1, 2. (a) Ulaon aha do na mansai ringkot di Jesus, jala boasa? (b) Aha do na ingkon taulahon asa marhasil gabe “dongan saulaon ni Debata”?

MULANA tukang hau do Jesus, dung i gabe parbarita na uli. (Mrk. 6:3; Rom 15:8) Malo do ibana martukang dohot marbarita. Tingki martukang, malo do Jesus mamangke angka alat na boi mangurupi ibana mambahen angka barang na sian hau. Tingki marbarita na uli, dipangke do parbinotoanna taringot Hata ni Debata laho mangurupi halak mangantusi hasintongan. (Mat. 7:28; Luk. 24:32, 45) Dung marumur 30 taon Jesus, ndang martukang be ibana. Gabe parbarita na uli nama. Ala diboto ibana ulaon marbarita do na rumingkot. Laho paboahon taringot Harajaon ni Debata do umbahen na disuru Debata ibana tu tano on. (Mat. 20:28; Luk. 3:23; 4:43) Ulaon marbarita na uli do na rumingkot di ngolu ni Jesus, jala lomo do rohana asa na asing pe mangulahon songon i.​—Mat. 9:35-38.

² Ra ndang tukang hau hita, alai sude do hita parbarita na uli. Dohot do Debata di ulaon marbarita on. Alani i do hita didok, “dongan saulaon ni Debata”. (1 Kor. 3:9; 2 Kor. 6:4) Tutu do na didok panurat psalmen, “Hasintongan do  pangarimpunan ni hatam.” (Ps. 119:159, 160) Jadi, hasintongan do hata ni Jahowa. I do alana lomo do rohanta asa “denggan mangajarhon jala patorangkon hasintongan i” tingki marbarita na uli. (Jaha 2 Timoteus 2:15.) Alani i, tongtong ma hita marsiajar asa lam malo mamangke Bibel dohot angka alat na diparade organisasi laho mangajari halak taringot Jahowa, Jesus, dohot taringot Harajaon ni Debata. Nunga diparade organisasi ni Jahowa angka alat na denggan, asa marhasil hita tingki marbarita na uli. Jala porlu do taboto songon dia cara mamangke angka alat na tadok Angka Alat Laho Mangajari.

3. Tingki marbarita na uli aha do na ringkot taingot, jala aha do poda na disurat Ulaon ni Apostel 13:48 na boi mangurupi hita?

³ Ra sungkun-sungkun do rohamuna boasa tadok i Angka Alat Laho Mangajari, ndang Angka Alat Laho Marbarita. Alana “marbarita” lapatanna, paboahon sada hatorangan. Alai “mangajari” lapatanna, patorangkon hatorangan i asa diantusi sasahalak na dibege ibana jala gabe olo mangulahon na diparsiajari ibana. Saleleng di ari parpudi on, mambahen parsiajaran Bibel jala mangajari halak asa gabe sisean ni Jesus do na rumingkot di hita. Lapatanna, ingkon ringgas ma hita mangalului angka halak na “tama mandapot hangoluan saleleng ni lelengna”. Jala taurupi ma nasida asa manomba Jahowa.​—Jaha Ulaon ni Apostel 13:44-48.

4. Songon dia do laho mamboto sasahalak na “tama mandapot hangoluan saleleng ni lelengna”?

⁴ Songon dia do laho mamboto sasahalak na “tama mandapot hangoluan saleleng ni lelengna”? Halak Kristen di abad na parjolo boi pajumpang dohot halak sisongon i holan tingki marbarita na uli. Didok Jesus do tu angka siseanna, “Tu kota manang tu huta na dia pe hamu laho, lului ma na olo manjalo baritamuna”. (Mat. 10:11) Suang songon i do di tingkinta saonari. Angka halak na so ias roha, na ginjang roha manang na so mangkaringkothon parbinotoan taringot Debata, ndang na laho olo manangihon barita na uli. Holan halak na ias roha, na serep roha jala na lomo rohana mamboto hasintongan do na talului. Mangalului halak sisongon i, dipatudos do songon ulaon ni Jesus tingki gabe tukang hau. Ingkon dilului ibana do hau na denggan andorang so mambahen lamari, kursi, meja, podoman, pintu, auga, manang na asing. Dung i, ingkon dipangke ibana ma angka alatna dohot parbinotoanna asa boi mambahen i. Saonari pe, ingkon talului do halak na ias rohana. Dung i, boi ma tapangke angka alat jala parbinotoanta laho mangurupi nasida asa gabe sisean.​—Mat. 28:19, 20.

5. Aha do na porlu taboto taringot Angka Alat Laho Mangajari? Bahen ma sada tudosan. (Ida gombar di mula ni parsiajaran.)

