TINGKI marumur 12 taon ahu, huboto ma adong do na arga na boi hulehon tu halak. Di kebaktian, ditogihon donganta ma ahu marbarita na uli. Nang pe ndang hea dope ahu marbarita na uli, alai huoloi do ibana. Laho ma hami marbarita na uli, dilehon ma pigapiga risalah taringot Harajaon ni Debata tu ahu. Didok ma, ”Disan ma ho marbarita, asa ahu dison.” Nang pe humitir huhilala, alai laho do ahu marbarita sian jabu tu jabu. Ndang hurimpu habis sude risalah i. Tangkas ma, godang do halak na mauas di hasintongan.

Taon 1923, tubu ma ahu di Chatham, Kent, di Inggris. Dung sae Porang Dunia I, hirim do roha ni jolma asa dame portibi on. Alai, ala ndang marnadame portibi on, godang do na mandele, songon natuatuangku. Sogo do roha ni nasida tu Pandita ni Gareja Baptis na mangkalomohon jabatan na timbo di gareja. Tingki sia taon dope ahu, laho ma omakku tu inganan ni International Bible Students Association, inganan ”singkola” manang parpunguan ni Sitindangi Ni Jahowa. Sahalak donganta borua mangurupi hami marsiajar Bibel mamangke buku parsiajaran Bibel tu dakdanak dohot buku The Harp of God. Lomo do rohangku mamparsiajari i.

Tingki remaja, lomo do rohangku marbarita na uli. Jotjot do sahalakku marbarita. Alai tingki marbarita dohot dongan na asing, godang do na huparsiajari. Umpamana, tingki marbarita ahu dohot dongan na umtua di sada huta, diida hami ma pandita. Hudok ma, ”Ida ma, hambing do i.” Dipaso donganta i ma sepedana, jala ditogihon ma ahu hundul di batang ni hau. Didok ibana ma, ”Ise marsuru ho gabe panguhum umbahen didok ho ibana hambing? Tapasahat ma barita na uli on, Jahowa do na manguhumi.” Tingki i, godang ma na huparsiajari taringot las ni roha ala mangalehon.​—Mat. 25:31-33; Ul. 20:35.

Dongan na umtua na asing mangajarhon hasabaron, asa marlas ni roha tingki mangalehon. Sogo do roha ni tungganeboruna tu Sitindangi Ni Jahowa. Sada tingki, ditamue ma ahu tu jabuna. Muruk ma tungganeboruna ala laho ibana marbarita, disampathon ma kotak ni bubuk tes  tu hami. Ndang muruk donganta i, alai denggan do dipaulak ibana muse kotak ni bubuk tes i tu ingananna. Ala sabar ibana, dung pigapiga taon, gabe Sitindangi Ni Jahowa ma tungganeboruna.

Bulan September 1939, tingki marumur 16 taon ahu, marporang ma Britania dohot Jerman. Di bulan Maret 1940, tardidi ma ahu dohot omakku di Dover. Di bulan Juni 1940, huida ma sian pintunami mamolus marribu tentara di bagasan truk. Nasida tentara sian Battle of Dunkirk. Molo huida, trauma do nasida jala ndang marpangkirimon. Naeng hupaboa do tu nasida taringot Harajaon ni Debata dohot pangkirimon tu ari na naeng ro. Dung pigapiga taon, dibom Jerman ma Britania. Ganup borngin, mamolus ma angka tentara ni Jerman sian hutanami. Mabiar do hami mambege soara ni bom na mardabuan. Manogotna i, nunga rumpak sude jabu di hutanami. Huantusi ma, holan Harajaon ni Debata do pangkirimonku.

