1, 2. (a) Songon dia do Jesaya 60:22 digohi di tingkinta saonari? (b) Saonari, aha do na dihaporluhon organisasi ni Jahowa di liat portibi on?

”NA UMMETMET i gabe saribu, jala na so piga gabe bangso na bolon.” (Jes. 60:22) Nunga digohi surirang on saonari. Di taon 2015, adong 8.220.105 Sitindangi Ni Jahowa na marbarita na uli di liat portibi on! Nunga didok Debata, ”Ahu Jahowa mambahensa gira di tingkina.” Alani i, lam godang ma ulaonta di partondion. Talehon do nasa gogonta di ulaon marbarita na uli? Godang donganta gabe perintis biasa manang perintis ekstra. Adong do na pinda tu luat na asing laho marbarita na uli, manang dohot pajongjongkon Bale Harajaon.

² Di liat portibi on, hirahira 2.000 huria tamba ganup taon, alani i porlu do godang sintua dohot parhobas. Ganup taon, porlu do marribu parhobas gabe sintua jala marribu donganta baoa gabe parhobas. Tangkas  ma, godang do ulaon di angka donganta baoa dohot borua ”di bagasan ulaon ni Tuhan i”.​—1 Kor. 15:58.

3, 4. Molo pandapotmuna, aha do lapatan ni maju di partondion?

³ Jaha 1 Timoteus 3:1. Dipuji si Paulus do baoa na naeng ”mangalului” hasintuaon. Rimangi ma tingki sasahalak naeng mambuat sada barang na dao sian ibana, ingkon marusaha do ibana asa boi buatonna. Suang songon i ma, sahalak baoa na naeng gabe parhobas di huria, ingkon marsitutu do patuduhon parange na denggan. Dung gabe parhobas, ingkon marsitutu do muse asa boi gabe sintua.

⁴ Pigapiga donganta mambahen hamubaon di parngoluonna asa boi mangalehon gumodang tingki di ulaon partondion. Umpamana, merintis, karejo di Betel, manang pajongjongkon Bale Harajaon. Taparrohahon ma songon dia Bibel mangurupi nasida tongtong maju di partondion.

5. Songon dia do na poso mangalehon gogona di ulaon partondion?

⁵ Godang do na boi diulahon angka na poso di ulaon partondion, ala gogo jala sehat dope nasida. (Jaha Poda 20:29.) Adong do na karejo di Betel di bagian percetakan buku dohot Bibel. Na asing mangurupi tingki adong masa mara, pajongjongkon manang padengganhon Bale Harajaon. Dung i, adong muse na marsiajar bahasa na baru manang pinda tu luat na asing laho marbarita na uli.

6-8. (a) Songon dia do donganta na poso marhamubaon, jala aha do hasilna? (b) Songon dia do hita mandai jala mangida denggan basa ni Jahowa?

⁶ Holong do rohanta tu Jahowa jala naeng talehon do na dumenggan. Alai, olo do ra pangkilalaanta sarupa songon si Aaron. Nang pe nunga sian na metmet ro tu parpunguan dohot marbarita na uli, didok ibana do, ”Ndang huhilala las ni roha tingki marpungu manang marbarita na uli.” Alani i, aha ma na diulahon ibana?

⁷ Marsitutu do ibana manjaha Bibel ganup ari, jotjot martangiang, paradehon siulason jala mangalehon alus di parpunguan. On mangurupi ibana maju di partondion. Ala lam mananda Jahowa, lam holong ma rohana tu Jahowa. Ujungna, dapotna ma las ni roha. Merintis ma ibana, mangurupi na hona mara, jala marbarita tu negara na asing. Saonari, nunga gabe sintua ibana jala karejo di Betel. Songon dia do pangkilalaanna? Si Aaron mandok, ”Nunga huhilala jala huida denggan basa ni Jahowa. Ala pasupasu na dilehon Jahowa, songon na marutang ma huhilala. Taronjar ma rohangku mangalehon gumodang tingki di ulaon partondion.”

⁸ Panurat buku psalmen mandok, ”Dai jala ida hamu denggan basa ni Jahowa.” Jala, ”ndang hurangan  angka na mangkabiari Ibana”. (Jaha Psalmen 34:9-11.) Tutu ma, molo talehon na dumenggan tu Jahowa, tadapot ma las ni roha ala taboto hita mambahen las rohaNa, jala sai diparrohahon do hita.

9, 10. Boasa ringkot hita sabar maimaima?

