1. Songon dia caranta asa rap saulaon dohot Debata?

TINGKI Jahowa manompa jolma, lomo do rohana asa rap saulaon nasida dohot Ibana. Jadi nang pe saonari hita ndang sempurna, alai molo tongtong marsihohot tu Debata, boi do hita rap saulaon dohot Ibana. Umpamana, gabe “dongan saulaon ni Debata” do hita tingki marbarita na uli jala mambahen sisean. (1 Kor. 3:5-9) Sada hasangapon do di hita ala dipillit Debata mangulahon ulaon on! Alai, ndang holan tingki marbarita na uli hita rap saulaon dohot Debata. Di parsiajaran on, taulas ma cara na asing asa rap saulaon dohot Debata. Na parjolo, i ma mangurupi keluarga jala mangurupi angka dongan di huria. Dung i ringgas manamue, mangurupi di angka ulaon ni organisasi di liat portibi on jala laho tu inganan na mangkaporluhon parbarita na uli.​—Kol. 3:23.

2. Boasa ndang boi tabandingkon na taulahon tu Jahowa dohot na diulahon halak?

² Di siulason on, ingot ma imbar do ganup halak. Umpamana, ndang sai sarupa umur, kesehatan, situasi, dohot bakat ni angka halak. Alani i, unang ma tabandingkon na boi taulahon dohot na boi diulahon angka dongan  tu Jahowa. Apostel Paulus mandok, “Ganup ma halak mamparrohahon ulaonna be. Asa boi ibana marlas ni roha marhite na niulahonna i, ndang ala paimbar-imbarhon tu ulaon ni halak.”​—Gal. 6:4.

3. Boasa halak na manarihon keluargana boi didok rap saulaon dohot Debata?

³ Dipangido Jahowa do asa tasarihon keluarganta. Ra, ingkon karejo do hamu laho paradehon na dihaporluhon keluargamuna. Manang adong do angka ina na ingkon di jabu laho manjaga ianakhonna. Manang hita ingkon mangurus natua-tuanta ala ndang boi be nasida mangurus dirina sandiri. Jadi ingkon diulahon do on. Didok Bibel, “Manang ise na so manarihon na di ibana, tarlumobi anggota keluargana, ndang halak na porsea be i jala nunga umjahat ibana sian angka na so porsea.” (1 Tim. 5:8) Ra, ala adong tanggung jawab keluarga ndang boi godang na diulahon hamu tu Jahowa songon na dipangido rohamuna. Alai, unang ma metmet rohamuna! Jadi las do roha ni Jahowa molo taparade angka na porlu di keluarganta.​—1 Kor. 10:31.

4. Songon dia do angka natua-tua boi rap saulaon dohot Jahowa, jala aha do hasilna?

⁴ Angka natua-tua boi do rap saulaon dohot Jahowa, marhite mangurupi ianakhonna asa mangalehon godang tingki tu Jahowa. Godang do angka natua-tua naung mangulahon i. Ujungna, ianakhon ni nasida dohot tu dinas sepenuh waktu, nang pe ingkon dao sian keluarga. Adong do na gabe utusan injil manang merintis di inganan na mangkaporluhon parbarita. Manang adong na karejo di Betel. Tontu, ala dao do angka natua-tua sian ianakhonna gabe ndang boi be nasida jotjot pajumpang. Alai, dipatogu nasida do ianakhonna asa tongtong marhobas tu Jahowa manang didia pe nasida. Boasa angka natua-tua olo mangulahon on? Ala las do roha ni angka natua-tua molo diharingkothon ianakhonna marhobas tu Jahowa. (3 Joh. 4) Jadi angka natua-tua i marlas ni roha songon si Hanna, na mangalehon anakna si Samuel tu Jahowa. Sada hasangapon do dihilala natua-tua boi rap saulaon dohot Jahowa marhite cara on.​—1 Sam. 1:28.

