MARRIBU donganta baoa di liat portibi on, nunga dipillit gabe sintua dohot parhobas di taon naung salpu. Molo hamu do sada sian nasida, tontu las do rohamuna mangulahon ulaon ni Jahowa, jala mangurupi angka dongan marhite cara on.

Somalna, taroktokon do hamu tingki manjalo tugas on. Songon si Jason sahalak sintua na poso mandok, “Tingki mandapot tugas, ninna rohangku ndang tolap ahu mangulahon tugas on.” Songon i do na dihilala si Musa dohot si Jeremia tingki dilehon Jahowa tugas tu nasida. (2 Mus. 4:10; Jer. 1:6) Molo songon i do na dihilala hamu, aha do na mambahen pos rohamuna jala lam denggan di ulaonmuna? Parsiajari hamu ma sitiruon sian si Timoteus.​—Ul. 16:1-3.

Marumur 20 taon do ra si Timoteus tingki ditogihon mandongani si Paulus naung gabe pengawas keliling. Ala poso dope ibana tingki i, dirimpu ibana do ndang tolap ibana laho mangajari jala mamodai angka dongan. (1 Tim. 4:11, 12; 2 Tim. 1:1, 2, 7) Alai, tongtong do ibana lam denggan di ulaonna. Jala sampulu taon dungkon i didok si Paulus ma tu halak Pilippi, “Molo lomo roha ni Tuan Jesus, hatop ma nian sahat si Timoteus mandapothon hamu.” Boasa songon i didok si Paulus? Didok ibana, “Ai ndang adong donganku na songon ibana burjuna.”​—Plp. 2:19, 20.

Adong onom sitiruon na denggan sian si Timoteus tu angka sintua.

1. Sian ias ni rohana do ibana manarihon angka halak. Didok si Paulus do tu angka dongan di Pilippi molo si Timoteus manarihon nasida “sian ias ni roha”. (Plp. 2:20) Lomo do roha ni si Timoteus asa tongtong angka dongan solhot tu Jahowa. Olo do ibana mangalehon gogo dohot tingkina laho mangurupi nasida.

Donganta na margoar si William naung 20 taon gabe sintua, jotjot do mandok tu sintua na baru, “Haholongi ma angka dongan. Ingkon manarihon na dihaporluhon nasida do na rumingkot, sian apala manarihon angka aturan na adong.” Jadi unang ma songon supir na holan mamingkirhon songon dia asa boi hatop sahat di terminal. Alai ingkon sabar do supir i paimahon halak masuk tu bagasan motor.

2. Mangulahon ulaon ni Jahowa do na rumingkot di ibana. Didok si Paulus imbar do si Timoteus sian halak na ‘holan mamparrohahon na ringkot di dirina, ndang na ringkot tu Jesus Kristus’. (Plp. 2:21) Diparrohahon si Paulus godang do angka dongan na holan mangkaringkothon ngolu ni nasida, sian mangulahon ulaon ni Jahowa. Alai ndang songon i si Timoteus. Pintor ringgas do ibana mangulahon ulaon ni Debata. Jala ditiru ibana do si Jesaya na mandok, “Dison do ahu, suru ma ahu!”​—Jes. 6:8.

Songon dia do boi manarihon na ringkot di hamu huhut manarihon na ringkot di huria? Na parjolo ingot ma poda ni si Paulus na mandok, asa tapastihon “dia na rumingkot”. (Plp. 1:10) Bahen ma ulaon ni Jahowa gabe na rumingkot. Na paduahon, unang ma suda tingki dohot gogomuna tu ulaon na so ringkot. Songon na didok si Paulus tu si Timoteus, “Pasiding ma dirim sian hisap-hisap ni angka na poso. Alai marsitutu ma ho mangulahon na sintong, patuduhon haporseaon, holong, dame.”​—2 Tim. 2:22.

