Di artikel sebelumna, taboto ma akka tanda na dipaboa Jesus. Nungnga dipajongjong be Harajaon i di surgo. Jala Jesus ma na gabe Rajana.

Bibel mandok, dung Jesus gabe Raja, disampatton Ibana ma Sibolis dohot akka suru-suruanna sian surgo tu tano on. Alani i ma, gabe lam godang hasusaan di tano on mulai sian taon 1914.​—Pangungkapon 12:7, 9.

Nang pe lam godang hasusaan, alai diurupi Jesus do akka halak di liat portibi on. Songon na dipaboa Jesus, marhite ulaon marbarita na uli, godang halak marsiajar jala mangulahon prinsip ni Bibel di ngolu nasida. (Jesaya 2:2-4) Marjuta halak marsiajar carana asa denggan keluargana, jala marsiajar do nasida asa unang gabe karejo dohot hepeng na urrikkot. Sude na diparsiajari nasida i marlaba do tu ngolu ni nasida saonari. Jala i boi mangurupi nasida gabe rakyat ni Harajaon ni Debata.

Nang pe Jesus nungnga gabe Raja di surgo, alai pamarettaon ni jolma dope na marhuaso di tano on. Alani i, diparettahon Debata do tu Jesus, “Mangarajai ma Ho di tongatonga ni musum.” (Psalmen 110:2) Satokkin nai, diripashon Jesus ma akka musuna. Dung i, paluaonna ma akka halak na unduk tu Debata.

Satokkin nai, on ma na lao ulahonon ni Harajaon ni Debata:

• Mangaripashon agama palsu. Ripashonon ni Debata ma agama palsu na mangajarhon gabus taringot Debata jala manusai ngolu ni jolma. Dipatudos Bibel do agama palsu on songon boru-boru na so hasea. Jala tarsonggot ma akka jolma tikki agama palsu i diripashon.​—Pangungkapon 17:15, 16.

• Mangaripashon pamarettaon ni jolma. Ripashonon ni Harajaon ni Debata ma sude pamarettaon ni jolma.​—Pangungkapon 19:15, 17, 18.

• Pamateonna ma sude parjahat. Aha do na lao masa tu akka parjahat na mangalo tu Debata? Bibel mandok, “Pasudaon ni Debata do halak parjahat sian tano i.”​—Poda 2:22, Bibel siganup ari.

• Pamateonna ma Sibolis dohot suru-suruan na jahat. Dang boi be Sibolis dohot suru-suruan na jahat ‘mangaliluhon angka bangso’.​—Pangungkapon 20:3, 10.

Jadi aha do pengaruh ni sude na masa on tu halak na unduk tu Harajaon ni Debata?

Dung Jesus gabe Raja di surgo, ulahononna ma lobi sian na boi diulahon sude pamarettaon ni jolma. Mamaretta do ibana dohot 144.000 halak na dipillit sian tano on. (Pangungkapon 5:9, 10; 14:1, 3) Bahenonna ma saut lomo ni roha ni Debata di tano on. Aha ma i?

• Dang adong be sahit dohot hamatean. “Na so tupa be dohonon ni pangisina: Na gale do ahu” jala “ndang adong be hamatean.”​—Jesaya 33:24; Pangungkapon 21:4.

• Aman jala dame ma sude jolma. “Marhasonangan godang angka anakmu”, jala “hundul be ma nasida di toru ni hau anggurna dohot di toru ni hau arana, jala ndang adong panonggoti.”​—Jesaya 54:13; Mika 4:4.

• Mangalehon karejo na palashon roha. “Jadijadian ni tangannasida ingkon halak na hupillit marsaulihonsa. Ndang tagamon loja so marniula nasida.”​—Jesaya 65:22, 23.

• Mambahen lingkungan ias jala uli. “Marlas ni roha ma halongonan dohot tano bangkalbangkal jala marolopolop ma adaran jala marbunga songon bunga pansur.”​—Jesaya 35:1.

• Mangajari akka halak carana asa boi mangolu salelengna. “On do hangoluan na saleleng ni lelengna, ingkon tandaon ni nasida do Ho Debata na Sasada i, na sintong i dohot Jesus Kristus na sinurum.”​—Johannes 17:3.

Lomo do roha ni Jahowa mangalehon pasu-pasu i tu hamu. (Jesaya 48:18) Di artikel berikutna, botoonmuna ma carana asa boi hamu gabe rakyat ni Harajaon ni Debata.