Di piga-piga keluarga, diharappon natua-tua do akka gellengna mangurupi karejo di jabu, jala las do roha ni akka gellengna mangulahon i. Alai di keluarga na asing dang disuru natua-tuana gellengna mangulahon i, akka gellengna pe las do rohana dang disuru mangurupi karejo di jabu. Hape boi do i mambahen gellengna gabe maoto.

Akka pakar mangida situasi on godangan terjadi di negara barat. Diparrohahon nasida unlomo do roha ni dakdanak diurupi daripada mangurupi. Sahalak natua-tua na margoar si Steven mandok, “Dipasombu akka natua-tua do akka gellengna margame, marinternet, jala manonton TV sahalakna. Hampir dang adong disuru gellengna mangulahon manang aha pe di jabu.”

Boha menurut hamu? Aha do manfaatna molo disuru dakdanak karejo di jabu? Holan asa ias do jabu manang asa lam marbisuk dakdanak i?

Piga-piga natua-tua dang manuru gellengna mangulahon karejo di jabu, ala godang tugas sikkolana manang kegiatan di luar jam sikkola. Alai parrohahon ma aha manfaatna.

Mambahen gabe lam dewasa. Biasana akka dakdanak na ringgas mangulahon karejo di jabu, gabe marhasil do ibana mangulahon akka tugasna di sikkola. Alana gabe lam percaya diri do ibana, disiplin, jala togu pendirianna.

Mambahen gabe olo mangurupi na asing. Piga-piga halak mangida molo somal do dakdanak mangurupi karejo di jabu, dung dewasa gabe lomo ma rohana mangurupi na asing. Alana nga somal ibana manjumolohon kebutuhan ni na asing sian kebutuhanna sandiri. Si Steven na didok nakkin mandok, “Alai molo dang disuru dakdanak karejo di jabu, gabe holan naeng dilayani ma nasida. Hape dung dewasa porlu do tanggung jawab dohot kerja keras di ngoluna.”

Mambahen keluarga lam kompak. Molo dilehon tugas di jabu tu dakdanak, gabe boi ma ibana merasa adong tanggung jawabna di keluarga, dang holan gabe bagian sian keluarga. Alai molo dibahen natua-tua do kegiatan di luar jam sikkola na uppetting sian mangurupi karejo di jabu, gabe mago ma rasa tanggung jawabna. Pikkirhon ma on, ‘Aha ma gunana molo ukkompak gellengku dohot donganna marbola alai dang kompak tu keluargana?’

Mulai ma sian tikki dakdanak. Adong natua-tua na mandok nungnga boi dilehon tugas di jabu tu gellengna mulai sian umur tolu taon. Na asing mandok nga boi dilehon tugas mulai umur dua taon manang upposo sian i. Intina, las do roha ni dakdanak kerja sama dohot natua-tuana jala maniru nasida mulai sian na gelleng.—Prinsip ni Bibel: Poda 22:6.

Lehon ma tugas sesuai tu umurna. Uppamana, dakdanak na marumur tolu taon boi do manusun meam-meamna, paiasson molo adong na maraek, manang pamasukkon baju na kotor tu ember panussian. Dakdanak na umbalga boi paiasson jabu, manussi mobil, bahkan nga boi mangaloppa. Sesuaihon ma tugas na dilehon hamu tu kesanggupanna. Pasti las do rohamuna molo semangat gellengmuna mangulahon tugas di jabu.

Utamahon ma karejo na di jabu. Borat do mangulahon on molo godang PR ni gellengmuna tiap ari. Bukku The Price of Privilege mandok, molo dang dilehon hamu tugas di jabu tu gellengmuna ala godang PR-na, berarti “sala do na diutamahon hamu”. Songon na didok nakkin, molo ringgas dakdanak karejo di jabu, boi do i mangurupi ibana gabe sahalak murid na denggan. Jala haduan pe gabe rade ma ibana tikki naeng marrumah tangga.—Prinsip ni Bibel: Pilippi 1:10.

Ingot ma tujuanna dang hasilna. Sipata boi do gabe ulleleng tikki ni gellengmuna lao pasaehon sada tugas di jabu sian na diharappon hamu. Jala hasil karejona pe dang pola denggan. Molo i na masa, unang ma pittor hamu na makkarejohon tugas i. Tujuanna asa martanggung jawab gellengmuna i jala las rohana mangulahon i, dang holan asa denggan hasilna songon na diulahon halak na dewasa.—Prinsip ni Bibel: Parjamita 3:22.

Urupi ma gellengmuna asa denggan diattusi ibana taringot tugas di jabu. Adong na mandok molo dilehon natua-tua hepeng tu gellengna asa olo ibana mangulahon tugas di jabu, na mangajarhon asa martanggung jawab do i. Na asing mandok molo dibahen songon i, gabe holan upana ma na dipikkiri dakdanak i dang be aha na boi dilehon ibana tu keluarga. Ujungna molo adong dope hepengna, pasti dang olo gellengna i mangulahon tugas di jabu. Tujuanna mangalehon tugas tu gellengna pe gabe dang tercapai. Parsiajaranna, unang ma sappe dirippu gellengmuna molo dilehon hamu hepeng tu ibana, na gabe upana do i ala makkarejohon tugas di jabu.