Parade ma Dirimuna

“Ala baru tubu gellengnami, huputusson ma asa so marisap, asa sehat gellengnami i. Jadi hubahen ma tanda ‘Dilarang Merokok’ di jabunami. Alai sajom dukkon i, pittor naeng marisap ma au. Gabe hupagalak ma sigarethu.”—Yoshimitsu, Jepang.

SONGON na masa tu si Yoshimitsu, molo naeng so sasahalak sian na marisap, adong do tantangan na ikkon dihadapi ibana. Sada penelitian patuduhon, 90 porsen halak na naeng so marisap gabe mulak do muse marisap. Alani i, molo naeng so hamu marisap ikkon diparade hamu do dirimuna menghadapi akka tantangan i. Akka aha ma tantanganna?

Kecanduan nikotin: Biasana, tolu ari dung so hamu marisap pittor tubu do muse keinginan naeng marisap. Jala lam moru ma i dung dua minggu. Sasahalak naung so marisap mandok, “Saleleng dua minggu i marlao ro keinginan i songon galumbang ni laut.” Gariada, martaon-taon dung so hamu marisap olo do toppu ro keinginan naeng marisap. Molo masa songon i tu hamu unang ma pittor menyerah hamu. Paima ma hira-hira lima menit. Dung lima menit, mago do annon keinginan i.

Gejala na asing: Mulana halak na baru so marisap boi do gabe maol konsentrasi jala lam mokmok. Boi do tong dihilala nasida adong nyeri, gatal-gatal, markaringat, batuk, hurang sabar, hatop muruk manang stres. Sude gejala i, boi do dihilala nasida hira-hira saleleng opat sahat tu onom minggu.

Saleleng di tikki i, ulahon hamu ma on. Contohna:

● Teratur ma hamu modom.

● Godang ma minum air putih manang jus. Jala allang ma akka sipanganon na sehat.

● Ringgas ma hamu olahraga.

● Bagas ma tarik napasmuna. Dung i bayakkon ma udara na segar masuk tu aru-arumuna.

Akka na boi mambahen hamu marisap muse: Adong do situasi manang ulaon na boi mambaen hamu sai naeng marisap muse. Misalna, olo do ra najolo hamu jotjot marisap sambil minum alkohol. Molo songon i do na masa tu hamu, unang paleleng-leleng hamu tikki minum alkohol. Haduan boi do hamu minum alkohol songon najolo i. Godang halak mandok, nang pe nungnga leleng hita so marisap, sipata olo do muncul keinginan lao marisap i di situasi-situasi tertentu.

Si Torben na dipaboa di mula ni artikel on mandok, “Sappulu sia taon dung so au marisap, jotjot do muncul keinginan naeng marisap tikki minum kopi. Alai nang pe songon i, lam leleng hita so marisap lam mago do keinginanta naeng marisap i di situasi na songon dia pe.”

Alai asing do molo hamu sahalak parminum. Molo naeng so hamu marisap, ikkon dipaso hamu do minum alkohol. Jala unang lao hamu tu inganan na paradehon alkohol. Boasa? Alana godang do halak na naeng so marisap gabe mulak muse marisap ala minum alkohol. Boasa boi songon i?

● Saotik pe alkohol boi do mambahen lam tabo nikotin.

● Tikki pungu-pungu akka halak, jotjot do nasida minum alkohol sambil marisap.

● Alani alkohol, boi do gabe maol akka halak mengendalihon diri. Bibel mandok, ‘Alani anggur, gabe dang lomo be roha ni halak mangulahon na sittong.’—Hosea 4:11.

Akka dongan: Manat ma hamu mamillit akka halak na gabe donganmuna. Misalna, unang olo hamu mardongan dohot halak na marisap manang halak na olo manogihon hamu asa marisap. Jala unang olo hamu mardongan dohot akka halak na mangarehei hamu ala naeng so marisap.

Emosi: Sian penelitian patuduhon, dua sian tolu halak na mulak muse marisap, olo do gabe stres manang muruk ala dang berhasil nasida so marisap. Jadi, molo tubu di rohamuna naeng marisap, pittor lului hamu ma kegiatan na asing. Songon minum air putih, mangallang bombon karet, manang mardalan. Pikkirhon ma akka na denggan, martangiang ma hamu tu Jahowa manang jaha ma Bibel.—Psalmen 19:14.

Pasiding ma Akka Pikkiran Sisongon on

● Holan sahali mangisap pe.

Sasittongna: Sahali mangisap sigaret boi do pangoluhon 50 persen saraf di otak saleleng tolu jom. Ujungna gabe mulak ma hamu muse marisap.

● Marisap mangurupi au asa unang stres.

Sasittongna: Nikotin mambahen sasahalak gabe lam stres. Jadi, molo pe dihilala hamu hira na moru stresmuna dung marisap, sasittongna holan sementara do i.

● Dang mungkin boi so au marisap.

Sasittongna: Boi do gabe dang olo sasahalak muba molo metmet rohana. Bibel mandok, “Molo metmet roham tikki masa hasusaan, moru ma gogom.” (Poda 24:10) Alani i, unang ma sai didok rohamuna dang boi hamu so marisap. Manang ise pe na naeng so marisap, jala olo mangulahon akka petunjuk na dipaboa di majalah on pasti boi do berhasil.

