1, 2. Aha do tanggung jawab na balga na dilehon tu si Josua dungkon mate si Musa?

DIDOK Jahowa do tu si Josua, “Nunga mate ianggo si Musa, naposongki, on pe borhat ma ho, taripari ma Jordan on, ho dohot sandok bangso on laho tu tano silehononku tu nasida.” (Jos. 1:1, 2) Ra, songgot do roha ni si Josua tingki mambege i, alana nunga 40 taon ibana gabe parhobas ni si Musa!

² Nunga leleng si Musa manguluhon bangso Israel, alai saonari si Josua ma na manguluhon nasida. Ra sungkun-sungkun do rohana, olo do bangso Israel manjangkon ibana gabe pamimpin ni nasida? (5 Mus. 34:8, 10-12) Taringot Josua 1:1, 2, sada buku referensi ni Bibel mandok, molo sian najolo sahat tu saonari maol jala parohon jea do di sada bangso molo marganti pamimpinna.

3, 4. Songon dia do si Josua dipasu-pasu ala porsea tu Jahowa? Jala sungkun-sungkun aha do na laho taulas?

 ³ Tontu on mambahen si Josua gabe holsoan. Alai, porsea do ibana tu Jahowa jala pintor diihuthon ibana do tudu-tuduna. (Jos. 1:9-11) Dipasu-pasu do si Josua ala porsea tu Jahowa jala disuru ma sada suru-suruan laho manogu-nogu si Josua dohot bangso Israel. Ra, suru-suruan on ma na didok Hata, i ma Anak buhabaju ni Debata.​—2 Mus. 23:20-23; Joh. 1:1.

⁴ Diurupi Jahowa do bangso Israel asa mura mangihuthon tudu-tudu sian pamimpin ni nasida na baru, i ma si Josua. Di tingkinta saonari pe, godang do perubahan na dibahen organisasi. Alani i, aha do na paposhon rohanta tu pamimpinta, i ma Jesus Kristus? (Jaha Mateus 23:10.) Laho mangalusi sungkun-sungkun on, taparsiajari ma songon dia Jahowa manguluhon naposona najolo tingki muba situasi.

5. Aha do pengalaman na so tarduga na didapot ni si Josua tingki di jonok ni Jeriko? (Ida gombar di mula ni parsiajaran.)

⁵ Dungkon menyeberang halak Israel sian sunge Jordan, adong ma pengalaman na so tarduga na didapot si Josua. Di jonok ni kota Jeriko, jumpangna ma sahalak baoa na mamboan podang. Jadi, disungkun si Josua ma, “Dongan do Ho, manang alo?” Tarsonggot ma si Josua ala didok baoa i molo ibana, “partogi ni parangan [manang, “panglima tentara”] ni Jahowa” na laho mangurupi naposo ni Debata. (Jaha Josua 5:13-15.) Nang pe didok di Bibel Jahowa do na mangkatai tu si Josua, ra marhite suru-suruan do Jahowa pasahathon hatana tu si Josua. Jala jotjot do Jahowa mangulahon on najolo.​—2 Mus. 3:2-4; Jos. 4:1, 15; 5:2, 9; Ul. 7:38; Gal. 3:19.

6-8. (a) Boasa tudu-tudu na dipaboa suru-suruan i hira na so parohon laba? (b) Sian dia do taboto molo tudu-tudu i dumenggan jala pas di tingkina? (Ida surat na di toru.)

⁶ Dipaboa suru-suruan i do tu si Josua aha na ingkon diulahon asa boi manaluhon kota Jeriko. Mulana, hira na so masuk angkal do tudu-tudu na dilehon i. Umpamana, didok suru-suruan i do tu si Josua asa disunat sude tentara ni Israel. Molo songon i do situasina, tontu saleleng piga-piga ari ndang boi nasida marporang. Jadi, cocok do nasida disunat di tingki i?​—1 Mus. 34:24, 25; Jos. 5:2, 8.

⁷ Ra, gabe sungkun-sungkun do roha ni tentara ni Israel, ‘Songon dia ma hami manjaga keluarganami molo ro musu mangaroro inganannami?’ Alai, di na so panagaman ni nasida masa do i! Ndang ro halak Jeriko mangaroro, gariada mabiar do nasida tu halak Israel. Didok di Bibel, “Tarhinsu situtu do [harbangan] ni huta Jeriko didapot halak Israel, ndang tarbahen ruar manang bongot manang ise.” (Jos. 6:1) Alani i, gabe lam pos ma roha ni halak Israel tu tudu-tudu ni Debata!

