1, 2. (a) Aha do na mambahen hita mandok, ”Sadia leleng?” (b) Boasa sungkunsungkun ni angka naposo ni Debata najolo boi patoguhon rohanta?

HEA do panurirang Jesaya dohot Habakuk mandok, ”Sadia leleng?” (Jes. 6:11; Hab. 1:2) Di Psalmen 13, disurat Raja Daud do muse sungkunsungkun i opat hali. (Ps. 13:2, 3) Jala tingki diida Jesus angka halak na so marhaporseaon, disungkun ibana do muse, ”Sadia leleng?” (Mat. 17:17) Ra hita pe olo do songon i.

² Aha do na mambahen hita mandok, ”Sadia leleng?” Ra ala masa tu hita hajahaton, sahit manang ala lam matua hita. Jala marsak do hita ala mangolu di ”ari hasusaan, di angka tingki parpudi”. (2 Tim. 3:1) Olo do alani pangalaho ni halak gabe loja pingkiranta jala marmetmet ni roha hita. Alai manang aha pe na mambahen hita marsak, dipatogu do rohanta mamboto molo Jahowa ndang muruk  tu naposoNa najolo na mandok, ”Sadia leleng?”

3. Songon dia do carana asa boi hita martahan tingki masa sitaonon?

³ Songon dia do carana asa boi hita martahan tingki masa sitaonon? Marhite tondi parbadia disuru Debata do si Jakkobus laho manurathon on, ”Pabenget hamu ma rohamuna, ale angka dongan, sahat ro di haroro ni Tuhan i!” (Jak. 5:7) Alani i, ingkon benget manang sabar do hita. Alai aha do lapatan ni sabar? Jala songon dia do hita boi patuduhon i?

4, 5. (a) Aha do lapatan ni sabar, jala songon dia do hita patuduhon i? (b) Songon dia do si Jakkobus patorangkon hasabaron? (Ida gombar di mula ni parsiajaran.)

⁴ Bibel paboahon, parbue ni tondi do lambas ni roha manang hasabaron. Ala jolma na mardosa do hita, maol do patuduhon hasabaron tingki masa sitaonon. Ingkon sian pangurupion ni Debata do asa boi hita patuduhon hasabaron. Molo sabar hita, na patuduhon holong tu Jahowa dohot tu angka dongan do hita. Alai, molo ndang sabar hita, lam ngali ma holongta tu angka dongan. (1 Kor. 13:4; Gal. 5:22) Aha do lapatan ni sabar? Sabar lapatanna, martahan di tingki masa sitaonon huhut patuduhon pangalaho na denggan. (Kol. 1:11; Jak. 1:3, 4) Sabar mangurupi hita marsihohot tu Jahowa, ndang soal aha pe na masa tu hita. Asing ni i, hasabaron mangurupi hita asa unang mambaloshon pambahenan ni halak na jungkat tu hita. Bibel paboahon, ingkon rade do hita patuduhon hasabaron. I ma parsiajaran na ringkot na tadapot sian Jakobus 5:7, 8. (Jaha.)

⁵ Boasa ingkon rade hita paimahon Jahowa manggohi janjiNa? Dipatudos si Jakkobus do situasinta songon sahalak pangula. Nang pe dilehon sahalak pangula nasa gogona tingki marsuan, alai ndang boi diatur ibana cuaca manang partubu ni suansuanan i. Ingkon sabar do ibana paimahon ”parbue na arga, na sian tano i”. Songon i ma nang hita. Huhut paimahon janji ni Jahowa, godang do na so boi tarbahenta. (Mrk. 13:32, 33; Ul. 1:7) Songon pangula i, ingkon sabar do hita paimahon.

6. Aha do na boi taparsiajari sian panurirang Mika?

⁶ Marsitaonon do panurirang Mika dos songon hita. Mangolu di tingki pamarentaon ni Raja Ahas do ibana. Mansai roa do pangalaho ni si Ahas. Alani i, mansai godang ma hajahaton di luat i. Songon na dipatorang di Bibel, ”girgir do tangannasida mangulahon na roa”. (Jaha Mika 7:1-3.) Diboto si Mika do na so boi paubaonna situasi i. Aha ma na boi diulahon ibana? Ibana mandok, ”Alai ianggo ahu, Jahowa do hupaimaima jala tu Ibana do ahu mangkirim, ai paluaonNa jala tangihononNa do ahu.” (Mik. 7:7, Bibel siganup ari) Songon si Mika, ingkon sabar do hita ’maimaima’.

