PASAL 17
‘Dipatorang do tu Nasida Surat na Badia i’
Sumber pengajaran na denggan jala sitiruon sian halak Berea
Dibuat sian Ulaon ni Apostel 17:1-15
1, 2. Ise do dongan ni si Paulus mardalan sian Pilippi tu Tessalonik, jala aha do na mungkin dipikkiri nasida?
DI DAERAH pegunungan, adong do dalan na dibangun akka halak Rom na malo. Dilapisi batu do dalan i. Marmacam do soara na tarbege molo lewat sian i. Adong soara ni halode, soara ni roda ni kareta, dohot soara ni akka halak, mungkin akka tentara, partiga-tiga, dohot tukkang. Di dalan i do si Paulus, si Silas, dohot si Timoteus. Mardalan do nasida sian Pilippi tu Tessalonik, daona lobi sian 130 kilometer. Dang mura pardalanan i di nasida. Alana baru dope dipukkuli si Paulus dohot si Silas di Pilippi, jala dang malum dope lukkana i.—Ul. 16:22, 23.
2 Aha ma na diulahon nasida asa boi dinikmati pardalanan i? Pasti marcerita do nasida. Apalagi ala baru sian Pilippi dope nasida, diingot dope ra panjaga ni penjara dohot keluargana na gabe halak Kristen. Gabe lam dipatogu ma nasida asa torus marbarita na uli. Alai dung naeng sahat di Tessalonik, olo do ra dipikkiri nasida songon dia tanggapan ni halak Jahudi na di kota i tu nasida. Dianiaya do annon nasida jala dipukkuli songon na di Pilippi?
3. Aha do na boi tatiru sian si Paulus?
3 Sian suratna tu halak Kristen di Tessalonik, taboto ma songon dia perasaan ni si Paulus tikki i. Didok ibana, “Diboto hamu do, nungnga marsitaonon hami jala nungnga dileai di Pilippi. Alai dilehon Debata do tu hami habaranion, asa boi hubaritahon hami tu hamu barita na uli taringot tu Debata nang pe godang hasusaan.” (1 Tes. 2:2) Jadi khawatir do si Paulus tikki naeng sahat tu Tessalonik, apalagi sebelumna baru dipukkuli do ibana di Pilippi. Boi do diattusi hamu perasaan ni si Paulus i? Hea do dirasa hamu hira na borat lao marbarita na uli? Molo hea, tiru ma si Paulus. (1 Kor. 4:16) Diandalhon ibana do Jahowa asa boi barani marbarita na uli.
‘Dipatorang Ibana do Surat na Badia i’ (Ul. 17:1-3)
4. Sian dia do taboto na lobi sian tolu minggu si Paulus di Tessalonik?
4 Tikki di Tessalonik, marbarita na uli do si Paulus di sinagoga setiap ari Sabat saleleng tolu minggu. Attong, holan tolu minggu do ibana di kota i? Belum tentu. Dang dipaboa dung sadia leleng si Paulus sahat, baru lao ibana tu sinagoga. Asing ni i, karejo do si Paulus dohot akka donganna lao memenuhi kebutuhan ni nasida saleleng di Tessalonik. (1 Tes. 2:9; 2 Tes. 3:7, 8) Jala saleleng di Tessalonik, dua hali ma akka dongan na di Pilippi mangalehon bantuan tu si Paulus. (Plp. 4:16) Jadi lobi do ra tolu minggu ibana di Tessalonik.
5. Boha do cara ni si Paulus marbarita tu akka halak?
5 Barani do si Paulus marbarita. Makkatai do ibana tu akka halak na marpungu di sinagoga. Songon na somal, makkata-hatai ma ibana, “dipatorang ibana do tu nasida isi ni Surat na Badia i. Dipatorang jala dipatuduhon ibana ma marhite akka ayat, na ikkon marsitaonon Kristus i jala dipahehe sian na mate. Ninna ma, ‘Jesus na hubaritahon i tu hamu, ibana do Kristus i’”. (Ul. 17:2, 3) Tujuan ni si Paulus, dang holan asa lomo roha ni halak mambege baritana i, alai ibana naeng mangurupi nasida bernalar. Diboto ibana do na ditanda jala diargai akka halak na di sinagoga i Surat na Badia. Alai dang diattusi nasida isina. Jadi makkata-hatai ma si Paulus dohot nasida. Dipatorang jala dipatudu ma akka ayat na mambuktihon Jesus na sian Nasaret i do Messias manang Kristus na dijanjihon.
