TAON 1934 do ahu tubu. Natua-tuangku goarna si Fred dohot si Edna Molohan, jala nunga 20 taon nasida gabe Parsiajar Bibel (Sitindangi Ni Jahowa). Las do rohangku ala diajari nasida do ahu asa mangkaholongi Jahowa. Di Parsons do hami tading, huta na gelleng sabola tenggara ni Kansas. Godangan angka na miniahan do dongan na di hurianami. Ringgas do keluarganami marpungu dohot marbarita. Jala di ari sabtu sore, jotjot do hami marbarita di dalan, manang saonari tadok marbarita di inganan na ribur. Las do roha marbarita nang pe sipata loja hami, alai sai dituhor bapa do es krim tu hami molo dung sae marbarita.

Bolak do daerah marbarita di hurianami. Adong piga-piga huta dohot godang do angka ladang. Tingki dilehon hami sijahaon tu angka halak, ndang adong hepeng na dilehon nasida. Alai dilehon nasida do angka sayur, tolor na baru dibuat sian kandangna, manang piga-piga ekor manuk. Alai tuani ma dilehon nasida angka sipanganon i laho siallangonnami, alana nunga dipangke bapa hepengna laho manuhor angka sijahaon i.

Dipangke natua-tuangku do fonograf laho marbarita. Ala gelleng dope ahu, las do rohangku mangurupi nasida mamutarhon rekaman ni jamita ni si Rutherford, tu kunjungan dohot tu angka parsiajar Bibel ni nasida.

Adong ma mobilnami na marmerek Ford model taon 1936. Dipasang bapa ma spiker na balga di mobil i, jala gabe dipangke hami ma mobil i laho marbarita. Somalna diputar hami do musik asa marroan angka halak, dung i diputar hami ma sada jamita. Dilehon hami ma sijahaon tu angka halak na lomo rohana manjangkon.

Di ari minggu diboan hami ma mobil i tu taman di Cherryvale di Kansas laho marbarita. Godang  do angka halak marmeami disi. Dung disi hami, ro ma polisi paboahon asa kaluar hami sian taman i. Jadi dipakaluar bapa ma mobilnami sian i. Alai boi dope dibege halak soara sian mobil i. Di tingki sisongon i, las do rohangku alana boi marbarita raphon bapa dohot si Jerry abangku.

Di taon i, adong piga-piga kampanye khusus na diulahon hami di inganan na godang halak na marsogo ni roha tu ulaon marbarita. Songon naung hupaboa nangkin, dungo do hami di tonga borngin jala manat do hami mameakhon angka risalah manang buku di toru ni pintu angka jabu. Dung i, pajumpang ma hami dohot angka dongan di luar huta i laho mamastihon atik adong do angka dongan na ditangkup polisi.

Ulaon marbarita na asing na boi parohon las ni roha, i ma barisan informasi. Dipangke hami ma tanda na balga jala marbaris mangkaliangi sada kota. Huingot hea do angka dongan ro tu hutanami jala marbaris mamangke tanda na paboahon “Agama Adalah Jerat dan Penipuan”. Sian jabunami mardalan ma nasida laho mangalewati huta na daona hira-hira sada satonga kilometer, dung i mulak muse tu jabunami. Las do rohangku ala ndang adong na manggugai nasida jala godang halak na lomo rohana laho mamboto aha do na masa tingki i.

Bapangku karejo di perusahaan kareta api. Alani i jotjot do hami ndang marongkos laho tu kebaktian manang manjumpangi tulangku si Fred Wismar dohot istrina si Eulalie di Texas. Tingki poso do tulangku marsiajar Bibel, di taon 1900-an. Dung tardidi ma ibana paboahon naung diparsiajarina tu itona dohot anggina, tarmasuk ma omak. Ditanda angka dongan di Texas bagian tengah do tulangku, alana sahalak hamba zona do ibana tingki i (saonari tadok i pengawas wilayah). Burju do ibana, parengkel, jala ringgas. Jadi sitiruon na denggan do ibana di ahu.

Di taon 1941 laho ma hami tu kebaktian na balga tu St. Louis di Missouri. Markareta api do hami laho tu kebaktian i. Sude angka na poso ditogihon do asa rap hundul di jonok ni panggung laho manangihon jamita ni donganta si Rutherford na marjudul, “Anak-Anak Sang Raja”. Di kebaktian i adong 15.000 angka na poso. Jala di ujung ni jamita i, dibagihon si Rutherford dohot angka asistenna do tu hami buku na baru, na marjudul Children. Alani i gabe las hian do rohanami.

Sai huingot do kebaktian di bulan April taon 1943 na marjudul, “Seruan untuk Bertindak” di Coffeyville di Kansas. Alana di tingki i do ahu tardidi dohot dongan na asing, di kolam na ngali jonok ni ladang. Jala di kebaktian i do dipaboa na laho dibahen nama singkola na baru di angka huria, i ma Sekolah Pelayanan Teokratis. Dilehon ma buku tu hami na marisi 52 parsiajaran na laho dipangke di singkola i. Jala di taon i ma ahu parjolo sahali mandapot tugas di singkola i.