5. Songon dia do cara mangurupi angka dongan di huria? (Ida gombar di mula ni parsiajaran.)

⁵ Molo ndang adong tanggung jawab keluarga na so boi ditinggalhon hamu, boi do hamu mangurupi angka donganta na matua, na marsahit, manang na mangkaporluhon pangurupion? Manang boi do hamu mangurupi angka dongan na mangurus keluargana? Parrohahon jala urupi ma angka dongan na mangkaporluhon pangurupion di huriamuna. Umpamana, ra adong do donganta borua na ingkon mangurus natua-tuana. Jadi olo do hamu mangurupi ibana mangurus natua-tuana asa boi donganta i mangulahon na asing? Manang rade do hamu mangurupi sasahalak asa rap laho tu parpunguan, laho balanja, manang laho mangida dongan na marsahit. Molo taulahon on, rap  saulaon ma hita dohot Jahowa laho mangalusi tangiang ni naposona.​—Jaha 1 Korint 10:24.

6. Songon dia do hita manamue?

⁶ Lomo do roha ni naposo ni Debata manamue. Di angka buku Junani, hata “manamue” lapatanna burju manamue halak na so ditanda. (Heb. 13:2) Sian Bibel adong do angka contoh na mangurupi hita asa ringgas manamue. (1 Mus. 18:1-5) Ingkon olo do hita mangurupi na asing, nang pe nasida ndang ‘dongan sahaporseaonta’.​—Gal. 6:10.

7. Aha do labana molo rade hita manamue donganta na dohot tu dinas sepenuh waktu?

⁷ Boi do hita rap saulaon dohot Jahowa tingki paradehon inganan laho manginap tu angka dongan na dohot tu dinas sepenuh waktu. (Jaha 3 Johannes 5, 8.) Adong do labana molo taulahon i. Jala hita pe boi “masipatoguan”. (Rom 1:11, 12) Parrohahon ma pengalaman ni si Olaf. Tingki poso dope ibana, ro ma sahalak pengawas keliling tu huriana. Alai ndang adong angka dongan na boi paradehon inganan laho manginap. Jadi, disungkun si Olaf ma tu natua-tuana na so Sitindangi, atik na boi do pengawas keliling i manginap di jabu ni nasida. Diloas natua-tuana do pengawas keliling i manginap, alai gabe modom di kursi ma si Olaf. Nang pe songon i, ndang gabe jut rohana. Gariada, gabe las do rohana saleleng saminggu i. Alana tingki sarapan, jotjot do dihatai nasida carita na denggan. Ala dipatogu pengawas keliling i si Olaf, gabe taronjar ma rohana dohot tu dinas sepenuh waktu. Saonari nunga 40 taon si Olaf gabe utusan injil di piga-piga negara.

8. Boasa hita ingkon burju nang pe adong halak na so mangargai? Paboa ma sada pengalaman.

⁸ Godang do cara laho manarihon halak na asing, nang pe mulana ndang diargai hita. Songon pengalaman ni donganta di Spanyol. Adong sada parsiajar Bibelna sian Ekuador na margoar si Yesica. Hea do di sada tingki sai tumatangis si Yesica saleleng marsiajar. Jadi, disungkun donganta i ma boasa tangis ibana. Didok si Yesica ma, andorang so tu Spanyol, pogos hian do ibana. Hea do holan minum aek boruna ala ndang adong sipanganon. Jadi, huhut papodomhon boruna martangiang ma si Yesica mangido pangurupion. Hape ndang sadia leleng ro ma dua Sitindangi tu jabuna jala mangalehon sijahaon tu ibana. Alai, muruk do si Yesica, jala diribakhon ibana do sijahaon i. Didok ibana ma, “Ndang boi on diallang borungku!” Diapuli donganta i do si Yesica, alai ndang ditangihon. Ndang sadia leleng, dipeakkon donganta i ma sakaranjang sipanganon di jolo ni pintu ni si Yesica. Jadi, alani i do si Yesica tangis, ala diingot ibana naung dialusi Jahowa do tangiangna. Didok rohana  ma ingkon marhobas do ibana tu Jahowa. Jadi, parohon na denggan do haburjuon ni donganta i.​—Pjm. 11:1, 6.

