1. Surirang aha do na dipaboa si Jesaya, jala boasa i paposhon rohanta?

PAPOSHON roha do surirang na dipaboa si Jesaya taringot Jesus Kristus. Surirangna i mandok molo Jesus ‘ndang manguhum marguru tu parnida ni matana, jala ndang manguhum marguru tu na binege ni pinggolna. Marhitehite hatigoran tahe uhumonna angka na pogos’. (Jes. 11:3, 4) Boasa on boi paposhon rohanta? Alana, jotjot do angka halak saonari on paimbar-imbarhon halak. Jadi, tahaporluhon do sahalak Panguhum na tigor, i ma Jesus. Ala, ndang olo Jesus manguhumi hita sian na niidana!

2. Aha do didok Jesus asa taulahon, jala aha do na laho taulas di parsiajaran on?

² Ganup ari sai adong do pandapotta taringot angka halak. Ala jolma na mardosa dope hita, ndang boi dope hita songon Jesus. Sipata olo do hita marpandapot na so denggan taringot sasahalak. Jala mura do hita porsea tu na taida. Jadi didok Jesus, “Unang ma uhumi hamu halak mangihuthon na tarida, alai tigor ma hamu manguhumi.” (Joh. 7:24) Jadi lomo do roha ni Jesus asa tatiru ibana.  Jala ndang manguhumi halak sian na taida. Di parsiajaran on, adong tolu na laho taulas na boi mambahen hita paimbar-imbarhon halak. Na parjolo, mangida halak sian suku manang luatna. Na paduahon, ala hamoraonna. Na patoluhon, ala mangida umurna. Tingki mangulas i, taparsiajari ma songon dia hita mangihuthon poda ni Jesus, jala ndang paimbar-imbarhon halak sian na taida.

3, 4. (a) Aha do na mambahen si Petrus gabe olo tu jabu ni halak na so Jahudi? (Ida gombar di mula ni parsiajaran.) (b) Parbinotoan aha do diajarhon Jahowa tu si Petrus?

³ Bayangkon ma pangkilalaan ni apostel Petrus tingki disuru tu jabu ni si Kornelius na so halak Jahudi! (Ul. 10:17-29) Sasintongna sian dakdanak diajari do si Petrus, ramun do halak na so Jahudi. Alai adong ma piga-piga situasi na masa tu si Petrus na mambahen ibana gabe pasidingkon naung diajarhon i tu ibana. Umpamana, diida ibana ma sada parnidaan sian Debata. (Ul. 10:9-16) Di parnidaan i adong songon sada abit linen na ro sian banua ginjang, jala di bagasanna adong angka binatang na ramun. Dung i adong ma sada soara na mandok tu ibana, “Hehe ma ho Petrus, seat jala pangan ma i!” Alai ndang mangoloi si Petrus. Didok soara i ma muse, “Unang be dok ramun naung ias di Debata.” Dung sae parnidaan i, gabe sungkun-sungkun ma roha ni si Petrus, aha do na lapatan ni hata i. Ndang sadia leleng sahat ma suruan ni si Kornelius. Jadi marhite tondi parbadia disuru ma si Petrus asa laho tu jabu ni si Kornelius, dohot angka suruan i.

⁴ Molo olo dope si Petrus paimbar-imbarhon ‘sian na tarida’, tontu ndang na olo ibana ro tu jabu ni si Kornelius. Alana, ndang hea halak Jahudi ro tu jabu ni halak na so Jahudi. Jadi, boasa olo ro si Petrus? Ala marhite parnidaan i dohot tudu-tudu sian tondi parbadia gabe muba ma pandapotna taringot halak na so Jahudi. Dung ditangihon si Petrus hata ni si Kornelius didok ibana ma, “Nunga tangkas be huboto saonari, na so marimbar jolma di jolo ni Debata. Alai dihalomohon Debata do ganup halak na mangkabiari Ibana jala na mangulahon na sintong, sian bangso na dia pe nasida.” (Ul. 10:34, 35) Las do roha ni si Petrus dung mamboto i. Jadi aha ma parsiajaranna tu hita?

