HEA DO lomo rohamuna mangulahon sada tugas di huria alai ndang boi i diulahon hamu saonari? Ra tugas i, nunga diulahon donganta na asing. Manang, hea do tugas i diulahon hamu najolo. Olo do ala naung matua, marsahit, susa di parhepengon dohot tanggung jawab keluarga na mambahen hamu ndang boi be mangulahon songon na dihirim rohamuna. Asing ni i, ala adong na muba di organisasi, gabe ndang boi be hamu mangulahon tugas naung leleng diulahon hamu. Alani i, olo do didok rohamuna adong na hurang na diulahon hamu tu Jahowa. Di tingki sisongon i, olo do gabe metmet rohamuna. Alai nang pe songon i, songon dia do asa unang sai marmetmet ni roha manang ndang marlungun ni roha hamu? Songon dia carana asa boi hamu tongtong marlas ni roha?

Boi do hita marsiajar sian si Johannes Pandidi taringot songon dia carana asa tongtong marlas ni roha. Lomo do rohana mangulahon tugas sian Jahowa. Alai ndang dirimpu ibana adong na laho masa di ngoluna. Gumodang do tingkina suda di penjara sian tingkina di ulaon marbarita. Alai nang pe songon i, tongtong do ibana marlas ni roha saleleng ngoluna. Aha do na mangurupi ibana? Jala songon dia hita boi tongtong marlas ni roha nang pe tingki marmetmet ni roha?

Di bulan April taon 29 M, mulai ma si Johannes mangulahon tugasna, i ma paradehon haroro ni Messias. Didok ibana, “Pauba hamu ma rohamuna, ai nunga jonok Harajaon banua ginjang i.” (Mat. 3:2; Luk. 1:12-17) Godang do na manangihon. Jala adong do na ro sian luat na dao laho manangihon ibana. Godang do na paubahon rohana jala tardidi. Barani do si Johannes pasingothon angka pamimpin agama, laho diuhum Debata do nasida molo ndang marhamubaon. (Mat. 3:5-12) Dung i, diulahon ibana ma ulaon na mansai ringkot, i ma mandidihon Jesus di bulan Oktober taon 29 M. Sian tingki i, dijujui do angka siseanna asa mangihuthon Jesus, i ma Messias na dijanjihon.​—Joh. 1:32-37.

Taringot si Johannes didok Jesus do, “Ndang adong na tinubuhon ni borua na umbalga sian si Johannes Pandidi.” (Mat. 11:11) Tontu las do roha ni si Johannes ala mandapot godang  pasu-pasu sian Debata. Songon si Johannes, godang do angka donganta na mangkilala gok pasu-pasu. Songon donganta na margoar si Terry. Ibana dohot istrina si Sandra nunga dohot tu dinas sepenuh waktu lobi sian 50 taon. Didok si Terry, “Godang tugas di organisasi na huulahon. Nunga hea ahu gabe perintis, karejo di Betel, perintis istimewa, pengawas wilayah, pengawas distrik, jala saonari gabe perintis istimewa muse.” Tontu, las do roha ala mandapot tugas di organisasi. Alai ingkon marsitutu do hita asa boi tongtong marlas ni roha. Taparsiajari ma muse sitiruon sian si Johannes, na mangurupi hita asa tongtong marlas ni roha tingki muba situasi di ngolunta.

Na mambahen si Johannes tongtong marlas ni roha, ala diargai ibana do tugasna. Pingkirhon ma contoh on. Dung tardidi Jesus, lam otik do sisean ni si Johannes, alai lam godang do sisean ni Jesus. Alani i, ro ma angka siseanna mandapothon si Johannes. Didok nasida ma, “Mandidihon do ibana nuaeng. Jala sude do halak ro mandapothon ibana.” (Joh. 3:26) Alai dialusi si Johannes ma, “Pangoli i do nampuna pengantin borua i. Alai dongan ni pangoli i, na jongjong di lambungna jala na manangihon ibana, mansai las do rohana mambege soara ni pangoli i. Alani i, nunga gok be saonari las ni rohangki.” (Joh. 3:29) Ndang mangiburu si Johannes tu Jesus. Jala ndang didok rohana gabe ndang ringkot ulaonna ala ulaon ni Jesus nama na rumingkot. Alai tongtong do ibana marlas ni roha ala diargai ibana do tugasna gabe “dongan ni pangoli”.

Cara marpingkir ni si Johannes boi mangurupi ibana tongtong marlas ni roha. Umpamana, halak Nasir do ibana sian mulai tubu. Alani i, ndang boi ibana manginum anggur. (Luk. 1:15) Sederhana do ngolu ni si Johannes. Didok Jesus do, “Ro si Johannes ndang mangan jala ndang minum.” Alai ndang halak Nasir Jesus dohot siseanna. Alani i, boi do songon halak na asing parngoluon ni nasida. (Mat. 11:18, 19) Asing ni i, ndang hea dibahen si Johannes mukjizat. Alai diboto ibana boi do angka sisean ni Jesus mambahen mukjizat, dohot ma i angka na hea gabe siseanna. (Mat. 10:1; Joh. 10:41) Ndang sai dipingkirhon ibana imbar ni siseanna dohot sisean ni Jesus. Gariada, ringgas do ibana mangulahon tugas na dilehon Jahowa.

