1, 2. Aha do na jotjot dipangke Sibolis laho manusai jolma?

LAM MURA do ulaon ni jolma ala dibahen telepon, bola lampu, mobil dohot kulkas. Hape, ala dibahen do angka sinjata, ranjau darat, sigaret, dohot bom atom gabe susa do ngolu ni jolma. Alai, sian najolo adong do na mambahen ngolu ni jolma lam susa. Aha ma i? I ma gabus. Margabus, i ma paboahon na so sasintongna laho mangoto-otoi sasahalak. Ise do na parjolo sahali margabus? Sibolis! Jala didok Jesus do ibana, “ama ni gabus”. (Jaha Johannes 8:44.) Andigan do i masa?

² Masa ma i tingki di porlak Eden hira-hira marribu taon naung salpu. Tingki di Paradeiso, las do roha ni si Adam dohot si Hawa. Alai dipaboa Debata do tu nasida, molo diallang parbue ni “hau parbinotoan ni na denggan dohot na roa”, mate ma nasida. Diboto Sibolis do taringot i, alai dipangke ibana do ulok laho mandok tu si Hawa, “Ndang na tutu hamu mate.” I ma gabus na parjolo sahali. Didok Sibolis do muse, “Diboto Debata do, sadari dipangan hamu sian i, tonggor ma  matamuna, gabe doshon Debata hamu umboto na denggan dohot na roa.”​—1 Mus. 2:15-17; 3:1-5.

3. Boasa mansai jahat gabus ni Sibolis, jala aha ma na masa alani i?

³ Mansai jahat do gabus ni Sibolis i. Alana, diboto ibana do molo porsea si Hawa jala diallang parbue ni hau i, gabe mate do nasida. Jala, tutu do songon i na masa. Ala ndang unduk be si Adam dohot si Hawa tu parenta ni Jahowa, gabe mate do nasida. (1 Mus. 3:6; 5:5) Alani dosa ni si Adam, ‘sahat ma hamatean i tu saluhut jolma’. Jala saonari, “nunga marhuaso hamatean i . . . , gariada marhuaso do hamatean i tu halak na so mangulahon dosa songon na niulahon ni si Adam.” (Rom 5:12, 14) On ma na mambahen hita ndang sempurna jala ndang mangolu salelengna songon na dihalomohon Debata. Gariada, holan “pitupulu taon” do jolma mangolu, ‘jala molo gogo do ualupulu taon’. Jala gok do “hangaluton dohot halojaon” di ngolunta. (Ps. 90:10) Ala gabus ni Sibolis do on masa!

4. (a) Sungkun-sungkun aha do na ingkon taboto alusna? (b) Songon na disurat di Psalmen 15:1, 2, ise do na boi marale-ale tu Jahowa?

⁴ Didok Jesus taringot Sibolis, “Ndang hot ibana di hasintongan, ai ndang adong hasintongan di bagasan rohana.” Jala ndang na laho muba Sibolis. Tong do ibana margabus sahat tu saonari “mangaliluhon saluhut portibi on”. (Pgk. 12:9) Alai, ndang olo hita dililuhon Sibolis. Alani i, adong tolu sungkun-sungkun na ingkon taboto alusna. Songon dia do saonari Sibolis mangaliluhon jolma? Boasa olo jolma margabus? Asa unang songon si Adam dohot si Hawa, songon dia do carana asa tongtong hita jujur?​—Jaha Psalmen 15:1, 2. 

5. Songon dia do saonari Sibolis mangaliluhon jolma?

⁵ Boi do hita ndang dioto-otoi Sibolis. Alana, didok apostel Paulus do, “Nunga taboto sangkap ni Sibolis i.” (2 Kor. 2:11) Dirajai Sibolis do sude portibi on. Dirajai ibana do agama na so sintong, angka pamarenta na korupsi, jala angka pengusaha na jahat. (1 Joh. 5:19) Alani i, ndang longang be rohanta molo Sibolis dohot angka suru-suruanna na jahat mangela-ela angka parhuaso asa “jotjot margabus”. (1 Tim. 4:1, 2) Umpamana, margabus do piga-piga halak tingki mambahen iklan taringot bisnis ni nasida. Hape naeng mangoto-otoi halak do nasida asa dapotan hepeng. Jala ra tiga-tiga ni nasida pe boi mambahen sahit.

