1, 2. Songon dia do pandapot ni halak taringot tu Sitindangi Ni Jahowa?

GODANG do na mandok, molo Sitindangi Ni Jahowa imbar sian na asing. Umpamana, si Anton Gill sahalak panurat, mamuji Sitindangi Ni Jahowa di tingki ni Nazi Jerman. Ibana mandok, ”Sogo do roha ni Nazi Jerman tu Sitindangi Ni Jahowa. . . . Di taon 1939 adong 6.000 halak Sitindangi Ni Jahowa na dihurung di [kamp konsentrasi].” Jala didok ibana do muse, ”Nang pe mangadopi sitaonon na posi, alai tongtong do nasida haposan, tenang, marsihohot tu Debata, jala marsada.”

² Songon i do nang di Afrika Selatan, diparrohahon angka halak do na imbar Sitindangi Ni Jahowa. Hea do ndang diloas rap marpungu halak kulit putih dohot kulit hitam, jala marlangku do i tu Sitindangi Ni Jahowa disi. Alai di ari Minggu tanggal 18 Desember 2011, marpungu do lobi sian 78.000 Sitindangi Ni Jahowa laho manangihon acara na sumurung di stadion na umbalga di  Johannesburg. Sian marragam suku di Afrika Selatan do nasida, na kulit hitam dohot kulit putih. Sada sian pengurus ni stadion i mandok, ”On ma punguan na tung denggan na hea huida di stadion on. Rapirapi do nasida. Jala ias do dibahen nasida stadion on. Alai na dumenggan, marsada do hamu nang pe sian marragam bangso.”

3. Boasa sumurung parsadaan ni angka donganta?

³ Tangkas do di ida angka halak, na sumurung do parsadaan ni angka dongan di liat portibi on. (1 Ptr. 5:9) Boasa hita imbar sian organisasi na asing? Ala marhite pangurupion sian Bibel dohot tondi parbadia, gabe boi ma hita paubahon diri sian angka ulaon na dihasogohon ni Jahowa. ’Tatanggalhon jolma na buruk’ jala ’tasolukhon na imbaru’.​—Kol. 3:9, 10.

4. Aha do na laho taulas di artikel on, jala boasa i ringkot?

⁴ Dungkon tatanggalhon jolma manang pangalaho na buruk, ingkon tongtong do hita marsitutu mambolongkon i. Di artikel on, taulas ma parjolo songon dia mananggalhon pangalaho na buruk jala boasa on ringkot. Taida ma sasahalak na boi mambahen hamubaon na balga, nang pe hea mangulahon angka na sala. Dung i, taulas ma muse taringot donganta naung martaontaon di bagasan hasintongan, ingkon tongtong mambolongkon pangalaho na buruk. Boasa on ringkot taulas? Alana, adong do na manomba Jahowa alai ndang tongtong jaga. Nunga mulak be pangalaho dohot pamingkirion ni nasida songon pangalahona andorang so mananda Jahowa. Porlu do sipasingot on tu hita, ”Ganup na jongjong di rohana, dimatahon ma, unang tinggang!”​—1 Kor. 10:12.

5. (a) Bahen ma tudosan, boasa ringkot pintor hatop mananggalhon angka pangalaho na buruk. (Ida gombar di mula ni parsiajaran.) (b) Angka ulaon aha do na didok pangalaho manang jolma na buruk na disurat di Kolosse 3:5-9?

⁵ Aha do na laho diulahon hamu molo nunga kotor jala bau pangkeanmuna? Tontu pintor hatop do ditanggalhon hamu i. Dos songon i ma, molo nunga taboto na taulahon i mambahen hansit roha ni Jahowa, pintor tabahen ma hamubaon. Tingki mangkatai taringot ulaon na sala, didok si Paulus do, ”Bolongkon hamu ma saluhutna i.” Taulas ma dua sian i, i ma parmainanon dohot hahodaron.​—Jaha Kolosse 3:5-9.

6, 7. Songon na didok ni si Paulus boasa ingkon marsitutu hita mananggalhon pangalaho na buruk? (b) Songon dia do parngoluan ni si Sakura jala aha do na mangurupi ibana marhamubaon?

⁶ Parmainanon. Di Bibel na didok ”parmainanon”, i ma hubungan seks na diulahon sasahalak tu na so dongan saripena. Si Paulus mandok ingkon  ’bunuon’ ni halak Kristen do ruas ni dagingnasida na boi mambahen nasida mangulahon parmainanon. Lapatanna ingkon marsitutu do hita laho mambolongkon giotgiot na sala. Maol do mangulahon on, alai boi do hita marhasil!