3. Ringgas do ibana mangulahon ulaon ni Jahowa. Didok si Paulus do, “Songon anak dohot ama, gabe hatoban do ibana rap dohot ahu laho mambahen asa lam  denggan ulaon marbarita na uli.” (Plp. 2:22) Ndang malas si Timoteus. Ringgas do ibana karejo raphon si Paulus. Jala i do na mambahen nasida gabe lam solhot.

Saonari, godang do ulaon na laho diulahon di organisasi ni Jahowa. Ulaon on boi do palashon rohamuna, jala mambahen hamu lam solhot tu angka dongan. Jadi tongtong ma hamu “mangulahon godang ulaon ni Tuhan i”.​—1 Kor. 15:58.

4. Diulahon do na diparsiajari ibana. Didok si Paulus tu si Timoteus, “Alai anggo ho, diihuthon ho do sude na huajarhon i, pangalahongku, na tinuju ni ngolungku, haporseaonku, hasabaronku, holongku, dohot togu ni rohangku.” (2 Tim. 3:10) Ala diulahon si Timoteus do na pinarsiajaranna, gabe dilehon ma piga-piga tugas tu ibana.​—1 Kor. 4:17.

Sahalak sintua naung marpengalaman boi do gabe sitiruonmuna. Parrohahon ma pengalaman ni si Tom naung leleng gabe sintua. Didok ibana, hea do sahalak sintua na marpengalaman mangurupi jala mangalatik ibana. Didok ibana, “Sai hupangido do podana jala huulahon do i. Gabe pos ma rohangku, boi do huulahon tugashi.”

5. Tongtong do dilatik ibana dirina. Didok si Paulus tu si Timoteus, “Marsitutu ma ho mangoloi parenta ni Debata.” (1 Tim. 4:7) Songon parolahraga, nang pe adong pelatihna, alai ibana sandiri pe porlu do marlatik. Didok si Paulus muse tu si Timoteus, “Marsitutu ma ho manjahahon i di jolo ni natorop, mamodahon jala mangajarhon i. . . . Rimangi ma angka i. Ulahon ma i sian nasa gogom, asa diida sude halak na lam togu parale-aleonmu tu Debata.”​—1 Tim. 4:13-15.

Lam denggan ma hamu di ulaon na dilehon tu hamu. Ringgas ma marsiajar Bibel. Jala tongtong ma ihuthon tudu-tudu na baru sian organisasi. Unang ma paposhu tu dirimuna sandiri. Sala do molo dirimpu hamu, boi do pengalamanmuna mangurupi hamu mangadopi situasi manang aha pe, nang pe ndang diriset hamu dope. Songon na didok si Timoteus, “Tongtong ma parrohahon dirim dohot na niajarhonmu.”​—1 Tim. 4:16.

6. Mangasahon huaso ni Jahowa do ibana. Dung dipaboa si Paulus taringot ulaon ni si Timoteus, dipaingot si Paulus do ibana, “Jaga ma arta na arga na pinasahatna tu ho marhite tondi parbadia na adong di hita”. (2 Tim. 1:14) Jadi ingkon mangasahon huaso ni Jahowa do si Timoteus.

Donganta si Donald naung leleng gabe sintua mandok, “Ingkon diharingkothon angka sintua dohot parhobas do parale-aleon ni nasida tu Jahowa. Alani i, ‘lam leleng, lam ganda do gogonasida’. Molo dipangido nasida do huaso ni Debata, jala marparangehon parbue ni tondi boi ma nasida tongtong mangurupi angka dongan.”​—Ps. 84:8; 1 Ptr. 4:11.

Mansai las do roha mangida hamu angka sintua dohot parhobas na baru, ala lam denggan mangulahon ulaon ni Jahowa. Songon si Jason na dipaboa nangkin mandok, “Dung gabe sintua ahu, godang do naung huparsiajari jala gabe pos ma rohangku na boi do huulahon tugas i. Las do rohangku tu ulaon on, jala sada hasangapon do on di ahu!”

Olo do hamu asa lam denggan di ulaonmuna? Molo diihuthon hamu sitiruon sian si Timoteus, boi ma hamu tongtong mangurupi angka dongan.