1. Aha do na dilehon Jahowa tu sude naposona?

HOLONG do roha ni Jahowa tu sude naposona. I do alana dilehon Ibana do tu hita tugas na massai arga di huria. Nang pe marasing-asing tugasta di huria, alai sude do hita mararga jala porlu do hita marsiurupan. Diurupi apostel Paulus do hita mandapot parsiajaran na rikkot taringot i. Aha ma i?

2. Songon na dipaboa di Epesus 4:16, boasa ikkon kerjasama hita dohot akka donganta jala taargai nasida?

² Songon na didok di ayat tema ni artikel on, takkas do dipaboa si Paulus dang adong naposo ni Jahowa na boi mandok tu donganna, “Ndang porlu ho di ahu!” (1 Kor. 12:21) Asa boi mardame huria, ikkon taargai do akka donganta jala ikkon kerjasama do hita. (Jaha Epesus 4:16.) Molo marsada hita jala tapatudu holong tu akka donganta, gabe lam togu ma huria.

3. Aha do na lao taulas di parsiajaran on?

³ Songon dia do caratta patuduhon na taargai do akka donganta di huria? Di parsiajaran on lao taulas ma, boha do carana akka sintua patuduhon na diargai nasida do sintua na asing. Dung i taulas ma songon dia hita patuduhon na taargai do akka donganta na so marhasohotan. Jala taulas ma songon dia hita boi patuduhon na taargai do akka donganta na so pola malo makkatai di bahasatta.

4. Aha do poda ni si Paulus na disurat di Rom 12:10 na ikkon diihutton akka sintua?

⁴ Sude do akka sintua di huria dilantik marhite tondi parbadia ni Jahowa. Alai marasing-asing do kemampuan ni nasida. (1 Kor. 12:17, 18) Adong do na baru dilantik gabe sintua. Jadi molo dibandingkon tu sintua na asing dang pola godang dope ra pengalamanna. Manang adong do ra sintua naung matua manang na marsahit. Jadi dang pola godang be na boi diulahon ibana. Alai nang pe songon i, dang boi sahalak sintua mandok tu sintua na asing, “Ndang porlu ho di ahu.” Ikkon diihutton akka sintua do poda ni si Paulus na disurat di Rom 12:10.​—Jaha.

5. Songon dia do sintua patuduhon na diargai ibana do sintua na asing, jala boasa ikkon diulahon ibana i?

⁵ Ikkon ditangihon akka sintua do pandapot ni sintua na asing. On patuduhon na diargai nasida do donganna i. Rikkot do on diulahon akka sintua tarlumobi tikki rapat nasida lao mangulas parsoalan na serius. Boasa? Parrohahon ma aha na didok di Menara Pengawal seri 53 taon 1988. Didok disi, “Diboto sintua do marhite tondi parbadia, boi do diurupi Jesus sintua na dia pe mandapot petunjuk sian Bibel lao menangani sada parsoalan manang mambahen keputusan na rikkot di huria. (Ul. 15:6-15) Jadi diurupi tondi parbadia do sude sintua, dang holan sada.”

6. Songon dia do akka sintua patuduhon na kerjasama do nasida, jala aha do pengaruhna tu huria?

⁶ Sahalak sintua na mangargai sintua na asing mamboto, dang ikkon ibana na parjolo makkatai tikki di rapat sintua. Jala dang holan ibana na sai torus makkatai di rapat i. Manang didok rohana holan pandapotna na sittong. Alai serep do rohana paboahon pandapotna. Olo do ibana manangihon pandapot ni sintua na asing. Jala na uppetting, olo do ibana rap mangulas dohot sintua na asing prinsip na adong di Bibel, dohot petunjuk sian “naposo haposan”. (Mat. 24:45-47) Molo olo do akka sintua patuduhon holong jala mangargai sintua na asing tikki rapat, diurupi tondi parbadia ma nasida lao mambahen keputusan na patoguhon huria.​—Jak. 3:17, 18.