⁷ Taida ma pengalaman ni donganta si Sakura sian Jepang. * (Ida surat na di toru.) Dung magodang, jotjot do ibana lungunlungunan. Sian marumur 15 taon nunga mangulahon seks ibana. Jala diulahon ibana do i dohot pigapiga halak. Tolu hali ma ibana manggugurhon. Didok ibana, ”Mulana, las do rohangku mangulahon on, ala huhilala songon na dihaholongi do ahu. Alai, lam jotjot huulahon, lam busisaon do ahu.” Sai diulahon ibana do on sahat tu na marumur 23 taon. Dungkon i, marsiajar Bibel ma ibana dohot Sitindangi Ni Jahowa, jala lomo do rohana tu parsiajaranna i. Diurupi Jahowa do ibana asa pasidingkon ulaon na rorang, jala asa unang sai manolsoli be. Ndang lungunlungunan be ibana, jala saonari nunga merintis biasa ibana. Didok ma, ”Las do rohangku sai huhilala do holong ni Jahowa.”

8. Aha do pigapiga ulaon na hodar di adopan ni Debata?

⁸ Hahodaron. Di Bibel ndang holan mangulahon seks na so patut na didok ”hahodaron”. Marisap manang mangkatahon gaitgait na rorang pe didok do hahodaron. (2 Kor. 7:1; Eps. 5:3, 4) Sipsip manjaha dohot manonton video porno pe boi do didok hahodaron. Alana, boi do ulaon sisongon i mambahen sasahalak gabe masturbasi manang mangosos ososhon alat kelamin. (Kol. 3:5) *—Ida surat na di toru.

9. Aha do na masa molo sasahalak nunga dirajai ”hisaphisap na roa”?

⁹ Gabe dirajai ”hisaphisap na roa” do sasahalak na jotjot manonton video porno, jala boi gabe hatagian seks. Sada penelitian paboahon, halak na hatagian film porno dipatudos songon halak na hatagian alkohol manang narkoba. Tangkas ma, parohon jea do molo sasahalak hatagian manonton video porno. Boi do parohon ila, ndang denggan karejo, sega rumatangga, marsirang, jala boi mambahen sasahalak maningkot. Sasahalak naung so manonton video porno paboahon dungkon sataon ma asa boi muse mulak harga dirina.

10. Songon dia do si Ribeiro boi pasohon hatagianna laho mangida gombar manang video porno?

¹⁰ Di godangan halak, maol do pasohon hatagian mangida gombar manang video porno. Alai boi do nasida marhasil. Parrohahon ma pengalaman ni si Ribeiro sian Brasil. Tingki remaja, karejo di percetakan daur ulang kertas do ibana. Diida ibana ma majalah porno. Didok si Ribeiro, ”Lam leleng gabe hatagian ma ahu. Ninna rohangku, sai hatop ma nian laho hamlethu sian jabu, asa boi ahu manonton video porno.”  Di sada tingki, diida ibana ma di angka buku na laho di daur ulang i adong buku Rahasia Kebahagiaan Keluarga. Dibuat jala dijaha ibana ma buku i. Dung dijaha, gabe olo ma ibana marsiajar Bibel dohot Sitindangi Ni Jahowa. Alai ndang pintor mago hasomalanna mangida jala manonton video porno. Aha do na mangurupi ibana? Dipatorang ibana ma, ”Ala martangiang, marsiajar Bibel, mangarimangi na huparsiajari, gabe lam huargai ma parange ni Debata. Gabe umbalga ma holong ni rohangku tu Jahowa sian giotgiot ni rohangku laho mangida gombar manang video porno.” Marhite parsiajaran Bibel dohot pangurupion ni tondi parbadia, gabe muba ma parngoluon ni si Ribeiro. Tardidi ma ibana, jala saonari nunga gabe sahalak sintua.

11. Aha do na boi mangurupi sasahalak asa malua sian hatagian laho mangida gombar manang video porno?

¹¹ Asa boi malua sian hatagianna i, ndang holan marsiajar Bibel sambing si Ribeiro. Alai bagas do dirimangi ibana parsiajaranna i. Martangiang do ibana tu Jahowa laho mangido pangurupion. Alani i, gabe umbalga ma holongna tu Debata sian hatagianna laho mangida gombar manang video porno. Suang songon i ma nang hita, asa boi malua sian hatagian sisongon i, ingkon bagas do holongta tu Jahowa jala tahasogohon ma angka ulaon na rorang.​—Jaha Psalmen 97:10.

12. Aha do na mangurupi si Stephen mambolongkon parange mura muruk manang mangaleai?

¹² Godang do halak na muramura muruk, mangkatahon hata na posi jala mangaleai na asing. Molo masa i, gabe susa ma keluargana. Sahalak ama di Australia na margoar si Stephen jotjot mamburai jala mura tarrimas. Ibana mandok, ”Nunga tolu hali ahu dohot tungganeborungku padaodao jala lao sirang nama hami.” Alai ndang sadia leleng, marsiajar Bibel ma nasida dohot Sitindangi. Marsitutu ma si Stephen mangulahon naung pinarsiajaranna i. Ibana paboahon, andorang so ditanda ibana Jahowa, pintor muruk do ibana molo adong na mambahen jut rohana, dos songon bom na laho pultak. Alai dung diihuthon ibana poda na sian Bibel gabe burju ma ibana. Ibana mandok, ”Gabe godang do hamubaon di keluarganami. Alani pangurupion ni Jahowa, gabe boi ma huhilala dame ni roha.” Saonari, nunga gabe parhobas be si Stephen di huria, jala tungganeboruna nunga merintis biasa saleleng pigapiga taon. Angka sintua di huria ni si Stephen mandok, ”Halak na lambok do donganta si Stephen, ringgas jala serep marroha.” Jala ndang hea diida angka dongan ibana muruk. Si Stephen paboahon,  ndang alani gogona umbahen na boi ibana marhamubaon. Ibana mandok, ”Sude angka na denggan na hudapot on, alani pangurupion ni Jahowa do.”