9, 10. (a) Angka cara aha do na dibahen halak Israel laho mangurupi di piga-piga ulaon? (b) Saonari songon dia do cara ni angka donganta baoa rade mangurupi di huria?

⁹ Di tingki najolo marragam do cara ni halak Israel laho mangurupi di piga-piga ulaon. (2 Mus. 36:2; 1 Kron. 29:5; Neh. 11:2) Saonari pe, godang do cara na boi dibahen hamu laho mangalehon tingki, arta, dohot keterampilan laho mangurupi angka dongan. Molo taulahon on, las ma rohanta jala dipasu-pasu Jahowa ma hamu.

¹⁰ Di Bibel, dijujui do angka baoa di huria asa rap saulaon dohot Jahowa marhite gabe parhobas manang sintua. (1 Tim. 3:1, 8, 9; 1 Ptr. 5:2, 3) Alana angka parhobas dohot sintua rade do mangurupi angka dongan di huria. (Ul. 6:1-4) Jadi, hea do sahalak sintua mangido hamu asa gabe tata tertib manang mangurus lektur, daerah dinas, inganan parpunguan, dohot na asing? Didok angka donganta baoa, las hian do roha ni nasida tingki mangulahon on.

11. Aha do laba na didapot sahalak donganta borua ala dohot tu ulaon konstruksi?

¹¹ Angka halak na gabe sukarelawan tu ulaon konstruksi jotjot mandapot ale-ale na baru. Songon donganta na margoar si Margie nunga dohot tu ulaon pembangunan Bale Harajaon saleleng 18 taon. Diparrohahon ibana do angka na poso na dohot di ulaon i jala dilatik do nasida. Didok ibana, on ma cara na dumenggan laho masipatoguan  dohot angka dongan. (Rom 1:12) Sada tingki, hea ma ibana mangadopi hasusaan. Jala angka donganna na dohot tu ulaon i do na patoguhon ibana. Hea do hamu gabe sukarelawan di ulaon konstruksi? Nang pe ndang adong keterampilanmuna, boi do hamu dohot tu ulaon i.

12. Songon dia do hamu mangurupi angka dongan na hona bencana?

¹² Mangurupi angka dongan na hona bencana pe sada cara asa rap saulaon dohot Jahowa. Umpamana, boi do talehon sumbangan. (Joh. 13:34, 35; Ul. 11:27-30) Asing ni i, dohot ma hita paiashon manang paturehon angka bangunan na sega. Songon donganta sian Polandia na margoar si Gabriela, las do rohana ala diurupi angka dongan sian huria na asing laho paturehon jabuna na sega ala hona banjir. Tingki diingot ibana pengalamanna i gabe ndang holsoan be ibana nang pe mago godang artana. Gariada pangurupion sian angka dongan i do na sai diingot ibana. Didok ibana, “Alani pengalaman on gabe pos ma rohangku, sada hasangapon na sumurung do gabe bagian sian naposo ni Jahowa di liat portibi on, jala parohon las ni roha do i.” Godang do donganta na mandapot pangurupion sisongon i tongtong marlas ni roha. Jala angka dongan na mangalehon pangurupion i pe tong mangkilala las ni roha.​—Jaha Ulaon ni Apostel 20:35; 2 Korint 9:6, 7.