Di taon 1941 ma ahu gabe perintis, jala on ma na mambahen las rohangku. Karejongku mambahen kapal di Royal Dockyard di Chatham. Ala godang gajina, godang do halak na naeng karejo dison. Alai tingki i, nunga diantusi Sitindangi Ni Jahowa, ndang boi halak Kristen marporang. Jala ndang boi hami dohot mambahen sinjata. (Joh. 18:36) Di parkarejoan i, dibahen do kapal selam na dipangke laho marporang. Alani i, kaluar ma ahu sian parkarejoan i, dung i merintis. Ditugashon ma ahu tu Cirencester, sada huta di Cotswolds.

Tingki marumur 18 taon, dipenjara ma ahu saleleng sia bulan ala ndang dohot marporang. Mabiar jala lungun do rohangku tingki dipenjara. Alai, tingki disungkun panjaga dohot angka tahanan i boasa ahu dipenjara, las ma rohangku patorangkon tu nasida.

Dung kaluar sian penjara, rap dohot si Leonard Smith * ma ahu marbarita di hutahuta na adong di Kent, huta hatubuannami. Asa boi mambom Inggris, sian Kent ma lewat pesawat ni Nazi. Sian taon 1944, lobi sian saribu bom ranjau didabuhon di Kent. Gok ma dibahen nasida bom di pesawat i, alai ndang adong pilotna. Tingki hubege hami mate soara ni masin, huboto hami ma tongkin nai madabu nama pesawat i jala pultak ma bom i. Mabiar ma sude halak.  Tingki i, diurupi hami do sada keluarga marsiajar Bibel. Sipata, hundul do hami di toru ni meja na sian bosi na dibahen laho mangondingi hami molo rumpak jabu i. Ujungna, tardidi do keluarga i.

Dung sae porang, gabe misionaris ma ahu saleleng dua taon di Irlandia Selatan. Dilului hami ma inganannami sian jabu tu jabu. Hulehon hami do majalah tingki di dalan. Alai, imbar do halak Irlandia dohot halak Inggris. Ala negara Katolik do Irlandia, ndang lomo roha ni nasida manjangkon hami. Tingki adong na mamungkuli hami, dipaboa hami ma tu polisi. Alai, didok polisi i ma, ”Jadi, aha do maksudmu?” Tutu ma, pandita do na mangatur disi. Dipakaluar do sasahalak sian parkarejoanna molo manjalo publikasinta. Diusir ma hami sian jabunami.

Ndang sadia leleng, pinda ma hami tu inganan na baru. Alai diboto hami ma, denggan do molo ndang ditanda pandita hami. Mulana, hami marbarita tu inganan na dao sian jabunami. Dung i, tu inganan na jonok tu jabunami. Di Kilkenny, nang pe godang halak marsogo ni roha, alai diurupi hami do sahalak baoa na poso marsiajar Bibel tolu hali saminggu. Ala las rohangku paboahon ajaran sian Bibel, lomo do rohangku dilatik gabe misionaris. Alani i, mandaftar ma ahu tu Singkola Alkitab Gilead Menara Pengawal.

Dung lima bulan marsiajar di New York, ditugashon ma opat halak sian hami tu pulo di Laut Karibia. Di taon 1948, borhat ma hami sian New York mamangke kapal na ganjangna 18 meter, na digoari Sibia. Las hian do rohangku, ala ndang hea dope ahu markapal. Dongannami na margoar si Gust Maki, nunga marpengalaman gabe kapten ni kapal. Diajari ma hami panaekkon dohot paturunhon layar ni kapal, mamangke kompas, jala manupir kapal tingki ndang tontu arah ni alogo. Malo do si Gust manupir kapal tingki adong habahaba. Dung 30 ari, sahat ma hami di Bahama.

Dung sae marbarita na uli di Bahama, laho ma hami tu pulo Leeward dohot Windward. Ganjang ni pulo on hirahira 800 kilometer di holangholang ni Kepulauan Virgin dohot Trinidad. Saleleng lima taon, marbarita ma hami di inganan na so adong Sitindangi Ni Jahowa. Sipata, ndang boi hami manongos manang manjalo surat. Alai, las do rohanami paboahon taringot Jahowa ”di pulopulo” i!​—Jer. 31:10.