6. Songon dia do cara ni Jesus marbarita, jala aha do hasilna?
6 Diihutton si Paulus do contoh ni Jesus. Dipakke ibana do Surat na Badia gabe sumber ni ajaranna. Tikki di tano on Jesus, dipatudu do tu akka siseanna surirang na adong di Surat na Badia taringot Anak ni Jolma i. Na lao marsitaonon do ibana, mate, jala dipahehe muse. (Mat. 16:21) Dung hehe Jesus, dipataridahon ma dirina tu akka siseanna, gabe terbukti ma sude na nidokna i. Alai dang holan i na dipaboa Jesus. “Dipatorang ibana ma tu nasida sude na nidok ni Surat na Badia taringot tu ibana, mulai sian na disurat si Musa dohot sude na Sinurat ni Akka Panurirang.” Jala denggan do hasilna. Ai didok akka sisean i do, “Patut ma hona tu rohatta hatana i, tikki na di dalan i hita jala tikki dipatorang ibana isi ni Surat na Badia i tu hita.”—Luk. 24:13, 27, 32.
7. Boasa penting tapakke Bibel gabe sumber pengajaranta?
7 Marhuaso do Hata ni Debata i. (Heb. 4:12) Tabahen do i gabe sumber ni pengajaranta, songon na diulahon Jesus, si Paulus, dohot apostel na asing. Makkata-hatai do hita dohot akka halak, tapatorang, jala tapatudu do buktina marhite akka ayat. Asing ni i, dang sian hita sandiri barita na tapaboa i. Tapakke do Bibel lao patuduhon molo na taajarhon i sian Debata, dang sian pikkiranta sandiri. Ikkon torus do taingot molo sude na taajarhon i sumberna sian Bibel. Ala boi do dihaporseai barita na tapasahat i, gabe barani ma hita paboahon i songon si Paulus.
“Gabe Porsea ma Piga-Piga sian Nasida” (Ul. 17:4-9)
8-10. (a) Songon dia do tanggapan ni halak Tessalonik tu barita na uli? (b) Boasa gabe cemburu halak Jahudi na disi tu si Paulus? (c) Aha do na diulahon halak Jahudi na muruk i?
8 Nungnga dihilala si Paulus sandiri hata ni Jesus na mandok, “Dang umbalga hatoban sian tuanna. Molo dibahen nasida na haccit tu au, bahenon ni nasida do songon i nang tu hamu. Molo dioloi nasida hatakku, oloan ni nasida do nang hatamuna.” (Joh. 15:20) Di Tessalonik pe, marragam do tanggapan ni halak tu barita na uli. Adong do na pittor mangulahon, alai adong do na mangalo. Disurat si Lukas do, “Gabe porsea ma piga-piga sian nasida jala diihutton nasida ma si Paulus dohot si Silas. Jala godang do halak Junani naung manomba Debata dohot akka borua na sangap i gabe porsea.” (Ul. 17:4) Pasti las do roha ni akka sisean na baru i ala diurupi mangattusi Surat na Badia.
9 Nang pe adong na manjalo barita na dipasahat si Paulus, alai adong do na muruk tu ibana. Adong do piga-piga halak Jahudi na di Tessalonik na cemburu ala “godang do halak Junani” na mambege ajaran ni si Paulus i. Hape halak Jahudi i manganggap bagian ni nasida do halak Junani i. Ai nungnga diajarhon nasida Akka Bukku Heber tu halak Junani, jala naeng dibahen do nasida gabe proselit. Jadi ala godang halak Junani na mangihutton ajaran na dipaboa si Paulus i, bahkan na sian sinagoga, gabe muruk ma halak Jahudi i.
“Lao ma nasida . . . mangalului si Paulus dohot si Silas asa boanonna tu jolo ni na manggutturi i.”—Ulaon ni Apostel 17:5
10 Disurat si Lukas do muse aha na masa, “Gabe muruk ma halak Jahudi. Dipapungu nasida ma akka pareman na sian pasar na so adong karejona. Marpungu ma nasida lao mambahen guttur kota i. Lao ma nasida tu jabu ni si Jason mangalului si Paulus dohot si Silas asa boanonna tu jolo ni na manggutturi i. Alai dang dapot ni nasida si Paulus dohot si Silas disi, gabe disarat nasida ma si Jason dohot piga-piga akka dongan tu jolo ni akka pamaretta di kota i. Gogo ma didok nasida, ‘Nungnga dison be akka halak na manggutturi liat portibi on. Jala si Jason on do na manjalo nasida di jabuna. Dialo nasida do akka paretta ni Kesar. Ai didok nasida do adong raja na asing, i ma Jesus.’” (Ul. 17:5-7) Aha ma na diulahon si Paulus dohot akka donganna?