7. Songon dia do hita paimahon Jahowa manggohi janjiNa?

⁷ Molo songon haporseaon ni si Mika do haporseaonta, rade do hita paimahon Jahowa. Ndang songon halak  na di penjara, na paimahon laho diuhum. Na tarpaksa do ibana paimahon, jala ndang adong pangkirimonna. Alai molo hita, rade do hita paimahon Jahowa! Ala taboto, gohan ni Jahowa do janjiNa di tingki na pas, i ma mangalehon ngolu na saleleng ni lelengna tu hita! Alani i, gabe sabar ma hita jala martahan ”mardongan las ni roha”. (Kol. 1:11, 12) Huhut paimahon, unang ma marungutungut hita ala didok rohanta hurang hatop Jahowa manggohi janjiNa. Ndang las roha ni Jahowa molo songon i hita.​—Kol. 3:12.

8. Aha do na boi taparsiajari sian naposo ni Debata najolo?

⁸ Aha do na boi mangurupi hita asa rade paimahon? Tarimangi ma taringot angka naposo ni Debata najolo, na rade paimahon Jahowa. (Rom 15:4) Huhut tarimangi sitiruon sian nasida, taingot ma sadia leleng nasida paimahon, aha do na mambahen nasida rade paimahon, jala songon dia do Jahowa mangalehon pasupasu tu nasida.

9, 10. Sadia leleng do si Abraham dohot si Sarah paimahon Jahowa?

⁹ Rimangi ma taringot si Abraham dohot si Sarah. Ala dipatudu nasida ”haporseaon dohot lambas ni roha” gabe ”dapotsa na pinarbagabaga i”. Bibel paboahon dung ’dipalambas [si Abraham] rohana’ marjanji ma Jahowa laho mangalehon pasupasu tu ibana jala bahenonNa si Abraham gabe  ama ni sada bangso na bolon. (Heb. 6:12, 15) Boasa ingkon marlambas ni roha manang sabar si Abraham? Alana, ndang pintor digohi janji i. Tanggal 14 Nisan taon 1943 SM ma si Abraham, si Sarah dohot sude donganna sajabu manaripari Sunge Euprat jala masuk tu Tano na Dijanjihon. Ingkon dipaima si Abraham do saleleng 25 taon andorang so tubu dope anakna si Isak. Jala ingkon dipaima ibana do muse saleleng 60 taon andorang so tubu dope pahompuna, i ma si Esau dohot si Jakkob.​—Heb. 11:9.

¹⁰ Sadia bolak do bagianna di Tano na Dijanjihon i? Bibel paboahon ”ndang dope dilehon [Jahowa] anggo golat tu ibana disi, nanggo na santopap, jadi diparbagabaga do, lehononna tu ibana tano i, asa ibana nampunasa ro di pomparanna, andorang so adong dope anakna”. (Ul. 7:5) Dungkon ditaripari si Abraham Sunge Euprat, hirahira 430 taon nai ma asa gabe sada bangso pinomparna jala tading di Tano na Dijanjihon.​—2 Mus. 12:40-42; Gal. 3:17.

11. Boasa rade si Abraham paimahon, jala pasupasu aha do na laho idaonna ala rade paimahon?

¹¹ Ala pos rohana tu Jahowa na so olo mangose janji, rade ma si Abraham paimahon. Marhaporseaon do ibana tu Jahowa. (Jaha Heber 11:8-12.) Marlas ni roha do ibana paimahon sahat tu na mate. Nang pe ndang sude diida ibana janji ni Debata digohi. Alai rimangi ma songon dia las ni rohana annon tingki dipahehe ibana di paradeiso di tano on. Songgot ma rohana tingki dijaha ibana godang carito taringot ibana dohot keluargana di angka buku di Bibel. * (Ida surat na di toru.) Rimangi ma las ni rohana tingki mamboto, na ibana do dalan ni Jahowa laho manggohi janjiNa taringot tu Messias! Tontu dihilala ibana do godang pasupasu ala sabar paimahon janji ni Debata.

12, 13. Boasa ingkon sabar si Josep paimahon, jala parange aha do na adong di ibana?

¹² Suang songon i ma si Josep, nini ni si Abraham. Rade do ibana paimahon. Godang do hajahaton na diadopi ibana. Na parjolo, digadis angka hahana do ibana gabe hatoban tingki marumur 17 taon. Dung i, ditudu do ibana laho manegai tungganeboru ni tuanna gabe dihurung do ibana alani i. (1 Mus. 39:11-20; Ps. 105:17, 18) Hira na so dipasupasu do ibana di tingki i nang pe marsihohot tu Debata. Alai dungkon 13 taon, muba ma parngoluonna. Dipalua ma ibana sian hurungan, jala gabe parhuaso na paduahon ma ibana di Misir.​—1 Mus. 41:14, 37-43; Ul. 7:9, 10.

¹³ Gabe mandele do si Josep alani sude sitaononna i? Didok rohana do naung ditadingkon Jahowa ibana? Ndang. Sabar do ibana paimahon. Aha do na mangurupi ibana asa boi songon i? Haporseaonna tu Jahowa. Boi do diida ibana pangurupion ni Jahowa. Boi do taboto i sian hatana tu angka hahana, ”Unang hamu mabiar, ai  nda guru di Debata do nang ahu? Na jat do nian tutu tahi ni rohamuna dompak ahu, alai na denggan do hapatean ni dibahen Debata, patupahon songon na niidamuna sadari on, laho pangoluhon bangso na bolon.” (1 Mus. 50:19, 20) Diboto ibana ma sai na dapotna do pasupasu molo sabar paimahon Jahowa.

