1. Nang pe marlas ni roha di mulana, aha do na laho adopan ni na mardongan saripe? (Ida gombar di mula ni parsiajaran.)

LAM leleng marhamlet, lam balga do holong ni sahalak baoa dohot borua. Marsangkap ma nasida laho marrumatangga, jala marjanji do nasida asa tongtong masihaholongan saleleng ngoluna. Di pesta parbogason ni nasida, mansai las do roha ni baoa i mangida borua i. Dung sae pesta i, porlu do nasida mambahen hamubaon asa tongtong marsada. Dihalomohon Jahowa do asa martua parsaripeon, jala dilehon do podaNa di Bibel. (Poda 18:22) Alai, dipaboa do di Bibel, ”marniae di daging” do na mardongan saripe. (1 Kor. 7:28) Songon dia do asa unang sai adong parsoalan di parsaripeon? Aha do bahenon ni halak Kristen asa martua parsaripeonna?

2. Holong na songon dia do na ingkon dipatudu di parsaripeon?

² Dipaboa di Bibel, ingkon tapatudu do holong. Godang do cara na boi dibahen na mardongan saripe  patuduhon holong. Umpamana, tapatudu ma lambok ni roha tu dongan saripe. Molo dung adong ianakhon, ringkot do tongtong patuduhon holong di keluarga. Alai, ingkon holong na marojahan tu Bibel do na mambahen martua parsaripeon. Dipatorang si Paulus do taringot holong di parsaripeon, ”Sandok ganup hamu, masihaholongi pardihutana be songon dirina; alai dihabiari parompuan i ma baoana!”​—Eps. 5:33.

3. Sadia ringkot do patuduhon holong di parsaripeon?

³ Si Paulus manurat, ”Hamu angka baoa, haholongi hamu ma pardihutamuna be songon Kristus, na mangkaholongi huria i jala dilehon do dirina humongkopsa.” (Eps. 5:25) Halak Kristen na mangkaholongi dongan saripena maniru Jesus na mangkaholongi siseanna. (Jaha Johannes 13:34, 35; 15:12, 13.) Ingkon masihaholongan do nasida jala olo mangalehon ngoluna humongkop dongan saripena. Alai, olo do ra pigapiga halak marpingkir laho marsirang tingki adong parsoalan na borat. Aha do na boi mangurupi nasida? Bibel mandok taringot holong, ”Saluhut do ditanom rohana, saluhut do dihaporseai, dihirimi jala ditaon. Ndang na olo salpu haholongon i.” (1 Kor. 13:7, 8) Ingkon diingot nasida do padanna, i ma padan laho masihaholongan jala marsihohot tu dongan saripena. On mangurupi nasida asa olo manjalo pangurupion sian Jahowa laho pasaehon parsoalan.

4, 5. (a) Aha do tanggung jawab ni tungganedoli? (b) Songon dia do tungganeboru maradophon tungganedolina? (c) Aha do na porlu disesuaihon na mardongan saripe?

⁴ Dipatorang si Paulus do tanggung jawab di parsaripeon. Ibana mandok, ”Dioloi angka parompuan ma baoana be, songon pangoloi di Tuhan! Ai baoa i do ulu ni pardihutana, songon Kristus ulu ni huria i.” (Eps. 5:22, 23) Lapatanna, ndang na gabe sumurung baoa sian borua. Tingki laho manompa borua, didok Jahowa do, ”Ndang jadi punjung [ndang mardongan] jolma i; hubahen ma di ibana sada pangurupina bahen donganna.” (1 Mus. 2:18) Ingkon urupan ni borua do asa boi denggan tungganedolina manguluhon rumatanggana. Tungganedoli pe ingkon maniru Jesus, ”ulu ni huria i”, na patuduhon holong. Molo diulahon i, pos ma roha ni tungganeboruna mangihuthon jala mangurupi tungganedolina.

⁵ Si Cathy, na muli tu si Fred, mandok, ”Tingki anak boru ahu, lomongku do mamillit na porlu di ahu. Alai dung muli, ingkon marpanungkun do ahu tu tungganedolingku. Ndang mura mangulahon on, alai ala mangihuthon poda ni Jahowa, lam solhot ma hami.” ^[1] (Ida catatan.) Si Fred mandok, ”Ndang mura mamillit na ringkot di dua halak. Alai, mura do i diulahon molo mangido pangurupion sian Jahowa jala manangihon  pandapot ni tungganeborungku. Huhilala, gabe songon dongan sakarejo do hami!”