11. Aha do tuduhan ni halak Jahudi tu si Paulus dohot akka donganna, jala paretta na dia ma na ditudu dilanggar nasida? (Ida surat na di toru.)
11 Ro ma akka halak naeng manakkup si Paulus. Muruk hian do halak i, jala dang terkendali. Songon i ma cara ni halak Jahudi palaohon si Paulus dohot si Silas. Dung dibahen nasida “guttur kota i”, didok nasida ma tu akka pamaretta, na massai jahat na diulahon si Paulus dohot akka donganna i. Dibahen ma dua tuduhan. Na parjolo, didok do si Paulus dohot akka donganna i “manggutturi liat portibi on”. Hape dang si Paulus na mambahen gaor Kota Tessalonik. Upparah do muse tuduhan na paduahon. Didok do si Paulus dohot akka donganna i mangalo paretta ni kesar. Ditudu do nasida mambaritahon adong raja na asing, i ma Jesus. a
12. Sian dia do taboto na borat tuduhan na dibahen tu halak Kristen na di Tessalonik?
12 Taingot ma, tuduhan na sarupa pe dibahen akka pamimpin agama do tu Jesus. Didok nasida do tu si Latus, “Tardapot do ibana mangaliluhon bangsonami. . . . jala didok do ibana Kristus, raja i.” (Luk. 23:2) Ala mabiar si Latus dianggap kesar ibana mendukung pemberontakan, dipasahat ma Jesus lao dihukum mate. Serius do hukuman na dibahen tu halak Kristen na di Tessalonik molo tutu tuduhan i. Sada karya referensi mandok, “Dang hal na sepele tuduhan na dibahen tu nasida i. Alana ‘holan ditudu pe sasahalak memberontak tu kesar, nang pe setelah diselidiki dang toho tuduhan i, tetap do borat hukumanna’.” Alai marhasil do serangan ni musu i?
13, 14. (a) Boasa boi tadok dang marhasil akka halak na muruk i pasohon ulaon marbarita di Tessalonik? (b) Aha do na diulahon si Paulus jala songon dia do hita maniru ibana?
13 Dang marhasil akka halak na mangamuk i pasohon ulaon marbarita di Tessalonik. Boasa? Alasan na parjolo, dang dapot ni nasida si Paulus dohot si Silas. Asing ni i, dang porsea akka pamaretta na di kota i tu tuduhan i. Alana dung dijalo nasida “hepeng jaminan” sian si Jason dohot sian dongan na asing i, dibebasson do nasida. (Ul. 17:8, 9) Diulahon si Paulus do hata ni Jesus na mandok, “Manat ma hamu songon ulok jala ias ma rohamuna songon darapati.” (Mat. 10:16) Diputusson si Paulus do maninggalhon kota i asa boi ibana torus marbarita di inganan na asing. Jadi nang pe barani si Paulus, dang gabe nekat ibana. Songon dia do hita maniru si Paulus?
14 Saonari, jotjot do pamimpin agama manjujui godang halak asa menyerang Saksi Jahowa. Ditudu do hita memberontak tu pamaretta jala mambahen gaor akka halak. Songon na masa di abad na parjolo, jotjot do diserang hita ala cemburu nasida. Hape dang olo hita mangalului masalah tu nasida. Sebisa mungkin taupayahon do asa unang berdebat jala lambok mangalusi nasida molo adong na muruk. Sabar do hita paimahon sappe situasina tenang asa marbarita muse tu inganan i.
“Urringgas” do Nasida (Ul. 17:10-15)
15. Songon dia do tanggapan ni halak Berea tu barita na uli?
15 Asa boi si Paulus dohot si Silas selamat, disuru ma nasida lao tu Berea, na daona hira-hira 65 kilometer sian Tessalonik. Dung sahat disi, lao ma si Paulus marbarita tu sinagoga. Las hian do roha ni si Paulus ala godang na manangihon. Si Lukas manurat, “Urringgas do halak na di Berea marsiajar sian halak na di Tessalonik. Ai dijalo nasida do hata ni Debata sian nasa rohana. Ganup ari do dipareso nasida Surat na Badia i lao mangida sittong manang dang na dibege nasida.” (Ul. 17:10, 11) Attong na hurang ringgas do halak na di Tessalonik? Daong. Boi do taida i sian surat na dibahen si Paulus tu nasida. Didok do, “Alani i do umbahen na toktong hami mandok mauliate tu Debata. Ai tikki dibege hamu hata ni Debata na hupasahat hami, dijalo hamu do i songon na manjalo hata ni Debata, dang songon hata ni jolma. Jala sittong do i, ai i do na mangurupi hamu gabe halak na porsea.” (1 Tes. 2:13) Attong boasa didokkon urringgas halak Jahudi na di Berea?