Molo taargai tugas na dilehon Jahowa tu hita, boi ma hita tongtong marlas ni roha. Si Terry na dipaboa nangkin mandok, “Marsitutu do ahu mangulahon tugas na dilehon tu ahu.” Tingki diingot ibana muse ngoluna tingki dohot tu dinas sepenuh waktu, didok ibana ma, “Ndang husolsoli aha naung huulahon. Alai godang do pengalaman na hudapot na boi mambahen las roha.”

Boi do hita tongtong marlas ni roha molo sai tapingkirhon aha na mambahen sada tugas sian organisasi mararga. Sada hasangapon do di hita gabe “dongan saulaon ni Debata”. (1 Kor. 3:9) Songon barang, boi do tongtong bagak molo dijaga. Suang songon i ma, hita pe boi do marlas ni roha molo sai tapingkirhon hasangapon do gabe dongan saulaon ni Jahowa. Unang ma tabandingkon ulaonta dohot ulaon ni dongan na asing. Jala unang ma didok rohanta rumingkot do ulaon ni dongan na asing sian ulaonta.​—Gal. 6:4.

Diboto si Johannes do ndang laho leleng ulaonna. Alai, ndang diboto ibana aha na laho masa tu dirina. (Joh. 3:30) Taon 30 M, onom bulan dungkon mandidihon Jesus, dipenjarahon Raja Herodes ma ibana. Alai, tongtong do ibana marbarita sian nasa tolapna. (Mrk. 6:17-20) Aha do na mangurupi ibana tongtong marlas ni roha tingki mangadopi hasusaan? Dipingkirhon ibana do na ringkot di Jahowa.

Saleleng di penjara, dibege si Johannes do barita taringot angka ulaon ni Jesus. (Mat. 11:2; Luk. 7:18) Pos do rohana molo Jesus i Messias. Alai gabe didok rohana ma, songon dia ma Jesus boi pasauthon sude surirang taringot Messias. Ala diboto si Johannes do Messias i laho gabe raja, ra dirimpu ibana laho mamarenta nama Jesus. Jala didok rohana muse, laho paluaon ni Jesus do ibana sian penjara. Ala naeng mamboto gumodang barita taringot ulaon ni Jesus, disuru  si Johannes ma dua siseanna laho manungkun tu Jesus, “Ho do na laho ro i, manang paimaonnami dope na asing?” (Luk. 7:19) Dung mulak siseanna na dua i, manat do ditangihon si Johannes tingki dipatorang nasida songon dia Jesus pamalumhon na marsahit marhite mukjizat. Disuru Jesus ma nasida mulak tu si Johannes laho paboahon angka naung diulahon Jesus. Didok, “Na mapitung boi marnida, na pangpang boi mardalan, na hona kusta dipamalum, na nengel marbinege, na mate dipangolu jala barita na uli dibaritahon tu halak na pogos.”​—Luk. 7:20-22.

Tontu, gabe lam togu do roha ni si Johannes dung dibege ibana barita sian siseanna. On patuduhon na tutu do Jesus i Messias songon na disurirangkon. Nang pe ndang dipalua Jesus ibana sian penjara, alai diboto do ndang marisuang ulaonna. Alani i, nang pe di penjara tongtong do ibana marlas ni roha.

Songon si Johannes, boi do hita mamingkirhon na ringkot di Jahowa. On boi mangurupi hita asa martahan, marlas ni roha jala sabar. (Kol. 1:9-11) Jaha ma Bibel jala rimangi ma i. Ingot ma, ndang marisuang ulaonta laho marhobas tu Jahowa. (1 Kor. 15:58) Didok si Sandra, “Manjaha Bibel ganup ari mangurupi ahu lam solhot tu Jahowa. On mangurupi asa sai mamingkirhon Ibana, ndang diringku sandiri.” Asing ni i, boi do taparrohahon angka na diulahon angka donganta laho manomba Jahowa. On boi mangurupi hita asa unang sai mamingkirhon dirinta sandiri, alai mamingkirhon angka naung diulahon Jahowa. Didok si Sandra muse, “Acara bulanan JW Broadcasting^® mangurupi hita asa lam jonok tu organisasi jala tongtong marlas ni roha di tugasta.”

Nang pe satongkin si Johannes Pandidi marbarita, alai marbarita do ibana “di bagasan las ni roha dohot huaso ni si Elia”. Songon si Elia, dos do pangkilalaan ni si Johannes songon hita. (Luk. 1:17; Jak. 5:17) Molo tatiru si Johannes jala marsitutu mangulahon tugas sian Jahowa, boi ma hita tongtong marlas ni roha, ndang soal aha pe na masa di ngolunta.