Jago do pendidikan na sian Bibel. Alana boi do i mambahen gabe lam denggan ngolu ni sasahalak. Taida ma jo dua pengalaman on.

SI RICARDO: Tikki marumur 15 taon au, mura do au dipengaruhi halak jala nga gabe anggota ni sada geng au. Alani pengaruh ni nasida, sappe marcita-cita ma au asa boi dipenjara saleleng sappulu taon! Aneh do memang cita-citakkon. Alai molo di hutakku, gabe dipuji-puji do halak na hea dipenjara. Jadi lomo rohakku asa boi gabe songon nasida.

Sarupa do au songon anggota geng na asing, marnarkoba, mangulahon seks na so patut, jala mangulahon kekerasan. Di sada borngin, masitembakan ma hami dohot geng na asing. Nga hurippu mate nama au, hape selamat do au. Mulai sian kejadian i, gabe hupikkiri ma aha tujuan ni ngolukku. Bertekad ma au lao muba, alai boha carana? Ise na boi mangurupi au?

Hampir sude do keluargakku dang bahagia, godang masalah ni nasida. Alai adong sada tulangku na burju. Burju do halak i sekeluarga jala diihutton nasida do na didok Bibel. Hea do dipaboa nasida tu au, Jahowa do goar ni Debata. Jadi dung kejadian i, martangiang ma au tu Jahowa. Hujou ma goarna jala hupangido ma asa diurupi Ibana au. Marsogotna i ro ma Saksi Jahowa tu jabu, tarsonggot hian do au. Mulai sian i, diurupi ibana ma au marsiajar Bibel.

Dang leleng dukkon i, ro ma tantangan na balga. Ditelefon donganku najolo ma au jala diajak nasida ma au asa rap dohot nasida. Alai hutolak do pangidoan ni nasida i, nang pe maol mangulahon i. Bertekad do au lao torus marsiajar Bibel jala godang do manfaat ni i tu au. Lam denggan do ngolukku jala bahagia do au.

Najolo hutangiakkon do tu Debata asa boi au dipenjara saleleng sappulu taon. Alai untung ma dang saut i. Di pudian ni ari, hutangiakkon ma tu Debata asa boi au gabe parbarita na uli sepenuh waktu pinomatna sappulu taon. Lomo do rohakku mangurupi akka halak, alana nga huhilala manfaatna diurupi halak na asing. Dialusi Debata do tangiakki, nungnga 17 taon au gabe parbarita na uli sepenuh waktu.

Hape godang do dongan di gengku najolo na dipenjara sappe martaon-taon. Adong do tong naung mate. Najolo sangap do au tu halak sisongon i. Mandok mauliate do au tu tulangku sekeluarga, ala barani nasida dang mangihutton akka halak jala mangihutton Hata ni Debata. Na paling penting, mandok mauliate do au tu Debata, ala dipatudu Ibana songon dia carana asa lam denggan ngolukku.

 SI ANDRES: Tubu jala magodang di daerah na kumuh do au. Hampir sude do halak disi marnarkoba, pareman, pambunu, jala pelacur. Sering do bapa minum-minum jala kecanduan kokain do ibana. Sering do bapa dohot omak marbadai.

Poso hian dope au tikki mulai minum-minum dohot marnarkoba. Sering do au kaluar sian jabu lao manakko jala manggadis na hutakko i. Di pudian ni ari, berusaha ma bapa asa lam kompak tu au, alai sala do carana. Diajari ibana do au menyeluduppon narkoba dohot barang terlarang na asing tu negaranami jala boha carana manggadis i. Hatop do godang hepengku sian i. Di sada tikki, ro ma polisi tu jabunami jala ditakkup ma au. Divonis ma au lima taon penjara alani kasus percobaan pembunuhan.

Tikki pagi-pagi, adong ma hubege pengumuman na dipaboa di penjara i. Diundang do ninna akka narapidana dohot tu diskusi Alkitab na dibahen Saksi Jahowa. Jadi dohot ma au tu diskusi i. Masuk akkal do pembahasanna, jadi marsiajar Bibel ma au dohot Saksi Jahowa i. Dang dipilliti nasida ajaran ni Bibel na dia na lao diihutton nasida. Alai diajarhon nasida do standar moral ni Debata na timbo.

Gabe sadar ma au, ikkon diurupi do au asa boi muba. Apalagi adong piga-piga napi na mangancam au, ala dang lomo roha ni nasida marsiajar Bibel au. Jadi martangiang ma au tu Debata asa margogo jala bijak. Dung i diurupi Jahowa ma au, gabe barani ma au marbarita tu akka napi na asing.

Dung dapot tikkina au dibebashon, gugup hian do huhilala. Alani gugupna, gabe hira na tumagon ma huhilala torus dipenjara. Jadi tikki kaluar au sian penjara i, godang do napi na mandada au. Jala adong do na tersenyum sambil mandok, “Selamat jalan da pak pandita.”

Mandok mauliate do au tu Debata ala dihaholongi Ibana do au jala dang marnaloja Ibana mangurupi au. a Dang tarbayakkon au songon dia ngolukku molo dang hujalo pendidikan na sian Debata.