5. (a) Aha do na dihalomohon Jahowa asa diboto sude halak Kristen? (b) Nang pe nunga taboto na sintong, ra pangkilalaan na songon dia do na adong dope di rohanta?

⁵ Marhite si Petrus do diajarhon Jahowa tu sude halak Kristen, molo Ibana ndang paimbar-imbarhon halak. Di Jahowa sarupa do sude halak, nang pe marasing-asing suku, marga, bangso, manang bahasana. Molo taoloi Debata jala taulahon na sintong gabe dihaholongi Jahowa do hita. (Gal. 3:26-28; Pgk.  7:9, 10) Tutu, sian najolo nunga taboto taringot on. Alai songon dia molo hamu tading di inganan manang keluarga na jotjot pintor curiga tu halak? Molo sai curiga dope hamu tu halak, tontu olo dope hamu paimbar-imbarhon. Nang pe si Petrus na paboahon tu halak molo Debata ndang paimbar-imbarhon, alai ibana sandiri olo dope paimbar-imbarhon. (Gal. 2:11-14) Jadi songon dia do hita boi mangoloi parenta ni Jesus, jala ndang be paimbar-imbarhon halak?

6. (a) Aha do na boi mangurupi hita asa unang sai curiga tu angka halak? (b) Sian surat na dibahen sintua i, tutu do ibana ndang paimbar-imbarhon?

⁶ Tapangke ma Bibel laho mamareso rohanta. Atik boha olo dope hita curiga tu halak. Tapahombar ma pangalahonta tu na taparsiajari. (Ps. 119:105) Boi ma tasungkun donganta atik songon i dope hita, alana ndang boi tanilai dirinta sandiri. (Gal. 2:11, 14) Ra ala nunga somal, gabe ndang tasadari na songon i dope rohanta. On ma na masa tu sahalak sintua. Dibahen ibana ma surat tu kantor cabang laho paboahon taringot donganta naung marsaripe na dohot tu dinas sepenuh waktu. Sian suku na so dihalomohon halak do suami ni na marsaripe i. Godang do angka na denggan na dipaboa sintua i taringot donganta i. Alai didok ibana do muse, “Nang pe ibana sian [suku on], alai hasomalan dohot pangalahona ndang sarupa dohot godangan halak sian [suku on]. Alana, halak sian [suku on] ditanda kotor jala ndang denggan pangalahona.” Aha ma parsiajaranna tu hita? Manang aha pe tanggung jawabta di organisasi, ingkon tapareso ma dirinta jala olo manjalo sipasingot, atik boha olo dope hita paimbar-imbarhon. Asing ni i, aha do muse na ingkon taulahon?

7. Songon dia do carana mangkaholongi sude halak?

⁷ Molo holong do rohanta tu sude halak, ndang sai curiga be hita. (2 Kor. 6:11-13) Umlomo do rohamuna mardongan tu na sarupa suku, marga, bangso dohot bahasana? Molo songon i dope hamu, marsaor ma tu na asing. Togihon ma angka donganta na sian suku na asing asa rap marbarita dohot hamu. Manang togihon ma nasida asa rap mangan manang marsaor di jabumuna. (Ul. 16:14, 15) Molo diulahon hamu songon i, gabe dihaholongi hamu ma nasida, jala ndang be sai curiga tu nasida. Saonari taulas ma, aha do muse na mambahen hita gabe paimbar-imbarhon ala “mangihuthon na tarida”.

8. Songon na didok di 3 Musa 19:15, aha do na boi mambahen muba caranta mangida sasahalak?

⁸ Olo do muba caranta mangida sasahalak alani hamoraonna. Didok di 3 Musa 19:15 “Ndang jadi papeolonmu uhum di paruhuman, ndang jadi hamu marnidanida bohi, palea halak na pogos, pasangap halak na sangap, ingkon marhite sian hatigoran uhumonmu donganmu.” Songon dia do hamoraon ni sasahalak boi mambahen hita gabe paimbar-imbarhon?

