HANGOLUAN NI HALAK KRISTEN
Cara Mamangke Brosur Tangihon ma Debata
Brosur Tangihon ma Debata dibahen asa mura hita mangajarhon hasintongan tu halak na so pola malo manjaha. Ganup dua halaman di parsiajaran on, paradehon gombar dohot tanda panah asa mura manguduti sada parsiajaran tu parsiajaran na mangihut.
Dos do gombar di brosur Tangihon ma Debata Asa Mangolu Salelenglelengna dohot brosur Tangihon ma Debata. Alai, gumodang do hatorangan di buku Tangihon ma Debata Asa Mangolu Salelenglelengna, jala boi do on diulas dohot sasahalak na malo manjaha. Buku on somalna dipangke penyiar tingki mangurupi parsiajar Bibelna na mamangke buku Tangihon ma Debata. Di pigapiga halaman, adong do kotak na marisi hatorangan na boi diulas hamu dohot nasida.
Boi do lehononmu brosur na asing, nang pe ndang brosur i na disarhon di bulan i. Tingki manguluhon parsiajaran Bibel, pangke ma gombar laho patorangkon hatorangan sian Bibel. Bahen ma sungkunsungkun asa diantusi parsiajaran i. Jaha jala ulas ma angka ayat di toru ni halaman ni buku i. Dung sae mangulas sude isi ni brosur on, parsiajari hamu ma buku Aha do na Diajarhon Bibel tu Hita? laho mangurupi ibana asa maju jala tardidi.