Dongan na So Denggan

Tadok ma adong donganmuna na ditanda hamu mulai sian na poso. Donganmuna on mambahen hamu gabe songon na dewasa idaon jala boi mardongan tu dongan satorbangmuna. Di tikki marsak hamu, pittor dilului hamu do ibana asa boi tenang dihilala hamu. Ujungna, gabe sai naeng rap ma hamu dohot ibana.

Alai di pudian ni ari diboto hamu ma akka na so denggan sian donganmuna on. Uppamana, sai naeng dohot do ibana manang tu dia pe hamu lao. Hape alani ibana gabe dang boi hamu lao tu piga-piga inganan. Dibahen ibana do nian hamu songon na dewasa idaon, alai gabe sega do kesehatanmuna alani ibana. Jala na lebih parah muse, ditakko ibana do deba hepengmuna.

Ujungna didok hamu ma dang olo be hamu mardongan dohot ibana. Alai dang olo ibana. Boi dohonon nungnga gabe hatobanna be hamu. Gabe manolsoli ma hamu ala nungnga marsitandaan dohot ibana.

SONGON i ma halak na mardongan dohot sigaret. Sahalak borua na margoar si Earline nungnga marisap saleleng 50 taon. Ibana mandok, “Unlomo do rohakku mardongan dohot sigaret sian jolma. Boi dohonon holan sigaret ma donganku.” Alai di pudian ni ari, disadari si Earline ma molo sigaret i dang dongan na denggan jala jahat. Sasittongna songon na disurat di mula ni artikel on ma ngolu si Earline. Dung diboto ibana dang lomo roha ni Debata tu sigaret ala boi manegai pamatangna, gabe dipaso ibana ma na marisap i.—2 Korint 7:1.

Sahalak bawa na margoar si Frank pe so do marisap ala naeng palashon roha ni Debata. Sadari dung dipaso ibana marisap, martugarang ma ibana lao mangalului akka puttung ni sigaretna. Ibana mandok, “Magigi hian do au mangida dirikku sandiri ala olo martugarang jala makkais-kais sampah holan alani sigaret. Mulai sian i, dang olo be au marisap.”

Boasa maol pasohon na marisap? Akka peneliti paboahon adong piga-piga alasanna: (1) Sarupa do timbaho songon narkoba, boi mambahen halak gabe kecanduan. (2) Molo taisap nikotin na adong di sigaret, boi do i sahat tu otak holan di bagasan pitu detik. (3) Biasana halak marisap tikki mangan, minum, makkata-hatai, marsak, dohot na asing.

Memang maol do pasohon na marisap. Alai songon na masa tu si Earline dohot si Frank, pasti boi do hamu marhasil pasohon i. Molo naeng so do hamu marisap, jaha ma akka artikel on. On boi mangurupi hamu mambolokkon kebiasaan naung leleng i.