Tingki marlabu kapalnami di topi ni tao, marpungu ma angka halak na di huta i laho mangida hami. Adong do na so hea mangida kapal songon kapalnami, jala ndang hea mangida halak Eropa. Halak na burju do nasida jala nunga mananda Bibel. Jotjot do nasida mangalehon dengke, apokat, dohot kacang. Nang pe ndang pola balga kapalnami, alai boi do hami mangalompa, modom, dohot manunsi disi.

Laho ma hami tu pulo i manjumpangi angka halak. Dipaboa hami ma na laho adong jamita. Tingki botari, dipangolu hami ma sirene ni kapal. Las roha mangida torop halak na ro. Songon bintang na marhillong do idaon lampu ni nasida. Sipata, marratus do halak na ro, jala  mambahen sungkunsungkun sahat tu tonga borngin. Ala lomo rohanasida marende, dilehon hami ma pigapiga ende pujian tu Jahowa. Marende ma hami na opat, jala diihuthon nasida ma. Tabo do begeon soara ni nasida. Las hian rohanami!

Dung sae marsiajar Bibel, olo do nasida mangihuthon hami tingki laho manguluhon parsiajaran Bibel tu jabu ni keluarga na asing. Dung pigapiga minggu disi, ingkon laho do hami. Alai, disuru hami do angka na ringgas marsiajar asa manguduti parsiajaran dohot dongan na asing, sahat tu na ro muse hami. Las hian do rohanami mangida nasida marsitutu marsiajar.

Saonari, godang do halak na ro tu pulo i, alai nasida laho tu inganan na sepi na adong tao, pantai, dohot hau ni kalapa. Somalna, tingki borngin do hami laho tu sadasada pulo. Marlange ma lumba-lumba di jonok ni kapalnami, jala holan soara ni kapal dohot aek do na tarbege. Sinondang ni bulan na manondangi aek di laut i, gabe songon warna perak idaon.

Dung lima taon marbarita na uli di pulo i, laho ma hami tu Puerto Riko laho manuhor kapal na baru na pangke masin. Dung sahat, pajumpang ma ahu dohot si Maxine Boyd jala lomo do rohangku tu ibana. Misionaris na uli do ibana jala ringgas marbarita na uli sian na metmet. Ndang sadia leleng, ditugashon ma ibana tu Republik Dominika, alai ala ndang mandapot izin sian pamarenta, pinda ma ibana sian i taon 1950. Ala parkapal do ahu, holan sabulan do ahu di Puerto Riko. Dung i, laho ma ahu tu pulo na asing saleleng pigapiga taon. Hudok ma tu diringku, ”Ronald, molo lomo roham tu borua on, pahatop ma alap ibana.” Dung tolu minggu, hupaboa ma na holong rohangku tu ibana. Dung onom minggu, marhasohotan ma hami. Ditugashon ma hami gabe misionaris di Puerto Riko, jala ndang saut hutuhor kapal i.

Taon 1956, gabe sintua kaliling ma ahu, jala lomo do rohanami manjumpangi angka dongan. Godang do nasida na pogos. Umpamana, di huta Potala Pastillo, adong dua keluarga Sitindangi na godang ianakhonna. Marsulim ma ahu asa las rohanasida. Hutogihon ma si Hilda, boru ni nasida, asa dohot marbarita. Didok ibana, ”Olo do ahu, alai ndang adong sipatungku.” Dituhor hami ma sipatuna, jala dohot ma ibana marbarita. Taon 1972, tingki laho ahu dohot si Maxine tu Brooklyn, ro ma sahalak donganta borua na baru tamat sian Singkola Gilead manjumpangi hami. Ibana ditugashon tu Ekuador, jala didok ibana, ”Ditanda hamu do ahu? Ahu ma anak boru sian Pastillo na so marsipatu i.” Si Hilda do hape! Tangis ma hami ala las ni rohanami!

