1. Aha do hasangapon na adong di hita?

SADA hasangapon do di hita boi gabe bagian sian huria ni Jahowa! Massai las do rohatta jala dame do pakkilalaanta ala boi manomba Jahowa rap dohot akka dongan di huria. Alai aha ma tugas na boi diulahon hamu di huria?

2. Tudosan aha do na dibahen si Paulus di akka suratna?

² Godang do parsiajaran na boi tadapot sian tudosan na dibahen si Paulus di akka suratna. Di suratna i, dipatudos si Paulus do huria i songon pamatangta. Jala akka halak di huria songon bagian ni pamatangta.​—Rom 12:4-8; 1 Kor. 12:12-27; Eps. 4:16.

3. Aha do tolu parsiajaran na boi tadapot sian artikel on?

³ Mararga do hita sude di huria. Dang soal ras, suku, status ekonomi manang sikkolatta. Jala sude do hita boi patoguhon huria. Adong tolu parsiajaran na boi tadapot sian tudosan na dibahen si Paulus. Na parjolo, lao taulas ma boasa hita sude marguna di huria. Na paduahon, taulas ma aha na boi taulahon molo tahilala songon na so marguna do hita di huria. Jala na patoluhon, taulas ma boasa hita ikkon toktong ringgas mangulahon tugasta.

4. Aha do na boi taparsiajari sian Rom 12:4, 5?

⁴ Parsiajaran na parjolo na boi tadapot sian tudosan ni si Paulus, i ma mararga do hita sude di organisasi ni Jahowa.  Didok si Paulus, “Ai sada do pamatang i alai godang do ruasna, jala marasing-asing be do ulaonna. Songon i ma nang hita, nang pe godang hita alai marsada do hita di bagasan Kristus. Jala sude do angka ruas ni pamatang i masiurupan.” (Rom 12:4, 5) Aha do maksud ni si Paulus di ayat i? Mararga do sude hita di huria nang pe marasing-asing do tugas na tadapot.

5. Aha do ‘silehon-lehon’ na dilehon Jahowa tu huria?

⁵ Sude do hita mararga di organisasi ni Jahowa. Alai na parjolo, taulas ma taringot akka donganta na manguluhon di huria. (1 Tes. 5:12; Heb. 13:17) Marhite Jesus, dilehon Jahowa do ‘silehon-lehon’ tu organisasina. (Eps. 4:8) ‘Silehon-lehon’ na dimaksud disi i ma, anggota ni Punguan na Mangaradoti Organisasi, akka donganta na mangurupi Punguan na Mangaradoti Organisasi, Panitia Cabang, pengawas wilayah, instruktur sikkola, sintua di huria, dohot hamba pelayanan. Sude do akka donganta on dilantik marhite tondi parbadia lao mangurus biru-biru na mararga di Jahowa, jala patoguhon roha ni nasida.​—1 Ptr. 5:2, 3. 

6. Songon na didok di 1 Tessalonik 2:6-8, aha do na uppetting di akka donganta na manguluhon di huria?

⁶ Akka donganta na dilantik marhite tondi parbadia i marsitutu do lao mangulahon godang tanggung jawab di huria. Sada bagian ni pamatangta, songon tangan manang pat, boi do marguna tu sude bagian ni pamatangta na asing. Dos songon i ma akka donganta na manguluhon di huria. Mararga do nasida tu sude anggota ni huria. Dang olo nasida pasangappon dirina sandiri. Alai patoguhon jala paposson roha ni akka dongan do na uppetting di nasida. (Jaha 1 Tessalonik 2:6-8.) Mandok mauliate do hita tu Jahowa ala dilehon Ibana tu hita akka dongan na so makkarikkotton dirina sandiri!

