1. Aha do na patuduhon molo Jahowa na burju mangalehon?

HOLAN sahalak ni Jahowa hinan do tingki so adong dope angka tompaan. Jadi, ala burjuna ditompa Ibana ma angka na denggan di banua ginjang dohot na di tano on. “Debata na marlas ni roha” do Jahowa, lomo do rohana mangalehon angka na denggan. (1 Tim. 1:11; Jak. 1:17) Ala lomo rohana asa marlas ni roha hita, dijujui do hita asa burju mangalehon.​—Rom 1:20.

2, 3. (a) Molo burju hita boasa i boi parohon las ni roha? (b) Aha do laho taulas di parsiajaran on?

² Ditompa Debata do jolma suman tu Ibana. (1 Mus. 1:27) Lapatanna, dibahen Jahowa do jolma asa boi marparange songon Ibana. Alani i, tatiru ma Ibana asa marlas ni roha jala dapot pasu-pasu. Marsitutu ma hita gabe halak na burju mangalehon jala manarihon na asing. (Plp. 2:3, 4; Jak. 1:5) Boasa ingkon taulahon i? Ala songon i do hita ditompa Jahowa. Nang pe hita ndang sempurna, alai boi do hita burju songon Jahowa.

 ³ Saonari na laho taulas, i ma na didok Bibel taringot burju mangalehon. Jala taulas ma muse boasa las roha ni Jahowa molo burju hita mangalehon. Taparsiajari ma muse songon dia do burju mangalehon boi mangurupi hita di ulaon marbarita. Jala boasa gabe las rohanta molo burju hita mangalehon. Dung i, taulas ma boasa hita ingkon tongtong mangulahon i.

4, 5. Sitiruon aha do na dibahen Jahowa dohot Jesus taringot burju mangalehon?

⁴ Las do roha ni Jahowa molo tatiru parangena, i ma burju mangalehon. (Eps. 5:1) Umpamana, ditompa Jahowa do hita mansai denggan, jala uli do dibahen Ibana tano on dohot nasa isina asa boi hita marlas ni roha. (Ps. 104:24; 139:13-16) Jadi, na pasangaphon Jahowa do molo marsitutu hita palashon roha ni na asing.

⁵ Asing ni i, tatiru ma Jesus alana ibana do sitiruon na dumenggan taringot burju mangalehon. Didok ibana, “Anak ni jolma i, ndang na sihobasan ibana umbahen na ro, alai na laho marhobas do jala mangalehon ngoluna bahen tobus ni torop jolma.” (Mat. 20:28) Jala, dijujui apostel Paulus do halak Kristen, didok ibana “sai songon Kristus Jesus ma pingkiran dohot pangalahomuna . . . ditadingkon do sude na di ibana, gabe songon hatoban ibana.” (Plp. 2:5, 7) Jadi tasungkun ma dirinta, ‘Marsitutu do ahu maniru Jesus?’​—Jaha 1 Petrus 2:21.

6. Aha do na diajarhon Jesus tu hita sian carita taringot sahalak Samaria? (Ida gombar di mula ni parsiajaran.)

⁶ Las do roha ni Jahowa molo tatiru Ibana dohot Jesus. Caranta laho maniru nasida, i ma manarihon na asing. Jala, marsitutu ma laho mangurupi nasida. Laho mangajarhon ringkot ni mangurupi na asing, dipaboa Jesus do sada carita taringot sahalak Samaria na burju. (Jaha Lukas 10:29-37.) Didok ibana ingkon taurupi do angka halak, ndang soal manang ise jala sian dia haroroanna. Dipaboa Jesus do carita on ala disungkun sahalak Jahudi ibana, “Ise do sasintongna donganku jolma?” Sian alus ni Jesus, taboto ma asa boi pasonangkon Jahowa, ingkon taurupi do na asing songon sitiruon sian halak Samaria i.

7. Molo pos do rohanta tu poda ni Jahowa, aha do na taulahon jala boasa?

⁷ Taparsiajari ma aha na masa tingki di porlak Eden. Tingki i, didok Sibolis do tu si Adam dohot si Hawa, boi do nasida marlas ni roha molo ndang unduk tu Debata jala holan mamingkirhon diri nasida sandiri. Hape, gabe lomo do roha ni si Hawa asa dos songon Debata. Jala, si Adam pe lomo do rohana laho pasonangkon roha ni si Hawa sian pasonangkon Debata. (1 Mus. 3:4-6) Ujungna gabe marjea do nasida. Sian on, tangkas ma taboto ndang adong halak na boi marlas ni roha molo mangkaringkothon diri sandiri. Jadi, molo burju hita jala ndang mangkaringkothon diri, pos do rohanta poda ni Jahowa do na dumenggan.