16. Boasa didok “urringgas” halak Berea marsiajar?
16 Tikki dibege nasida ajaran na baru na dipaboa si Paulus, dang pittor negatif manang kritis tanggapan ni nasida. Alai dilului nasida do alasanna boasa ikkon porsea nasida tusi. Denggan do ditangihon nasida si Paulus. Dung i dipareso nasida ma Surat na Badia na dipaboa si Paulus lao mamastihon na diajarhonna i. Asing ni i, ringgas do nasida marsiajar Bibel. Alana dang holan di ari Sabat nasida marsiajar, alai ganup ari do. Jala diulahon nasida do i sian nasa rohana. Dilului nasida do taringot ajaran na baru i sian Surat na Badia. Serep do roha ni nasida jala olo muba. Alani i “godang ma sian nasida na gabe porsea”. (Ul. 17:12) On ma na mambahen si Lukas mandok “urringgas” nasida marsiajar!
17. Boasa dipuji halak Berea, jala songon dia do hita boi maniru nasida?
17 Pasti dang dirippu halak Berea disurat di Bibel taringot semangat ni nasida i jala gabe teladan tu hita saonari. Diulahon nasida do persis songon na dihalomohon Jahowa dohot na dianjurhon si Paulus. Dijujui do nasida mamareso isi ni Bibel asa lam togu haporseaon ni nasida. Songon i ma nang hita, ikkon taanjurhon do akka halak mangulahon na sarupa. Alai nang pe nungnga taboto hasittongan, dang berarti dang porlu be hita ringgas marsiajar. Justru ikkon lam semangat ma hita marsiajar taringot Jahowa, jala pittor taulahon ma na taparsiajari i. Molo taulahon i berarti tapasombu Jahowa membentuk jala mangalatik hita sesuai tu lomo ni rohana. (Jes. 64:8) Hita pe gabe torus ma dipakke Jahowa lao mambahen las rohana.
18, 19. (a) Boasa lao si Paulus sian Berea, jala songon dia do tindakanna selanjutna gabe teladan tu hita? (b) Tudia do muse si Paulus marbarita?
18 Alai dang leleng si Paulus di Berea. Alana “dibege halak Jahudi na di Tessalonik ma naung dibaritahon si Paulus hata ni Debata di Berea. Gabe ro ma nasida tusi jala dihasut ma akka jolma na disi lao mangalo nasida. Pittor disuru akka dongan na disi ma asa ditaruhon si Paulus tu huta na di topi ni laut. Anggo si Silas dohot si Timoteus, tinggal dope disi. Alai ditaruhon do si Paulus sahat tu Atena. Didok si Paulus ma tu nasida asa disuru hatop ro si Silas dohot si Timoteus mandapotton ibana. Dung i mulak ma nasida”. (Ul. 17:13-15) Dang menyerah akka musu i. Dang puas dope nasida holan mangusir si Paulus sian Tessalonik. Lao do nasida tu Berea jala mambahen hagutturon muse disi, alai sia-sia do i. Diboto si Paulus do bidang nai dope daerah na porlu dikarejohon ibana. Alani i lao ma ibana tu inganan na asing. Jadi torus ma hita berupaya mangalului kesempatan lao marbarita na uli, nang pe akka halak torus berupaya manggagalhon ulaon i!
19 Pasti godang do na diparsiajari si Paulus dung marbarita tu akka halak Jahudi di Tessalonik dohot di Berea. Marsiajar do ibana asa barani marbarita nang pe adong tantangan, jala songon dia cara na denggan lao mangajarhon Bibel. Hita pe tatiru ma ibana. Saonari, si Paulus naeng marbarita tu akka halak na so Jahudi di Atena. Aha do na terjadi tu ibana di kota i? Tabahas ma i di pasal berikutna.
a Menurut sahalak pakar, adong do paretta ni kesar na mangorai manang ise pe mandok “na lao adong raja dohot harajaon na baru, apalagi molo didok harajaon i naeng manggattihon kesar na mamaretta di tikki i”. Olo do ra akka musu ni si Paulus mandok, barita na dipasahatna i maralo tu paretta ni kesar i. Ida ma kotak “ Akka Kesar na di Bukku Ulaon ni Apostel”.