Tamat ma ahu sian SMA taon 1951. Jala hupingkiri ma aha na naeng huulahon di ngolungku. Hea do abangku si Jerry karejo di Betel. Jadi, ahu pe lomo do rohangku asa boi karejo di Betel. Alani i, huisi ma formulir asa boi tusi. Ndang sadia leleng, tanggal 10 Maret 1952 digokkon ma ahu asa karejo di Betel. Keputusan na denggan do on, alana gabe godang do tingkingku marhobas tu Jahowa.

Didok rohangku aut boi ma nian asa di bagian percetakan ahu karejo mangurupi laho mambahen majalah dohot sijahaon na asing. Alai, ndang hea ahu karejo di bagian i. Jadi, ditugashon ma ahu gabe pelayan jala mangurupi di dapur. Las do rohangku disi jala godang do na huparsiajari disi. Margilir do jam karejonami, jadi adong ma tingkingku laho tu perpustakaan di Betel laho parsiajaran pribadi. On mangurupi asa patoguhon haporseaonku dohot parale-aleonku tu Jahowa. Gabe lam pos ma rohangku asa boi marhobas tu Jahowa di Betel saleleng  ngolungku. Taon 1949 ndang karejo di Betel be si Jerry jala mangoli ma ibana dohot si Patricia. Tading ma nasida di jonok ni Brooklyn. Jotjot do nasida patoguhon rohangku ala baru dope ahu karejo di Betel.

Ndang sadia leleng ahu karejo di Betel, dilului organisasi do angka dongan na di Betel gabe wakil kantor cabang laho pasahathon jamita. Ditugashon do nasida tu angka huria na daona 320 kilometer sian Brooklyn. Asing ni marjamita, nasida pe rap marbarita dohot angka dongan na di huria. Ahu ma sada sian na dipillit i. Taroktokan do ahu tingki manjumpangi jala tingki pasahathon jamita. Tingki i, lobi sian sajom do pasahathon jamita. Markareta api do ahu manjumpangi angka huria i. Huingot do di tingki i ari minggu siang taon 1954 jala musim salju. Markareta api ma ahu laho mulak tu New York asa boi ahu sahat tu Betel di sorena i. Alai ala sega do masin ni kareta api i, jadi ndang boi ahu hatop sahat. Gabe jam 5 manogot di ari senin na i ma ahu sahat. Laho ma ahu tu Brooklyn markareta api bawah tanah. Dung sahat pintor karejo do ahu di dapur. Ala ndang modom ahu di borngin i, gabe tarlambat jala loja do huhilala. Alai adong do labana na huulahon i. Las do rohangku ala boi manjumpangi angka huria jala pajumpang dohot angka dongan na baru hutanda.

Dung sataon ahu di Betel jotjot do ahu dohot tu program parsiajaran Bibel na disiarhon ganup minggu di stasiun radio WBBR. Stasiun radio i adong di lante dua gedung Columbia Heights 124. Donganta si Alexander H. Macmillan na di jou si Mac, naung karejo di Betel martaon-taon, jotjot do dohot tu siaran radio on. Sitiruon na denggan do ibana tu angka na poso na karejo di Betel. Alana sai marsihohot do ibana nang pe godang sitaonon.

Di taon 1958 muba ma tugashu di Betel. Mangurupi angka dongan lulusan Singkola Gilead ma ahu. Huurupi do angka donganta on asa mandapot visa, asa boi laho tu daerah penugasan nasida. Tingki i arga dope tiket ni pesawat. Jadi gumodang sian nasida na ditugashon tu Afrika dohot Asia gabe markapal laut. Dung mura tiket ni pesawat, gabe marpesawat ma angka misionaris tu daerah penugasan nasida.

Taon 1960 huatur ma asa disewa pesawat sian Amerika Serikat tu Eropa laho tu kebaktian Internasional di taon 1961. Laho ma ahu tu sada sian kebaktian Internasional i na adong di Hamburg di Jerman. Dung sae kebaktian, ahu dohot tolu donganku sian Betel manewa mobil sian Jerman laho tu kantor cabang Roma di Italia. Sian i laho muse hami tu Prancis mangalewati dolok Pyrenees jala masuk tu Spanyol, tingki i diorai pamarenta do ulaonta disi. Alai, dilehon hami do piga-piga sijahaon tu angka dongan na di Barcelona. Dibungkus hami ma sijahaon i gabe songon hadiah. Las hian do rohanami pajumpang dohot nasida! Dung i laho muse hami tu Amsterdam jala mulak muse tu New York.

 Taon 1962 ditugashon ma ahu asa mangatur tiket pesawat, penginapan, dohot angka visa ni 583 angka donganta na laho tu kebaktian Internasional. Tema ni kebaktian i, i ma “Kabar Kesukaan yang Kekal” di taon 1963. Angka kebaktian i dibahen di Eropa, Asia, Pasifik Selatan, Honolulu di Hawaii, dohot Pasadena di Kalifornia. Jala adong do kunjungan khusus ni nasida tu Lebanon, Jordan dohot piga-piga inganan na disurat di Bibel.

