1-3. (a) Boasa marsak si Paulus mangida Kota Atena? (b) Aha do na boi taparsiajari sian pengalaman ni si Paulus i?

 NUNGNGA sahat be si Paulus di Atena, Junani. Pusat ilmu pengetahuan do kota i. Hea do si Sokrates, si Plato, dohot si Aristoteles mangajar disi. Godang do patung di kota i ala manomba dewa-dewi do halak Atena. Dibahen nasida do i di akka kuil, di lapangan, dohot di dalan. Jadi marsak do si Paulus mangida kota i. Diboto si Paulus do na so lomo roha ni Jahowa tu akka patung. (2 Mus. 20:4, 5) Jadi magigi do ibana mangida akka patung i.

² Tarsonggot do si Paulus tikki masuk ibana tu pasar na di kota i, manang na digoari agora. Godang do patung Hermes na mamakke alat kelamin ni bawa marjejer di sabola barat na jonok tu pintu masuk ni pasar i. Di setiap sudut, adong tempat pemujaan. Gok do halak na manomba patung disi. Jadi boha ma dibahen Apostel Paulus marbarita tu nasida? Boi do dikendalihon ibana perasaanna? Boi do dapotna topik na cocok lao makkatai tu nasida? Marhasil do ibana mangurupi akka halak na marsitutu mangalului Debata di kota i?

³ Disurat do di Ulaon ni Apostel 17:22-31 hata ni si Paulus tu halak Atena i. Diurupi ibana do halak bernalar, manat do ibana makkatai, jala dipakke do daya pengamatan. Sitiruon na denggan do i tu hita. Gabe taboto ma songon dia mangalului topik na cocok tu akka halak na mambege.

4, 5. Tudia do si Paulus marbarita tikki di Atena, jala halak na songon dia do juppangna disi?

⁴ Hira-hira taon 50 M ma si Paulus ro tu Atena, di pardalanan utusan injilna na paduahon. a Paima ro si Silas dohot si Timoteus sian Berea, songon na biasa lao ma si Paulus tu sinagoga, “diajari ibana ma akka halak Jahudi”. Lao do muse ibana “tu pasar” manang agora, asa boi pajuppang  dohot penduduk Atena na so Jahudi. (Ul. 17:17) Agora Atena adong di sabola barat ni Akropolis, bidangna hira-hira lima hektar. Pasar on dang holan sekedar inganan marjualan, alai on ma pusat ni kota i. Sada karya referensi mandok, pasar on ma “pusat ekonomi, politik, dohot pusat budaya ni kota i”. Lomo hian do roha ni halak Atena marpungu jala makkata-hatai disi.

⁵ Pajuppang ma si Paulus di pasar i dohot akka halak na mangihutton ajaran Epikurus dohot Stoa. Maralo do dua aliran filsafat on. b Jadi dang mura di si Paulus paposson roha ni nasida. Halak na porsea tu ajaran Epikurus manganggap hangoluan i dang dirancang, alai terjadi secara kebetulan do. Hira songon on do pandangan ni nasida taringot hangoluan: “Dang adong na porlu dihabiari sian Debata. Dang adong be na haccit molo dung mate. Pasti boi do diraih akka na denggan. Pasti boi do tahadapi akka na jahat.” Molo halak na mangihutton ajaran Stoa, dipakke do nalar dohot logika. Jala dang porsea nasida molo Debata sada Pribadi. Halak na mangihutton aliran na dua on dang porsea tu haheheon na diajarhon sisean ni Kristus. Jadi ajaran ni dua aliran on dang sesuai tu hasittongan, songon na dibaritahon si Paulus.

6, 7. Songon dia do tanggapan ni akka halak Junani na malo i tu ajaran ni si Paulus, jala songon dia do tanggapan ni akka halak saonari tu barita na uli?

⁶ Boha do tanggapan ni akka halak Junani na malo i tu ajaran ni si Paulus? Adong do na mandok si Paulus, “sigodang hata”. (Ida keterangan tambahan sian nwtsty-IN di Ul. 17:18.) Taringot istilah on, sahalak pakar mandok, “Di bahasa Junani, hata on mulana dipakke lao mandok pidong na gelleng na habang tusan tuson lao mangallang biji-bijian na marserakan. Alai di pudian ni ari dipakke do on lao mandokkon halak na papungu-punguhon sisa makanan dohot sampah na di pasar. Dipakke do muse hata on gabe tudosan lao mandok halak na papungu-punguhon informasi sian godang sumber, alai dang boi mambahen kesimpulan na sittong.” Jadi dibahen halak na malo i do gelar ni si Paulus halak na oto, na holan mangulangi hata ni halak. Nang pe songon i, dang menyerah si Paulus.

