i? (b) Boasa porlu taparsiajari taringot si Stepanus?
6 Makkatai ma piga-piga halak lao berdebat dohot si Stepanus. Alai “dang taralo ni nasida ibana, ai marbisuk jala diurupi tondi parbadia do ibana makkatai”. a Ala nungnga sogo hian roha ni nasida, ‘sip-sip ma digaji’ piga-piga bawa lao manudu si Stepanus. “Dihasut nasida ma akka halak”, pangituai, dohot siboto surat asa marsogo ni roha tu si Stepanus. Jala dipaksa ma diboan si Stepanus tu Sanhedrin. (Ul. 6:9-12) Adong dua tuduhan na dibahen tu si Stepanus. Ditudu do ibana mangaleai Debata dohot si Musa. Aha do maksudna?
7 Ditudu do si Stepanus mangaleai Debata, ala menurut nasida dileai si Stepanus do “inganan na badia” manang bagas joro na di Jerusalem. (Ul. 6:13) Didok do muse ibana mangaleai si Musa, ala ditudu nasida do hata ni si Stepanus i maralo tu Patik ni si Musa. Ditudu do ibana manggatti kebiasaan naung dipaboa si Musa hian tu akka ompu ni nasida. Massai serius do tuduhan on, alana massai badia do bagas joro di halak Jahudi. Massai penting do di nasida akka perincian na di Patik ni si Musa dohot tradisi lisan na ditambahon tu Patik i. Jadi menurut nasida, ikkon dihukum mate do si Stepanus.
8 Saonari on pe, jotjot do akka pamimpin agama mamakke cara na sarupa menentang naposo ni Debata. Dihasut nasida do akka pamimpin manang pamaretta lao menganiaya Saksi Jahowa. Boha do seharusna tanggapanta molo dibahen tuduhan na so sittong tu hita? Boi ma hita marsiajar sian si Stepanus.
Barani Paboahon Taringot “Debata na Sangap i” (Ul. 7:1-53)
9, 10. (a) Aha do na didok akka kritikus taringot alus ni si Stepanus? (b) Songon dia do si Stepanus mangalusi tuduhan i?
9 Songon na dipaboa di awal ni pasal on, songon bohi ni suru-suruan do bohi ni si Stepanus ala tetap do ibana tenang nang pe godang tuduhan na so sittong didok tu ibana. Saonari diida si Kayapas ma si Stepanus jala didok ma, “Ate, tutu do i sude?” (Ul. 7:1) Dipakke si Stepanus ma kesempatan i makkatai tu nasida.
10 Didok piga-piga kritikus nang pe ganjang pembelaan ni si Stepanus i, alai dang boi dibuktihon ibana na so marsala ibana. Alai dang tutu i. Justru denggan do molo tatiru cara ni si Stepanus tikki mambela haporseaotta. (1 Ptr. 3:15) Taingot ma, ditudu do si Stepanus mangaleai Debata ala disinggung taringot bagas joro, jala ditudu do ibana mangaleai si Musa ala dipaboa taringot Patik. Alani i ma, tikki dialusi si Stepanus nasida, disinggung ibana do tolu jaman na adong di sejarah ni halak Israel jala adong do piga-piga hatorangan na ditandasson ibana sian i. Tabahas ma jo i.
11, 12. (a) Boasa dipaboa si Stepanus taringot si Abraham? (b) Boasa dipaboa si Stepanus taringot si Josep?
11 Jaman ni si Abraham. (Ul. 7:1-16) Dipillit si Stepanus do topik na so maralo tu nasida. Dipaboa ma parjolo taringot si Abraham, alana diakkui halak Jahudi do na togu haporseaonna. Dipaboa si Stepanus ma na di Mesopotamia do parjolo sahali Jahowa “Debata na sangap i” pataridahon dirina tu si Abraham. (Ul. 7:2) Alai dukkon i gabe penduduk asing ma si Abraham di Tano na Dijanjihon. Di tikki i dang adong dope bagas joro manang Patik ni si Musa. Alai tetap do ibana setia tu Debata. Sian on tarida ma, sasahalak boi do setia tu Debata nang pe dang adong bagas joro dohot Patik ni si Musa.