13. Boasa rimas parohon jea? Aha do na nidok ni Bibel tu hita taringot i?

¹³ Dipasingot Bibel do hita asa pasidingkon rimas, hata na mambahen hansit ni roha ni dongan, dohot songgaksonggak. (Eps. 4:31) Sudena i boi mambahen hita gabe ”lalu tangan”. Saonari, nunga somal be masa di portibi on rimas dohot hajahaton. Alai sasintongna, pangalaho sisongon on ndang pasangaphon Debata Sipanompa hita. Alani i, godang do angka donganta mambahen hamubaon jala mamangke parange na imbaru.​—Jaha Psalmen 37:8-11.

14. Boi do sahalak parmuruk gabe sahalak na lambok?

¹⁴ Sahalak donganta na margoar si Hans gabe sintua di sada huria di Austria. Koordinator punguan ni angka sintua di huria i mandok, ”Si Hans ma halak na mansai lambok na hea hujumpangi.” Alai uju di haposoonna, parmabuk jala parjahat do ibana. Di sada tingki, mabuk ma ibana jala tarrimas gabe dibunu ma hamletna. Dipenjarahon ma ibana saleleng 20 taon, alai ndang muba parangena nang pe di penjara. Didok omakna ma tu sintua asa ro mangida ibana. Marsiajar Bibel ma si Hans. Didok ibana, ”Maol do manadingkon pangalaho na buruk i. Ayat ni Bibel na patoguhon ahu, i ma Jesaya 55:7 na mandok, ’Sai ditadingkon halak parjahat i ma  dalanna,’ dohot 1 Korint 6:11, na paboahon ’angka sisongon i do hamu deba najolo’ alai nunga ditadingkon hamu dosa i. Dung pigapiga taon, sabar do Jahowa mangurupi ahu marhite tondi parbadia asa marpangalaho na imbaru.” Tardidi ma si Hans tingki di penjara, jala malua ma ibana dung 17 satonga taon. Didok ibana, ”Mandok mauliate do ahu tu Jahowa alani lambas dohot asi ni rohaNa.”

15. Aha do muse na didok pangalaho na buruk? Aha do na didok Bibel taringot i?

¹⁵ Sada sian pangalaho na buruk, i ma margabus. Umpamana, godang do jolma margabus asa unang manggarar pajak manang asa unang disalahon. Alai ”Debata ni hasintongan” do Jahowa. (Ps. 31:5) Dipangido do tu na manomba Ibana asa ’mangkatahon na sintong’ jala ”unang ma masigabusan”. (Eps. 4:25; Kol. 3:9) Tangkas ma taboto, ingkon tahatahon do na sintong nang pe di situasi na maol.​—Poda 6:16-19; Jak. 5:16.

16. Aha do na boi mangurupi hita mananggalhon pangalaho na buruk?

¹⁶ Ndang boi hita marhasil mananggalhon pangalaho na buruk molo holan mangasahon gogonta. Marsitutu do si Sakura, si Ribeiro, si Stephen, dohot si Hans mambahen hamubaon di ngolunasida. Na mangurupi nasida i ma huaso ni Hata ni Debata dohot tondi parbadiaNa. (Luk. 11:13; Heb. 4:12) Asa tahilala huaso ni Debata, ingkon tajaha do Bibel ganup ari, tarimangi, jala tongtong martangiang mangido bisuk dohot gogo asa boi mangulahon na taparsiajari. (Jos. 1:8; Ps. 119:97; 1 Tes. 5:17) Boi do muse dapotta laba sian Hata ni Debata dohot tondi parbadiaNa molo ro tu parpunguan jala denggan taparade na hombar tusi. (Heb. 10:24, 25) Lomo do rohanta mamangke godang alat na diparade organisasi ni Jahowa, songon majalah, JW Broadcasting, JW Library, dohot jw.org.​—Luk. 12:42.

17. Aha do na laho taulas di artikel na mangihut?

¹⁷ Nunga taulas pigapiga ulaon na rorang na ingkon ditanggalhon jala dipasiding halak Kristen, asa mambahen las roha ni Jahowa. Alai adong dope na ringkot na ingkon taulahon. Ingkon tasolukkon do pangalaho na imbaru jala tongtong ma taparangehon i. Di artikel na mangihut, taulas ma songon dia cara mangulahon i.