1-3. (a) Aha do masalah na mambahen huria di abad na parjolo gabe dang marsada? (b) Aha ma na boi taparsiajari sian bukku Ulaon ni Apostel taringot masalah on?

 NUNGNGA mulak be si Paulus dohot si Barnabas tu Antiokia Siria sian pardalanan utusan injil ni nasida na parjolo. Massai las do roha ni nasida ala nungnga ‘dibukka Debata dalan tu akka bangso na asing asa boi nasida porsea tu Ibana’. (Ul. 14:26, 27) Nungnga sahat be barita na uli i di Antiokia, jala “lam godang” ma halak na so Jahudi na tamba di huria na adong disi.—Ul. 11:20-26.

² Sahat ma tu Judea barita naung lam godang halak na so Jahudi tamba di huria i. Alai dang sude marlas ni roha. Gabe diparsoalhon nasida do taringot sunat, jala gabe masalah na balga do i. Adong na marpikkir, songon dia do seharusna hubungan ni halak Kristen Jahudi dohot halak na so Jahudi? Boha do seharusna cara pandang ni halak Kristen na so Jahudi tu Patik ni si Musa? Alani masalah on, gabe terancam do hadameon di huria. Boha ma carana pasaehon masalah on?

³ Taida ma songon dia masalah on dipasae di bukku Ulaon ni Apostel, jala godang do parsiajaranna tu hita. Sian i gabe taboto ma songon dia cara na denggan lao pasaehon masalah na mambahen huria dang marsada.

4. Aha do ajaran na sala na dipaboa piga-piga halak Kristen tu akka dongan di tikki i, jala sukkun-sukkun aha do na ro tu pikkiranta?

⁴ Disurat si Lukas do di bukku Ulaon ni Apostel, “Adong ma piga-piga halak na ro sian Judea tu Antiokia. Diajari nasida ma akka dongan sahaporseaon na disi. Didok nasida ma, ‘Dang boi hamu selamat molo dang disunat hamu mangihutton Patik ni si Musa.’” (Ul. 15:1) Memang dang taboto “halak na ro sian Judea” i halak Parise hian do sebelum gabe halak Kristen manang na dang. Alai cara marpikkir ni nasida terpengaruh do tu sekte Parise na terlalu kaku mangihutton Patik ni si Musa. Asing ni i, bisa jadi mangakku do nasida mewakili akka apostel dohot sintua di Jerusalem. (Ul. 15:23, 24) Hape sekitar 13 taon naung salpu, nungnga dipaboa Debata tu si Petrus asa dijalo halak na  so Jahudi gabe halak Kristen. Attong boasa dope diparsoalhon halak Kristen Jahudi sunat sahat tu tikki i? a—Ul. 10:24-29, 44-48.

5, 6. (a) Boasa diparsoalhon halak Kristen Jahudi taringot sunat? (b) Bagian sian parjanjian ni si Abraham do parjanjian sunat? (Ida surat na di toru.)

⁵ Godang do ra alasanna boasa diparsoalhon halak Kristen Jahudi taringot sunat. Olo do ra ala Jahowa na menetappon hukum taringot sunat tu akka bawa, lao patuduhon bangso na istimewa do nasida di Ibana. Asing ni i, hukum taringot sunat pe nga dimulai sian jaman ni si Abraham dohot keluargana. Belakangan dipamasuk do i gabe bagian sian Patik ni si Musa. b (3 Mus. 12:2, 3) Sesuai tu Patik, halak sian bangso na asing pe ikkon disunat do asa boi dohot ambil bagian tu akka perayaan ni halak Israel. Contohna, mangallang sipanganon di ari Paska. (2 Mus. 12:43, 44, 48, 49) Jadi di pandangan ni halak Jahudi molo adong na so disunat, ramun do ibana jala dang boi manomba Debata.—Jes. 52:1.

⁶ Alani i, ikkon togu do haporseaon ni halak Kristen Jahudi, jala serep rohana manjalo pemahaman na baru i. Nga digattihon be parjanjian Patik i tu parjanjian na imbaru. Jadi sasahalak na tubu sian keluarga Jahudi dang otomatis be gabe naposo ni Debata. Halak Kristen Jahudi na tinggal rap dohot halak Jahudi na asing, songon halak Kristen di Judea, ikkon barani do mangihutton Kristus jala manjalo halak na so Jahudi jala na so disunat gabe dongan sahaporseaonna.—Jer. 31:31-33; Luk. 22:20.

