On ma sada na diparsoalhon halak Parise tu Jesus dohot tu siseanna. Dipatorang do di Patik ni si Musa angka na mambahen sasahalak gabe ramun. Umpamana, cairan na kaluar sian hailaan ni sasahalak, sahit kusta, manang manjama bangke. Dipaboa do aha na ingkon bahenon ni sasahalak asa ias muse, i ma mangalehon pelean, marburi, manang dipispis sintua ni malim.​—3 Musa, bindu 11-15; 4 Musa, bindu 19.

Guru ni agama Jahudi na didok rabbi, manambai uhum ni nasida tu Patik ni si Musa. Adong na mandok, ditambai nasida do angka na mambahen sasahalak gabe ramun jala songon dia sasahalak mambahen donganna gabe ramun. Didok angka rabbi i do muse, angka aha na boi manang na so boi ramun dohot angka aha na ingkon ulahonon ni sasahalak asa boi ias muse.

Disungkun halak Parise ma, ”Boasa so diihuthon angka siseanmi adat ni angka situatua, ai ramun do tanganna mangan roti?” (Mrk. 7:5) Ndang na taringot haiason na didok halak Parise i dison, alai taringot mamburi tangan andorang so mangan. Dibahen halak Parise do uhum na mandok, andorang so mangan halak, ingkon diusehon do aek tu tanganna. Didok do muse, ”Diparsoalhon angka rabbi i do muse baskom na dia na ingkon pangkeon ni nasida laho mangusehon aek, aek na songon dia na boi pangkeon, ise na mangusehon, jala piga tangan na boi hona aek.”

Aha do alus ni Jesus tu halak Parise i? Didok Jesus ma tu nasida, ”Na sinurirangkon ni si Jesaya, songon na tarsurat i: ’Dipapujipuji pamangan ni bangso on do Ahu; alai ia rohanasida dao do sian Ahu [Jahowa]!’ ’Jala magopo do pambahennasida pasangaphon Ahu, ai patikpatik ni jolma do dipodahon nasida.’ Ai tading do patik ni Debata dibahen hamu, laho mangaradoti adat na sian jolma.”​—Mrk. 7:6-8.