9. Aha do na dipaboa si Salomo, jala aha do parsiajaranna tu hita?

⁹ Ditogu-togu tondi parbadia do  si Salomo laho paboahon hahurangan ni jolma. Didok, “Molo dung pogos, peus [manang, sogo ma roha ni] nang alealena mida ibana, alai torop do aleale ni halak na mora.” (Poda 14:20) Aha do parsiajaranna tu hita? Molo ndang manat hita, holan tu angka donganta na mamora ma hita marsaor. Jala ndang olo be hita marsaor dohot na pogos. Jadi aha ma na boi masa molo olo hita paimbar-imbarhon alani hamoraon?

10. Sipasingot aha do na dipaboa si Jakobus tu halak Kristen?

¹⁰ Molo tapaimbar-imbar do angka donganta alani hamoraonna, boi do gabe ndang marsada be angka dongan di huria. On ma na masa di piga-piga huria di abad na parjolo. Jala dipasingot si Jakobus do nasida alani i. (Jaha Jakobus 2:1-4.) Jadi, unang ma tapaloas masa i di hurianta. Alani i, songon dia ma asa unang tapaimbar-imbar halak alani hamoraon?

11. Alani arta ni sasahalak do umbahen na boi ibana marale-ale tu Jahowa?

¹¹ Tatiru ma cara ni Jahowa tingki mangida angka donganta. Sasahalak na dihaholongi Jahowa, ndang na ingkon na mamora manang pogos. Jala boi hita marale-ale tu Jahowa ndang alani arta. Tutu do hea didok Jesus, “maol do halak na mora masuk tu Harajaon banua ginjang i”. Alai ndang adong didok Jesus  ndang boi nasida masuk tu Harajaon banua ginjang. (Mat. 19:23) Hea do muse didok Jesus, “Marlas ni roha ma hamu angka na pogos, ai hamu do nampuna Harajaon ni Debata.” (Luk. 6:20) Alai lapatanna ndang sude halak na pogos, olo manangihon Jesus, jala dapot pasu-pasu na sumurung. Gariada godang do angka na pogos ndang mangihuthon Jesus. Sasintongna, ndang boi tadok sasahalak boi marale-ale tu Jahowa holan alani artana.

12. Aha do sipasingot tu angka na mamora dohot na pogos?

¹² Angka naposo ni Jahowa adong do na mamora, jala adong do na pogos. Alai, dihaholongi nasida do Jahowa jala diulahon do lomo ni roha ni Jahowa sian nasa roha. Didok do tu angka na mamora, “asa unang mangkirim nasida tu hamoraon na boi mago. Alai mangkirim ma nasida tu Debata”. (Jaha 1 Timoteus 6:17-19.) Disurat do di Bibel, sipasingot tu sude naposo ni Jahowa, na mamora nang na pogos asa unang mangkaringkothon hepeng. (1 Tim. 6:9, 10) Molo tatiru do cara ni Jahowa maradophon angka naposona, tontu ndang tapaimbar-imbar nasida nang mamora manang pogos. Alai olo do hita paimbar-imbarhon halak ala mangida umurna?

13. Aha do poda sian Bibel taringot mangargai angka naung matua?

¹³ Jotjot do Bibel paboahon molo hita sude ingkon sangap do tu angka naung matua. Songon na disurat di 3 Musa 19:32, “Ingkon hehe ho laos jongjong maradophon halak na ubanon, jala ingkon pasangaponmu do halak na tuatua, jala ingkon marhabiaran ho maradophon Debatam.” Jala disurat do muse di Poda 16:31, “Tumpal [manang, mahkota] hamuliaon do uban na jumpang marhite sian dalan hatigoran.” Didok si Paulus do muse tu si Timoteus asa unang kasar tu na matua alai songon maradophon amana ma dibahen. (1 Tim. 5:1, 2) Jadi, tingki mangalehon sipasingot pe tongtong do si Timoteus burju jala mangargai angka dongan naung matua.

