1, 2. (a) Aha do na masa molo tompu muba situasi di ngolunta? (Ida gombar di mula ni parsiajaran.) (b) Songon na didok Psalmen 131, aha do na boi mangurupi hita asa mangkilala hadameon?

DUNG 25 taon si Lloyd dohot si Alexandra karejo di Betel, ditugashon ma nasida tu lapangan. Gabe lungun do roha ni nasida. Didok si Lloyd, “Nunga gabe bagian di ngolungku do karejo di Betel. Huantusi do boasa dibahen aturan on. Alai dung marbulan-bulan, jotjot do gabe marmetmet ni roha ahu.” Sipata didok roha ni si Lloyd ndang pola mahua i nang pe muba situasina. Alai olo do sipata lungun rohana alani i.

² Olo do muba situasinta jala masa na so tarduga di ngolunta. Boi do i mambahen hita marsak jala holsoan. (Poda 12:25) Jadi molo muba situasi di ngolunta jala gabe susa hita, songon dia do carana asa boi paradehon diri? (Jaha Psalmen 131:1-3.) Taulas ma piga-piga pengalaman ni naposo ni Jahowa di tingki najolo dohot di tingkinta saonari. Alana boi do nasida tongtong mangkilala hadameon nang pe adong na muba di ngolu ni nasida.

3. Boasa tompu muba ngolu ni si Josep?

³ Rimangi ma pengalaman ni si Josep. Sian sude anak ni si Jakkob, si Josep ma anak haholonganna. On mambahen angka abangna gabe mangiburu tu ibana. Jadi tingki marumur 17 taon si Josep, digadis do ibana jala gabe hatoban. (1 Mus. 37:2-4, 23-28) Saleleng 13 taon ma si Josep susa di Mesir. Gabe hatoban jala dipenjarahon do ibana disi. Jala gabe dao do ibana sian bapakna. Sasintongna, situasi i boi do mambahen jut roha ni si Josep jala mandele. Alai, ndang songon i na masa. Jadi aha do na mangurupi ibana?

4. (a) Aha do na diulahon si Josep tingki di penjara? (b) Songon dia do Jahowa mangalusi tangiang ni si Josep?

⁴ Saleleng di penjara si Josep tongtong do sai dipingkiri aha naung dijalo ibana sian Jahowa. (1 Mus. 39:21; Ps. 105:17-19) Ra, sai diingot ibana do nipina na paboahon sada surirang. Jala i mambahen pos rohana tu Jahowa. (1 Mus. 37:5-11) Tontu jotjot do si Josep martangiang tu Jahowa laho paboahon na di rohana. (Ps. 145:18) Jala dialusi Jahowa do tangiang ni si Josep i. Dipapos Jahowa do rohana, sai dongananna do ibana manang aha pe na masa.​—Ul. 7:9, 10. *

5. Songon dia do “hadameon na so boi diantusi jolma” boi mangurupi hita tongtong manomba Jahowa?

⁵ Nang pe mansai susa situasi na taadopi, alai “hadameon na so boi diantusi jolma” boi manjaga ‘pingkiranta’ jala tongtong mangkilala hadameon. (Jaha Pilippi 4:6, 7.) Tingki marsak jala holsoan, “hadameon na so boi diantusi jolma” boi mangurupi hita asa ndang marnaloja jala lam togu manomba Jahowa. Jadi, taulas ma piga-piga pengalaman sian angka donganta di tingkinta saonari na mangadopi situasi sisongon i.

6, 7. Songon dia do tangiangta boi mambahen dame muse pingkiranta? Paboa ma sada pengalaman.

⁶ Dung diboto si Ryan dohot si Juliette ndang perintis istimewa sementara be nasida, gabe metmet do roha ni nasida. Didok si Ryan, “Pintor ditangiangkon hami do on tu Jahowa. Diboto hami do, on ma tingkina hami patuduhon na marpos ni roha hami tu Jahowa. Di hurianami godang do angka dongan na baru dope mananda hasintongan. Jadi, sai martangiang do hami asa boi gabe sitiruon tu nasida.”

⁷ Songon dia do Jahowa mangalusi tangiang ni nasida? Didok si Ryan, “Dung martangiang hami, mago do holso dohot arsak ni rohanami. Hadameon sian Debata mambahen hami tongtong marlas ni roha. Diantusi hami do, molo tongtong diharingkothon hami palashon roha ni Jahowa, tongtong do hami dipangke Jahowa laho marhobas tu Ibana.”

8-10. (a) Songon dia tondi parbadia mangurupi hita tingki holsoan? (b) Songon dia Jahowa mangurupi hita molo taharingkothon panombaon tu Ibana?