7. Songon dia do cara ni Jesus mangida akka na so marhasohotan?

⁷ Di huria godang do akka donganta naung marhasohotan dohot na marianakkon. Alai godang do tong akka donganta na so marhasohotan. Boha do caratta mangida nasida? Tatiru ma songon dia cara ni Jesus mangida nasida. Tikki di tano on dang marhasohotan Jesus. Fokus do ibana mangulahon tugasna. Dang hea didok Jesus molo sahalak Kristen ikkon marhasohotan manang na dang. Alai didok ibana adong do memang piga-piga halak Kristen na mamillit dang marhasohotan. (Mat. 19:11, 12) Diargai Jesus do akka na so marhasohotan. Dang leas rohana mangida nasida. Manang dang hea didok rohana dang sonang ngolu ni akka na so marhasohotan i.

8. Songon na didok di 1 Korint 7:7-9, aha do na dijujui si Paulus tu halak Kristen?

⁸ Songon Jesus, apostel Paulus pe dang marhasohotan saleleng mangulahon tugasna. Alai dang gabe didok si Paulus sala do molo marhasohotan sahalak Kristen. Diboto si Paulus ganup halak ikkon mambahen keputusanna sandiri do taringot on. Alai dijujui si Paulus do memang halak Kristen asa marhobas tu Jahowa alai toktong dang marhasohotan. (Jaha 1 Korint 7:7-9.) Dang leas roha ni si Paulus mangida akka na so marhasohotan. Gariada dipillit ibana do si Timoteus na so marhasohotan lao mangulahon tugas na rikkot. * (Plp. 2:19-22) Jadi unang ma didok rohatta dang boi sahalak donganta bawa mandapot tugas na rikkot di huria, holan ala na so marhasohotan ibana.​—1 Kor. 7:32-35, 38.

9. Aha do pandangan na sittong taringot akka halak na marhasohotan manang na dang?

⁹ Dang hea didok Jesus dohot si Paulus, ikkon marhasohotan do sahalak Kristen manang na dang. Jadi aha do pandangan na sittong taringot akka halak na marhasohotan manang na dang? Dipaboa do alusna di Menara Pengawal 1 Oktober 2012. Didok disi, “Sasittongna, [marhasohotan pe sasahalak manang na dang] tong do silehon-lehon sian Jahowa i. . . . Dang leas roha ni Jahowa mangida [akka halak na so marhasohotan].” Jadi ikkon taargai do akka donganta na so marhasohotan di huria.

10. Songon dia do caratta patuduhon na taargai do akka donganta na so marhasohotan?

¹⁰ Songon dia do caratta patuduhon na taargai  do akka donganta na so marhasohotan? Taingot ma, adong do memang akka donganta na mambahen keputusan dang marhasohotan. Na asing, olo do marhasohotan alai dang dapotna dope pasangan na cocok. Na deba dang marhasohotan ala nga monding pasanganna. Manang songon dia pe situasina, porlu do sukkunonta boasa nasida dang marhasohotan? Manang porlu do taurupi nasida mangalului pasangan? Daong. Memang adong do ra piga-piga donganta na mangido asa diurupi nasida mangalului pasangan. Alai boha ma perasaan ni akka donganta na so marhasohotan, molo pittor talului pasangan tu ibana hape dang dipangido pangurupionta? (1 Tes. 4:11; 1 Tim. 5:13) Taparrohahon ma aha na didok akka donganta na so marhasohotan taringot on.

11-12. Songon dia do hita boi gabe mambahen metmet roha ni akka donganta na so marhasohotan?

¹¹ Sahalak pengawas wilayah na lajang mandok, godang do labana molo dang marhasohotan. Alai olo do gabe metmet rohana molo adong akka dongan na manukkun tu ibana, “Boasa dang mangoli dope ho?” Sahalak donganta bawa di Betel pe mandok, “Sipata olo do gabe asi roha ni akka dongan mangida akka na so marhasohotan. Jadi molo adong akka dongan na so marhasohotan, dang songon silehon-lehon sian Jahowa be i dihilala ibana. Alai gabe boban na borat ma i di ibana.”