12 Diboto si Stepanus do muse na dihormati nasida si Josep, pinoppar ni si Abraham. Dipaingot ma nasida taringot pangalaho ni akka ompu ni halak Israel, i ma akka abang ni si Josep. Nasida do na menganiaya si Josep jala na manjual ibana gabe budak. Alai dipakke Debata do si Josep paluahon halak Israel sian kelaparan. Didok si Stepanus pe i ala adong do diida ibana persamaan ni si Josep dohot Jesus Kristus. Alai dang pola dipaboa i asa torus ditangihon nasida ibana.
13. Boha do si Stepanus mambuktihon na so dileai ibana si Musa, jala aha do inti ni hata ni si Stepanus taringot si Musa?
13 Jaman ni si Musa. (Ul. 7:17-43) Dipaboa si Stepanus ma muse taringot si Musa. Cocok do on dipaboa alana ditudu do ibana mangaleai si Musa, jala godang sian anggota Sanhedrin i halak Saduse do. Dang porsea halak Saduse tu akka bukku na di Bibel, holan tu na disurat si Musa do nasida porsea. Jadi tikki didokkon si Stepanus na massai diargai ibana si Musa dohot Patikna i, gabe terbukti ma na so tutu tuduhan i. (Ul. 7:38) Dipaboa do muse na mulak-ulak bangso Israel manolak si Musa. Na parjolo tikki marumur 40 taon ma si Musa. Lobi sian 40 taon dukkon i, piga-piga hali ditolak bangso i do si Musa gabe pamimpin ni nasida. b Jadi inti na naeng dipaboa si Stepanus disi, mulak-ulak do naposo ni Debata manolak akka halak na dipillit Debata lao mamimpin nasida.
14. Aha do muse na dipatorang si Stepanus taringot si Musa?
14 Disinggung si Stepanus ma muse taringot surirang ni si Musa. Nungnga dipaboa hian na lao adong sahalak panurirang sian Israel na songon si Musa. Alai parpudi do dipaboa si Stepanus ise panurirang i, jolo dipaboa do parsiajaran na asing. Diceritahon ma peristiwa tikki makkatai Jahowa tu si Musa marhite ramba na marsuga. Didokkon Jahowa do tano na di sakalilingna i badia. On berarti diboto si Musa do inganan na dia pe boi do dibahen badia. Jadi ikkon di sada bangunan do hita manomba Jahowa asa dijalo ibadatta, songon bagas joro na di Jerusalem? Taida ma alusna.
15, 16. (a) Songon dia do hatorangan ni si Stepanus taringot tabernakel mambuktihon dang sittong tuduhan ni nasida? (b) Aha do muse na dipatorang si Stepanus sian bagas joro na dibangun si Salomo?
15 Tabernakel dohot bagas joro. (Ul. 7:44-50) Dipaboa si Stepanus do muse aha na masa sebelum adong bagas joro na di Jerusalem. Disuru Debata do asa dibahen si Musa tabernakel, i ma sada kemah lao inganan beribadat tu Jahowa jala boi do on dipapinda-pinda. Pasti dang adong sian hakim i na barani mandok na ubbadia bagas joro sian tabernakel. Ai takkas do diboto nasida disi do si Musa beribadat tu Jahowa.
16 Dipaboa ibana ma muse taringot bagas joro na di Jerusalem na dibangun si Salomo. Dikutip ibana ma tangiang ni si Salomo na mandok, “Dang tinggal di inganan na dibahen jolma Debata Natumimbul i.” (Ul. 7:48; 2 Kron. 6:18) Dikutip do muse hata na sian bukku Jesaya. Didok, “Surgo i do tahtakku, jala tano on do sidege-degean ni pattu. Ai jabu na songon dia ma na lao pajongjongonmuna di Au? Ninna Jahowa. Jala dia ma inganan na boi gabe inganakku tinggal? Ai tanganku sandiri do na mambahen on sude.” (Ul. 7:49, 50; Jes. 66:1, 2) Memang dipakke Jahowa do najolo bagas joro lao pasautton lomo ni rohana. Alai dang ikkon marhite bagas joro i Ibana pasautton lomo ni rohana. Jadi dang ikkon beribadat di sada inganan asa dijalo Jahowa ibadatta.
17. (a) Songon dia do pembelaan ni si Stepanus i patuduhon na jahat akka na manudu ibana? (b) Songon dia do pembelaan ni si Stepanus i patuduhon na so tutu tuduhan ni nasida?
