Mangargai Sude Halak

PANGOLU

BOASA PORLU TAARGAI SUDE HALAK?

Molo taargai sude halak, dang gabe tubu parbadaan manang tamba masalah.

Bibel mandok, “Hata na lambok padaohon rimas, alai mambahen muruk do hata na kasar.” (Poda 15:1) Molo kasar hatatta dohot pambahenatta tu halak, boi do i mambahen nasida gabe muruk jala gabe marjea ma hita. Dos ma i songon na maniram bensin tu api.
Didok Jesus, “Nasa na adong di roha, i do dihatahon pamangan.” (Mateus 12:34) Molo kasar hita makkatai tu sasahalak, on patuduhon na negatif do ra pikkiranta tu ibana ala berbeda sukuna, margana, bangsona, dohot latar belakangna tu hita.

Dibahen do baru-baru on survei tu lobi sian 32.000 halak na sian 28 negara, 65 persen sian nasida mandok nga parah be pangalaho ni halak saonari, dang adong be sopanna jala dang diboto mangargai halak na asing.

NA BOI DIULAHON HAMU

Argai ma sude halak, nang pe dang sarupa pandanganmuna tu nasida. Pikkirhon ma aha persamaanmuna tu nasida. On boi mangurupi hamu asa unang pittor manguhumi nasida.

“Unang be uhumi hamu halak na asing, asa unang diuhumi Debata hamu.”—Mateus 7:1.

Bahen ma na denggan tu sude halak. Molo burju hamu tu halak jala diargai hamu nasida, bahenon ni nasida ma tong songon i tu hamu.

“Aha na dihalomohon rohamuna bahenon ni halak tu hamu, ikkon songon i do bahenonmuna tu nasida.”—Lukas 6:31.

Rade ma manalpuhon hasalaan. Molo adong halak na kasar makkatai tu hamu, unang ma pittor didok rohamuna na sengaja do ibana lao mambahen jut rohamuna.

“Molo marbisuk halak, dang mura ibana muruk, jala dipuji do halak na olo manalpuhon hasalaan.”—Poda 19:11.

NA DIULAHON HAMI

Diargai Saksi Jahowa do sude halak. Berupaya do hami manjujui akka halak asa mangulahon songon i.

Lomo do rohanami manawarhon parsiajaran Bibel gratis tu sude halak. Alai dang olo hami mamaksahon pandangannami dohot haporseaonnami tu nasida. Berupaya do hami mangihutton poda na tarsurat di Bibel na mandok asa ‘lambok jala sangap’ tikki marbarita na uli tu akka halak.—1 Petrus 3:15; 2 Timoteus 2:24.

Dang olo hami paimbar-imbarhon halak. Dijakkon hami do sude halak na ro tu acara ibadahnami lao manangihon hata ni Debata, dang soal songon dia latar belakang ni nasida. Berupaya do hami ‘pasangappon sude jolma’ jala mangargai pandangan ni nasida.—1 Petrus 2:17.

Diargai hami do pamaretta. (Rom 13:1) Diihutton hami do peraturan na dibahen nasida jala digarar hami do pajak. Nang pe dang marpihak hami di politik, alai dang olo hami mamaksa akka halak asa sarupa songon hami.

DUNGO MA!