⁵ Ganup alat marasing-asing do gunana. Umpamana, bayangkon ma angka alat na dipangke Jesus tingki martukang. * Dipangke ibana do angka alat laho mangukur, manandai, mamotong, mangalubangi jala membentuk sada hau. Dung i, adong do muse alat laho mamasang angka hau i asa gabe sada barang na boi dipangke. Suang songon i, Angka Alat Laho Mangajari  pe marasing-asing do gunana. Saonari taulas ma songon dia cara mamangke i.

6, 7. (a) Songon dia do hamu mamangke kartu kontak? (b) Boasa ringkot tapangke gokkon tu parpunguan?

⁶ Kartu Kontak. On sada alat na gelleng. Alai boi mangurupi laho patandahon ise do Sitindangi jala patuduhon jw.org. Sian jw.org boi do lam diboto angka halak taringot Sitindangi. Jala boi muse dipangido nasida asa marsiajar Bibel sian jw.org. Lobi sian 400.000 halak mangido marsiajar Bibel di jw.org. Jala ganup ari adong marratus halak mangido marsiajar Bibel di jw.org! Jadi boan hamu ma piga-piga kartu kontak on asa boi dilehon hamu tu manang ise na jumpangmuna.

⁷ Gokkon. Di gokkon i didok do, “Ditogihon hami do hamu rap marsiajar Bibel dohot Sitindangi Ni Jahowa.” Jala nasida pe boi marsiajar “di parpunguan” manang “di jabu”. Jala di gokkon i dipaboa do muse ise Sitindangi. Ditogihon do angka halak “na mamboto ringkot ni marale-ale tu Debata” asa rap marsiajar Bibel dohot hita. (Mat. 5:3) Tajangkon ma sude na ro tu parpunguan nang pe ndang marsiajar Bibel dope nasida. Molo ro nasida tu parpunguan, lam godang ma na diparsiajari nasida taringot Bibel.

8. Boasa ringkot manggokkon angka halak tu parpunguan apala holan sahali? Paboa ma sada pengalaman.

⁸ Ringkot do manggokkon sasahalak asa ro tu parpunguan, apala holan sahali pe. Asa boi diida ibana holan Sitindangi Ni Jahowa do na mangajarhon hasintongan sian Bibel jala olo mangurupi halak laho mananda Debata. Ndang adong agama na asing na mangulahon songon on. (Jes. 65:13) Piga-piga taon naung salpu, adong do na mamparrohahon imbar ni Sitindangi dohot agama na asing. Songon si Ray dohot si Linda na mardongan saripe. Tading di Amerika Serikat do nasida. Adong dua na naeng botoon ni nasida, i ma taringot Debata jala songon dia do pangkean na tama laho manomba Debata. Alani i, ro ma nasida tu piga-piga gareja di huta ni nasida. Alani godang ni gareja di huta ni nasida, sampe martaon-taon do nasida mangulahon i. Alai ndang dapot ni nasida sisongon i. Ndang adong manang aha na boi diparsiajari nasida sian angka gareja i. Jala ndang suman pangkean ni angka halak na disi. Sada tingki, dung mulak sian gareja, laho ma si Linda karejo alai molo si Ray mulak tu jabu. Hape lewat ma si Ray sian Bale Harajaon. Didok rohana ma, ‘Hucoba ma masuk tusi asa hubereng jo.’ Dijangkon angka dongan di huria do ibana jala diida ibana denggan do nasida marpangkean. Hundul ma si Ray di jolo jala lomo hian rohana tu parsiajaran na diulas tingki i! Mansai denggan do pengalaman on. Sarupa do on tu na didok si Paulus taringot pangkilalaan ni sasahalak na baru dope mangihuthon parpunguan. Didok ibana, “Tutu do Debata di tonga-tongamuna!” (1 Kor. 14:23-25) Tongtong do ro si Ray tu ganup parpunguan di ari minggu. Ndang sadia leleng diihuthon ibana do parpunguan tonga pokan. Jala si Linda pe gabe ro tu parpunguan. Nang pe nunga marumur 70 taon nasida, olo do marsiajar Bibel jala tardidi.

9, 10. (a) Songon dia do hamu mamangke risalah laho mamungka pangkataion? (b) Paboa ma songon dia carana mamangke risalah Aha do Harajaon ni Debata i?

⁹ Risalah. Adong ualu topik na dibahen di angka risalah na diparade organisasi. Nunga sian taon 2013 on dibahen, jala hira-hira lima miliar risalah nunga dicetak! Mura do mamangke risalah on laho mamungka pangkataion. Alana sarupa do sude susunan ni hatorangan na dibahen di risalah on. Jala sarupa do cara manawarhon sude risalah. Songon dia ma caranta mamangke risalah laho mamungka pangkataion?