7. Aha do na so diattusi “halak na ro sian Judea” i?

⁷ Dang na gabe berubah prinsip ni Debata. Sasittongna tetap do marlakku prinsip na adong di Patik ni si Musa di parjanjian na imbaru. (Mat. 22:36-40) Misalna, di pudian ni ari taringot sunat on pe didok si Paulus do, “Akka na adong di bagasan rohana i do na patuduhon molo ibana halak Jahudi na sittong. Disunat do rohana marhite tondi parbadia, dang mangihutton patik na tarsurat i.” (Rom 2:29; 5 Mus. 10:16) Dang diattusi “halak na ro sian Judea” i taringot on. Sai berkeras do nasida molo na dihalomohon Debata Patik taringot sunat i do. Alai olo do nasida manguba cara marpikkirna?

8. Boasa ikkon diboan masalah taringot sunat tu punguan na mangaradoti organisasi di Jerusalem?

⁸ Disurat si Lukas do muse, “Dialo si Paulus dohot si Barnabas do pandapot ni nasida i [“halak na ro sian Judea”]. Dung lam balga parsalisian i, gabe  disuru akka dongan ma si Paulus, si Barnabas, dohot piga-piga dongan na asing lao tu Jerusalem, asa disukkun nasida tu akka apostel dohot tu akka sintua parsoalan i.” c (Ul. 15:2) Ala sama-sama berkeras nasida, gabe ‘lam balga ma parsalisian i’. Dang boi dipasae huria Antiokia masalah i. Jadi diputusson akka sintua di huria i ma asa dipasahat parsoalan i “tu akka apostel dohot tu akka sintua” na di Jerusalem. Di tikki i nasida ma na gabe punguan na mangaradoti organisasi. Aha ma na boi taparsiajari sian akka sintua na di Antiokia i?

9, 10. Aha do na boi tatiru sian akka dongan na di Antiokia, sian si Paulus dohot si Barnabas?

⁹ Parsiajaran na parjolo, penting do porsea tu organisasi ni Debata. Diboto akka dongan na di Antiokia i do halak Jahudi sude anggota ni punguan na mangaradoti organisasi. Alai porsea do nasida pasti dipasae do masalah i sesuai tu Hata ni Debata, pasti dilehon Jahowa do tu nasida dukungan marhite tondi parbadia, dohot marhite Jesus Kristus, Ulu ni huria Kristen. (Mat. 28:18, 20; Eps. 1:22, 23) Saonari on pe molo adong masalah di huria, tatiru ma halak Kristen na di Antiokia. Pos ma rohatta tu organisasi ni Debata dohot tu Punguan na Mangaradoti Organisasi.

¹⁰ Hita pe porlu do sabar jala serep rohatta. Memang nga dilantik tondi parbadia si Paulus dohot si Barnabas lao marbarita tu bangso na asing. Alai dang dibahen nasida i gabe alasan asa nasida sandiri na pasaehon masalah sunat i. (Ul. 13:2, 3) Asing ni i, didok si Paulus do di pudian ni ari, “Ala mandapot parnidaan do au umbahen na lao [tu Jerusalem].” On patuduhon diihutton nasida do arahan ni tondi parbadia. (Gal. 2:2) Saonari pe, berupaya do akka sintua asa serep rohana jala sabar tikki adong masalah na boi mambahen huria dang marsada.  Dang olo nasida mamaksahon pandapotna sandiri. Alai, dilului nasida do bantuan sian Jahowa. Diperiksa nasida do Bibel dohot akka petunjuk sian naposo haposan.—Plp. 2:2, 3.

11, 12. Boasa ikkon sabar hita paimahon Jahowa pasaehon sada parsoalan?

¹¹ Sipata ikkon sabar do ra hita paimahon Jahowa mangalehon petunjuk na lebih jelas taringot sada parsoalan. Taingot ma akka dongan di jaman ni si Paulus i. Ikkon dipaima nasida do sekitar 13 taon asa dipasae Jahowa parsoalan taringot sunat, mulai sian dimiahi si Kornelius taon 36 M sahat tu taon 49 M. Boasa massai leleng? Mungkin ala dilehon Debata dope kesempatan tu halak Jahudi lao menyesuaihon cara pandang ni nasida tu perubahan na balga on. Pasti dang mura di nasida maninggalhon parjanjian sunat naung didalatton saleleng 1.900 taon mulai sian si Abraham, ompu ni nasida.—Joh. 16:12.

¹² Sada hasangapon do di hita ala boi diajari jala diurupi Jahowa, Ama na burju jala na sabar. Massai denggan do hasilna jala godang manfaatna tu hita. (Jes. 48:17, 18; 64:8) Alani i molo adong perubahan di organisasi manang penyesuaian taringot pemahamanta, unang ma ginjang rohatta jala tapaksahon pandapotta sandiri. (Pjm. 7:8) Molo hira na maol dope tahilala mangihutton akka penyesuaian i, martangiang ma hita mangido bimbingan ni Jahowa, jala tarimangi ma akka prinsip na di Ulaon ni Apostel bindu 15 i. d

13. Songon dia do hita maniru Jahowa tikki mangurupi parsiajar Bibel?

¹³ Hita pe porlu do sabar tikki mangajarhon Bibel tu akka halak na maol dope maninggalhon ajaran na so sittong, manang kebiasaan na sala naung leleng diulahon nasida. Porlu do tikki di nasida lao muba marhite bantuan ni tondi parbadia. (1 Kor. 3:6, 7) Asing ni i, boi do tatangiakkon taringot i. Molo sabar hita paimahon, urupan ni Debata ma hita mamboto songon dia cara na denggan mangurupi nasida.—1 Joh. 5:14.