6. Songon dia do holong gabe ”rahutrahut ni nasa harimpason” tingki adong parsoalan di parsaripeon?

⁶ Lam togu do parsaripeon molo na mardongan saripe ”masipauneunean jala masisesaan dosa”. Ala mardosa, olo do nasida na dua mangulahon na sala. Tingki masa sisongon i, masisesaan dosa ma nasida jala patuduhon holong songon na didok di Bibel. Holong ni roha i do ”rahutrahut ni nasa harimpason”. (Kol. 3:13, 14) Dipatudu nasida do holong molo sabar, burju, jala ”ndang dipaingotingot hasalaan ni halak”. (1 Kor. 13:4, 5, Bibel siganup ari) Tingki adong parsoalan, pintor dipasae ma nian. (Eps. 4:26, 27) Porlu do serep ni roha dohot habaranion laho mandok, ”Sala ma ahu da hasian.” Molo diulahon i, sae ma parsoalan jala lam solhot ma parsaripeon.

7, 8. (a) Aha do poda na dilehon di Bibel taringot hubungan suami istri di parsaripeon? (b) Boasa ringkot patuduhon lambok ni roha di parsaripeon?

⁷ Di Bibel, adong do poda na mangurupi na mardongan saripe asa marpangantusion na denggan taringot hubungan suami istri. (Jaha 1 Korint 7:3-5.) Ringkot do mamparrohahon pangkilalaan dohot na porlu di dongan saripe. Molo ndang lambok tu tungganeboru, ndang marlas ni roha be tungganeboru tingki berhubungan suami istri. Ingkon ”marroha” do tungganedoli maradophon tungganeboruna. (1 Ptr. 3:7) Hubungan suami istri ndang boi dipaksahon tu dongan saripe. Tung pe baoa na jumolo merespon, alai somalna ingkon di tingki na denggan ma nian di nasida na dua.

⁸ Ndang adong aturan di Bibel taringot sadia godang holong ni roha na ingkon dipatudu tu dongan saripe. Alai, dipaboa do cara patuduhon holong ni roha. (Ende 1:2; 2:6) Ingkon lambok do maradophon dongan saripe.

9. Boasa ndang patut menggoda halak na so dongan saripenta?

⁹ Molo togu holongta tu Debata dohot tu dongan, ndang tapaloas manang aha pe manegai parsaripeonta. Adong do na manegai parsaripeonna sandiri ala jotjot mangida pornografi. Ingkon tapasiding do pornografi dohot angka ulaon na rorang. Unang ma menggoda na so dongan saripenta, alana on patuduhon, ndang tahaholongi dongan saripenta. Diboto Debata do aha na tapingkiri dohot na taulahon. Molo taingot on, lam marhiras ni roha ma hita mambahen las roha ni  Debata jala marsihohot tu dongan saripe.​—Jaha Mateus 5:27, 28; Heber 4:13.

10, 11. (a) Godang do halak na marsirang? (b) Aha do na didok Bibel taringot padaodao? (c) Aha do na mangurupi na marsaripe asa unang padaodao?

¹⁰ Ala ndang boi pasaehon parsoalan, adong do pigapiga halak na mamillit laho marsirang manang padaodao. Di pigapiga inganan, godang do halak na marsirang. Alai, ndang somal parsirangan di halak Kristen. Nang pe songon i, godang do parsoalan na diadopi halak Kristen na mardongan saripe.

¹¹ Dipaboa do di Bibel, ”Ndang boi tadingkonon ni boruboru tungganedolina; alai molo tadingkononna do, torus ma ibana unang muli be, molo so i, didapothon ma tungganedolina. Jala ndang boi baoa manirangkon tungganeboruna.” (1 Kor. 7:10, 11, Bibel siganup ari) Godang do halak na padaodao alani godang ni parsoalan. Alai, dipaboa Jesus do songon dia Hata ni Jahowa taringot parsaripeon, ”Naung pinadomu ni Debata, ndang jadi sirangon ni jolma.” (Mat. 19:3-6; 1 Mus. 2:24) Ndang dihalomohon Jahowa parsirangan. (1 Kor. 7:39) Taingot ma, martanggung jawab do hita tu Jahowa taringot parniulaonta. On mangurupi hita hatop pasaehon parsoalan.

12. Aha do na mambahen na marsaripe naeng padaodao?

¹² Boasa adong na mangadopi parsoalan na borat, jala naeng padaodao? Alana, adong do halak na gabe mandele ala parsaripeonna ndang songon na hinirim ni rohana. Asing ni i, marasingasing do hasomalan ni sasahalak dohot cara ni nasida dipagodanggodang. Sipata, maol do mangadopi keluarga ni simatua, jala ndang sai sapandapot taringot parhepengon manang pagodanggodang ianakhon. Alai, las do rohanta mangida godang halak Kristen boi pasaehon parsoalan di parsaripeon ala mangihuthon poda ni Debata.