⁸ Diurupi tondi parbadia do hita asa boi tongtong mangkilala hadameon tingki mangadopi masalah. Jala diurupi do hita asa mangingot ayat-ayat Bibel na boi  mangurupi asa tongtong taharingkothon parale-aleon tu Debata. (Jaha Johannes 14:26, 27.) Taparrohahon ma donganta naung marsaripe, i ma si Philip dohot si Mary. Nunga 25 taon nasida karejo di Betel. Di bagasan opat bulan, mate ma omak ni nasida. Jala adong muse sada keluarga ni si Philip na mate. Ingkon diurus nasida do bapak ni si Mary na naung pingkun.

⁹ Didok si Philip, “Nunga huadopi piga-piga parsoalan, alai hira adong dope na hurang. Huriset ma Kolosse 1:11, dapothu ma hatoranganna di Joujou Paboahon siparsiajaran. Gabe huantusi ma, nang pe ahu martahan saleleng on, alai adong dope na hurang. Ingkon ‘sabar jala marlas ni roha’ do ahu asa boi martahan. Ayat on paingothon ahu, ndang ingkon denggan situasinta asa boi marlas ni roha. Alai, alani diurupi tondi parbadia ni Debata do.”

¹⁰ Ala tongtong si Philip dohot si Mary mangkaringkothon panombaon tu Jahowa, godang ma pasu-pasu na didapot ni nasida. Dung kaluar nasida sian Betel, dapot ni nasida do godang parsiajar Bibel na mambahen hamajuon. Jala dipangido angka parsiajar Bibelna i do asa piga-piga hali marsiajar di bagasan saminggu. Didok si Mary, “Las do rohanami alani nasida. Jala on ma cara ni Jahowa paboahon tu hami asa unang pola holsoan.”

11, 12. (a) Aha do na diulahon si Josep na mambahen ibana gabe dipasu-pasu Jahowa? (b) Songon dia Jahowa mamasu-masu si Josep?

¹¹ Molo tompu muba situasi di ngolunta, ra olo do hita gabe holsoan. Jala holan angka parsoalan i do na sai tapingkiri. Ra songon i do pangkilalaan ni si Josep. Alai tongtong do ibana mangulahon na dumenggan di situasi sisongon i. Tingki di jabu ni si Potifar, ringgas do ibana karejo. Jala tingki di penjara pe tongtong do ibana ringgas. Manang aha pe na disuru kepala penjara i, diulahon ibana do.​—1 Mus. 39:21-23.

¹² Sada tingki, ditugashon ma si Josep asa manjaga dua tahanan na hea gabe naposo ni si Firaun. Burju do si Josep tu nasida, alani i gabe olo ma nasida paboahon arsak ni roha dohot nipi ni nasida. (1 Mus. 40:5-8) Ndang diboto si Josep taringot i. Alai pangkataion ni nasida i gabe dalan do tu si Josep kaluar sian penjara. Dua taon dungkon i, kaluar ma si Josep sian  penjara jala gabe parhuaso ma ibana di Mesir. Tingki i, ibana ma parhuaso na paduahon di Mesir dungkon si Firaun!​—1 Mus. 41:1, 14-16, 39-41.

13. Manang aha pe situasina, aha do na ingkon taulahon asa dipasu-pasu Jahowa?

¹³ Songon si Josep, ra olo do ndang boi songon na didok rohanta situasi na taadopi. Alai, molo sabar hita huhut taulahon angka na dumenggan, pasu-pasuon ni Jahowa do hita. (Ps. 37:5) Jadi nang pe hita holsoan jala hira ndang taboto aha na laho taulahon, sai taharingkothon ma ulaonna. Donganan ni Jahowa do hita jala sai adong do dalan haluaon.​—2 Kor. 4:8.

14-16. Songon dia si Pilippus tongtong ringgas di ulaon marbarita nang pe muba situasi di ngoluna?

¹⁴ Parbarita na uli na gabe sitiruon na mansai denggan, i ma si Pilippus. Diharingkothon ibana do ulaon marbarita nang pe muba situasi di ngoluna. Las do rohana tingki ditugashon tu Jerusalem. (Ul. 6:1-6) Dung dibunu si Stepanus, gabe muba ma situasina di Jerusalem. Adong ma paraloan na mansai borat na diadopi halak Kristen disi. Ala songon i do situasina, lari ma halak Kristen sian Jerusalem. Alai, tongtong do ringgas si Pilippus di ulaon marbarita. Jadi laho ma ibana tu kota Samaria. Godang do disi halak na so hea mambege barita na uli.​—Mat. 10:5; Ul. 8:1, 5.

