1. Ise do na mangurupi laho pajongjongkon huria na baru di Pilippi?

TINGKI ro apostel Paulus, si Silas, si Lukas, dohot si Timoteus tu kota Pilippi, pajumpang ma nasida dohot godang halak na lomo rohana tu barita na uli. Opat donganta on, marsitutu do mangurupi laho pajongjongkon huria na baru. Sude angka dongan na baru tardidi, nunga ro marpungu. Jala ra, di jabu ni sahalak borua na porsea na margoar si Lidia do dibahen parpunguan i.​—Ul. 16:40.

2. Aha do ambat-ambat na diadopi huria di Pilippi?

² Alai ndang sadia leleng, adong ma ambat-ambat na diadopi huria na baru on. Dibahen Sibolis do halak na sogo rohana tu hasintongan asa mangorai ulaon ni si Paulus dohot angka donganna. Gabe ditangkup ma si Paulus dohot si Silas, didangguri dohot batu, jala dipenjarahon. Dung kaluar nasida sian penjara, dijumpangi jala dipatogu nasida do muse angka dongan di kota i. Dung i, laho ma si Paulus, si Silas, dohot si Timoteus sian kota i. Alai tongtong do si Lukas tinggal disi. Dung laho nasida, aha do na diulahon angka donganta na baru tardidi i? Marhite tondi parbadia, diurupi Jahowa do nasida asa tongtong ringgas marbarita. (Plp. 2:12) Tontu, las do roha ni si Paulus tu nasida!

3. Songon na disurat di Pilippi 1:9-11, aha do na ditangiangkon si Paulus?

³ Hira-hira sampulu taon dungkon i, dibahen si Paulus do surat tu huria di Pilippi. Tingki dijaha hamu i, boi ma diida  hamu na mansai balga do holong ni si Paulus tu angka donganna. Didok ibana, “Sihol ni rohangku tu hamu sude, ai holong situtu do rohangku tu hamu songon holong ni Kristus Jesus.” (Plp. 1:8) Didok di suratna i, sai ditangiangkon si Paulus do nasida. Dipangido ibana do Jahowa mangurupi nasida asa lam martamba holong ni nasida, mamboto dia na rumingkot, ndang marcacat, ndang mambahen tartuktuk na asing, jala mangulahon godang ulaon na denggan. Saonari, boi do tadapot laba sian surat ni si Paulus on. Alani i, tajaha ma aha na disurat si Paulus tu halak di Pilippi. (Jaha Pilippi 1:9-11.) Jala taulas ma piga-piga na didok si Paulus di ayat i jala songon dia hita mangulahon i.

4. (a) Hombar tu 1 Johannes 4:9, 10, songon dia do Jahowa patuduhon holongna tu hita? (b) Ingkon sadia balga do holongta tu Jahowa?

⁴ Dipatudu Jahowa do holongna na mansai balga tu hita marhite manuru Anakna tu tano on laho mate humongkop dosanta. (Jaha 1 Johannes 4:9, 10.) Holong ni Debata manjujui hita asa mangkaholongi Ibana. (Rom 5:8) Ingkon sadia balga do holongta tu Jahowa? Didok Jesus tu angka halak Parise, “Ingkon haholonganmu do Jahowa Debatam sian nasa roham, sian nasa ngolum dohot sian nasa pingkiranmu.” (Mat. 22:36, 37) Lomo rohanta mangkaholongi Debata sian nasa rohanta. Jala lomo rohanta asa lam togu holongta tu Ibana ganup ari. Didok si Paulus tu halak Pilippi, asa “lam martamba-tamba” holong ni nasida. Songon dia carana asa lam togu holongta tu Debata?

5. Songon dia carana asa lam togu holongta tu Debata?

⁵ Asa boi tahaholongi Debata, ingkon tatanda do Ibana. Bibel mandok, “Manang ise na so marholong ni roha, ndang ditanda ibana Debata, ai holong do Debata.” (1 Joh. 4:8) Didok si Paulus, gabe lam togu do holongta tu Debata molo lam martamba ‘parbinotoan dohot pangantusionta na bagas’ taringot Ibana. (Plp. 1:9) Tingki parjolo sahali hita marsiajar Bibel, tahaholongi do Debata nang pe otik dope na taboto taringot Ibana. Dung lam godang na taparsiajari taringot Jahowa, gabe lam togu ma holongta tu Ibana. Alani i, mansai ringkot do mambahen parsiajaran Bibel pribadi jala mangarimangi aha na tajaha!​—Plp. 2:16.

6. Hombar tu 1 Johannes 4:11, 20, 21, tu ise do hita ingkon patuduhon holong?

⁶ Holong ni Jahowa na mansai balga manjujui hita laho mangkaholongi angka dongan. (Jaha 1 Johannes 4:11, 20, 21.) Rap manomba Jahowa do hita dohot angka dongan jala lomo rohanta maniru Ibana. Tatiru do contoh sian Jesus na patuduhon holongna na mansai balga marhite mangalehon dirina gabe tobusan tu hita. I do alana, olo do ra didok rohanta mura do patuduhon holong tu angka dongan. Alai sipata, maol do mangulahon i. Pingkirhon ma contoh sian huria di Pilippi.