6, 7. (a) Boasa boi parohon jea molo na so sintong diajarhon pamimpin agama? (b) Gabus aha do na hea dibege hamu sian angka pamimpin agama?

⁶ Boasa boi parohon jea molo na so sintong diajarhon pamimpin agama? Alana molo porsea halak tu na diajarhon pamimpin agama, gabe na sala ma na diulahon nasida. Ujungna gabe ndang dapot hangoluan na salelengna nasida. (Hos. 4:9) Diboto Jesus do angka pamimpin agama di tingki i, nunga mangoto-otoi jolma. Tangkas do didok ibana tu nasida, “Marjea ma hamu siboto surat dohot halak Parise, halak na munafik! Ai ditaripari hamu do laut dohot darat laho mambahen sasahalak masuk tu agamamuna. Hape ia dung masuk, gabe tu Gehena [manang hamatean salelengna] do ibana dibahen hamu.” (Mat. 23:15) Didok Jesus angka pamimpin agama i sarupa do songon ama ni nasida i ma Sibolis, na didok “pambunu”.​—Joh. 8:44.

 ⁷ Saonari on, godang do pamimpin agama. Ra, jotjot do nasida dijou pastor, malim, manang goar na asing. Songon halak Parise do nasida. Ndang diajarhon nasida hasintongan sian Hata ni Debata, alai “dipillit nasida do mangkaporseai gabus”. (Rom 1:18, 25) Angka gabus na dibahen nasida i ma, “sahali malua, tongtong malua”, mangolu dope tondi ni na mate, mar-reinkarnasi do halak molo dung mate, jala ndang muruk Debata molo adong baoa mangoli tu baoa manang borua muli tu borua.

8. Aha do gabus na laho didok angka pamimpin ni politik? Alai songon dia do hita mangadopi i?

⁸ Parpolitik pe margabus do laho mangoto-otoi jolma. Laho didok nasida ma bahenonna do portibi on ‘dame jala ndang adong be sihabiaran’. Hape “tompu ma diripashon nasida”. Jadi ndang na laho olo hita porsea molo didok nasida lam dame do portibi on. Sasintongna, nunga tangkas taboto, “songon haroro ni panangko di tingki borngin do haroro ni ari ni Jahowa i”.​—1 Tes. 5:1-4.

9, 10. (a) Boasa olo jolma margabus, jala aha do na masa alani i? (b) Aha do na ingkon taingot taringot Jahowa?

⁹ Saonari, ndang holan angka parhuaso na margabus. Di artikel, “Boasa olo Jolma Margabus” na disurat Y. Bhattacharjee mandok, “nunga bangko ni jolma be na margabus i”. Asing ni i, adong do halak na marpingkir ndang na sala molo margabus. Jotjot do jolma margabus laho manjaga diri tarlumobi tingki adong hasalaan na dibahen nasida. Margabus do nasida asa dapotan godang hepeng. Didok do muse di artikel i, adong do piga-piga halak na olo margabus “tu halak na so tinanda, dongan sakarejo, ale-ale ni nasida dohot keluarga ni nasida”.

¹⁰ Ala margabus angka halak gabe ndang porsea be halak tu na asing. Jala ndang masihaholongan be nasida. Umpamana, adong sahalak suami na setia, hape istrina mangalangkup. Jala ndang olo istrina mangangku. Tontu hansit do rohana. Asing ni i, adong sahalak suami molo diida halak songon na burju tu istri dohot ianakhonna. Alai, molo dijabu ndang burju ibana tu istri dohot ianakhonnna. Angka halak sisongon i boi do mangoto-otoi jolma. Alai ingkon taingot do, ndang boi digabusi nasida Jahowa. Didok di Bibel, ‘patar jala bungka do sude di jolo ni’ Debata.​—Heb. 4:13.