¹² Sahalak donganta borua di Betel pe mandok, “Adong do piga-piga donganta na marpikkir, sude akka donganta na so marhasohotan pasti mangalului pasangan. Manang didok roha ni nasida molo adong acara, pasti disi do kesempatan ni akka na lajang i mangalului pasangan. Di sada tikki, hea ma au lao tu luat na asing lao mangulahon tugas Betel. Menginap ma au di jabu ni sahalak donganta borua. Didok ibana adong do dua donganta bawa na lajang di huriana na seumuran dohot au. Memang didok ibana dang na mangalului pasangan ibana di au. Alai dung sahat hami di parpunguan, pittor diboan ibana do au pajuppang dohot dua donganta bawa i. Gabe songon na so tabo ma situasina di hami na tolu.”

13. Sitiruon ni ise do na patoguhon roha ni sahalak donganta borua na lajang?

¹³ Adong do muse sahalak donganta borua na lajang di Betel na mandok, “Adong do hutanda piga-piga donganta perintis na matua na so marhasohotan. Seimbang do pandangan ni nasida, fokus tu tujuanna, lomo rohana mangurupi na asing jala sai marlas ni roha. Massai arga do nasida di huria. Nang pe dang marhasohotan nasida, alai seimbang do pandanganna. Dang dihilala nasida, unjago do dirina ala dang marhasohotan. Manang gabe lungun rohana ala dang adong pasanganna.” Pasti las do rohatta molo sude akka dongan di huria mangargai perasaan ni na asing. Pos do rohamu, dang adong akka dongan na leas rohana mangida hamu manang mangiburu tu hamu. Jala dang adong na marpikkir, unjago do dirimuna sian nasida. Manang gabe dihalupahon nasida hamu. Pos do rohamu holong do roha ni akka dongan tu hamu.

14. Songon dia caratta patuduhon na taargai do akka donganta na so marhasohotan?

¹⁴ Pasti las do roha ni akka donganta na so marhasohotan molo taargai nasida alani parange ni nasida na denggan. Jala dang leas rohatta mangida nasida nang pe dang marhasohotan nasida. Ikkon taargai do nasida ala toktong setia manomba Jahowa. Molo taulahon i, dang adong be akka donganta na so marhasohotan na makkilala dang marguna nasida di huria. (1 Kor. 12:21) Alai gabe diboto nasida ma, arga do nasida di huria.

15. Penyesuaian aha do na ikkon dibahen akka donganta asa boi mangalehon na dumenggan di ulaon marbarita?

¹⁵ Di piga-piga taon na parpudi on, godang do akka donganta na marsiajar bahasa na asing asa boi mangalehon na dumenggan tu Jahowa di ulaon marbarita. Godang do penyesuaian na ikkon dibahen nasida lao mangulahon i. Olo do nasida pinda sian huria di bahasa ni nasida sandiri asa boi mangurupi huria di bahasa na asing na makkaporluhon parbarita. (Ul. 16:9) Nasida sandiri do na mambahen keputusan i asa boi mangalehon gumodang tikki dohot gogo lao marhobas tu Jahowa. Nang pe porlu do ra martaon-taon asa boi nasida malo makkatai di bahasa i, alai balga do pengaruh ni nasida tu huria. Akka parange ni nasida na denggan dohot pengalaman ni nasida boi do patoguhon huria. Taargai do akka donganta on ala olo mambahen pengorbanan.

16. Aha do na porlu diingot akka sintua tikki manottuhon boi do sahalak donganta gabe sintua manang hamba pelayanan?

¹⁶ Dang boi akka sintua mamutushon molo sahalak donganta dang boi gabe sintua manang hamba pelayanan, holan ala dang malo dope ibana makkatai di bahasa na dipakke di huria i. Alai dibahen nasida do penilaian hombar tu persyaratan na adong di Bibel taringot tu sintua dohot hamba pelayanan. Jadi dibahen akka sintua pe keputusan i, dang alani kemampuan bahasa ni donganta i.​—1 Tim. 3:1-10, 12, 13; Tit. 1:5-9.

