Boi do Hamu Berhasil!

ON ma tikkina di hamu “ikkon barani”. (1 Kronika 28:10) Akka aha do muse na ikkon diulahon hamu asa boi berhasil?

Tottuhon ma tanggalna. Departemen Kesehatan dohot Layanan Masyarakat AS paboahon, molo naeng so hamu marisap di bagasan dua minggu tottuhon hamu ma di tanggal piga hamu naeng so marisap. Molo dibahen hamu songon i, gabe semangat ma hamu naeng so marisap. Tandai ma i di kalendermuna. Paboa ma i tu akka donganmuna. Jala, manang aha pe na masa di ngolumuna, pittor so ma hamu marisap di tanggal i.

Bahen ma “kartu pengingat”. Kartu pengingat on boi do marisi akka keterangan na boi mambahen hamu lam semangat. Contohna:

● Alasanmuna so marisap.

● Nomor telepon ni akka halak na boi ditelepon hamu tikki naeng menyerah hamu.

● Pengingat—akka ayat ni Bibel songon Galatia 5:22, 23—na boi mangurupi hamu asa so marisap.

Torus ma boan kartu i manang tudia pe hamu lao. Jaha ma i piga-piga hali di bagasan sadari. Gariada dung so pe hamu marisap, toktong ma jaha kartu i tikki tubu keinginanmuna naeng marisap muse.

Padao hamu ma akka situasi na boi mambahen hamu gabe naeng marisap. Sebelum tanggal naung ditottuhon i, paso ma akka kebiasaan na boi mambahen hamu sai naeng marisap. Contohna, molo biasa do hamu marisap di tikki manogot, i ma tikki baru dungo, paso ma jo i pinomatna hira-hira sajom. Biasana marisap do hamu tikki mangan manang dung sae mangan? Paso ma kebiasaan i. Padao hamu ma akka halak na marisap. Asing ni i, tikki sahalakmuna gogo ma soaramuna mandok, “Santabi bah, dang marisap be au.” Molo diulahon hamu songon i, on boi mempersiaphon dirimuna lao so marisap di tanggal naung ditottuhon i. Jala on boi paingotton hamu, molo satokkin nai dang sahalak parisap be hamu.

Parade hian ma akka na porlu. Molo nungnga jonok tanggal naung ditottuhon hamu i, parade ma wortel, kacang, bombon karet, manang akka na asing. Paboa hian ma tu keluarga manang akka donganmuna, tanggal piga hamu naeng so marisap. Jala paboa ma tu nasida, songon dia nasida boi mangurupi hamu. Sebelum dapot tanggal i, bolokkon hian ma asbak, korek api, manang akka na boi mambahen hamu naeng marisap. Contohna, songon sigaret na adong di jabu, di mobil, di kattung ni baju, manang sigaret na adong di ingananmuna karejo. Alana, ummura do di hamu mambuat sigaret sian laci sian apala manjalo i manang manuhor. Asing ni i, toktong ma hamu martangiang tu Debata. Jala sai dok ma di rohamuna, on ma parpudi sahali au marisap.—Lukas 11:13.

Nungnga godang halak na berhasil dang mardongan be dohot sigaret. Alana, dongan na jahat jala na kejam do ibana. Hamu pe boi do songon i. Molo so hamu marisap, gabe lam sehat ma hamu jala tamba ma las ni rohamuna.

[Gambar]

Sai boan ma kartu pengingatmuna jala jotjot ma i jaha di bagasan sadari