⁷ Sarupa do i tu situasitta saonari. Jotjot do Saksi Jahowa dipahata-hata halak, jala dibahen julukan lao menghina ala sian Bibel haporseaotta. Misalna, diajarhon akka guru do evolusi, didok nasida do i sittong ala dihaporseai halak na malo. Seolah-olah didok nasida do oto halak na so porsea tu evolusi. Gabe dianggap halak ma hita “sigodang hata” tikki tapaboa sian Bibel akka bukti na patuduhon adong Panoppa. Nang pe songon i, dang menyerah hita. Pos do rohatta paboahon molo sude na adong di alam semesta on ditoppa Pribadi na malo, na margoar Debata Jahowa.—Pgk. 4:11.

8. (a) Boha do muse tanggapan ni akka halak na mambege si Paulus? (b) Tudia do si Paulus diboan? (Ida surat na di toru.)

⁸ Adong muse halak di Atena i mandok, “Debata na asing do ra na dipaboa  ibana.” (Ul. 17:18) Tutu do memang debata na asing na dipaboa si Paulus? Dang boi sepele si Paulus tu tanggapan ni nasida i, alana hea do tuduhan na sarupa mambahen si Sokrates diadili jala dihukum mate piga-piga abad sebelumna. Alani i, diboan ma si Paulus tu Areopagus. c Jala disuru nasida ma ibana patorakkon ajaran na baru dibege halak Atena i. Songon dia do cara ni si Paulus patorakkon ajaran i tu halak na so mananda Surat na Badia?

9-11. (a) Songon dia do si Paulus mangalului topik na cocok tu akka halak na dijuppangi ibana? (b) Songon dia do hita boi maniru si Paulus tikki marbarita?

⁹ Taingot ma, marsak do si Paulus mangida akka patung na di Atena. Alai dang pittor dimuruki ibana akka halak alani patung i. Tetap do ibana tenang jala manat makkatai. Berupaya do ibana mangalului topik na menarik. Didok do, “Hamu akka halak Atena, huida di sude ulaonmuna, dihabiari hamu do akka debatamuna lobi sian na dibahen halak na asing.” (Ul. 17:22) Jadi  hira na didok si Paulus do tu nasida, ‘Huida semangat do hamu na beribadat i.’ Dipuji si Paulus do semangat ni nasida. Diboto si Paulus do na so diattusi nasida dope manang aha, ala nungnga dililuhon ajaran na so sittong. Alai lomo do ra roha ni nasida manjalo barita na uli. Mungkin diingot si Paulus do songon dia ibana najolo. Diulahon ibana do na sala ala ‘so porsea dope ibana jala hurang parbinotoanna’.—1 Tim. 1:13.

¹⁰ Dung dapot ni si Paulus topik na menarik tu halak Atena i jala dipuji semangat ni nasida beribadat, disinggung ma sada langgatan, tarsurat do disi “Tu Debata na So Tatanda”. Menurut sada sumber, “Biasana dibahen halak Junani dohot akka bangso na asing do langgatan tu ‘akka debata na so ditanda nasida’. Tujuanna asa unang muruk dewa na asing na so ditanda i, abbetak adong dewa na merasa diabaihon tikki beribadat nasida.” Jadi sian langgatan i, diakkui halak Atena do sebenarna adong debata na so ditanda nasida. Sian i ma dalan ni si Paulus marbarita. Didok ibana do, “Debata na disomba hamu jala na so ditanda hamuna i do na lao paboaokku tu hamu.” (Ul. 17:23) Halus do cara ni si Paulus mangajak nasida marpikkir, alai hona do i tu roha. Gabe terbukti ma na so tutu tuduhan ni halak i. Alana dang debata na baru manang dewa na asing na dipaboa si Paulus, alai Debata na sittong do, i ma Debata na so ditanda nasida.