8. Boasa ingkon dipingkirhon si Adam dohot si Hawa taringot angka pinomparna haduan?

⁸ Nang pe tingki i holan si Adam dohot si Hawa dope na adong di porlak Eden, alai ingkon dipingkirhon nasida do songon dia pinomparna haduan. Alana, didok Jahowa tu nasida asa marpinompari jala mambahen sude tano on gabe paradeiso. (1 Mus. 1:28) Jadi, ingkon marlas ni roha do dibahen nasida angka pinomparna. Jala, on do sasintongna na dihalomohon Jahowa, asa boi si Adam dohot angka pinomparna marlas ni roha. Boi ma nasida rap saulaon mambahen portibi on gabe paradeiso. Jadi, ulaon na mansai balga do on!

9. Boasa mambahen tano on gabe paradeiso boi parohon las ni roha tu jolma?

⁹ Aut sugari si Adam dohot si Hawa ndang mardosa, boi ma sude tano on digohi angka halak na sempurna. Jala, boi ma nasida rap saulaon dohot Jahowa mambahen sude portibi on gabe paradeiso. Jala, masuk ma nasida tu ari paradianan ni Debata. (Heb. 4:11) Tontu lomo do roha ni nasida mangulahon ulaon i jala marlas ni roha! Aut sugari si Adam dohot si Hawa ndang mangkaringkothon diri, gok do pasu-pasu na dapot ni nasida dohot angka pinomparna.

10, 11. Aha do na boi mangurupi hita laho marbarita na uli jala mambahen sisean?

 ¹⁰ Saonari, dilehon Jahowa do tu hita ulaon na mansai ringkot, i ma marbarita jala mambahen halak gabe sisean ni Jesus. Molo taulahon i, na marasi ni roha do hita tu halak. Jadi, asa boi tongtong taulahon ulaon i, ingkon holong do hita tu Jahowa dohot tu angka halak.

¹¹ Didok si Paulus, “dongan saulaon ni Debata” do ibana dohot halak Kristen di abad na parjolo. Alana, marbarita do nasida jala mangajari angka halak taringot hata ni Debata. (1 Kor. 3:6, 9) Jadi, hita pe saonari gabe “dongan saulaon ni Debata”. Alana, las do rohanta mangalehon tingki, gogo, dohot artanta asa boi mangulahon ulaon marbarita na uli. Jadi, on sada hasangapon do di hita!

12, 13. Aha do laba na dihilala hamu ala mangurupi halak marsiajar Bibel?

¹² Parohon las ni roha do molo talehon gogonta dohot tingkinta ala marbarita na uli jala mangurupi halak marsiajar Bibel. Songon i do na dihilala godangan donganta na mangurupi halak marsiajar Bibel. Hita pe, las do rohanta tingki mangida parsiajar Bibelta lam porsea tu na diparsiajari ibana jala mambahen hamubaon di ngoluna. Jala olo do ibana paboahon naung diparsiajari i tu na asing. Suang songon i ma las ni roha ni Jesus. Disuru ibana do 70 halak marbarita, jala mulak di bagasan las ni roha do nasida ala mandapot pengalaman na mansai denggan.​—Luk. 10:17-21.

¹³ Sude donganta di liat portibi on, marlas ni roha tingki mangida angka parsiajar Bibel mambahen hamubaon. Songon pengalaman ni donganta si Anna. * Pinda do ibana tu inganan na mangkaporluhon parbarita di Eropa Timur. Didok ibana, “Godang do dison na olo marsiajar Bibel. Las hian do rohangku. On ma ulaon na parohon las ni rohangku. Molo dung sahat di jabu hupingkirhon do parsoalan na diadopi parsiajar Bibelhu. Jadi, ndang holan diringku be na hupingkiri. Hulului do cara laho mangurupi jala patoguhon roha ni nasida. Saonari lam pos do rohangku tu hata na mandok, ‘Umlas do roha ni halak na mangalehon sian na manjalo.’”​—Ul. 20:35.

14. Songon dia do asa marlas ni roha hamu marbarita nang pe ndang olo halak manangihon?

¹⁴ Nang pe godang halak na so olo manangihon barita na tapasahat, boi do hita marlas ni roha marbarita. Ala marsitutu hita mangalului halak na so hea dope mambege barita na uli. Jadi, dipangido Jahowa do asa taulahon songon na hea dipangido Ibana asa diulahon si Hesekiel. Didok Jahowa, “Ingkon dohononmu angka hatangku tu nasida, manang tangihononna manang  ndang.” (Hes. 2:7; Jes. 43:10) Jadi ditangihon manang ndang, diargai Jahowa do sude na tabahen. (Jaha Heber 6:10.) Didok donganta do taringot ulaonna marbarita, i ma “hita do na manuan dohot maniram, jala tapangido ma tu Jahowa laho patubuhon i”.​—1 Kor. 3:6.

