Boasa ndang boi pamasukkon angka publikasi ni Sitindangi Ni Jahowa tu situs na asing manang tu media sosial?

Adong piga-piga halak na marpingkir ala gratis do talehon angka publikasinta, boi do i dipamasuk tu situs na asing manang tu media sosial. Hape gabe bahaya do on, jala ndang mangihuthon Aturan Laho Mamangke * di situsta. Tangkas do didok di aturan i, ndang adong na boi “pamasukkon gombar, publikasi elektronik, merek dagang, musik, poto, video, manang artikel sian situs web on tu Internet (situs web na asing, situs file-sharing, manang jejaring sosial).” Sadia ringkot do aturan i?

Adong do Hak cipta ni sude hatorangan na di situsta. Alani i adong do uhum na mangalinggomi situs i. Mansai ringkot do on dibahen asa unang lomo-lomo ni halak tingki mamangke situs on. Adong do halak na murtad dohot halak na asing na laho manggugai ulaonta. Dipamasuk nasida do publikasinta di situs ni nasida, laho mambahen Sitindangi dohot na asing gabe mangida situs i. Jala di situs i dibahen nasida do hatorangan na boi mambahen ganggu roha ni halak. (Ps. 26:4; Poda 22:5) Adong do na mamangke angka hatorangan sian situsta manang logo jw.org di iklan, di aplikasi elektronik, manang barang dagangan ni nasida. Jadi ala adong do uhum na mangalinggomi sude hatorangan na adong di situsta dohot logo jw.org, boi do talapor nasida tu pengadilan asa unang dibahen nasida muse songon i. (Poda 27:12) Alai ndang diurupi pengadilan molo hita sandiri do na paloashon halak manang donganta pamasukkon publikasinta tu situs na asing, manang mambahen logo jw.org tu barang dagangan ni nasida.

Bahaya do molo ndang sian jw.org ta-download angka publikasinta. Holan marhite “naposo haposan jala na marbisuk” do dilehon Jahowa hatorangan na boi patoguhon parale-aleonta tu Ibana. (Mat. 24:45) Jala marhite situs resmi www.pr418.com, tv.pr418.com, dohot wol.pr418.com do diparade “naposo” i angka hatorangan on. Jala holan tolu do dibahen aplikasi resmi tu perangkat elektronik, i ma aplikasi JW Language^®, JW Library^®, dohot JW Library Sign Language^®. Ndang adong disi iklan manang hatorangan na sian pamingkirion ni halak di portibi on. Bahaya do molo ta-download publikasinta sian situs manang aplikasi na asing. Ra nunga diganti-ganti nasida hatorangan na adong disi.​—Ps. 18:27; 19:9.

Molo tapamasuk manang aha pe na adong di situsta, tu situs na boi dikomentari halak, boi do gabe angka na murtad dohot na asing paroa-roahon organisasi ni Jahowa. Adong do angka donganta na gabe marsoal dohot nasida, jala gabe ndang parohon sangap tu Jahowa. Ndang patut pangkataion sisongon i dibahen di internet laho pasingothon sasahalak, manang laho mangurupi halak mangantusi hasintongan. (1 Tim. 6:3-5; 2 Tim. 2:23-25) Adong do halak na mambahen situs dohot akun media sosial, asa dirimpu halak ma i sian organisasinta manang sian angka Punguan na Mangaradoti. Hape gabus do i. Alana ndang adong nanggo sada pe sian Punguan na Mangaradoti na mambahen Situs pribadi manang akun di media sosial.

Molo tajujui halak asa mambungka situs jw.org, na “marbarita na uli” do hita. (Mat. 24:14) Lam denggan do dibahen angka situs dohot aplikasinta. Tontu lomo do rohanta asa godang na mandapot laba sian i. Alai boi do talehon publikasinta marhite e-mail manang mangalehon link situsta tu halak. Molo taulahon on, taurupi do halak mandapot hatorangan na sintong na dilehon Jahowa marhite “naposo haposan jala na marbisuk”.