7. Aha do pasu-pasu na didapot akka donganta na dohot tu dinas sepenuh waktu?

⁷ Adong do ra piga-piga akka donganta di huria na gabe missionaris, perintis istimewa manang perintis biasa. Jala godang do akka donganta di liat portibi on na mangalehon gumodang tikki dohot gogo ni nasida lao marbarita jala mambahen sisean. Alani keputusan ni nasida i, gabe godang ma akka halak na diurupi nasida gabe sisean ni Jesus. Nang pe biasana dang sadia arta ni nasida, alai dilehon Jahowa do tu nasida godang pasu-pasu. (Mrk. 10:29, 30) Holong do rohatta tu akka donganta on, jala taargai do nasida ala gabe bagian sian huria!

8. Boasa sude parbarita mararga di Jahowa?

⁸ Holan akka donganta na dohot tu dinas sepenuh waktu do na mararga di huria? Daong. Sude do parbarita mararga di Jahowa dohot di huria. (Rom 10:15; 1 Kor. 3:6-9) Alana tugas na paling penting na ikkon diulahon huria, i ma mambahen sude halak gabe sisean ni Kristus. (Mat. 28:19, 20; 1 Tim. 2:4) Sude akka parbarita, na tardidi manang na so tardidi dope, berupaya do mambahen ulaon on gabe na uppetting di ngolu ni nasida.​—Mat. 24:14.

9. Boasa taargai akka donganta borua di huria?

⁹ Diargai Jahowa do akka donganta borua di huria ala dilehon Ibana tugas na penting tu nasida. Diargai Jahowa do akka istri, ina, na mabalu, dohot akka donganta borua na lajang ala toktong nasida setia manomba Ibana. Disurat do di Bibel akka donganta borua na palashon roha ni Jahowa. Dipuji do nasida ala patuduhon bisuk, haporseaon, habaranion, semangat, ala burju mangalehon, jala marpangalaho na denggan. (Luk. 8:2, 3; Ul. 16:14, 15; Rom 16:3, 6; Plp. 4:3; Heb. 11:11, 31, 35) Mandok mauliate do  hita tu Jahowa ala di huria pe godang do akka donganta borua na patuduhon parange na sarupa!

10. Boasa taargai akka donganta naung matua di huria?

¹⁰ Taargai do muse akka donganta naung matua di huria. Adong do ra sian nasida naung leleng manomba Jahowa. Na deba ra dung matua do baru mandapot hasittongan. Godang do ra sian nasida na marsahit-sahit ala nungnga lam matua. Alani i, gabe dang godang be na boi diulahon nasida di huria manang dohot di ulaon marbarita. Alai marbarita do nasida sian nasa tolap ni nasida. Jala berupaya do nasida lao patoguhon dohot mangalatik na asing. Pasti godang do na boi tatiru sian pengalaman ni nasida. Massai arga do nasida di hita dohot di Jahowa.​—Poda 16:31.

11-12. Boasa boi dipatogu rohamu ala mangida akka dongan na poso di huriamuna?

¹¹ Pikkirhon ma muse akka donganta na poso di huria. Godang do tantangan na diadopi nasida ala mangolu di portibi na dirajai Sibolis. Jala godang do akka ajaran na sala na dibahen Sibolis di portibi on. (1 Joh. 5:19) Alai, dipatogu do rohatta tikki mambege komentar ni nasida di parpunguan, taida nasida ringgas marbarita, jala barani membela haporseaon ni nasida. Takkas ma mararga do hamu akka na poso di huria!​—Ps. 8:3.

¹² Alai adong do ra akka donganta na makkilala songon na so marguna do dirina di huria. Molo songon i do pakkilalaanta, taida ma aha na boi paposson rohatta na marguna do hita di huria.

13-14. Boasa adong piga-piga donganta na makkilala dang marguna nasida di huria?