13. Boasa boi lam holong rohanta tu Jahowa molo rade hita mangurupi? Paboa ma sada pengalaman.

¹³ Donganta si Stephanie dohot angka dongan na asing rap saulaon dohot Jahowa, marhite mangurupi angka donganta na mangungsi tu Amerika. Angka donganta i mangungsi ala masa do porang di negara ni nasida. Diurupi angka donganta do nasida mangalului jabu dohot angka barang na dihaporluhon pengungsi i. Didok si Stephanie, “Gabe dipatogu do rohanami ala las ni roha dohot pangargaion ni nasida tu pangurupion na dilehon angka dongan di liat portibi on. Dirimpu angka pengungsi i do nasida na diurupi, hape hami do sasintongna na dipatogu nasida. Boi do dihilala hami holong, parsadaan, haporseaon, dohot pos ni roha tu Jahowa. Gabe lam holong do rohanami tu Jahowa jala lam tamba do pangargaionnami tu sude na dijalo hami sian organisasi.”

14, 15. (a) Songon dia si Jesaya rap saulaon dohot Debata? (b) Songon dia do hita boi maniru si Jesaya?

¹⁴ Aha do muse na boi diulahon hamu asa rap saulaon dohot Jahowa? Olo do hamu pinda tu inganan na mangkaporluhon parbarita? Tontu ndang ingkon pinda hita tu luat na dao asa boi patuduhon haburjuon. Alai, adong do piga-piga donganta na pinda tu inganan na mangkaporluhon parbarita. Nasida maniru panurirang Jesaya. Tingki disungkun Jahowa si Jesaya, “Ise do suruhononku, jala ise pardalannami?” Dialusi si Jesaya do, “Dison do ahu, suru ma ahu!” (Jes. 6:8) Jadi, rade jala boi do hamu mangurupi organisasi ni Jahowa? Songon dia do caramuna mangurupi?

¹⁵ Taringot ulaon marbarita didok Jesus do, “Bidang do nian sisabion, alai otik do angka panabi. Alani i, pangido ma tu Nampuna sisabion i asa disuru angka panabi tu sisabionna i.” (Mat. 9:37, 38) Jadi, olo do hamu merintis di inganan na mangkaporluhon parbarita? Manang, olo do hamu mangurupi sasahalak asa pinda tu inganan na mangkaporluhon parbarita? Angka dongan na mangulahon on, mandok on ma cara patuduhon holong tu Debata dohot tu angka jolma. Jadi, boi do dilului hamu cara na asing asa lam denggan di ulaon ni Debata? Molo diulahon hamu do on, lam marlas ni roha ma hamu.

16, 17. Aha do muse na boi taulahon asa boi lam denggan di ulaon ni Jahowa?

¹⁶ Olo do hamu karejo di Betel manang mangurupi di ulaon konstruksi saleleng piga-piga bulan manang piga-piga ari di bagasan saminggu? Organisasi ni Jahowa tongtong do mangkaporluhon halak na rade mangurupi di piga-piga ulaon, nang pe ndang adong pengalaman ni nasida di ulaon i. Diargai Jahowa do na dibahen ni angka donganta asa boi rade mangurupi di ulaon i.​—Ps. 110:3.

¹⁷ Olo do hamu mandapot pelatihan asa lam denggan mangulahon ulaon ni Jahowa? Ra, boi do hamu dohot Singkola tu Parbarita Harajaon. Dilatik do angka donganta na dohot tu singkola on, asa lam denggan di ulaon dinas sepenuh waktu. Na dohot tu singkola on, ingkon rade do ditugashon manang didia pe. Jadi, olo do hamu parsidohot tu singkola on?​—1 Kor. 9:23.

18. Aha do labana molo tongtong hita rap saulaon dohot Jahowa?

¹⁸ Ala hita naposo ni Jahowa, burju do hita mangalehon, denggan marpangalaho, jala marsihaholongan. Tasarihon do angka dongan ganup ari. Alana parohon las ni roha dohot hadameon do on tu hita. (Gal. 5:22, 23) Dapotta do las ni roha, molo sai tatiru do haburjuon ni Jahowa jala gabe dongan saulaonna, manang songon dia pe situasinta!​—Poda 3:9, 10.