14, 15. Aha do na diulahon huria Antiokia tu rombongan ni si Paulus dohot si Barnabas, jala songon dia do nasida patoguhon roha ni akka dongan na asing?

¹⁴ Disurat si Lukas ma muse di bukku Ulaon ni Apostel, “Dung didongani akka dongan na di huria i nasida satokkin di pardalanan, ditorusson nasida ma muse pardalanan i mangalewati Penisia dohot Samaria. Diceritahon nasida ma tu akka dongan na disi songon dia akka halak na sian bangso na asing mambahen hamubaon lao manomba Debata. Mambege i, las situtu ma roha ni akka dongan i.” (Ul. 15:3) Tindakan ni akka dongan na olo manaruhon rombongan ni si Paulus dohot si Barnabas, patuduhon holong ni roha ni nasida. Berharap do nasida asa dipasu-pasu ulaon ni si Paulus dohot akka donganna. Teladan na denggan do akka dongan na di Antiokia on di hita. Alani i dihormati hamu do akka dongan di huria, “tarlumobi akka sintua . . . na  mangajarhon hata ni Debata sian nasa gogona”?—1 Tim. 5:17.

¹⁵ Saleleng di pardalanan, diceritahon rombongan i do akka pengalaman na patoguhon roha taringot halak na so Jahudi na gabe sisomba Jahowa. Pasti pengalaman i mambahen las roha ni akka dongan na di Penisia dohot Samaria. Adong do mungkin sian nasida halak Kristen Jahudi na melarikan diri tu inganan i dung mate si Stepanus. Saonari on pe molo taida laporan taringot ulaon marbarita, gabe lam dipatogu do haporseaotta tarlumobi tikki adong masalahta. Jadi denggan ma taparrohahon laporan na dipaboa di akka parpunguan Kristen dohot kisah hidup di publikasi tercetak manang di jw.org.

16. Aha do buktina masalah na balga do sunat i?

¹⁶ Nga sahat be rombongan na sian Antiokia i di Jerusalem. Daona hira-hira 550 kilometer ma tu selatan. Didok di Bibel, “Dung sahat nasida di Jerusalem, denggan do nasida dijalo akka dongan na di huria, akka apostel, dohot akka sintua. Dung i, diceritahon nasida ma akka ulaon na dibahen Debata marhite nasida.” (Ul. 15:4) Boha do tanggapan ni na asing? “Jongjong ma piga-piga halak sian hundulan ni nasida. Sian sekte Parise hian do nasida alai nungnga gabe halak na porsea. Didok nasida ma, ‘Ikkon disunat do nasida jala ikkon diihutton nasida do Patik ni si Musa.’” (Ul. 15:5) Jadi, masalah na balga do sunat i jala ikkon dipasae.

17. Ise do punguan na mangaradoti organisasi di Jerusalem di tikki i, jala boasa dohot “akka sintua” anggotana?

¹⁷ Diihutton nasida do prinsip di Poda 13:10 na mandok, “Dapotan bisuk do halak na manangihon poda.” Jadi “marpungu ma akka apostel dohot akka sintua lao mambahas parsoalan i”. (Ul. 15:6) Sarupa ma “akka apostel dohot akka sintua” i songon Punguan na Mangaradoti Organisasi saonari on. Nasida ma na gabe wakil ni sude huria Kristen. Boasa “akka sintua” di tikki i rap melayani dohot akka apostel? Taingot ma nungnga dipamate Apostel Jakobus, jala dang leleng dukkon i dipenjarahon do Apostel Petrus. Mungkin khawatir do akka dongan di tikki i molo dibahen na sarupa tu akka apostel na asing. Jadi porlu do dipillit akka bawa na dimiahi asa tetap adong na mengawasi akka huria.

18, 19. Aha do na didokkon si Petrus tu nasida, jala aha do na boi disimpulhon akka halak na mambege i?