15. Sude do halak marlomo ni roha molo burju hita? Jala boasa hita ingkon tongtong burju?

¹⁵ Jesus pe lomo do rohana molo marlas ni roha hita. Molo burju hita, gabe burju ma godang halak tu hita. I do umbahen didok Jesus, “Sai lehon ma asa dilehon tu hamu. Suhathononna do tu hajutmuna panuhatan na denggan, na nionjat, na hinutur, jala na pinasuksuk. Ai panuhatan na pinangkemuna laho manuhat, i do suhathononna tu hamu.” (Luk. 6:38) Alai molo burju pe hita, ra ndang sude halak gabe marlomo ni roha tu hita. Nang pe songon i, tongtong ma hita burju mangalehon. Alana, godang do labana molo taulahon i.

16. Tu ise do hita ingkon burju jala boasa?

¹⁶ Halak na sian ias ni rohana mangalehon, ndang mangkirim ibana asa dibalos na binahenna i. Didok Jesus do, “Molo naeng mambahen pesta ho, gokkon ma na pogos, na pangpang, na lumpu dohot na mapitung. Marlas ni roha ma hamu, ai ndang adong lehonon ni nasida laho mambalos i tu hamu.” (Luk. 14:13, 14) Didok Bibel do muse, “Halak na lambok marpanaili, dapotan pasupasu.” Didok ayat na asing do muse, “Martua ma halak na mangalehon rohana tu na pogos.”  (Poda 22:9; Ps. 41:2, Bibel siganup ari) Jadi ala lomo do rohanta mangurupi halak umbahen na burju hita tu nasida.

17. Songon dia do cara na asing asa marlas ni roha?

¹⁷ Tingki dienet si Paulus hata ni Jesus na mandok, “Umlas do roha ni halak na mangalehon sian na manjalo,” ndang na lapatanna holan taringot mangalehon hepeng. Boi do tapatogu angka halak, talehon poda sian Bibel, jala taurupi na asing tingki susa. (Ul. 20:31-35) Jadi, sian na didok si Paulus dohot na diulahon ibana, taboto ma mansai ringkot do mangalehon tingkinta, gogonta, holongta, jala tasarihon na asing.

18. Songon dia do na didok angka panulingkit taringot burju mangalehon?

¹⁸ Angka panulingkit na mamparsiajari taringot parange ni jolma mandok, parohon las ni roha do molo burju mangalehon. Disurat do muse di sada sijahaon, godang halak mandok lam marlas ni roha do nasida dung mangurupi na asing. Didok angka panulingkit i do muse molo olo hita mangurupi na asing gabe marlapatan do ngolunta. Piga-piga halak na pistar pe mandok, sasahalak na rade mangurupi na asing gabe lam sehat do jala marlas ni roha. Tontu, nunga taboto on, ala nunga dipaboa Jahowa tu hita, sai las do roha ni halak na mangalehon.​—2 Tim. 3:16, 17.

19, 20. Boasa lomo rohamuna mangalehon?

¹⁹ Ra, maol do asa tongtong burju ala godang dope halak di humaliangta na holan mangkaringkothon diri. Alai, tongtong ma taingot dua parenta ni Jesus na rumingkot, i ma mangkaholongi Jahowa sian nasa roha, gogo, pingkiran, dohot ngolunta. Jala mangkaholongi angka dongan songon mangkaholongi dirinta sandiri. (Mrk. 12:28-31) Sian siulason on nunga taboto Jahowa dohot Jesus gabe sitiruon taringot burju mangalehon. Diboto nasida do molo taihuthon sitiruon i, boi do hita marlas ni roha. Jala ala holong do rohanta tu Jahowa umbahen tatiru Ibana. Jadi na pasangaphon Jahowa do molo burju hita mangalehon tu Ibana dohot tu sude halak. Jala hita pe dohot na asing boi mandapot laba ala mangulahon i.

²⁰ Tontu nunga dibahen hamu na denggan laho mangurupi halak, tarlumobi tu angka donganmuna. (Gal. 6:10) Molo tongtong do hamu mangulahon i, gabe las do roha ni halak jala dihaholongi do hamu. Jala hamu pe marlas ni roha. I do alana didok di Bibel, ‘Lam lobian do manang ise na mardenggan basa.’ (Poda 11:25) Jadi, di ganup ulaonta godang do cara laho mangalehon. Jala, taulas ma angka cara i di parsiajaran na mangihut.