11. Parsiajaran aha do na tadapot sian carita taringot si Ananias dohot si Sapira? (Ida gombar di mula ni parsiajaran.)

¹¹ Adong do disurat di Bibel taringot si Ananias dohot si Sapira. Diela-ela Sibolis do nasida asa margabus jala diotoi-otoi nasida do angka apostel. Manggadis tano ma nasida alai holan deba dilehon hepengna i tu angka apostel. Asa dipuji halak, didok nasida do nunga dilehon sude hepeng i. Diboto Jahowa do nasida margabus jala diuhum ma nasida.​—Ul. 5:1-10.

12. Aha do na laho masa tu angka halak na paboahon gabus na jahat dohot angka halak na so olo muba, jala boasa?

 ¹² Songon dia do pangkilalaan ni Jahowa mangida pargabus? Sude halak na pargabus jala ndang olo muba, laho dibahen tu “laut api”. Lapatanna, laho diripashon songon Sibolis. (Pgk. 20:10; 21:8; Ps. 5:7) Alana, dos do di jolo ni Jahowa angka pargabus dohot “angka halak na mangulahon ulaon na dihagigihon” Ibana.​—Pgk. 22:15, surat na di toru.

13. Aha do na taboto taringot Jahowa, jala aha ma na ingkon taulahon?

¹³ Taboto “ndang dos Debata dohot jolma na olo margabus” jala “ndang boi Ibana margabus”. (4 Mus. 23:19, Bibel siganup ari; Heb. 6:18) Jala “dihagigihon Jahowa . . . dila pargapgap”. (Poda 6:16, 17) Molo lomo rohanta palashon roha ni Jahowa, ingkon mangkatahon na sintong ma hita. Jadi “unang ma masigabusan” hita.​—Kol. 3:9.

14. (a) Aha do na mambahen halak Kristen na sintong imbar tu angka halak sian agama palsu? (b) Paboa ma prinsip na disurat di Lukas 6:45.

¹⁴ Aha do na mambahen halak Kristen na sintong imbar tu angka halak sian agama palsu? Tongtong ma hita “mandok hata hasintongan”. (Jaha Sakaria 8:16, 17.) Didok si Paulus, “hupatuduhon hami do molo hami parhobas ni Debata . . . huhatahon hami do na sintong.” (2 Kor. 6:4, 7) Jala didok Jesus do, “na adong di roha” ni sasahalak i do na dihatahon. (Luk. 6:45) Lapatanna, na sintong do paboahon ni halak na jujur. Jujur do ibana tu angka halak na so tinanda, dongan sakarejo, ale-alena, dohot keluargana. Saonari taulas ma piga-piga contoh taringot songon dia hita asa tongtong jujur.

15. (a) Boasa ndang denggan molo na poso gabe mangihuthon pangalaho ni angka donganna na so Sitindangi? (b) Aha do na boi mangurupi sahalak na poso tingki mangadopi ela-ela sian angka donganna? (Ida surat na di toru.)

 ¹⁵ Molo hamu sahalak na poso, ra lomo do rohamuna asa boi marsaor dohot donganmuna. Ala songon ni do pangkilalaan na poso, gabe adong ma na mangihuthon pangalaho ni angka donganna na so Sitindangi. Burju do nasida di jolo ni keluargana, dohot di huria. Alai, tingki di media sosial manang marsaor dohot halak na so sisomba Jahowa, gabe imbar do pangalaho ni nasida. Jotjot do nasida marhata na kotor, ndang suman pangkeanna, lomo rohana mambege musik na so denggan hata-hatana, mabuk, narkobaon, sip-sip marhamlet, dohot ulaon na so denggan na asing. Margabus do nasida tu natua-tuana, angka dongan di huria, dohot tu Jahowa. (Ps. 26:4, 5) Alai diboto Jahowa do tapasangap do manang taulahon na dihasogohon Ibana. (Mrk. 7:6) Jadi, taulahon ma poda na mandok, “Unang mangiburu roham mida halak pardosa, mangapian ma tagonan di biar mida Jahowa ariari.”​—Poda 23:17. *