● Dang sanggup au manaon gejalana i molo so marisap.

Sasittongna: Memang haccit do tahilala tikki baru so marisap. Alai moru do i di bagasan piga-piga minggu. Alani i, tetap ma hamu berjuang. Molo tubu keinginanmuna naeng marisap marbulan-bulan manang martaon-taon dukkon so hamu marisap, pos ma rohamuna pittor mago do i di bagasan piga-piga menit—molo dang dipagalak hamu sigaretmuna.

● Depresi do au saonari.

Sasittongna: Molo lagi marubat do hamu alani depresi manang schizophrenia, sukkun ma doktermuna asa boi diurupi hamu so marisap. Pasti olo do ibana paboahon tu hamu akka perawatan manang ubat na boi mangurupi hamu mangulahon keputusanmuna i.

● Ninna rohakku, nga gagal be au molo mulak muse marisap.

Sasittongna: Molo nungnga dicoba hamu so marisap hape mulak muse marisap, pos ma rohamuna dang holan hamu na songon i. Godang do halak na makkilala songon i. Coba hamu ma muse, torus ma coba hamu asa so marisap. Molo torus hamu mancoba, ujungna pasti boi hamu berhasil. Sasahalak didok gagal, molo dang olo be ibana mancoba!

Parrohahon ma pengalaman ni si Romualdo. Nungnga marisap ibana saleleng 26 taon, jala nungnga so marisap 30 taon na salpu. Ibana mandok, “Dang huingot be piga hali au gagal, tikki mulak au marisap muse dang tabo pakkilalaakku. Ninna rohakku, dang boi be au so marisap. Alai, disi marsitutu au naeng marale-ale tu Jahowa, jotjot ma au martangiang mangido asa diurupi Ibana. Ujungna, boi do au marhasil so marisap.”

Di majalah on taulas ma piga-piga cara na boi mangurupi hamu asa boi gabe halak na marlas ni roha ala nungnga so marisap.

[Kotak/​Gambar]

SONGON DIA PE BENTUKNA, TETAP DO TEMBAKAU PAROHON HAMATEAN

Godang do macam ni tembakau. Piga-piga tembakau dijual do di toko na manjual akka sipanganon kesehatan dohot di toko obat herbal. Alai nang pe songon i, Organisasi Kesehatan Dunia mandok, “Sude bentuk ni tembakau boi do parohon hamatean.” Sasahalak na mamakke tembakau boi do gabe hona sahit kanker, manang hona sahit jantung. Jala on boi mambahen sasahalak mate. Molo marisap sahalak ina na hamil, bahaya do i tu poso-poso na adong di kandunganna. Akka aha ma contoh ni tembakau na dipakke godangan halak?

Linting: Biasana sigaret linting on, dipakke di piga-piga negara na di Asia. Linting on mangaluarhon tar, nikotin, dohot karbon monoksida unggodang sian sigaret na biasa.

Cerutu: Cerutu, i ma tembakau na dibungkus mamakke bulung ni tembakau manang harotas na dibahen sian tembakau. Berbeda do cerutu on sian sigaret na biasa. Alana nikotin na adong di cerutu on, boi do diisap nang pe dang dipagalak.

Kretek, manang sigaret cengkeh: Biasana sigaret on dibahen sian 60 persen tembakau jala 40 persen cengkeh. Unggodang do tar, nikotin, dohot karbon monoksida na adong di sigaret on sian sigaret na biasa.

Pipa: Marisap mamakke pipa, tong do dang aman. Alana, marisap mamakke pipa pe boi do mambahen sasahalak hona kanker manang hona sahit na asing.

Suttil: Suttil manang tembakau na dikunyah, jotjot do dipakke di Asia Tenggara. Nikotin na adong di suttil diserap ma melalui pamangan jala masuk tu aliran darah. Tembakau sisongon on pe tong do berbahaya songon tembakau na asing.

Pipa na adong aekna (bong, hookah, narghile, shisha): Cara kerja ni alat on i ma, mambahen asap ni tembakau i lewat sian ginjang ni aek sebelum dihisap. Alai nang pe dibahen songon i, dang gabe moru zat beracun na masuk tu aru-arutta. Jala on pe boi mambahen sasahalak hona kanker.

[Kotak/​Gambar]

MANGURUPI HALAK NA NAENG SO MARISAP

● Tetap ma positif pakkataionmuna. Puji hamu ma ibana. Tumagon do dipuji hamu ibana sian apala dimuruki hamu. Tumagon didok hamu, “Pasti boi do ho mangulahon i, molo dicoba ho muse.” Sian apala didok hamu, “Ehe, dang boi ho ate.”

● Rade ma memaafhon. Molo muruk sasahalak na ditanda hamu, manang stres ala naeng so marisap, maafhon ma ibana. Unang ma didok hamu, “Nga be, marisap pe ho taho.” Alai dok hamu ma, “Huboto do pasti maol do on di ho, alai bangga do au tu ho ala olo mangulahon on.”

● Gabe dongan na burju ma hamu. Bibel mandok, “Sai dipatudu ale-ale do holong ni roha. Jala songon haha anggi do i tikki masa sitaonon.” (Poda 17:17) Sabar ma hamu jala sai patudu ma holong tu akka halak na marsitutu naeng so marisap, manang sadihari pe jala manang songon dia pe situasi ni nasida.