BOI DOPE BERTAHAN BUMI ON?
Hutan
“PARU-PARU dunia do hutan jala alani i do boi hita mangolu.” Songon paru-paru, akka hau na adong di hutan menyaring udara asa tetap ias. Carana, diserap ma karbon dioksida na berbahaya tu hita, dung i dihasilhon ma oksigen asa boi hita marhosa. Hira-hira 80 persen binatang na mangolu di darat dohot akka suan-suanan adong di hutan. Molo dang adong hutan, dang boi hita mangolu.
Keadaan ni Hutan Saonari
Ganup taon marmiliar hau di hutan nungnga ditaba. Jala godangan hutan i dibahen gabe lahan pertanian. Alani i mulai sian taon 1940-an, satonga sian hutan tropis dang adong be.
Molo disegai hutan, boi do gabe marmatean sude suan-suanan dohot binatang na adong disi.
Dirancang do Planet Bumi asa Boi Bertahan
Nang pe godang hau na ditaba di hutan, alai boi do tubu muse akka hau i. Bahkan dang dirippu akka ahli lingkungan hidup, boi do hatop mulak denggan muse hutan i. Parrohahon ma contohna:
-
Diamati akka peneliti ma akka hutan na dibahen gabe lahan pertanian, dung i di pudian ni ari dang dikarejoi be. Dang gok sappe sappulu taon, mulak do muse martubuan akka hau di hutan i. Adong ma 2.200 lahan sisongon i di Amerika dohot di Afrika Barat.
-
Menurut majalah Science, didok akka peneliti hira-hira di bagasan 100 taon boi do mulak muse hutan i songon najolo i jala gok akka binatang disi.
-
Baru-baru on, diteliti akka ilmuwan na di Brasil ma akka hutan naung ditaba. Diamati nasida ma na dia do na ukkatop tubu, hutan na disuan jolma do hauna, manang na dipasombu sandiri tubu hauna. National Geographic paboahon taringot penelitian i, “sebenarna dang pola porlu disuan akka hau i”. Alana holan di bagasan lima taon pe, “nungnga godang tubu akka hau” di lahan na dipasombu tarulang.
Aha ma Naung Diulahon Saleleng on?
Di liat portibi on, dibahen do upaya lao manjaga hutan jala padenggatton akka hutan naung sega. Hasilna, menurut sada laporan ni PBB, “gabe menurun do lobi sian 50 persen godang ni penebangan hutan di liat portibi on” di bagasan 25 taon na parpudi on.
Alai nang pe songon i, menurut organisasi Global Forest Watch, “Tong dope godang hutan tropis na disegai jolma di piga-piga taon na parpudi on.”
Godang do muse jolma na jahat na mambahen penebangan hutan ilegal. Ai martriliun rupiah do uttung ni nasida sian i. Alani i ma godang hutan tropis na sega saonari.
Tugas ni akka na mangarawat hutan, i ma manaba akka hau naung matua, dung i manuan na baru
Bibel Paposson Rohatta
“Dibahen Debata Jahowa a ma tubu marragam hau sian tano i. Tubu do akka hau na denggan jala parbuena boi panganon.”—1 Musa 2:9.
Denggan do dirancang Panoppa i akka hutan. Molo pe ditaba akka jolma hauna lao tu kebutuhanna, tong do boi tubu muse hau i. Lomo do rohana asa tetap tajaga akka hutan dohot akka na di bagasanna.
Dipaboa do di Bibel dang pasombuon ni Debata halak na jahat manegai planet on dohot sude isina. Ida ma artikel “Janji ni Debata Taringot Tano on” di halaman 15.
a Goar ni Debata do Jahowa.—Psalmen 83:18.