¹¹ Songon dia do caratta maniru si Paulus tikki marbarita? Tapakke ma daya pengamatan. Taida ma atik adong tanda na patuduhon ringgas parjabu i beribadat. Mungkin adong do lambang manang benda keagamaan na dipakke nasida, dipajang di jabu manang di alaman. Boi ma tadokkon, ‘Diida hami ringgas do Amang/Inang beribadat ate. Las do rohakku makkata-hatai dohot halak na berminat tu hal rohani.’ Molo denggan tapuji manang taakkui na ringgas nasida beribadat, dapotta ma topik na cocok tu nasida. Taingot ma, tujuanta dang lao menghakimi haporseaon ni nasida. Godang do akka donganta sebelumna pe porsea tu ajaran ni agama na so sittong, alai tulus rohana manomba Debata.

12. Songon dia do si Paulus menyesuaihon carana mangajari tu halak Atena?

¹² Nga diboto si Paulus be topik na cocok tu nasida. Alai boha ma carana asa tetap ditangihon akka halak ibana? Diboto si Paulus do na malo halak na mambege ibana i, diparsiajari nasida do filsafat Junani. Alai dang ditanda nasida Surat na Badia. Jadi disesuaihon ma carana mangajari. Na parjolo, dang pittor dikutip ibana isi ni Surat na Badia i. Na paduahon, dilibatton do dirina tu nasida, sipata didok ibana do hata “hita”. Na patoluhon, dikutip do hata na adong di puisi ni halak Junani. Gabe diboto nasida ma adong do ajaran ni si Paulus i di karya tulisan ni nasida. Saonari taida ma aha na dipaboa si Paulus taringot Debata na so ditanda halak Atena i.

13. Songon dia do si Paulus patorakkon taringot asal mula ni alam semesta on, jala aha do inti ni hatana i?

 ¹³ Debata do na manoppa alam semesta on. Si Paulus mandok, “Debata na manoppa portibi on dohot nasa isina, Ibana do Tuan ni langit dohot tano on. Dang di inganan na dibangun jolma Ibana tinggal.” d (Ul. 17:24) Jadi, adong do na merancang alam semesta on, dang terjadi secara kebetulan i. Debata na sittong i ma na manoppa sudena. (Ps. 146:6) Dang sarupa Debata na manoppa langit dohot tano on tu akka dewa songon dewi Atena. Molo akka dewa bergantung tu kuil dohot langgatan do hamuliaonna. Alai anggo Debata na sittong i, dang maringanan di kuil na binahen ni jolma Ibana, haru langit dohot tano on pe dang siat ingananna. (1 Raj. 8:27) Jadi sian hata ni si Paulus i takkas do dipaboa ibana, dao do ussangap Debata na sittong i sian sude patung na binahen ni jolma na adong di akka kuil.—Jes. 40:18-26.

14. Songon dia do si Paulus patuduhon molo Debata dang bergantung tu jolma?

¹⁴ Debata dang bergantung tu na diulahon jolma. Jotjot do dibahen halak baju na mewah tu patung na disomba nasida. Diboan do muse akka hadiah na arga, sipanganon dohot siinumon, seolah-olah porlu sudena i di patung i. Alai adong do deba sian filsuf Junani na manangihon si Paulus i porsea dang porlu di Debata manang aha pe. Setuju do nasida tu hata ni si Paulus na mandok, “Dang hurangan manang aha [Debata] jala dang porlu urupan ni jolma Ibana.” Jadi dang adong barang na boi dilehon jolma tu Debata, justru Ibana do na “mangalehon hangoluan, hosa, ro di saluhutna tu sude jolma”, termasuk mataniari, udan, dohot tano na subur. (Ul. 17:25; 1 Mus. 2:7) Jadi, Debata na mangalehon saluhutna i dang bergantung tu jolma.