7. Aha do na boi taparsiajari sian sipaingot na dilehon si Paulus tu si Euodia dohot si Sintike?

⁷ Si Euodia dohot tu si Sintike, i ma donganta borua na ringgas mangurupi si Paulus. Alai, hea do nasida ndang sapandapot jala gabe ndang mardongan. Tingki mambahen surat tu huria, tangkas do dipaboa si Paulus goar ni si Euodia dohot si Sintike. Dilehon ibana do sipaingot “asa marsada ni roha nasida marhobas tu Tuhan”. (Plp. 4:2, 3) Didok roha ni si Paulus, porlu do dilehon ibana sipaingot tu sude huria. Didok ibana, “Ulahon hamu ma sude so pola marungut-ungut dohot mangalo-alo.” (Plp. 2:14) Sipaingot ni si Paulus on ndang holan mangurupi dua donganta  borua i, alai dohot do sude na di huria asa lam martamba holong ni nasida.

8. Aha do na mambahen hita maol patuduhon holong tu angka dongan, jala aha do na boi mangurupi hita?

⁸ Songon si Euodia dohot si Sintike, sipata maol do patuduhon holong molo sai taingot hasalaan ni angka dongan. Sude do hita mambahen hasalaan ganup ari. Alai molo hasalaan ni angka dongan do na sai tapingkiri, gabe lam maol do hita patuduhon holong tu nasida. Umpamana, molo adong sahalak donganta baoa na lupa mangurupi hita paiashon Bale Harajaon, ra gabe jut do rohanta tu ibana. Molo taingot-ingot muse hasalaanna na asing, gabe lam jut ma rohanta jala lam moru ma holongta tu ibana. Molo adong parsoalanmuna dohot angka dongan di huria, ingot ma, diida Jahowa do sude hasalaanmuna dohot hasalaan ni nasida. Alai, tongtong do dihaholongi Jahowa hita. Alani i, ingkon tatiru do Jahowa jala taida ma angka na denggan sian angka donganta. Molo marsitutu hita patuduhon holong tu angka dongan, gabe lam marsada ma hita.​—Plp. 2:1, 2.

9. Aha do angka “na rumingkot” na dipaboa si Paulus tu halak Kristen di Pilippi?

⁹ Disuru Jahowa do si Paulus paboahon tu halak Kristen di Pilippi asa diboto nasida “dia na rumingkot”. (Plp. 1:10) Angka na rumingkot, i ma pabadiahon goar ni Jahowa, angka janjina na laho masa, dohot mambahen huria dame jala marsada. (Mat. 6:9, 10; Joh. 13:35) Molo tabahen i sude gabe na rumingkot di ngolunta, on patuduhon na tahaholongi do Jahowa.

10. Aha do na ingkon taulahon asa unang marcacat?

¹⁰ Didok si Paulus do muse asa unang “marcacat” hita. Lapatanna, ndang ingkon gabe sempurna hita. Alana ndang boi hita sempurna songon Jahowa. Alai boi do hita sempurna manang ndang marcacat di adopan ni Jahowa molo taulahon na dumenggan laho patoguhon holongta jala mamboto dia na rumingkot. Sada cara patuduhon holong, i ma molo taulahon sian nasa tolapta asa unang mambahen tartuktuk na asing.

11. Boasa ndang boi tabahen tartuktuk na asing?

¹¹ Sada sipasingot do tu hita unang mambahen tartuktuk na asing. Songon dia hita boi mambahen sasahalak tartuktuk? Ra boi do sian hiburan, pangkean, dohot karejo na tapillit. Ra ndang adong na sala sian na tapillit i. Alai boi do i gabe parohon jea molo mangganggu panggora ni roha ni sasahalak jala mambahen ibana tartuktuk. Didok Jesus, tumagon ma digantungkon tu rungkungta batu gilingan na balga jala dilonongkon hita tu laut unang apala mambahen tartuktuk sada biru-biruna!​—Mat. 18:6.

12. Aha do na boi taparsiajari sian contoh na dibahen suami istri perintis?

¹² Parrohahon ma na diulahon suami istri perintis taringot sipasingot ni Jesus i. Di huria ni nasida, adong suami istri na baru tardidi na sian keluarga na kaku jala mangorai godang ulaon. Didok roha ni na baru tardidi i, ndang boi halak Kristen laho tu bioskop, nang pe ndang sala isi ni filmna i. Tarsonggot do nasida tingki diboto laho suami istri perintis i tu bioskop. Alani i, ndang laho be suami istri perintis i tu bioskop sahat tu na tarlatik panggora ni roha ni na baru tardidi i jala boi lam denggan mamboto dia na sintong manang na ndang. (Heb. 5:14) Marhite cara on, dipatudu suami istri perintis i do holong tu angka dongan na baru tardidi, ndang holan sian hata alai dohot do sian parniulaon.​—Rom 14:19-21; 1 Joh. 3:18.