¹⁰ Umpamana, molo naeng mamangke risalah Aha do Harajaon ni Debata I?, patudu ma sungkun-sungkun di halaman na parjolo. Jala dokkon ma, “Hea do sungkun-sungkun rohamuna, aha do Harajaon ni Debata i? Ninna rohamuna . . . ?” Togihon ma ibana mamillit sada sian alus na adong disi. Aha pe alusna, bungka ma risalah i jala patudu ma bagian “Songon on ma Hata ni Bibel”. Jahahon ma ayat na disurat disi, i ma Daniel 2:44 dohot Jesaya 9:5. Tingki naeng sae mangkatai, patudu ma sungkun-sungkun na adong di halaman parpudi na adong di bagian “Rimangi ma”. Adong disi sungkun-sungkun, “Aha na laho sihilalaon ni pangisi ni Harajaon ni Debata?” Jala alusi ma sungkun-sungkun i tingki manjumpangi muse. Tingki kunjungan, patudu ma hatorangan sian parsiajaran 7 di brosur Barita na Uli sian Debata! Togihon ma ibana asa marsiajar Bibel.

11. Aha do tujuan ni angka majalah on dibahen, jala aha na ingkon taboto taringot angka majalah on?

¹¹ Majalah. Joujou Paboahon dohot Sadarlah! i ma sijahaon naung godang dibagihon jala diterjemahon di liat portibi on! Menarik do dibahen judul dohot gombarna, asa lomo roha ni halak laho manjaha i. Jadi tapangke ma majalah on laho mangurupi halak asa mamboto aha do na ringkot di ngolunta saonari. Alai parjolo ingkon taboto do tu angka halak na songon dia do ganup majalah on boi talehon.

12. (a) Laho tu ise do Sadarlah! dibahen, jala aha do na tinuju ni majalah on? (b) Paboa ma pengalamanmuna na baru-baru on tingki mamangke majalah on.

¹² Sadarlah! dibahen laho tu angka halak na so apala mamboto taringot Bibel. Jala ndang diboto nasida ajaran ni halak Kristen manang ndang porsea tu agama. Manang ndang diboto molo Bibel i boi mangurupi ngolu ni nasida. Alai, tujuan ni Sadarlah! asa paposhon roha ni nasida na adong do Debata. (Rom 1:20; Heb. 11:6) Sijahaon on pe boi mangurupi angka na manjaha asa porsea molo Bibel i “hata ni Debata . . . Jala sintong do i”. (1 Tes. 2:13) Adong tolu judul ni Sadarlah! dibahen di taon 2018, i ma “Apa Kebahagiaan Sejati Itu?”, “12 Kunci Keluarga Bahagia”, dohot “Bantuan bagi Yang Berduka”.

13. (a) Tu ise do majalah Joujou Paboahon edisi umum dibahen? (b) Paboa ma pengalamanmuna na baru-baru on tingki mamangke majalah on.

¹³ Na tinuju ni majalah Joujou Paboahon edisi umum, i ma laho paboahon parbinotoan sian Bibel tu angka halak na porsea tu Debata dohot na mangargai Bibel. Ra adong do parbinotoan nasida taringot Bibel,  alai ndang apala tangkas diantusi nasida taringot Bibel. (Rom 10:2; 1 Tim. 2:3, 4) Adong tolu majalah Joujou Paboahon na dibahen taon 2018 na marjudul, “Porlu Dope Tajaha Bibel?”, “Boha do Ngolungku Sogot?”, dohot “Debata do Mambahen Ahu Susa?”

14. (a) Aha do na tinuju ni opat video on dibahen? (b) Paboa ma pengalamanmuna na denggan tingki patuduhon angka video on.

¹⁴ Video. Di jaman ni Jesus ndang mamangke masin dope alat na dipangke tukang hau. Alai saonari, godang do alat na mamangke masin na dipangke tukang hau, songon gergaji, bor, dohot masin amplas. Jadi tingki marbarita hita, ndang holan angka sijahaon na boi talehon tu angka halak, alai adong opat video na denggan na boi taputar tu nasida. Angka video i, i ma Boasa Ringkot Marsiajar Bibel?, Songon dia do Parsiajaran Bibel na Diulahon Hami?, Aha do na Dipatupa di Bale Harajaon?, dohot Ise do Sitindangi Ni Jahowa? Angka video na jempek on, lelengna hurang sian dua minut jala diputar tingki marbarita. Video na ganjang boi diputar tingki manjumpangi muse. Jala boi diputar tu angka halak na boi leleng ditogihon mangkatai. Angka alat na mansai denggan do angka video on. Alana, boi do on mangonjar roha ni sasahalak asa marsiajar Bibel jala ro tu parpunguan.