17. Keputusan aha do na porlu dibahen natua-tua tikki pinda keluargana tu negara na asing?

¹⁷ Adong do ra piga-piga keluarga Kristen na pinda tu negara na asing ala situasi na maol di negarana manang lao mangalului karejo. Biasana, gabe marsikkola do gellengna di sikkola na mamakke bahasa ni negara i. Natua-tuana pe ikkon marsiajar bahasa i do ra asa boi mandapot karejo. Boha ma molo di negara i adong huria manang kelompok na mamakke bahasa ni nasida? Tu huria na dia do nasida ikkon margabung? Tu huria na mamakke bahasa ni negara i do, manang tu huria na mamakke bahasa ni nasida sandiri?

18. Hombar tu Galatia 6:5, songon dia do caratta patuduhon na taargai do keputusan na dibahen kepala keluarga?

¹⁸ Ikkon kepala keluarga do na mamutushon tu huria na dia keluargana margabung. Dang boi halak na asing na manottuhon i. Ikkon ibana sandiri do na manottuhon aha na dumenggan tu keluargana. (Jaha Galatia 6:5.) Manang aha pe keputusan na dibahen kepala keluarga i, ikkon taargai do i. Las ma rohatta manjakkon keluargana di huriatta.​—Rom 15:7.

19. Keputusan aha do na ikkon jolo dipikkiri jala ditangiakkon kepala keluarga?

¹⁹ Di situasi na asing, adong do ra sada keluarga na margabung di huria na mamakke bahasa na diattusi natua-tuana. Alai dang pola  diattusi ianakkonna bahasa i. Olo do ra gabe maol ianakkonna mangattusi aha na diulas di parpunguan jala gabe maol ibana jonok tu Jahowa. Boasa boi songon i? Alana bahasa negara i do na dipakke nasida di sikkola, dang na bahasa ni natua-tuana i. Molo songon i do situasina, ikkon martangiang do kepala keluarga jala ikkon manat do dipikkiri ibana aha na ikkon diulahon nasida asa boi jonok ianakkonna tu Jahowa dohot tu organisasina. Misalna, ikkon diurupi natua-tuana do ra ianakkonna asa lam malo makkatai di bahasa ni nasida. Manang ikkon pinda do ra nasida tu huria na mamakke bahasa na diattusi ianakkonna. Alai, tu huria na dia pe ujungna keluarga i margabung, ikkon dijakkon jala diargai akka dongan na di huria i do nasida.

20. Boha do caratta patuduhon na taargai do akka donganta na marsiajar bahasa na baru?

²⁰ Godang do akka donganta na berupaya marsiajar bahasa na baru. Jadi, olo do ra gabe maol dihilala nasida paboahon aha na adong di rohana. Alai unang ma kemampuan bahasa ni nasida na taparrohahon. Taida ma balga ni holong ni nasida tu Jahowa dohot upaya ni nasida lao manomba Ibana. Molo taida akka parange na denggan sian nasida, gabe lam taargai ma akka donganta on. Unang ma gabe tadok tu nasida, ‘Ndang porlu ho di hami’, holan ala na so malo nasida makkatai di bahasatta.

21-22. Aha do naung dilehon Jahowa tu hita sude?

²¹ Nungnga dilehon Jahowa tu hita sude tugas na massai arga di huria. Dang soal hita bawa manang borua, na marhasohotan manang na dang, na poso manang na matua, malo makkatai di sada bahasa manang na dang, mararga do hita sude di Jahowa dohot di akka donganta.​—Rom 12:4, 5; Kol. 3:10, 11.

²² Sai anggiat ma taulahon parsiajaran naung tadapot sian tudosan ni si Paulus taringot pamatang. Molo taulahon i, gabe taboto ma aha na boi taulahon lao patoguhon akka donganta di huria. Jala on mambahen hita gabe lam makkaholongi jala mangargai nasida.