13. Songon dia hita boi mambahen sasahalak gabe mangulahon dosa?

 ¹³ Cara na asing na mambahen sasahalak tartuktuk, i ma molo tabahen ibana mangulahon dosa. Songon dia on boi masa? Bayangkon ma sada situasi. Marsitutu do sahalak parsiajar Bibel mangorom diri sian siinumon na maralkohol. Diboto ibana do na so boi be ibana manginum i. Godang do hamubaon na dibahen ibana jala ujungna boi tardidi. Dung i, adong ma sahalak donganta na mambahen acara ramah tamah di jabuna jala ditawarhon donganta on ma siinumon na maralkohol tu na baru tardidi i. Didok donganta i, “Nunga halak Kristen ho saonari, urupan ni tondi parbadia do ho. Sada sian parbue ni tondi, i ma mangorom diri. Molo boi ho mangorom diri, ndang pola boha molo diinum ho saotik.” Bayangkon ma na boi masa molo ditangihon na baru tardidi i poda na sala, jala mulak muse ibana tu hasomalanna najolo i!

14. Songon dia parpunguan mangurupi hita mangulahon poda di Pilippi 1:10?

¹⁴ Di parpunguan, diurupi do hita asa mangulahon poda di Pilippi 1:10 marhite godang cara. Na parjolo, aha na taulas di parpunguan patuduhon tu hita aha na rumingkot di Jahowa. Na paduahon, taboto do songon dia mangulahon na taparsiajari asa ndang marcacat hita. Na patoluhon, dijujui do hita “laho patuduhon holong ni roha dohot mangulahon na denggan”. (Heb. 10:24, 25) Tingki dipatogu angka dongan hita, gabe lam martamba ma holongta tu Debata dohot tu nasida. Molo tahaholongi Debata dohot angka dongan sian nasa rohanta, gabe  taulahon ma na dumenggan asa unang mambahen tartuktuk angka dongan.

15. Aha do lapatanna “mangulahon godang ulaon na denggan”?

¹⁵ Ditangiangkon si Paulus do halak di Pilippi asa “mangulahon godang ulaon na denggan”. (Plp. 1:11) Tontu, angka “ulaon na denggan”, dohot ma i holong ni nasida tu Jahowa dohot tu angka dongan. Dohot ma i muse paboahon tu halak na asing taringot haporseaon ni nasida tu Jesus dohot pangkirimon ni nasida. Di Pilippi 2:15, dipatudos do i “songon siboan panondang tu portibi on”. Hombar do on tu na didok Jesus, molo angka siseanna songon “panondang ni portibi on”. (Mat. 5:14-16) Diparentahon Jesus do muse angka siseanna asa mambahen sisean jala didok tu nasida, ingkon “paboaonmuna . . . sahat tu ujung ni tano on”. (Mat. 28:18-20; Ul. 1:8) Na mangulahon “ulaon na denggan” do hita molo marsitutu di ulaon na mansai ringkot on.

16. Songon dia do Pilippi 1:12-14 patuduhon na boi do hita gabe siboan panondang tu portibi on aha pe situasina? (Ida gambar sampul.)

¹⁶ Aha pe situasina, boi do hita gabe siboan panondang tu portibi on. Ra, olo do adong ambat-ambat na mambahen hita maol marbarita. Alai sipata, boi do i gabe kesempatan di hita laho marbarita. Umpamana, tingki mambahen surat tu halak Pilippi, dipenjarahon do si Paulus di sada jabu di kota Rom. Alai nang pe dipenjarahon, tongtong do ibana marbarita tu angka pengawal dohot tu angka na ro mandapothon ibana. Ala ringgas do si Paulus marbarita, gabe lam pos ma roha ni angka dongan jala “lam barani do nasida paboahon hata ni Debata”.​—Jaha Pilippi 1:12-14; 4:22.

17. Songon dia do angka donganta tongtong marbarita nang pe maol?

 ¹⁷ Godang do angka donganta na patuduhon habaranion songon si Paulus. Di negara ni nasida, diorai do ulaon marbarita di inganan na ribur manang sian jabu tu jabu. Alani i, dilului nasida ma cara na asing asa boi marbarita. (Mat. 10:16-20) Di sada negara, sahalak pengawas wilayah manjujui angka dongan asa marbarita tu sisolhot ni nasida, tu hombar jabu, dongan singkola, dongan sakarejo, dohot tu halak naung ditanda nasida. Di bagasan dua taon, hatop do martamba huria di wilayah i. Ra, bebas do hita marbarita di negaranta. Alai, adong parsiajaran na arga na tadapot sian contoh ni angka donganta i. Sai talului ma cara asa boi marbarita. Pos ma rohanta, lehonon ni Jahowa do gogo tu hita asa boi tongtong marbarita nang pe maol.​—Plp. 2:13.

18. Aha do na ingkon taulahon?

¹⁸ Saonari, marsitutu ma hita mangihuthon poda sian surat ni si Paulus tu halak Pilippi. Ingkon taboto do dia na rumingkot, ndang marcacat, ndang mambahen tartuktuk na asing, jala mangulahon godang ulaon na denggan. Hasilna, gabe lam martamba ma holongta jala pasangaphon Jahowa, i ma Ama na parholong.