Sada cita-cita ni Perserikatan Bangsa-Bangsa (PBB) i ma, asa bekerja sama sude halak di portibi on, mangargai hak asasi ni na asing, jala manjaga lingkungan hidup. Boasa penting on? Songon on ma na disurat si Maher Nasser sahalak pejabat PBB di UN Chronicle, “Sarupa do masalah ni sude halak di portibi on. Contohna, perubahan iklim, kejahatan, lam godang ketidakadilan, konflik na so marnasae, lam godang halak na mengungsi, terorisme, sahit na menular dohot masalah na asing.”

Adong halak na terkenal di portibi on na mandok, ikkon sada do pamarettaon na mangarajai portibi on. Contohna songon na didok sahalak filsuf, pujangga jala negarawan Italia na margoar si Dante (1265-1321). Asing ni i, adong do muse sahalak fisikawan na margoar si Albert Einstein (1879-1955). Pos do roha ni si Dante dang boi aman jala dame portibi on molo godang na mamaretta. Disinggung ibana do hata ni Jesus na mandok, “Molo tarbagi jala marbadai sada harajaon, pasti hancur do i.”—Lukas 11:17.

Saleleng Porang Dunia II adong dua bom atom na meledak. Dung sae porang i, dibahen si Albert Einstein ma surat tu Majelis Umum PBB. Didok ibana disuratna, “Asa boi aman portibi on, ikkon hatop do PBB bertindak lao mambahen asa holan sada pamarettaon na mangarajai sude portibi on.”

Alai molo tung pe holan sada pamarettaon na mangarajai sude portibi on, boi do nasida jujur mamaretta jala burju? Jala tolap do nasida pasaehon sude masalahta? Manang pittor korupsi do nasida molo nungnga mamaretta, songon na diulahon akka pamaretta saonari? Adong sahalak sejarawan Inggris na margoar si Lord Acton mandok, “Biasana pasti korupsi do sasahalak molo dung mamaretta. Jala pasti korupsi do sasahalak molo nga timbo jabatanna.”

Jadi boi do aman jala dame portibi on molo holan sada pamarettaon na mamimpin? Didok Bibel boi. Alai boha carana? Dang boi jolma na mamimpin akka pamarettaon na marsada i. Ikkon Debata do na mamimpin. Alana, holan Ibana do na marhak mamaretta sude na ditoppa Ibana. Goar ni harajaon i didok di Bibel, “Harajaon ni Debata”.​—Lukas 4:43.

Harajaon ni Debata ma na didok Jesus di tangiang na diajarhon ibana tu akka siseanna. Didok ibana di tangiangna i, “Sai ro ma Harajaonmu. Sai saut ma lomo ni roham di tano on songon na di banua ginjang.” (Mateus 6:9, 10) Jadi lomo ni roha ni Debata do na lao dipasaut Harajaon ni Debata. Dang lomo ni roha ni jolma na holan mamikkiri dirina sandiri jala na tamak.

Didok do tong Harajaon ni Debata i, “harajaon banua ginjang.” (Mateus 5:3) Boasa songon i? Alana sian surgo do harajaon i mamaretta sude portibi on. Pikkirhon ma, dang porlu di harajaon i hepeng manang pajak sian rakyatna. Jadi dang adong rakyatna na gabe susa ala ikkon manggarar pajak.

Sian hata “Harajaon ni Debata”, boi ma taboto sada raja do na mamimpin harajaon i. Rajana, i ma Jesus Kristus. Jala Debata do na mangalehon huaso tu ibana. Songon on ma na didok Bibel taringot Raja i:

• “Dilehon do tu ibana tanggung jawab lao mamaretta. . . . Lam balga ma torus huasona, jala dang adong ujung ni hadameon.”​—Jesaya 9:6, 7.

•   “Dilehon do tu ibana huaso, hasangapon, dohot harajaon, asa sude halak na sian akka bangso dohot bahasa marhobas tu ibana. Pamarettaonna . . . dang boi digattihon.”​—Daniel 7:14.

• “Harajaon ni tano on nungnga gabe Harajaon ni Tuhanta dohot Kristusna.”​—Pangungkapon 11:15.

Songon na di tangiang ni Jesus, bahenon ni Harajaon ni Debata ma saut tujuan awal ni Debata manoppa tano on. Dung mamaretta Harajaon ni Debata, sude ma jolma marsiajar lao mangurus lingkungan dohot padenggatton tano on. Gabe bagak ma muse tano on, jala marlas ni roha ma sude na mangolu disi.

Jala na paling penting lehonon ni Harajaon ni Debata ma pendidikan tu sude rakyatna. Jala sarupa ma aturan moral na diajarhon tu nasida. Dang adong be parbadaan manang parporangan. Jesaya 11:9 mandok, “Dang adong manang aha pe sian nasida na mambahen marjea manang na mambahen sega . . . Ai gok parbinotoan taringot Jahowa do saluhut tano on, dos songon aek na manggohi laut.”

Di masa depan dang adong be kejahatan, polusi, hapogoson, dohot porang. Marsada jala mardame ma sude jolma di tano on. Didok di Psalmen 37:11, “Marlas ni roha situtu ma nasida, ai dame do ngolu ni nasida.” On ma cita-cita ni PBB. Alai dang tolap nasida pasautton i. Sukkun-sukkunna: Andigan do Harajaon ni Debata mamaretta tu tano on? Aha do na parjolo na ikkon diulahon harajaon i? Aha do na ikkon diulahon hamu asa boi gabe rakyat ni harajaon i? Saonari tabahas ma sukkun-sukkun i.