⁹ Ra, lomo do rohanta mangalehon gumodang tingki di ulaon partondion. Alai, songon dia do molo ndang dilehon hak na sumurung tu hita, manang situasinta mambahen hita maol mangalehon gumodang tingki? Sabar ma paimahon. (Mik. 7:7) Nang pe dipaloas Jahowa masa sisongon i, pos ma rohanta sai na urupanNa do hita. Tatiru ma si Abraham, marjanji do Jahowa mangalehon ianakhon tu ibana. Alai, leleng do ibana paimahon andorang so tubu dope si Isak.​—1 Mus. 15:3, 4; 21:5; Heb. 6:12-15.

¹⁰ Olo do ndang sabar hita paimahon. (Poda 13:12) Alai molo sai marungutungut hita, boi do i mambahen hita gabe marmetmet ni roha. Alani i, taparhaseang ma tingkinta laho padengganhon parange asa boi denggan hita mangulahon tanggung jawab na dilehon tu hita di joloan ni ari.

11. Aha do na ingkon taulahon asa maju di partondion, jala boasa i ringkot?

¹¹ Lam tu dengganna ma parangemu jala ringgas ma marsiajar. Molo tarimangi aha na tajaha sian Bibel, gabe marbisuk ma hita tingki mamillit na dumenggan. Di ari na naeng ro, boi ma hita denggan mangulahon tanggung jawab na dilehon di huria. (Poda 1:1-4; Tit. 1:7-9) Tingki marsiajar Bibel, taboto ma pingkiran dohot pangkilalaan ni Jahowa. Sian parbinotoan i, boi ma hita mambahen las roha ni Jahowa ganup ari. Taboto ma songon dia maradophon donganta, mangatur parhepengon, manang mamillit hiburan dohot pangkean na denggan.

12. Songon dia hita patuduhon na haposan do hita?

¹² Marsitutu ma hamu mangulahon tanggung jawabmuna. Godang do baoa na ditogihon si Nehemia tingki paulihon bagas joro. Dipillit si Nehemia do halak na marpangalaho na denggan, na mangkaholongi Jahowa jala ringgas mangulahon sude ulaon na dilehon. (Neh. 7:2; 13:12, 13) Suang songon i ma saonari, gumodang do dilehon tanggung jawab tu halak na marsihohot jala ringgas. (1 Kor. 4:2) Nang  pe hita baoa manang borua, marsitutu ma hita mangulahon tanggung jawab na dilehon tu hita.​—Jaha 1 Timoteus 5:25.

13. Songon dia do hamu maniru si Josep tingki adong na mangulahon na so denggan tu hamu?

¹³ Marpangunsandean ma tu Jahowa. Songon dia do molo adong mambahen na so denggan tu hamu? Boi do dipaboa hamu pangkilalaanmuna. Alai, molo sai disalahon hamu na asing, boi do on parohon parsoalan. Tiru ma si Josep. Jahat do hahana tu ibana. Diparoaroa do ibana jala dipenjara nang pe ndang mangulahon na sala. Alai, Jahowa do na dipangasahon si Josep. Tongtong do diingot ibana janji ni Jahowa jala marsihohot. (Ps. 105:19) Di tingki i, diparhaseang ibana do tingkina patuduhon pangalaho na boi mangurupi ibana mangulahon tanggung jawab na ringkot di ari na naeng ro. (1 Mus. 41:37-44; 45:4-8) Molo adong na mambahen na roa, pangido ma bisuk tu Jahowa asa dame pangkilalaanmu jala lambok maradophon nasida.​—Jaha 1 Petrus 5:10.

14, 15. (a) Boasa hita ingkon mamparrohahon caranta marbarita na uli? (b) Songon dia do tabahen asa boi marbarita tu sude halak? (Ida gombar di mula ni parsiajaran dohot kotak ” Olo do Hamu Mangulahon Cara na Asing?”)

¹⁴ Dijujui si Paulus do si Timoteus asa lam tu dengganna di ulaon  marbarita. Didok ma, ”Matahon dirim, ro di pamodaion i.” (1 Tim. 4:13, 16) Tingki i, nunga martaontaon si Timoteus marbarita na uli. Alai, boasa dijujui muse ibana asa lam tu dengganna marbarita? Diboto si Timoteus, boi do muba parngoluon ni angka jolma. Alani i, ingkon muba do cara na dibahen ibana tingki marbarita na uli asa ditangihon angka jolma ibana. Suang songon i ma hita saonari.