Taon 1963 gabe taon na ringkot do di ahu. Alana di tanggal 29 Juni marhasohotan ma ahu tu si Lila Rogers sian Missouri. Ibana nunga karejo di Betel sian taon 1960. Saminggu dung marhasohotan hami, dohot ma hami tu kunjungan khusus i jala laho tu Junani, Mesir, dohot tu Lebanon. Sian i laho ma hami tu Jordan. Diorai do ulaonta disi jala ndang dilehon pamarenta visa tu angka Sitindangi. Jadi, sasintongna ndang diboto hami aha na laho masa molo dung sahat hami disi. Alai, las hian do rohanami mangida angka dongan naung paimahon hami di bandara. Ditiop nasida do spanduk, jala disurat do disi “Horas angka Sitindangi Ni Jahowa”! Las hian do rohanami tingki mangida angka luat na disurat di Bibel dohot huta ni si Abraham, si Isak, dohot si Jakkob, inganan marbarita Jesus dohot apostelna jala didia halak Kristen parjolo sahali marbarita “sahat tu ujung ni tano on”.​—Ul. 13:47.

Saleleng 55 taon, burju do si Lila mandongani ahu tingki mangulahon tugashu. Tingki diorai pamarenta ulaonta di Spanyol dohot Portugal laho do hami piga-piga hali tusi. Dipatogu hami do angka dongan, dilehon hami ma angka sijahaon dohot na dihaporluhon nasida. Hea do muse hami manjumpangi angka donganta na di penjara di Cádiz na di Spanyol. Las do rohangku ala boi hami masipatoguan.

Sian taon 1963, ahu mangurus pardalanan ni angka delegasi tu kebaktian internasional na di Afrika, Australia, Amerika tengah dohot Amerika Latin, Eropa, Timur Jauh, Hawai, Selandia Baru, dohot Puerto Riko. Godang do pengalaman na so tarhalupahon hami tingki kebaktian i. Songon, kebaktian Internasional na di Warsawa di Polandia taon 1989. Godang do donganta sian Rusia ro tu kebaktian i. Jala on ma parjolo sahali nasida ro tu kebaktian! Pajumpang do hami dohot angka dongan naung martaon-taon dipenjara di Uni Soviet alani haporseaon ni nasida.

Tugas na asing na mansai huhalomohon, i ma manjumpangi jala patoguhon keluarga Betel dohot misionaris di sude negara. Di sada tingki laho ma hami tu Korea Selatan jala pajumpang dohot 50 donganta na di penjara di Suwon. Tongtong do nasida marlas ni roha jala sai tarpaima do nasida sada tingki ndang adong be na mangorai nasida laho manomba Jahowa. Pajumpang dohot nasida gabe patoguhon ahu do!​—Rom 1:11, 12.

Nunga martaon-taon huida songon dia Jahowa mamasu-masu angka naposona. Tingki tardidi ahu taon 1943, holan 100.000 dope penyiar. Alai, saonari nunga 8.000.000 halak di 240 negara. On alani pangurupion ni angka lulusan Singkola Gilead. Las hian do rohangku boi rap saulaon dohot angka misionaris jala mangurupi nasida asa boi sahat tu inganan nasida ditugashon.

Las do rohangku ala tingki poso dope ahu hubahen keputusan asa karejo di Betel. Godang do pasu-pasu na hudapot sian Jahowa. Asing ni las ni roha ala karejo di Betel, las do rohangku dohot si Lila marbarita di piga-piga huria di Brooklyn saleleng 50 taon. Jala gabe godang do ale-alenami.

Tongtong do ahu diurupi si Lila karejo di Betel. Nang pe saonari ahu nunga marumur 84 taon, alai las do rohangku ala adong dope na boi huulahon. Jala mangurupi di bagian mambahen surat di Kantor Cabang dope ahu.

Las do roha boi dohot tu organisasi ni Jahowa jala mangida saut hata na disurat di Maleaki 3:18, “Idaonmuna ma hasurungan ni halak partigor martimbangkon halak parjahat, hasurungan ni halak sioloi Debata, martimbangkon halak na so mangoloi ibana.” Tongtong do Sibolis mambahen susa portibi on, mambahen halak ndang marpangkirimon jala ndang marlas ni roha. Alai las do roha ni halak na mangkaholongi jala manomba Jahowa nang pe mangolu di ari parpudi, ala marpangkirimon do angka sisomba Jahowa tu ari sogot. Sada hasangapon do pasahathon barita na uli on tu angka halak! (Mat. 24:14) Harajaon ni Debata laho mambahen portibi on gabe paradeiso. Hirim do rohanta asa saut i! Jala, sude halak di portibi on mandapot hahipason, las ni roha, jala mangolu salelengna.