15. Songon dia do cara ni si Paulus paboahon na sala pandangan ni halak Atena, jala aha do parsiajaranna tu hita?

 ¹⁵ Debata do na manoppa sude jolma. Dianggap halak Atena do na ussangap nasida sian halak na so Junani. Dang sesuai cara pandang ni nasida i tu Bibel. (5 Mus. 10:17) Dipaboa si Paulus ma taringot i tu nasida, alai manat jala marbisuk do ibana. Si Paulus mandok, “Sian sada jolma do dibahen [Debata] sude bangso.” Pasti gabe marpikkir do nasida tikki dibege hatana i. (Ul. 17:26) Si Paulus merujuk tu catatan na di bukku 1 Musa taringot si Adam, ompu ni sude jolma. (1 Mus. 1:26-28) Ala pinoppar ni si Adam do sude jolma, jadi dang adong suku manang bangso na ussangap sian na asing. Pasti mura do diattusi halak hata ni si Paulus i. Parsiajaranna, nang pe ikkon manat jala taupayahon asa masuk akkal barita na tapasahat, alai unang ma gabe dang tapaboa ajaran na sasittongna sian Bibel ala mabiar hita dang sesuai i tu lomo ni roha ni nasida.

16. Aha do tujuan ni Debata manoppa jolma?

¹⁶ Lomo do roha ni Debata asa jonok jolma tu Ibana. Nungnga leleng diselidiki akka filsuf tujuan ni jolma ditoppa. Alai sahat tu tikki i dang boi dipatorang nasida aha tujuan na sebenarna. Alai anggo si Paulus, boi do takkas dipaboa tujuan ni Debata manoppa jolma. Didok si Paulus, “Lomo do roha ni Debata dilului akka jolma Ibana. Molo marsitutu nasida mangalului, juppang ni nasida ma Ibana. Ai sasittongna, dang dao Ibana sian ganup hita on.” (Ul. 17:27) Jadi boi do sebenarna halak Atena mananda Debata na so ditanda nasida i. Ai dang dao Debata sian akka halak na marsitutu mangalului jala marsiajar taringot Ibana. (Ps. 145:18) Dipakke si Paulus do hata “hita” di ayat i. On patuduhon, ibana pe ‘marsitutu do mangalului’ Debata.

17, 18. Boasa ikkon jonok jolma tu Debata, jala aha do na boi taparsiajari sian cara ni si Paulus mangajari nasida?

 ¹⁷ Ikkon lomo do roha ni jolma jonok tu Debata. Didok si Paulus do, “Alani Ibana do hita gabe adong, marhosa, jala mangolu.” Piga-piga pakar mandok, hata ni si Epimenides do na disinggung si Paulus dison. Ibana sahalak penyair sian Kreta di abad na paonomhon SM jala tokoh penting di agama ni halak Atena. Dipaboa si Paulus do alasan na asing boasa ikkon jonok jolma tu Debata. Ibana mandok, “Songon na didok di akka uppasa, ‘Ai sude do hita anakkonna.’” (Ul. 17:28) Jadi ikkon lomo do roha ni jolma jonok tu Debata ala Ibana do Bapakta, Ibana do na manoppa jolma na parjolo, jala pinoppar ni jolma na parjolo i do hita sude. Asa tertarik akka halak mambege si Paulus, dikutip do langsung hata sian karya tulisan ni halak Junani, ala diargai nasida do i. e Hita pe tatiru do si Paulus. Sipata takutip do hata sian bukku sejarah, ensiklopedia, manang karya referensi na jotjot dipakke halak. Misalna, tikki paboahon asal-usul ni sada kebiasaan manang perayaan ni agama palsu, takutip do hatorangan sian sumber na dihaporseai asa lam pos roha ni halak.

¹⁸ Nungnga dipaboa si Paulus be hasittongan taringot Debata jala disesuaihon do carana mangajari tu halak Atena. Aha ma na diharappon si Paulus diulahon halak Atena dung mambege hatana i? Langsung do dipaboa tu nasida.

19, 20. (a) Songon dia do si Paulus patuduhon na massai oto halak na manomba patung? (b) Aha do na porlu diulahon akka halak na mambege ajaran ni si Paulus i?

¹⁹ Saonari, dipaboa si Paulus ma aha na ikkon diulahon akka halak na mambege i. Dikutip ma muse hata sian tulisan na di bahasa Junani. Ibana mandok, “Attong, ala anak ni Debata do hita, unang ma tapikkir na songon patung na dipature tangan ni jolma Debata i, na dibahen sian mas, perak, manang batu.” (Ul. 17:29) Jadi, dang mungkin bahenon ni Debata dirina gabe patung na dibahen jolma. Ai haru jolma pe Debata do na mambahen. Hata ni si Paulus i patuduhon massai oto do molo adong jolma na manomba patung, ai jolma i sandiri do na mambahen i. (Ps. 115:4-8; Jes. 44:9-20) Tikki didok si Paulus, “unang ma tapikkir”, on patuduhon berupaya do ibana asa unang karas paingotton nasida.