14. Tingki sadihari do na matua boi tapasingot?

¹⁴ Songon dia molo adong sahalak na matua na sengaja mangulahon dosa? Manang manjujui na asing asa mangulahon na so denggan? Ndang gabe dipasombu Jahowa hasalaanna i holan ala nunga matua ibana jala diargai halak. Prinsip na disurat di Jesaya 65:20 mandok, “pardosa sisaratus taon hona bura”. Sarupa do prinsip on songon na di parnidaan ni si Hesekiel. (Hes. 9:5-7) Alai na rumingkot tapasangap ma Jahowa, i ma Debata naung adong sian najolo. (Dan. 7:9, 10, 13, 14) Molo tapasangap do Jahowa, ndang mabiar hita pasingothon donganta nang pe na matua.​—Gal. 6:1.

15. Aha do parsiajaran na tadapot sian si Paulus taringot mangargai donganta na poso?

¹⁵ Molo poso dope donganta, porlu do taargai? Porlu. Didok si Paulus do tu si Timoteus, “Unang ma adong na marlea ni roha tu ho ala poso dope ho. Alai gabe sitiruon ma ho tu angka halak na marsihohot. Gabe sitiruon ma ho di pangkataion, di parniulaon, di  holong ni roha, di haporseaon dohot di habadiaon.” (1 Tim. 4:12) Hira-hira marumur 30 taon ma si Timoteus tingki didok si Paulus songon i. Dung i, dilehon ma tu si Timoteus tanggung jawab na ringkot. Jesus pe tingki marumur 33 taon, nunga godang na diulahon ibana. Parsiajaranna tu hita, unang ma leas rohanta tu donganta na poso.

16, 17. (a) Songon dia angka sintua boi manontuhon sasahalak boi gabe parhobas manang sintua? (b) Pamingkirion manang hasomalan na songon dia do na so hombar tu Bibel?

¹⁶ Di piga-piga inganan, somal do na poso ndang diargai. Ujungna, dirimpu angka sintua ma ndang boi dope na poso gabe parhobas manang sintua. Hape sasintongna nunga boi na poso i mandapot tanggung jawab. Alana, ndang adong disurat di Bibel sadia umur ni sasahalak asa boi gabe parhobas manang sintua. (1 Tim. 3:1-10, 12, 13; Tit. 1:5-9) Molo diihuthon sintua do hasomalanna i, na so mangihuthon poda ni Bibel do nasida disi. Jadi tingki sintua maradophon angka na poso, ndang boi mangihuthon hasomalan dohot pamingkirion ni nasida. Alai ingkon poda ni Bibel do na diihuthon nasida.​—2 Tim. 3:16, 17.

¹⁷ Boha do molo angka sintua ndang mangihuthon tudu-tudu ni Bibel? Gabe diambati nasida do angka na poso mandapot tanggung jawab. Umpamana di sada luat, adong ma sada parhobas di huria na denggan mangulahon tanggung jawabna. Jala diboto angka sintua do molo ibana sasintongna nunga boi gabe sintua. Hape, adong piga-piga sintua na naung matua mandok molo parhobas i paposohu dope gabe sintua. Ala songon i pamingkirion ni angka sintua i gabe ndang dilantik parhobas i. Taboto ma, godang do na songon i dope pamingkirionna. Alani i, ringkot ma mangihuthon tudu-tudu sian Bibel jala unang ma mangihuthon pamingkirionta manang hasomalanta. Taihuthon ma poda ni Jesus, jala unang ma paimbar-imbarhon halak sian na taida.

18, 19. Aha do na mangurupi hita maniru Jahowa?

¹⁸ Nang pe mardosa, alai boi do hita maniru Jahowa na so paimbar-imbarhon halak. (Ul. 10:34, 35) Alani i tongtong ma taihuthon poda ni Bibel. Molo songon i do na taulahon, na mangoloi parenta ni Jesus do hita asa ‘unang manguhumi halak mangihuthon na tarida’.​—Joh. 7:24.

¹⁹ Satongkin nai nama Jesus manguhumi sude jolma. Uhumonna do halak hombar tu uhum ni Debata, ndang sian na niidana manang na binegena. (Jes. 11:3, 4) Tontu tarpaima-ima do hita tingki masa i!