14, 15. (a) Songon dia do si Daud patuduhon hasabaron? (b) Aha do na mangurupi si Daud asa sabar paimahon?

¹⁴ Godang do hajahaton na masa tu Raja Daud. Tingki poso, nunga dipillit Jahowa ibana gabe raja ni Israel. Alai, ingkon dipaima ibana do saleleng 15 taon asa boi gabe raja ni Juda. (2 Sam. 2:3, 4) Saleleng pigapiga taon, ingkon martabuni do ibana sian Raja Saul na laho mamunu ibana. * (Ida surat na di toru.) Marpindapinda ma ibana sian sada luat tu luat na asing, martabuni di halongonan, di liang manang di goa. Ujungna, mate di parporangan ma si Saul. Alai nang pe songon i, ingkon dipaima si Daud dope lobi sian pitu taon asa gabe raja ibana di Israel.​—2 Sam. 5:4, 5. 

¹⁵ Boasa si Daud rade jala sabar paimahon? Dipaboa ibana do alusna tu hita tingki disurat ibana opat hali sungkunsungkun, ”Sadia leleng?” Ibana mandok, ”Alai anggo ahu, marhaposan tu asi ni roham do ahu, ingkon marolopolop rohangku mida pangurupim. Marende ma ahu tu Jahowa, ai denggan do uhumna tu ahu.” (Ps. 13:6) Pos do roha ni si Daud na holong do Jahowa tu ibana jala sai na urupan ni Debata do ibana. Diingot ibana do songon dia Jahowa mangurupi ibana di tingki naung salpu, jala dipaima ibana do Jahowa manalpuhon sitaononna. Diboto si Daud do na parohon pasupasu do molo sabar paimahon Jahowa.

16, 17. Songon dia do Debata Jahowa dohot Jesus Kristus sitiruon na dumenggan tingki sai rade paimahon?

¹⁶ Ndang disuru Jahowa hita mangulahon ulaon na so diulahon Ibana. Sitiruon na dumenggan do Ibana tingki patuduhon haradeon taringot tu na paimahon. (Jaha 2 Petrus 3:9.) Umpamana, marribu taon naung salpu di porlak Eden, didok Sibolis do na so tigor Jahowa. ’Sai maimaima do Jahowa’ tu sada tingki laho pabadiahon goarNa. Alani i, dapotan pasupasu ma angka halak na sabar paimahon Ibana.​—Jes. 30:18.

¹⁷ Jesus pe rade do paimahon. Tingki di tano on, marsihohot do ibana sahat tu na mate. Taon 33 M do dipelehon ibana arga ni tobusan i tu Jahowa, alai ingkon maimaima do ibana sahat tu taon 1914 asa boi gabe Raja.  (Ul. 2:33-35; Heb. 10:12, 13) Jala, ingkon dipaima Jesus do muse ujung ni Pamarentaon Saribu Taon. Dung pe i, diripashon ma sude angka musuna. (1 Kor. 15:25) Leleng do paimahon i. Alai dapotna ma pasupasu molo sabar ibana paimahon.

18, 19. Aha do na boi mangurupi hita asa sabar jala rade paimahon?

¹⁸ Tangkas ma, dipangido Jahowa do asa sabar jala rade hita paimahon. Aha do na boi mangurupi hita laho mangulahon i? Tapangido ma tondi parbadia ni Debata. Ingot ma, parbue ni tondi parbadia do lambas ni roha manang hasabaron. (Eps. 3:16; 6:18; 1 Tes. 5:17-19) Pangido ma pangurupion sian Jahowa asa boi martahan jala sabar paimahon!

¹⁹ Aha do na mangurupi si Abraham, si Josep dohot si Daud asa sabar paimahon Jahowa? I ma haporseaon dohot pos ni roha ni nasida tu Jahowa. Ndang holan dirinasida dohot lomo ni rohana na dipingkiri nasida. Tingki tarimangi songon dia Jahowa mangalehon pasupasu tu nasida, dipatogu ma rohanta asa sabar paimahon.

20. Aha do na ingkon taulahon?

²⁰ Nang pe marungkil hita alani sitaonon, marsitutu ma hita ’maimaima’. Sipata olo do tadok, ”Sadia leleng on ale [Jahowa]?” (Jes. 6:11) Alai marhite pangurupion ni tondi parbadia, boi ma tatiru panurirang Jeremia jala mandok, ”Jahowa do parjambaranku . . . dibahen i marhaposan tu ibana ma ahu.” Alani i, tongtong do dipaima ibana Jahowa.​—And. 3:21, 24.