17 Malo do si Stepanus mambahen pembelaan di jolo ni Sanhedrin. Gabe tarida ma na massai jahat pangalaho ni akka halak na manudu ibana. Dipatudu si Stepanus do na torus disesuaihon Jahowa carana paboahon lomo ni rohana. Dang kaku Ibana manang dituntut akka halak ikkon mangihutton tradisi. Takkas do dipatudu si Stepanus ala pasangappu nasida tu bagas joro na di Jerusalem i dohot tu kebiasaan manang tradisi na adong di Patik ni si Musa, gabe dang diboto be aha tujuanna dilehon Patik dohot bagas joro i. Jadi hira na didok si Stepanus ma tu nasida, ‘Molo dang dioloi hamu Jahowa, berarti dang diargai hamu Patik ni si Musa dohot bagas joro i.’ Sian pembelaanna i tarida ma na berupaya ibana sian nasa tolapna mangoloi Jahowa.
18. Aha do na boi tatiru sian si Stepanus?
18 Aha do na boi taparsiajari sian si Stepanus? Takkas do ditanda ibana isi ni Surat na Badia i. Hita pe ikkon ringgas ma marsiajar Bibel, asa boi hita “denggan mangajari jala patorakkon hasittongan i”. (2 Tim. 2:15) Boi do hita muse marsiajar songon dia carana asa menarik barita na tapasahat jala dang mambahen halak tersinggung. Nang pe godang halak na marsogo ni roha tu si Stepanus, alai dilului ibana do persamaan dohot nasida. Berupaya do ibana mambahas topik na menarik di nasida. Respek do si Stepanus, dijou do akka pangituai i “amanami”. (Ul. 7:2) Jadi hita pe porlu do lambok paboahon hata ni Debata jala sangap tu halak na asing.—1 Ptr. 3:15.
19. Songon dia do si Stepanus tegas tikki makkatai di jolo ni Sanhedrin?
19 Alani i, tapakke ma setiap kesempatan lao marbarita. Unang ma tatahan diritta lao paboahon i ala mabiar mambahen haccit roha ni halak. Terus terang ma hita paboahon barita panguhuman na sian Jahowa. Boi ma tatiru cara ni si Stepanus. Takkas do diboto ibana dang berpengaruh nanggo saotik pe bukti na dipatorangna i tu akka hakim i. Alani i ma tegas hatana di akhir ni pembelaanna i. Disarupahon si Stepanus do nasida songon ompu ni nasida na manolak si Josep, si Musa, dohot sude panurirang. (Ul. 7:51-53) Bahkan akka hakim i do na pamatehon Messias na disurirakkon si Musa dohot sude panurirang. Jadi takkas ma nasida do na mangalanggar Patik ni si Musa!
“Tuan Jesus, tu Ho ma Hupasahat Hosakkon” (Ul. 7:54–8:3)
“Dung dibege nasida hatana i, sogo situtu ma roha ni nasida. Sappe diharat nasida ma ngingi ni nasida alani murukna mangida si Stepanus.”—Ulaon ni Apostel 7:54
20, 21. Songon dia do tanggapan ni akka hakim i tu hata ni si Stepanus, jala songon dia do Jahowa paposson rohana?
20 Dung dibege akka hakim i hata ni si Stepanus, muruk hian ma nasida. Dang adong be wibawa ni nasida. Sappe diharat nasida do ngingi ni nasida alani murukna. Diboto si Stepanus do na lao dipamate akka hakim i nama ibana songon Jesus, Tuanna i.
21 Ikkon barani do si Stepanus menghadapi hukuman na lao dibahen tu ibana. Pasti lam pos do rohana ala dapotna parnidaan sian Jahowa tikki i. Diida si Stepanus do hasangapon ni Debata jala diida do Jesus jongjong di sabola kanan ni Jahowa. Tikki diceritahon si Stepanus parnidaanna i, ditutup akka hakim i do pinggol ni nasida. Boasa? Alana sebelumna pe tikki jongjong Jesus di jolo ni akka hakim i, didok ibana do molo dirina Messias jala satokkin nai hundul di sabola kanan ni Bapakna. (Mrk. 14:62) Jadi parnidaan ni si Stepanus on patuduhon na sittong hata ni Jesus i. Gabe terbukti ma molo Sanhedrin i nungnga menghianati jala mambunu Messias. Tikki dibege i, pittor sepakat ma nasida sude mamboan si Stepanus asa dilempari pakke batu sappe mate. c
22, 23. Aha do persamaan ni Jesus dohot si Stepanus tikki dipamate, jala songon dia do halak Kristen saonari maniru pos ni roha ni si Stepanus?