¹³ Adong muse parsiajaran na paduahon na boi tadapot sian tudosan na dibahen si Paulus. Godang do donganta saonari na so pos rohana molo ibana marguna di huria. Didok si Paulus, “Aut sura didok pat, ‘Ala ndang tangan ahu, ndang ruas ni pamatang i ahu’, tutu do pat i ndang dohot ruas ni pamatang? Jala aut sura didok pinggol, ‘Ala ndang mata ahu, ndang  ruas ni pamatang i ahu’, tutu do pinggol i ndang dohot ruas ni pamatang?” (1 Kor. 12:15, 16) Aha do maksud ni si Paulus disi?

¹⁴ Molo torus do dibanding-bandingkon hamu dirimuna tu akka dongan na asing, boi do gabe didok rohamu dang marguna hamu di huria. Adong do ra akka donganta di huria na malo mangajari, malo mangatur tikki, manang burju mangapuli dohot patoguhon akka donganta na asing. Olo do ra didok rohamu dang boi diulahon hamu i songon nasida. Molo songon i do na dihilala hamu berarti na serep do rohamu. (Plp. 2:3) Alai manat ma hamu. Molo sai torus do dibanding-bandingkon hamu dirimuna tu akka dongan na asing, boi do gabe metmet rohamuna. Jala gabe dihilala hamu dang marguna hamu di huria. Aha do na boi mangurupi hamu pasidikkon pikkiran sisongon i?

15. Songon na tarsurat di 1 Korint 12:4-11, aha do na porlu taingot taringot kemampuan na adong di hita?

¹⁵ Marhite tondi parbadia, dilehon Jahowa do kemampuan tu akka halak Kristen di abad na parjolo. Alai dang sude mandapot kemampuan na sarupa. (Jaha 1 Korint 12:4-11.) Nang pe marasing-asing do kemampuan na dilehon Jahowa tu nasida, alai mararga do nasida sude di Jahowa. Suang songon i ma tong hita saonari. Nang pe dang sarupa sude kemampuanta, mararga do hita sude di Jahowa.

16. Aha do poda ni apostel Paulus na porlu taulahon?

¹⁶ Unang ma tabanding-bandingkon diritta tu akka dongan na asing. Alai taulahon ma poda na didok si Paulus, “Ganup ma halak mamparrohahon ulaonna be. Asa boi ibana marlas ni roha marhite na niulahonna i, ndang ala paimbar-imbarhon tu ulaon ni halak.”​—Gal. 6:4.

17. Aha do labana molo taihutton poda ni si Paulus?

¹⁷ Molo taihutton poda ni si Paulus, gabe boi ma taida kemampuan na adong di hita na so adong di halak na asing. Misalna, adong do ra sahalak sintua na so pola malo marjamita, alai malo do ibana mangajari halak tikki marbarita. Manang dang pola malo ibana mangatur tikki, alai ditanda halak do ibana  sintua na burju jala lambok. Lomo do roha ni akka dongan jonok tu ibana jala mangido poda ni Bibel sian ibana. Manang ditanda halak do ibana sahalak sintua na rade manamue. (Heb. 13:2, 16) Molo diboto hamu adong do kemampuanmuna na so adong di halak na asing, gabe pos ma rohamu marguna do hamu di huria. Jala dang mangiburu be hamu tu akka dongan na kemampuanna dang sarupa songon hamu.

18. Songon dia ma carana asa lam denggan hita di ulaon marbarita dohot mangajari?

¹⁸ Manang aha pe tugasta di huria, ikkon lam denggan do hita sude mangulahon tugasta i. Asa lam denggan mangulahon i, dilehon Jahowa do pelatihan tu hita marhite organisasina. Misalna, di parpunguan tonga pokan, dilatik do hita asa lam denggan di ulaon marbarita. Diulahon hamu do pelatihan naung didapot hamu sian parpunguan i?