13. Aha do alana umbahen diloas na mardongan saripe padaodao?

¹³ Adong do alana umbahen diloas na marsaripe padaodao. Umpamana, ndang disarihon sasahalak keluargana, jotjot mamungkuli dongan saripena, jala ndang diloas mangulahon sude ulaon partondion. Tingki adong parsoalan, ingkon dipangido do pangurupion sian angka sintua. Nunga godang pengalaman ni angka sintua jala boi mangurupi na marsaripe mangulahon Hata ni Debata. Molo dipangido tondi parbadia, diurupi ma  nasida mangulahon prinsip ni Bibel, jala patuduhon parange na denggan. (Gal. 5:22, 23) ^[2]—Ida catatan.

14. Aha do na didok Bibel tu halak Kristen na dongan saripena ndang manomba Jahowa?

¹⁴ Dipaboa do di Bibel, denggan do sahalak Kristen tongtong rap dohot dongan saripena na so manomba Jahowa. (Jaha 1 Korint 7:12-14.) ”Gabe badia” do dongan saripe na so sahaporseaon i, ala gabe panomba Jahowa dongan saripena. Ianakhon ni nasida pe ”gabe badia” jala dilinggomi Debata. Dijujui si Paulus do halak Kristen, ”Ai sian dia ma diboto hamu, hamu angka tungganeboru Kristen, na so boi hamu paluahon tungganedolimuna? Hamu pe tungganedoli Kristen, sian dia ma diboto hamu na so boi hamu paluahon tungganeborumuna?” (1 Kor. 7:16, Bibel siganup ari) Godang do sitiruon na denggan sian halak Kristen na mangurupi dongan saripena laho manomba Jahowa.

15, 16. (a) Aha do poda ni Bibel tu halak Kristen na tungganedolina ndang panomba Jahowa? (b) Aha do na so boi diulahon sahalak Kristen molo ditadingkon dongan saripena na so panomba Jahowa ibana?

¹⁵ Dijujui si Petrus do angka tungganeboru Kristen unduk tu tungganedolina ”asa molo so porsea deba di Hata i, gabe meol rohanasida, binahen ni parange ni parompuan i, so pola mardongan hata, molo dibereng nasida parangemuna na bontor, na marhatahuton”. Urupi ma dongan saripe manjangkon hasintongan marhite patuduhon parange ”na lambok jala na dame, i do na arga dietong Debata”. Dumenggan do i sian na sai mangkatahon taringot haporseaon tu dongan saripe.​—1 Ptr. 3:1-4.

 ¹⁶ Songon dia do molo na so manomba Jahowa manadingkon dongan saripena na manomba Jahowa? Bibel mandok, ”Molo disirang na so porsea i dirina, sirang ma ibana tusi. Ndang apala marnihot baoa manang boruboru naung Kristen tu sisongon i; alai di bagasan dame dijou Debata hamu.” (1 Kor. 7:15) Nang pe songon na dame dihilala sahalak Kristen tingki ditadingkon, alai songon na didok Bibel, ndang boi ibana marhasohotan muse dohot na asing. Ndang boi dipaksa ibana dongan saripena i tongtong rap dohot ibana. Alana, olo do ra mulak muse dongan saripena i laho mardame jala gabe panomba Jahowa.

17. Aha do na ingkon taharingkothon di parsaripeon?

¹⁷ Ala mangolu ”di angka tingki parpudi”, hita mangadopi ”angka ari hasusaan”. (2 Tim. 3:1-5) Dibahen i, ingkon lam solhot ma paralealeonta tu Jahowa. Si Paulus mandok, ”Gogot [otik] nama tingkina. Songon on ma tu joloan on: Songon na so marjolma ma angka naung marjolma i. . . . Jala angka na marhaseangkon portibi on, songon na so marhaseangkonsa situtu, ai na mamolus do rumang ni portibi on.” (1 Kor. 7:29-31) Na didok si Paulus dison, ndang na gabe ndang mamparrohahon dongan saripe. Ala hita mangolu di tingki parpudi, taharingkothon ma panombaonta tu Jahowa.​—Mat. 6:33.

18. Boasa tadok na boi do martua parsaripeon ni halak Kristen?

¹⁸ Saonari, godang do parsaripeon na so martua. Alai, boi do martua parsaripeon? Boi, molo tongtong hita maraleale tu Jahowa dohot naposoNa, mangulahon poda sian Bibel jala manjalo pangurupion sian tondi parbadia. Molo taulahon i, na patuduhon pangargaion do hita tu ”naung pinadomu ni Debata”.​—Mrk. 10:9.