 ¹⁸ Disurat si Lukas ma muse, “Dung leleng dibahas nasida parsoalan i, jongjong ma si Petrus jala ninna ma tu nasida, ‘Hamu akka dongan, takkas do diboto hamu, sian mulana dipillit Debata do au sian tonga-tongamuna lao paboahon barita na uli tu akka bangso na asing asa gabe porsea nasida. Jala nungnga dipatuduhon Debata siboto roha i, na lomo rohana tu nasida. Ai dilehon Ibana do tondi parbadiana tu nasida songon na dilehon tu hita. Dang dibeda-bedahon Debata hita dohot nasida. Alai dipabadia Debata do roha ni nasida alani haporseaon ni nasida.’” (Ul. 15:7-9) Menurut sada karya referensi, hata Junani na diterjemahon gabe “parsoalan” na di ayat 7 i, boi do lapatanna tindakan lao “mangalului” jala manat mamareso masalah i. Nang pe dang sarupa pandapot ni akka dongan, alai bebas do nasida paboahon pandapotna be.

¹⁹ Dipaingot si Petrus ma muse nasida sude tu peristiwa na masa taon 36 M. Ai ibana sandiri do di tikki i na parjolo sahali mangurupi halak na so Jahudi jala na so marsunat manomba Jahowa, i ma si Kornelius dohot keluargana. Jadi sian i boi ma disimpulhon nasida, dang dibeda-bedahon Jahowa be halak Jahudi dohot na so Jahudi, jala dang marhak jolma mangulahon i. Alani haporseaon tu Jesus Kristus nama sasahalak didok mangulahon na sittong, dang ala mangihutton Patik ni si Musa.—Gal. 2:16.

20. Boasa tindakan ni halak na mamaksahon sunat i sebenarna ‘manguji Debata’?

²⁰ Dang adong sian nasida na boi mandok na so tutu hata ni si Petrus i. Ala diboto nasida do Debata na manuru ibana mangulahon i marhite tondi parbadia. Alani i ma didok si Petrus, “Attong boasa ma diuji hamu Debata? Boasa pola talehon boban na borat tu akka sisean i? Hape haru hita dohot akka omputta pe dang tolap mamboan boban i. Alai porsea do hita, holan marhite asi ni roha ni Tuan Jesus na massai balga i do hita boi malua. Jala nasida pe songon i do dihaporseai.” (Ul. 15:10, 11) Jadi si Petrus mandok, halak na mamaksahon sunat i sebenarna ‘manguji Debata’ do manang manguji kesabaran ni Debata. Sai dipaksahon nasida do aturan na di Patik i tu halak na so Jahudi, hape halak Jahudi i sandiri pe dang boi mangulahon sudena. Justru layak do nasida dihukum mate alani i. (Gal. 3:10) Seharusna mandok mauliate do halak Jahudi, ai alani asi ni roha ni Debata do umbahen na boi nasida malua marhite Jesus.

21. Aha do na dipaboa si Barnabas dohot si Paulus tu akka jolma na marpungu i?

²¹ Hona do tu roha ni akka halak hata ni si Petrus i. “Gabe hohom ma sude halak na pungu i.” Dung i, dipaboa si Barnabas dohot si Paulus ma “akka tanda halongangan na dibahen Debata marhite nasida di tonga-tonga ni akka bangso”. (Ul. 15:12) Sian i boi ma diida akka apostel dohot akka sintua sude bukti na dipasu-pasu Debata ulaon ni nasida. Jala nungnga siap be nasida mambahen keputusan taringot sunat.

22-24. (a) Songon dia do Punguan na Mangaradoti Organisasi saonari mangihutton teladan ni akka apostel dohot akka sintua najolo? (b) Songon dia do akka sintua mangihutton pengaturan teokratis?

 ²² Saonari pe tikki rapat Punguan na Mangaradoti Organisasi, dilului nasida do petunjuk na sesuai tu prinsip ni Bibel jala martangiang mangido tondi parbadia. (Ps. 119:105; Mat. 7:7-11) Asing ni i, leleng sebelum rapat nungnga ditottuhon nasida bahan na lao dibahas, asa adong tikki ni nasida lao mamikkirhon jala manangiakkon i. Molo diulahon i, boi ma dibahen keputusan sesuai tu lomo ni roha ni Debata. (Poda 15:28) Saleleng rapat, leluasa jala respek do nasida mangalehon pandapotna. Jala sering do dibukka Bibel saleleng pembahasan i.

²³ Akka sintua na di huria pe porlu do maniru teladan ni nasida. Molo adong sada masalah na so boi dipasae di rapat ni sintua, boi do disukkun nasida i tu kantor cabang manang tu pengawas wilayah. Jala molo tetap dope dang boi dipasae, boi ma dibahen kantor cabang surat tu Punguan na Mangaradoti Organisasi.

²⁴ Dipasu-pasu Jahowa do akka halak na rendah hati, setia, jala sabar mangihutton pengaturan teokratis on. Songon na lao tabahas di pasal na mangihut, dipasu-pasu Debata do huria Kristen i. Dibahen do lam tamba godang sisean, dibahen do nasida mardame jala marsada.