¹⁵ Rade do si Pilippus ditogihon marhite tondi parbadia manang tudia pe. Jadi ditugashon Jahowa ma ibana tu inganan na so hea dope angka halak mambege barita na uli. Godang halak Jahudi na leas jala kasar tu halak Samaria. Alai ndang imbar dibahen si Pilippus angka halak. Pintor ringgas do ibana paboahon barita na uli tu nasida. Jala denggan do diparrohahon halak Samaria barita na uli i!​—Ul. 8:6-8.

¹⁶ Dung i, ditogihon tondi parbadia ma si Pilippus asa marbarita tu Asdod dohot tu Kaesarea. Jala godang do disi halak na so Jahudi. (Ul. 8:39, 40) Muba do muse ngolu ni si Pilippus. Tading jala markeluarga disi ma ibana. Nang pe songon i situasi ni si Pilippus, tongtong do ringgas ibana di ulaon marbarita. Jala tongtong do Jahowa mamasu-masu ibana dohot keluargana.​—Ul. 21:8, 9.

17, 18. Songon dia do ulaon marbarita mangurupi hita tingki muba situasi di ngolunta?

 ¹⁷ Didok angka dongan na dohot tu dinas sepenuh waktu, molo tongtong ringgas di ulaon marbarita boi do i mangurupi nasida tongtong marlas ni roha. Jala sai dipingkirhon nasida do angka na denggan nang pe muba situasi ni nasida. Donganta naung marsaripe, i ma si Osborne dohot si Polite na tading di Afrika Selatan, ndang be karejo di Betel. Dirimpu nasida mura do mangalului jabu, dohot mangalului karejo na pas jala na holan piga-piga jom karejo. Didok si Osborne, “Ndang pintor dapot hami karejo songon na didok ni rohanami.” Jala didok si Polite muse, “Tolu bulan hami ndang karejo jala suda do tabungannami. Maol situtu do on.”

¹⁸ Aha do na mangurupi si Osborne dohot si Polite di situasi na susa i? Didok si Osborne, “Marbarita dohot angka dongan di huria mangurupi hami asa tongtong mamingkirhon angka na rumingkot dohot angka na denggan.” Tongtong do ringgas nasida di ulaon marbarita, ndang holan holsoan jala so di jabu. Alani i, gabe marlas ni roha ma nasida! Didok si Osborne muse, “Dung loja mangalului karejo, ujungna dapot hami do.”

19-21. (a) Aha do na boi mangurupi hita asa tongtong mangkilala hadameon? (b) Aha do labana molo huihuthon situasi na muba di ngolungku?

¹⁹ Songon naung taulas, manang aha pe na masa molo tongtong taulahon na denggan jala pos rohanta tu Jahowa gabe boi ma tahilala hadameon ni roha dohot pingkiran. (Jaha Mika 7:7.) Jala gabe taboto do, molo taihuthon situasi na muba di ngolunta, gabe lam togu do parale-aleonta tu Jahowa. Tingki ndang karejo be di Betel didok si Polite, gabe diantusi ibana porlu do tongtong marhaposan tu Jahowa tarlumobi di tingki na susa. Didok ibana  muse, “Lam solhot do parale-aleonku tu Jahowa.”

²⁰ Songon si Mary naung taulas nangkin, tongtong do ibana mangurus bapana huhut merintis. Didok ibana, “Huboto ma, tingki holsoan ahu porlu do ahu so satongkin laho marpingkir, martangiang, jala paradehon diri. Marpos ni roha tu Jahowa, i sada parsiajaran na mansai ringkot di ahu jala i do annon na dihaporluhon di ari na naeng ro.”

²¹ Didok si Lloyd dohot si Alexandra molo situasi na tompu muba di ngolu ni nasida, gabe mambahen togu haporseaon ni nasida. Nang pe mangadopi situasi songon i, alai adong do labana. Ala togu do haporseaon ni nasida gabe mura ma nasida mangadopi angka masala. Gabe rade do nasida mangadopi angka na masa.

22. Molo tongtong taulahon na dumenggan di situasinta, aha do na boi tadapot?

²² Di tingkinta saonari, boi do tompu muba ngolunta. Ra, tadapot do tugas na asing di ulaon ni Jahowa. Manang marsahit hita, manang ingkon mangurus keluarga. Alai aha pe na masa di ngolunta, pos ma rohanta tu Jahowa. Disarihon Jahowa do hita jala laho urupanna do hita di tingkina. (Heb. 4:16; 1 Ptr. 5:6, 7) Alai saonari aha pe na masa, taulahon ma na dumenggan. Martangiang ma tu Jahowa, jala tongtong ma marhaposan tu Ibana. Molo taulahon i tongtong do tahilala hadameon pingkiran sian Jahowa.