SADA kota na ribur do Mexico City. Di bulan November 1932 lobi sian sajuta halak na maringanan disi. Pigapiga minggu na salpu dipasang ma lampu lalu lintas na parjolo sahali. Asing ni i, adong do na mambahen las roha ni angka halak. Nunga rade angka wartawan paimahon tamu istimewa di stasiun kereta api. Ise ma i? Si Joseph F. Rutherford, presiden Lembaga Menara Pengawal. Sitindangi Ni Jahowa na maringanan disi pe dohot do paimahon donganta si Rutherford, na ro tu kebaktian sitolu ari.

The Golden Age paboahon, ”Tontu sai na ingoton do kebaktian on, sada acara na mansai ringkot,” laho mamaritahon hasintongan di Meksiko. Ndang pola balga kebaktian on ala holan 150 halak do na ro. Alai, boasa on ringkot?

Andorang so dibahen kebaktian on, ndang godang dope halak na manangihon hasintongan di Meksiko. Dung taon 1919, hea do dibahen kebaktian na gelleng. Alai dungkon taon i lam otik do huria disi. Tingki dibungka kantor cabang di Mexico City taon 1929, gabe lam maju ma ulaon marbarita na uli disi. Alai, adong dope ambatambatna. Dilehon organisasi ma tudutudu tu kolportir (goar ni perintis di tingki i), asa unang martigatiga tingki marbarita na uli. Alai, sogo do roha ni sahalak perintis alani i, jala gabe ditadingkon ibana ma hasintongan. Dung i, dibahen ibana ma sada punguan parsiajar Bibelna sandiri. Jala di tingki i, sahalak pengawas kantor cabang ingkon diganti ala mangulahon na sala. Ringkot do dipatogu angka Sitindangi disi.

Dipatogu donganta si Rutherford ma angka donganta i, marhite dua jamita dohot lima buku. Disarhon do muse kebaktian i marhite radio. On ma na parjolo sahali angka dongan mamangke radio laho marbarita na uli di sude luat Meksiko. Dung sae kebaktian i, dipillit ma pengawas kantor cabang na baru. Saonari, marhiras ni roha do angka Sitindangi na disi laho marbarita na uli. Jala las do roha ni Jahowa mangida i.

Taon 1933, dibahen ma dua kebaktian di Meksiko, sada di Veracruz jala sada nai di Mexico City. Marsitutu do angka donganta laho marbarita na uli, jala denggan do hasilna. Umpamana, taon 1931 holan 82 halak do penyiar disi. Alai, taon 1941 tamba ma gabe sampulu hali lompit! Hirahira 1.000 halak ma na ro tu kebaktian di Mexico City di taon i.

Taon 1943 dibahen Sitindangi ma kampanye kebaktian ”Bangso na Dipalua” na laho dibahen di 12 kota di Meksiko. * (Ida surat na di toru.) Dipangke nasida do plangkat na marlapis laho kampanye. Digantung ma plangkat i di jolo dohot di tanggurung ni nasida. Nunga dipangke Sitindangi cara on laho kampanye kebaktian sian taon 1936.

Marhasil do kampanye mamangke plangkat na marlapis di Mexico City. Koran La Nación paboahon, ”Ari na parjolo, digokkon nasida do godang halak asa ro. Ari na mangihut, gabe ndang siat be inganan i.” Sogo do roha ni Gareja Katolik ala marhasil ulaon on. Alai, ndang mabiar angka donganta. Tongtong do diulahon nasida kampanye kebaktian on. Artikel na asing sian koran La Nación paboahon, ”Sude do halak na di kota i mangida nasida.” Didok disi, nunga gabe iklan na ’mardalan’ be angka Sitindangi. Dibahen do muse di artikel i poto ni angka dongan na kampanye di angka dalan di Mexico City. Jala on ma hatorangan na di poto i, ”Kampanye di dalan”.

Di taon i, marsitutu do angka Sitindangi asa boi ro tu pigapiga kebaktian di Meksiko. Godangan angka donganta ro sian huta na pinjil, na dao sian pasar manang stasiun kereta api. Sada huria manurat, ”Holan telegram do na boi sahat tuson.” Angka na ro sian negara na asing, ingkon marhalode manang mardalan pat saleleng pigapiga ari asa sahat tu stasiun kereta api tu inganan kebaktian.

Godangan angka Sitindangi na tading disi pogos do, jala ingkon marungkil do nasida asa boi ro. Dung sahat di kebaktian, marborngin di jabu ni angka dongan do nasida. Na asing, marborngin di Bale Harajaon. Hea do 90 halak angka donganta marborngin di kantor cabang. Dibahen ma kardus ni buku gabe podoman ni nasida. Buku Yearbook paboahon, mandok mauliate do angka donganta ala boi modom di ”podoman na umlambok jala umlas sian lante”.

Nang pe godang na diulahon nasida asa boi ro tu kebaktian on, las do roha ni nasida rap marpungu dohot angka dongan na asing. Suang songon i nang pangargaion ni lobi sian 850.000 angka donganta di Meksiko saonari. * (Ida surat na di toru.) Laporan di buku Yearbook 1949 paboahon, nang pe godang ambatambat na diadopi nasida laho ro tu kebaktian i, alai tongtong do marhiras ni roha nasida manomba Jahowa. Molo adong kebaktian ”sai di hatai nasida do taringot kebaktian i, nang pe nunga salpu”. Sai disungkun angka donganta do, ”Andigan do Muse Hita Kebaktian?”​—Dibuat Sian Arsipta di Amerika Tengah.