Taon 1960, karejo ma hami di kantor cabang Puerto Riko, di sada jabu na gelleng di Santurce, San Juan. Mulana, holan ahu dohot si Lennart Johnson do na mangulahon angka ulaon disi. Ibana dohot tungganeboruna ma Sitindangi Ni Jahowa na parjolo di Republik Dominika. Taon 1957, pinda ma nasida tu Puerto Riko. Dung i, ditongos si Maxine ma majalah tu halak na marlangganan. Ganup minggu, marribu do majalah na ditongos ibana. Las do rohana mangulahon on, ala lomo rohana godang halak mananda Jahowa.

Las do rohangku karejo di Betel, alana disi ma ahu mangalehon sude gogongku tu Jahowa. Alai, ndang sai mura mangulahon i. Umpamana, tingki kebaktian na parjolo di Puerto Riko taon 1967, palojahu do ahu ala godang ulaonku. Ro ma si Nathan Knorr, na mangaradoti Sitindangi Ni Jahowa di tingki i. Dirimpu ibana ndang adong hubahen pengaturan transportasi tu angka misionaris di kota i, hape nunga hubahen. Dipinsang ibana ma ahu, jala jut do rohana mangida ahu. Ndang olo ahu marsoal dohot ibana. Didok rohangku, ndang boi bahenonna songon i tu ahu. Hansit do rohangku alani i. Alai, tingki pajumpang hami dohot si Knorr, ditogihon ibana ma hami tu ruanganna jala ditamue do hami.

 Laho ma hami manjumpangi keluargangku di Inggris. Tingki marsiajar Bibel dope ahu dohot omakku, ndang olo bapakku dohot marsiajar. Alai, tingki ro angka dongan sian Betel, jotjot do omakku manogihon nasida marborngin di jabunami. Diida bapak ma serep ni rohanasida. Mansai imbar sian angka pandita na hea mambahen sogo rohana. Ujungna, taon 1962, gabe Sitindangi Ni Jahowa ma ibana.

Taon 2011, marujung ngolu ma tungganeborungku. Hirim do rohangku pajumpang dohot ibana dung dipahehe. Las rohangku mangarimangi i! Saleleng 58 taon mardongan saripe, diida hami do lam tamba Sitindangi Ni Jahowa di Puerto Riko, sian 650 gabe 26.000 halak! Taon 2013, dipasada ma kantor cabang Puerto Riko dohot Amerika Serikat, jala ahu ditugashon di Wallkill, New York. Dung 60 taon di Puerto Riko, nunga songon halak Puerto Riko ahu, na songon coquí, katak pohon sian Puerto Riko. Molo botari, songon on ma soarana, ko-kee, ko-kee. Lomo do rohangku di Puerto Riko, alai ingkon pinda do ahu.

Saonari, di Betel dope ahu. Nunga lobi 90 taon umurhu, jala karejongku patoguhon keluarga Betel. Dung di Wallkill, nunga adong lobi sian 600 donganta naung hudongani mangkatai. Adong do na paboahon taringot masalah pribadi, keluarga, adong manjalo poda asa marlas ni roha karejo di Betel, ala baru marhasohotan manang ala ditugashon gabe perintis. Hutangihon do sude nasida jala hudok, ”’Dihaholongi Debata do na las roha mangalehon.’ Marlas ni roha ma hamu mangulahon ulaonmuna. Alana, lomo ni roha ni Jahowa do na taulahon on.”​—2 Kor. 9:7.

Asa las rohamuna karejo di Betel manang didia pe, ingot ma boasa ringkot ulaonmuna i. Badia do sude na taulahon di Betel. On mangurupi ”naposo haposan jala na marroha” paradehon sipanganon partondion tu sude donganta di liat portibi on. (Mat. 24:45) Manang didia pe hita, tapuji ma Jahowa. Marlas ni roha ma hita mangulahon lomo ni rohaNa, alana ”dihaholongi Debata do na las roha mangalehon”.