⁸ Dipaboa suru-suruan i do tu si Josua asa unang mamorangi halak Jeriko. Gariada, ingkon marbaris do nasida sahali sadari laho mangkaliangi huta i sahat tu ari na paonomhon. Dung i, di ari na papituhon ingkon pitu hali ma nasida mangkaliangi huta i. Ra didok roha ni nasida, ‘Ndang adong lapatan ni on!’ Alai diboto Jahowa do aha na dumenggan tu nasida! Ala  mangihuthon tudu-tuduna gabe lam togu ma haporseaon ni halak Israel. Jala, ndang ingkon marporang nasida mangalo tentara ni halak Jeriko.​—Jos. 6:2-5; Heb. 11:30. *

9. Boasa ingkon taihuthon tudu-tudu sian organisasi ni Debata? Bahen ma sada tudosan.

⁹ Aha do na boi taparsiajari sian carita on? Sipata dipangke organisasi ni Jahowa do cara na baru jala ndang sai taantusi boasa songon i dibahen. Umpamana, ra olo do didok rohanta ndang tabo mamangke perangkat elektronik tingki pelajaran pribadi, tingki marbarita, dohot tingki marpungu. Alai saonari nunga tahilala labana tingki mamangke angka alat i. Jadi, molo taingot do laba ni tudu-tudu na dilehon, gabe lam togu ma haporseaonta jala gabe lam solhot ma hita dohot angka dongan.

10. Sasintongna, ise do na mangarahon punguan na mangaradoti asa pasaehon parsoalan taringot sunat i?

¹⁰ Dung 13 taon si Kornelius na so halak Jahudi gabe halak Kristen, adong do piga-piga halak Jahudi Kristen na mandok ingkon disunat do halak Kristen. (Ul. 15:1, 2) Marsoal do angka dongan na di kota Antiokia taringot i. Alani i, disuru nasida ma si Paulus tu Jerusalem laho manungkun i tu punguan na mangaradoti. Sasintongna, ise do na mangarahon si Paulus asa laho tusi? Didok ibana, “Ala mandapot pangungkapon do ahu laho tu Jerusalem.”  Kristus do na mangarahon punguan na mangaradoti asa pasaehon parsoalan i.​—Gal. 2:1-3.

11. (a) Boasa piga-piga halak Jahudi Kristen tongtong mangulahon sunat? (b) Songon dia do si Paulus patuduhon na serep do rohana mangurupi angka sintua di Jerusalem? (Ida surat na di toru.)

¹¹ Diarahon Kristus do punguan na mangaradoti laho patangkashon molo halak Kristen na so Jahudi ndang pola disunat. (Ul. 15:19, 20) Alai, saleleng martaon-taon godang dope halak Jahudi Kristen na tongtong pasunathon ianakhonna. Hape dibege angka sintua di Jerusalem ma barita molo si Paulus ndang mangargai Patik ni si Musa. Jadi, didok angka sintua i ma asa dibuktihon si Paulus na diargai ibana do Patik i. * (Ul. 21:20-26) Disuru nasida ma si Paulus tu bagas joro raphon opat baoa laho patuduhon na diargai ibana do Patik ni si Musa. Ra, didok roha ni si Paulus do, ‘Ndang masuk angkal on! Boasa ingkon huulahon songon i? Halak Kristen Jahudi na so mangantusi sunat i do na sala.’ Alai, diantusi si Paulus do na lomo do roha ni angka sintua i asa marsada sude halak Kristen. Jadi diihuthon si Paulus ma tudu-tudu ni nasida. Sasintongna dungkon mate Jesus ndang marlangku be Patik ni si Musa. Alani ra, gabe sungkun-sungkun do rohanta, boasa sampe leleng dipaloas Jesus masa parsoalan i?​—Kol. 2:13, 14.

12. Boasa sampe leleng dipaloas Jesus sae parsoalan taringot sunat?

¹² Porlu do tingki asa boi mangihuthon tudu-tudu na baru. Piga-piga halak Jahudi Kristen ndang pintor mangantusi molo nasida ndang porlu be mangihuthon Patik i. (Joh. 16:12) Didok roha ni nasida do sunat i gabe tanda parale-aleon tu Debata. (1 Mus. 17:9-12) Jala, adong muse na mabiar molo imbar sian halak Jahudi na asing gabe direhei do annon. (Gal. 6:12) Alai tingki i, adong ma muse tudu-tudu na dipaboa Kristus marhite surat na dibahen si Paulus.​—Rom 2:28, 29; Gal. 3:23-25.

13. Di tingkinta saonari aha do na ingkon taulahon molo adong tudu-tudu sian Kristus?

¹³ Kristus dope Pamimpin ni sude huria Kristen sahat tu saonari. Jadi, molo adong tudu-tudu na baru jala ndang apala taantusi i, taingot ma songon dia Kristus manguluhon naposona di tingki najolo. Umpamana, di jaman ni si Josua manang di jaman ni angka apostel, tongtong do dilehon Kristus tudu-tudu na dumenggan laho manjaga naposo ni Debata. Tujuanna laho patoguhon haporseaon jala mangurupi nasida asa tongtong marsada.​—Heb. 13:8.