²⁰ Dipaboa si Paulus do muse, “Tutu, hea do dipasombu Debata jolma dang mananda Ibana [hea do dipasombu Debata jolma marpikkir na lomo roha ni Debata tu akka halak na manomba patung]. Alai saonari, dipangido Debata do tu sude jolma asa muba nasida, manang didia pe nasida maringanan.” (Ul. 17:30) Mungkin tarsonggot do nasida tikki dijujui si Paulus nasida muba. Alai gabe diboto nasida ma adong do pangidoan ni Debata sian nasida jala ikkon dipartanggung jawabhon do i di jolo ni Debata. Ikkon dilului nasida do Debata,  diparsiajari ise Ibana sasittongna, jala disesuaihon pangalahona tu hasittongan. Jadi ikkon muba do nasida jala unang be manomba patung.

21, 22. Aha do na didok si Paulus di bagian panutup ni hatana, jala boasa hona tu rohatta hatana i?

²¹ Di bagian panutup ni hatana, didok si Paulus ma, “Nungnga ditottuhon Debata andigan arina lao manguhumi portibi on. Adil do cara ni Ibana manguhumi jala nungnga dipillit Ibana halak na lao mangulahon i. Dipahehe Debata do halak na dipillit i sian na mate, asa porsea sude jolma na tutu ro ari panguhuman i.” (Ul. 17:31) Jadi tikki didok Ari Panguhuman, on ma alasan na kuat di nasida lao muba jala mangalului Debata. Dang dipaboa si Paulus ise goar ni Hakim na dipillit Debata lao mangulahon i, alai dipaboa do molo Hakim i hea gabe jolma, mate, jala nungnga dipahehe Debata.

²² Hona do tu rohatta hata panutup ni si Paulus. Nungnga taboto be Jesus Kristus do Hakim na dipillit Debata. (Joh. 5:22) Taboto do muse leleng ni Ari Panguhuman i 1.000 taon jala satokkin nai nama masa i. (Pgk. 20:4, 6) Dang mabiar hita tu Ari Panguhuman i, ala taboto marhite ari i do Debata parohon godang pasu-pasu tu halak na setia. Pos do rohatta na lao saut janji on di ari na naeng ro, ai Jesus sandiri pe nungnga dipahehe sian na mate!

23. Boha do tanggapan ni akka halak tu hata ni si Paulus?

²³ Marragam do tanggapan ni akka halak tu hata ni si Paulus. Adong do na mangarehei ibana tikki dipaboa taringot haheheon. Adong do muse na manolak, jala sopan mandok, “Sahali nai ma patorang taringot tusi.” (Ul. 17:32) Alai adong do na olo manjalo jala gabe porsea. “Uppamana si Dionisius sahalak hakim sian pengadilan Areopagus, dohot sahalak borua na margoar si Damaris jala godang dope na asing.” (Ul. 17:34) Sering do tajuppangi tanggapan sisongon i tikki marbarita. Adong do na mangarehei hita. Adong do muse na secara sopan manolak hita. Alai massai las do rohatta tikki juppang dohot halak na olo manjalo barita i jala gabe porsea.

24. Aha do na boi taparsiajari sian hata ni si Paulus na di Areopagus?

²⁴ Molo tarimangi hata ni si Paulus i, boi ma hita marsiajar songon dia carana mamillit topik na menarik tu akka halak, songon dia asa masuk akkal jala pos roha ni nasida tu barita i. Porlu do muse tasesuaihon caratta mangajari. Asing ni i porlu do hita sabar jala manat makkatai tu akka halak naung leleng mangihutton ajaran na so sittong. Adong do muse parsiajaran na penting. Unang ma tatahan diritta paboahon ajaran na sasittongna sian Bibel, holan ala mabiar hita dang sesuai i tu lomo ni roha ni nasida. Molo tatiru cara ni si Paulus, gabe denggan ma caratta mangajari tikki marbarita. Asing ni i, akka pengawas di huria pe boi ma gabe lam malo mangajari di huria. Molo taulahon sudena i, nungnga siap be hita lao mangurupi halak na asing ‘mangalului Debata’.—Ul. 17:27.