19. Aha do na boi diulahon hamu asa boi dohot tu Sikkola tu Parbarita Harajaon?

¹⁹ Pelatihan na asing na dilehon Jahowa tu hita i ma Sikkola tu Parbarita Harajaon. Sude donganta na dohot tu dinas sepenuh waktu, na marumur 23 sahat tu 65 taon boi do dohot tu sikkola on. Olo do ra didok rohamu dang mungkin boi hamu dohot tu sikkola i. Alai unang ma i na sai dipikkiri hamu. Pikkirhon ma boasa lomo rohamuna naeng dohot tu sikkola i. Dung i, bahen ma rencana asa boi diihutton hamu persyaratanna. Nang pe dihilala hamu songon na so mungkin do on diulahon hamu, alai molo berupaya do hamu, pasti diurupi Jahowa do hamu lao mangulahon i.

20. Aha do na boi taparsiajari sian Rom 12:6-8?

²⁰ Parsiajaran na patoluhon na boi tadapot sian tudosan na dibahen si Paulus disurat do di Rom 12:6-8. (Jaha.) Di ayat i dipatorang si Paulus do muse marasing-asing do kemampuan ni ganup halak di huria. Alai dipatakkas ibana do, manang aha pe kemampuanta ikkon tapakke do i lao patoguhon huria.

21-22. Aha do na boi taparsiajari sian pengalaman ni si Robert dohot si Felice?

²¹ Parrohahon ma pengalaman ni sahalak donganta na margoar si Robert. Hea do ibana melayani di negara na asing. Alai dukkon i, ditugashon ma ibana melayani di Betel di negarana. Nang pe nga dipapos rohana dang adong na sala na diulahon ibana, alai didok ibana do, “Saleleng marbulan-bulan, sai lungun do rohakku. Sai hupikkiri do, aha do na sala na huulahon di tugashu na sebelumna. Sipata, tarpikkir do au naeng kaluar sian Betel.” Boha do carana boi ibana marlas ni roha muse? Didok sahalak sintua do tu ibana, dilatik Jahowa do hita di tugasta na sebelumna asa rade hita mangulahon tugasta saonari. Gabe diboto si Robert ma, dang porlu be sai diingot ibana aha naung salpu. Alai ikkon fokus do ibana tu aha na boi diulahon ibana saonari.

²² Donganta si Felice Episcopo pe mangadopi situasi na sarupa. Lulus do donganta on dohot istrina sian Sikkola Gilead di taon 1956, jala ditugashon do ibana gabe pengawas wilayah di Bolivia. Alai di taon 1964, tubu ma ianakkon ni nasida. Didok si Felice, “Borat do rohanami maninggalhon tugasnami na sebelumna i. Adong do sampe sataon sai husalahon dirikku sandiri. Alai ala diurupi Jahowa, gabe boi ma hupauba cara marpikkirhu jala fokus tu tanggung jawabku saonari gabe natua-tua.” Sarupa do situasimuna songon si Robert manang si Felice? Olo do metmet rohamu ala dang songon najolo be tugasmu saonari? Molo songon i do pakkilalaanmu,  boi do hamu marlas ni roha muse molo dipauba hamu cara marpikkirmu. Jala fokus ma hamu tu tugas na boi diulahon hamu saonari lao manomba Jahowa. Toktong ma ringgas jala pakke hamu ma kemampuanmuna lao mangurupi akka dongan. Molo diulahon hamu i, gabe las ma rohamuna ala dipatogu hamu do huria.

23. Aha do na porlu tapikkirhon, jala aha do na lao taulas di parsiajaran na mangihut?

²³ Mararga do hita sude di Jahowa. Lomo do rohana asa tahilala molo hita memang bagian sian keluargana. Tapikkirhon ma aha na boi taulahon lao patoguhon akka dongan di huria, jala berupaya ma hita mangulahon i. Molo taulahon i, gabe pos ma rohatta mararga do hita di huria. Alai songon dia caratta mangida akka donganta na asing di huria? Songon dia caratta patuduhon na taargai do nasida? Di parsiajaran na mangihut, lao taulas ma taringot i.