22 Sarupa songon Jesus, tikki naeng mate si Stepanus, dame do rohana, pos do rohana tu Jahowa, jala diampuni do akka musuna i. Didok si Stepanus do, “Tuan Jesus, tu ho ma hupasahat hosakkon.” Mungkin sahat tu na didok hata on, diida ibana dope Jesus rap dohot Jahowa di surgo. Jala pasti diboto ibana do hata ni Jesus na mandok, “Au do haheheon dohot hangoluan.” (Joh. 11:25) Ujungna gogo ma soarana martangiang, “Ale Jahowa, unang ma hukum nasida alani dosa na diulahon nasida on.” Dung i, mate ma ibana.—Ul. 7:59, 60.
23 Si Stepanus ma halak Kristen na parjolo mate martir. (Ida ma kotak “ Aha do Lapatan ni ‘Martir’?”) Alai dang holan ibana na songon i. Sahat tu saonari adong do naposo ni Debata na dipamate akka halak na fanatik sian kalangan agama, politik, dohot penentang na kejam. Alai sarupa do pos ni roha ni nasida songon si Stepanus. Ai pos do roha ni nasida, Jesus nungnga gabe Raja jala dilean Debata do huaso na massai balga tu ibana. Jadi dang adong na boi mangabbati Jesus pahehehon akka halak na setia.—Joh. 5:28, 29.
24. Songon dia do si Saulus terlibat tu parmate ni si Stepanus, jala aha do pengaruh ni kesetiaanna tu akka halak?
24 Adong ma sahalak doli-doli na mangida na masa i goarna si Saulus. Lomo do rohana tu parmate ni si Stepanus. Ibana do na manjaga pakkean luar ni akka na mangalempari batu i. Dang leleng dukkon i, ibana ma na mamimpin akka halak lao menganiaya halak Kristen. Alai massai balga do pengaruh ni kesetiaan ni si Stepanus tu halak Kristen. Godang do sian nasida na setia sappe mate. Bahkan si Saulus na jotjot dijou si Paulus, menyesal do molo diingot ibana na hea dohot ibana terlibat tu parmate ni si Stepanus. (Ul. 22:20) Didok ibana, “Ginjang do rohakku najolo, huleai do Debata jala hulelei naposona.” (1 Tim. 1:13) Jadi dang hea lupa si Paulus tu si Stepanus dohot tu pembelaanna i. Bahkan dipakke si Paulus do topik na adong di pembelaan ni si Stepanus di akka jamitana dohot suratna. (Ul. 7:48; 17:24; Heb. 9:24) Jala ditiru si Paulus do haporseaon dohot habaranion ni si Stepanus, bawa na ‘gok huaso dohot asi ni roha ni Debata i’. Boha do molo hita?
a Piga-piga halak na marsogo ni roha i ro sian “Sinagoga ni Halak na Merdeka”. Mungkin hea do nasida ditawan halak Rom jala merdeka ma nasida. Manang nasida akka hatoban naung merdeka jala gabe halak Jahudi proselit. Adong do muse na ro sian Kilikia. Sian i do si Saulus na sian Tarsus i. Alai dang dipaboa di peristiwa on na dohot si Saulus rap dohot akka halak na sian Kilikia berdebat dohot si Stepanus.
b Adong do piga-piga hatorangan na dipaboa si Stepanus na so disurat di ayat na asing. Misalna taringot pendidikan ni si Musa di Mesir, sadia umurna tikki lari sian Mesir, jala sadia leleng ibana tinggal di Midian.
c Dang boi dipastihon adong do dilehon pamaretta ni Rom wewenang tu Sanhedrin lao mambahen hukuman mate manang na dang. (Joh. 18:31) Takkas ma hukuman mate na dibahen tu si Stepanus holan alani na muruk do Sanhedrin tu ibana, dang berdasarhon keputusan pengadilan na sah.