15. Paboa ma pengalaman laba ni manonton sada video di bahasa na diantusi angka halak.

¹⁵ Adong donganta borua na pajumpang tu sahalak borua na baru pinda sian Mikronesia. Jala borua on nunga marbahasa Yap sian na gelleng. Dipatudu donganta i ma tu ibana video Boasa Ringkot Marsiajar Bibel? na marbahasa Yap. Dung diputar video i, didok borua i ma, “Bahasangku do on, boasa boi songon i? Sian logatna boi do huboto bahasa di hutangku do on. Bahasangku do na di video on!” Ala adong do di situsta na marbahasa Yap, pintor dijaha jala ditonton ibana do manang aha na adong di situsta. (Bandingkon Ulaon ni Apostel 2:8, 11.) Pengalaman na asing, sian donganta na tading di Amerika Serikat. Adong do paramanna na tading di benua na asing. Dikirim ibana ma link manang alamat video Boasa Ringkot Marsiajar Bibel? na marbahasa na diantusi paramanna. Ditonton paramanna do video i, jala dikirim ma email tu ibana. Didok paramanna i, “Ala didok di video i, Sibolis do na mangarajai portibi on, gabe sungkun-sungkun ma rohangku. Jadi hubahen ma pangidoan laho marsiajar Bibel.” Mansai denggan do pengalaman on. Alana ibana tading di negara na diorai pamarenta do ulaonta.

16. Aha do na tinuju ni ganup brosur on: (a) Tangihon ma Debata Asa Mangolu Salelengna. (b) Barita na Uli sian Debata! (c) Ise do na Mangulahon Lomo ni Roha ni Jahowa Saonari On?

¹⁶ Brosur. Boi ma tapangke Tangihon ma Debata Asa Mangolu Salelengna. * Tapangke ma brosur on laho mangajari halak na so lancar manjaha. Asing ni i, pangke ma Barita na Uli sian Debata! laho manogihon halak marsiajar Bibel. Patudu ma 14 Topik na adong di halaman parpudi. Jala  pangido ma asa dipillit sada topik na lomo rohana asa diulas. Dung i, ulas ma topik na dipillit na i. Hea do dicoba hamu cara on tingki manjumpangi muse? Brosur na patoluhon, i ma Ise do na Mangulahon Lomo ni Roha ni Jahowa Saonari On? Dibahen on laho mangajarhon taringot organisasi tu parsiajar Bibelta. Asa taboto mamangke angka brosur on, ida ma Hangoluan dohot Pangkobasion ni Halak Kristen—Na Laho Diparsiajari Maret 2017.

17. (a) Aha do na tinuju ni ganup buku parsiajaran on? (b) Aha do na porlu diulahon sasahalak naung tardidi, jala boasa?

¹⁷ Buku. Tingki hamu mamangke brosur tu parsiajar Bibelmuna, sada tingki boi ma diganti hamu tu buku Aha do na Diajarhon Bibel tu Hita? Alat on, mangurupi parsiajar Bibel mamboto ajaran dasar sian Bibel. Dung sae ibana mamparsiajari buku i jala nunga lam jonok tu Debata, uduti hamu ma mamangke buku Tongtong ma di Bagasan Holong ni Roha ni Debata. Alat on boi mangurupi parsiajar Bibel mamboto songon dia mangulahon angka prinsip ni Bibel. Alai ingot ma nang pe nunga tardidi ibana, porlu do dipasae ibana mamparsiajari dua buku i. Alana, on boi patoguhon haporseaonna tu Jahowa jala tongtong marsihohot tu Ibana.​—Jaha Kolosse 2:6, 7.

18. (a) Songon dia do 1 Timoteus 4:16 patoguhon hita laho mangajari halak, jala aha do hasilna? (b) Aha do tujuanta tingki mamangke Angka Alat Laho Mangajari?

¹⁸ Sude Sitindangi Ni Jahowa martanggung jawab laho mangajari angka halak asa mamboto “taringot tu pangkirimon on sian barita na uli”. Alana on ma na boi mangurupi nasida mandapot hangoluan salelengna. (Kol. 1:5; jaha 1 Timoteus 4:16.) Asa boi taulahon i, adong do Angka Alat Laho Mangajari. (Ida kotak “ Angka Alat Laho Mangajari”.) Jadi denggan ma tapangke angka alat on. Boi ma tatontuhon na dia jala andigan hita boi mamangke alat on. Alai ingot ma, tujuanta ndang holan mambagihon sijahaon tu godang halak. Jala ndang lehononta sijahaonta tu angka halak na so olo manangihon. Alana halak na ias roha, serep roha, na lomo rohana mananda Debata i ma halak na “tama mandapot hangoluan saleleng ni lelengna”. Jala halak sisongon i ma na laho taurupi asa gabe sisean ni Jesus.​—Ul. 13:48; Mat. 28:19, 20.