¹⁵ Di pigapiga inganan, tingki marbarita na uli hita sian jabu tu jabu, jotjot do ndang pajumpang hita dohot parjabu. Di inganan na asing, olo do ra adong halak di jabuna, alai ndang boi hita masuk. Molo songon i do di ingananta, olo do hita mambahen cara na asing asa boi pajumpang dohot nasida?

16. Boasa denggan marbarita di inganan na ribur?

¹⁶ Las do roha ni angka donganta marbarita di inganan na ribur. Umpamana, asa boi pajumpang dohot godang halak, laho do nasida tu stasiun kareta api, terminal, pasar, manang di inganan parkir. Laho mamungka pangkataion, ditaringoti nasida ma barita na baru masa, mamuji ianakhon ni sasahalak, manang manungkun taringot parkarejoan ni nasida. Molo lomo roha ni sasahalak mangkatai dohot nasida, boi do ditaringoti isi ni Bibel. Somalna, lomo do roha ni halak mandapot gumodang hatorangan sian Bibel.

17, 18. (a) Songon dia do asa barani hita marbarita di inganan na ribur? (b) Boasa ringkot maniru hiras ni roha ni si Daud mamuji Jahowa tingki marbarita na uli?

¹⁷ Ra, adong do na maila mangkatai tu halak na so ditanda di inganan na ribur. Songon i ma si Eddie, perintis biasa sian kota New York. Songon dia do ibana mandapot pangurupion? Ibana mandok, ”Tingki panombaon na sasaripe, huparsiajari hami ma songon dia mangalusi sungkunsungkun ni angka jolma, jala husungkun hami do muse angka dongan na di huria.” Saonari, ndang maila be si Eddie marbarita di inganan na ribur.

¹⁸ Molo las rohanta marbarita na uli, jala lam denggan taulahon i, patar ma hamajuonta. (Jaha 1 Timoteus 4:15.) Ra, boi ma taurupi na asing gabe panomba Jahowa. Si Daud mandok, ”Pujionku ma Jahowa sipatsipat ni ari, sai tong ma pujipujianna di bagasan pamanganku. Jahowa do dipartanggulhon rohangku, begeon ni angka na dangol ma i, jadi las ma rohanasida.”​—Ps. 34:2, 3.

19. Boasa naposo ni Jahowa na marsihohot boi marlas ni roha nang pe mangadopi hasusaan?

¹⁹ Didok si Daud, ”Mandok mauliate ma sude jadijadianmu tu Ho, ale Jahowa, jala dipuji angka na niasianmu do Ho. Dibaritahon nasida do hamuliaon ni harajaonmu, jala diparhatopot nasida hagogoonmu  na sumurung i. Laho pabotohon tu jolma manisia angka hagogoonna i, dohot hamuliaon ni harajaonna na sangap i.” (Ps. 145:10-12) Molo tahaholongi Jahowa jala marsihohot, marhiras ni roha ma hita marbarita na uli. Alai, ala marsahit manang matua, ndang boi be godang talehon tingkinta marbarita sian jabu tu jabu. Aha ma na boi taulahon? Ingot ma, na mamuji Jahowa do hita tingki tapaboa barita na uli tu sude na tajumpangi, umpamana dokter manang perawat. Tingki dipenjara alani haporseaon, boi do tongtong hita marbarita disi. On mambahen las roha ni Jahowa. (Poda 27:11) Las do roha ni Jahowa molo tongtong hita marsihohot nang pe keluarganta ndang manomba Jahowa. (1 Ptr. 3:1-4) Nang pe tingki susa, boi do hita mamuji Jahowa molo tongtong maraleale tu Ibana jala maju di partondion.

20, 21. Molo godang tanggung jawab na dilehon tu hita di huria, aha do labana tu donganta na asing?

²⁰ Pasupasuon ni Jahowa do hita molo tapatogu paralealeonta tu Ibana jala mangalehon na dumenggan. Umpamana, boi do taatur tingkinta asa boi mangurupi godang halak mamboto janji ni Jahowa. Manang, boi do hita mangurupi dongan di huria. Rimangi ma holong ni angka dongan tu hita, molo diida nasida hita ringgas mangulahon ulaon di huria!

²¹ Nang pe nunga leleng hita gabe Sitindangi Ni Jahowa, alai ingkon tapatogu do paralealeonta tu Jahowa jala tongtong maju di partondion. Di parsiajaran na mangihut, taulas ma songon dia hita mangurupi na asing asa maju di partondion.