14-16. Songon dia do tudu-tudu sian “naposo haposan” patuduhon na lomo do roha ni Kristus patoguhon haporseaonta?

¹⁴ Saonari, “naposo haposan jala na  marbisuk” do na mangalehon tudu-tudu na tahaporluhon. (Mat. 24:45) Jala, tudu-tudu i gabe bukti na disarihon Jesus do hita. Donganta si Marc na opat ianakhonna mandok, “Asa gale huria diroro Sibolis do sude keluarga Kristen. Alai saonari dilehon tudu-tudu tu hita asa mambahen ibadat keluarga ganup minggu. Alani i, ingkon diingot kepala keluarga ma asa manjaga keluargana!”

¹⁵ Dung taboto songon dia Kristus mamimpin hita, tontu gabe taantusi ma lomo do roha ni Kristus patoguhon haporseaonta. Pingkirhon ma sada pengalaman sian sada sintua na margoar si Patrick. Didok ibana, “Ndang pola lomo roha ni angka donganta ro tu kelompok dinas lapangan di ari sabtu ala otik na ro.” Alai, didok ibana muse molo tudu-tudu on patuduhon na diparrohahon Jesus do sude angka dongan di huria. Alana adong do donganta na parila manang na so pola jotjot marbarita, gabe lam togu haporseaonna alani i.

¹⁶ Diurupi Kristus do hita asa tongtong mangkaringkothon ulaon marbarita. On ma ulaon na mansai ringkot di tingkinta saonari. (Jaha Markus 13:10.) Sahalak sintua na margoar si André tongtong do mangihuthon tudu-tudu na dilehon organisasi ni Jahowa. Jala didok ibana, “Ala diorui do angka donganta na karejo di kantor cabang, gabe diingot hami ma nunga jonok ari ni Jahowa. Alani i ingkon ringgas do hami di ulaon marbarita.”

17, 18. Boasa ingkon tongtong taingot laba ni mangihuthon tudu-tudu na baru?

¹⁷ Tudu-tudu na tadapot sian Jesus Kristus naung gabe Raja, boi mangurupi hita di tingkinta saonari dohot di ari na naeng ro.  Jadi, sai ingot ma labana molo diihuthon hamu tudu-tudu na baru. Tingki di ibadat keluarga ulas ma laba ni tudu-tudu na baru di parpunguan manang di ulaon marbarita di keluargamuna.

¹⁸ Molo taingot laba ni mangihuthon tudu-tudu sian organisasi ni Jahowa, gabe mura ma hita mangihuthon tudu-tudu i jala marlas ni roha ma hita. Umpamana, gabe hemat do parhepengon ni organisasi ala ndang songon najolo be godang ni sijahaon dicetak. Organisasi boi pasahathon barita na uli tu gumodang halak, alana dipangke do alat na canggih. Jadi, tapangke do sijahaon elektronik, audio, manang video tingki marbarita? On sada cara mangihuthon tudu-tudu sian Kristus na marlomo ni roha asa marbisuk hita mamangke angka na adong di organisasi.

19. Boasa ingkon taihuthon tudu-tudu sian Kristus?

¹⁹ Molo taihuthon tudu-tudu sian Kristus, tapatogu do haporseaon ni donganta jala hita pe lam marsada. Taringot angka dongan na diorui na di Betel, didok si André do, “Rade do nasida mangihuthon tudu-tudu na baru on. Huargai do nasida jala lam pos do rohangku tu tudu-tudu na sian Kristus. Diihuthon nasida do hureta ni Jahowa. Las do roha ni nasida tu tugas na didapot ni nasida.”

20, 21. (a) Boasa pos rohanta tu Pamimpinta, i ma Kristus? (b) Sungkun-sungkun aha do na laho taulas di parsiajaran na mangihut?

²⁰ Satongkin nai Jesus Kristus, i ma Pamimpinta laho “mamorangi musuna jala manaluhon” dung i “mambahen angka halongangan”. (Pgk. 6:2; Ps. 45:5) Saonari pe, diurupi ibana do hita asa boi mangolu di portibi na imbaru. Jala ulaonta disi, i ma mangajari angka halak naung dipahehe dohot mambahen portibi on gabe paradeiso.

²¹ Manang aha pe na masa, tongtong ma hita porsea tu Pamimpin manang Rajanta. Jala urupanna do hita asa sahat tu portibi na imbaru. (Jaha Psalmen 46:2-4.) Saonari, ra olo do maol taihuthon tudu-tudu na baru, tarlumobi molo i mambahen muba situasi di ngolunta. Molo songon i, songon dia do hita boi tongtong mangkilala hadameon jala tongtong togu haporseaonta tu Jahowa? Taulas ma alus ni sungkun-sungkun i di parsiajaran na mangihut.