“Dang ditangihon ho au!” didok dongan saripemuna. ‘Alai hutangihon do ibana,’ didok rohamuna. Hape na so sarupa do na diatussi hamu dohot na dihatahon dongan saripemuna. Alani i gabe marsoal ma hamu.

Adong do na boi diulahon hamu asa unang gabe marsoal. Na parjolo, porlu do diboto hamu boasa dang boi takkas diattusi hamu tujuan hata ni dongan saripemuna, nang pe nungnga dibege hamu ibana tikki makkatai.

Loja jala dang fokus. Tikki dipaboa dongan saripemuna na lao ro tamu borngin on, olo do ra lagi ribut soara ni gellengmuna, balga soara ni TV, jala dipikkiri hamu masalah di parkarejoan. Jadi pittor didok hamu ma, “Olo.” Alai tutu do diparrohahon hamu na didok dongan saripemuna i? Bisa jadi daong.

Sala paham. Jotjot do on terjadi molo pahatophu hita mambahen kesimpulan. Dirippu hamu adong maksud na asing sian hata ni dongan saripemuna, hape dang songon i lapatan ni hatana i. Misalna didok ibana, “Hira na sering do ho lembur saminggu on ate.” Ala dirippu hamu na mangalesengi ibana, pittor didok hamu ma, “Dang au na sala! Lembur pe au alana pagodanghu do situhoronmu.” Didok dongan saripemuna ma, “Boasa gabe muruk ho? Dang i maksudhu!” Hape tujuan ni hatana i naeng mangajak hamu do mardalani di akhir pekan.

Pittor naeng pasaehon masalah. Didok si Marcie, a “Sipata holan naeng paboahon na di rohakku do au. Alai pittor jalan kaluarna do na dipaboa si Mike. Hape dang mangido jalan kaluar au, holan paboahon perasaanku do au tu ibana.” Aha do masalah na sasittongna? Holan lao pasaehon masalah do na dipikkiri si Mike. Akibatna, gabe dang boi takkas diattusi ibana maksud hata ni si Marcie.

Manang aha pe boccir ni masalahna, songon dia ma carana asa boi denggan hamu manangihon?

Denggan ma parrohahon. Tikki adong na petting na lao dipaboa dongan saripemuna, pittor rade do hamu manangihon? Olo do ra daong. Bisa jadi adong ulaon na asing na dipikkiri hamu. Molo songon i unang ma dibaen hamu hira na mambege, hape sasittongna daong. Molo boi, paso hamu ma jo ulaonmuna i. Manang pangido ma tu dongan saripemuna asa dipaima jolo sidung ulaonmuna i, baru pe boi denggan hamu manangihon.—Prinsip ni Bibel: Jakobus 1:19.

Margatti ma hamu makkatai. Tikki makkatai ibana unang ma pittor digotap hamu hatana i, nang pe hira na so pas i di rohamuna. Adong do tikkina hamu na makkatai. Alani i tangihon ma jo ibana.—Prinsip ni Bibel: Poda 18:13.

Sukkun ma. Molo disukkun hamu dongan saripemuna, gabe lam diattusi hamu ma aha maksud ni hatana i. Si Marcie, na dipaboa nakkin mandok, “Las do rohakku molo disukkun si Mike au, alana on patuduhon na diparrohahon ibana do hatakku.”

Coba ma attusi maksud ni hatana. Tikki makkatai ibana parrohahon ma songon dia bohina dohot nada soarana. Nang pe didok dongan saripemuna “dang pola boha”, parrohahon ma songon dia carana mandokkon i. Alana olo do ra sasittongna ibana naeng mandok, “lagi adong masalah”. Tikki didok dongan saripemuna, “dang hea ho mangurupi au” bisa jadi maksudna “hira na so parduli be ho tu au.” Jadi, coba ma attusi maksud ni hatana i nang pe dang dipaboa ibana i tu hamu. Molo dang, olo do gabe marsoal hamu ala dang diattusi hamu aha na dimaksud dongan saripemuna.

Denggan ma tangihon. Nang pe hira na so lomo rohamu membege hata ni dongan saripemuna, unang ma pittor lao hamu. Contohna, boha molo marungut-ungut dongan saripemuna alani kesalahanmuna? Songon on ma na didok si Gregory naung marsaripe saleleng 60 taon, “Denggan ma tangihon. Parrohahon ma na didok dongan saripemuna. Memang dang sai mura mangulahon i, alai bermanfaat do i.”—Prinsip ni Bibel: Poda 18:15.

Patudu ma na parduli hamu. Sada cara lao patuduhon holong tu pasanganta, denggan ma tatangihon ibana tikki makkatai. Molo holong do rohamuna tu pasanganmuna jala parduli hamu tu ibana, gabe lam mura ma hamu manangihon ibana tikki makkatai. Jala boi ma diihutton hamu poda na adong di Bibel na mandok, “Unang ma holan mamparrohahon na porlu di hamu, alai parrohahon ma na porlu di na asing.”—Pilippi 2:4.