16. Aha do na ingkon taingot tingki mangisi formulir dinas sepenuh waktu khusus?

¹⁶ Molo naeng merintis biasa manang dohot tu dinas sepenuh waktu khusus songon dinas Betel, adong do formulir na diisi hamu. Ringkot do molo diisi hamu hatorangan na hombar tu situasimuna. Umpamana, taringot kesehatan, hiburan na dihalomohon hamu, dohot pangalahomuna. (Heb. 13:18) Alai songon dia do molo hea hamu mangulahon na dihasogohon Jahowa manang na mambahen ganggu panggora ni rohamuna, hape ndang dipaboa hamu taringot i tu angka sintua? Pangido ma pangurupion sian sintua asa denggan panggora ni rohamuna marhobas tu Jahowa.​—Rom 9:1; Gal. 6:1.

17. Aha do na ingkon taulahon tingki angka na marsogo ni roha tu ulaonta manungkuni taringot angka donganta?

¹⁷ Molo diorai pamarenta ulaonta jala gabe dipenjarahon hamu, aha do laho bahenonmuna? Songon dia do molo adong na manungkuni hamu taringot angka donganta? Dipaboa hamu do sude hatorangan na diboto hamu? Ingot ma, tingki Jesus disungkuni gubernur ni halak Rom. Ndang adong manang aha didok Jesus! Ala diihuthon Jesus do poda ni Bibel na mandok, “adong do tingki hohom, adong do tingki mangkatai”. (Pjm. 3:1, 7, Bibel siganup  ari; Mat. 27:11-14) Jadi tingki songon i situasinta, ingkon marbisuk ma hita. Jala unang ma pola tapaboa hatorangan taringot donganta na boi manusai nasida.​—Poda 10:19; 11:12.

18. Aha do na taulahon tingki disungkun sintua hita taringot donganta na mangulahon dosa?

¹⁸ Molo diboto hamu adong donganta na di huria mangulahon dosa na balga, aha do na ingkon ulahononmuna? Ra, dipangido angka sintua do hatorangan na diboto hamu, ala nasida do na martanggung jawab manjaga asa tongtong ias pangalaho ni angka dongan di huria. Molo ale-alemuna manang keluargamuna do na mangulahon dosa i, hatorangan na songon dia do na dipaboa hamu tu angka sintua? Didok di Bibel, “Manang ise na patajom hasintongan, i ma na papatarhon hatigoran.” (Poda 12:17; 21:28) Alani i paboa ma sude hatorangan na diboto hamu. Ingkon diboto angka sintua do hatorangan na sasintongna, asa diboto nasida songon dia cara na dumenggan laho mangurupi donganta i marale-ale muse tu Jahowa.​—Jak. 5:14, 15.

19. Aha na laho taulas di parsiajaran na mangihut?

¹⁹ Tingki martangiang si Daud didok ibana do tu Jahowa, “Sintong ni roha di bagasan do tongon lomo ni roham”. (Ps. 51:8) Na didok si Daud dison, na adong di rohanta do na rumingkot. Alani i sude halak Kristen ingkon ‘mandok na sintong tu donganna’. Asing ni i, patuduhon imbar hita tu angka halak na mangihuthon agama na so sintong, i ma tapaboa do hasintongan sian Bibel. Di parsiajaran na mangihut taulas ma songon dia mangulahon i tingki marbarita na uli.