1. Songon dia do si Abraham patuduhon pos ni rohana tu hatigoran ni Jahowa? (Ida gombar di mula ni parsiajaran.)

”TUNG na so uhum ma bahenon ni Siuhumi liat portibi on?” (1 Mus. 18:25) Ndang na ganggu roha ni si Abraham umbahen na disungkun ibana songon i. Alai sungkunsungkunna i patuduhon pos do rohana tu hatigoran ni Jahowa na manguhumi Sodom dohot Gumora. Pos rohana, ndang olo Jahowa ”mambunu na tigor rap dohot parjahat” jala ndang hea ro tu pingkiran ni si Abraham songon i. Didok Jahowa ma taringot diriNa, ”Tau partanobatoan do Ibana, na so hasurahan di pambahenanna, ai na tigor do luhut dalanna, sihaposan do Debata, ndang adong hageduhonna, na tigor jala na bonar do Ibana.”—5 Mus. 31:19; 32:4.

2. Boasa boi tadok molo Jahowa ndang olo mangulahon na so tigor?

² Boasa pos roha ni si Abraham na sai tigor do na diulahon Jahowa? Alana, Jahowa do sitiruon na mansai denggan taringot uhum dohot hatigoran. Sasintongna,  hata ”uhum” dohot ”hatigoran” jotjot do dipangke di Angka Buku Heber, alana dos do lapatan ni i. Alani i, ala sai na sintong do na diulahon Jahowa, hombar tu hatigoranNa ma Ibana manguhumi. Didok di Bibel, ”Ibana mangkaholongi hatigoran dohot uhum.”—Ps. 33:5.

3. Paboa ma angka na masa di portibi on na patuduhon godang parniulaon na so tigor.

³ Las do rohanta mamboto, sai na tigor do ulaon ni Jahowa. Alai, jotjot do masa parniulaon na so tigor di portibi on. Umpamana, adong do na leleng dipenjarahon, hape ndang adong hasalaanna. Alai ala adong bukti, gabe tarboto ma ndang adong sala ni sasahalak i. Parniulaon sisongon on boi mambahen sasahalak gabe tarrimas jala stres. Alai, adong do sada parniulaon na so tigor na maol taadopi. Parniulaon aha do i?

4. Aha do na boi manguji haporseaonta?

⁴ Ingkon taadopi do parniulaon na so tigor na dibahen halak na asing. Alai, diuji do haporseaonta tingki dongan sahaporseaon mambahen na so tigor tu hita. Songon dia do hita maradophon i? Gabe gale do partondionta?

5. Sipata, boasa boi adong parniulaon na so tigor di huria?

⁵ Mardosa do hita jala boi mambahen hasalaan. Alani i, olo do sipata adong mambahen na so tigor tu hita manang hita na mambahen na so tigor tu dongan na di huria. (1 Joh. 1:8) Nang pe ndang jotjot masa i, unang ma songgot rohanta manang gabe gale partondionta molo masa sisongon i. Dilehon Jahowa do poda di Bibel laho mangurupi hita tongtong marsihohot nang pe adong dongan sahaporseaon mambahen na so tigor tu hita.—Ps. 55:13-15.

6, 7. Parniulaon na so tigor aha do na diadopi sahalak donganta di huria, jala parange aha do na mangurupi ibana?

⁶ Parrohahon ma pengalaman ni si Willi Diehl. Mulai taon 1931, Donganta si Diehl mangurupi di Betel Swiss, di kota Bern. Taon 1946, dohot ma ibana tu kelas na paualuhon di Singkola Gilead di New York, Amerika Serikat. Dung wisuda, disuru ma ibana marhobas di ulaon wilayah di Swiss. Bulan Mei 1949, dipaboa si Diehl ma tu kantor cabang Swiss, naeng marhasohotan ibana. Dung i, dipaboa ma tu ibana ndang mandapot hak na sumurung be ibana. Holan gabe perintis ma ibana dipaloas. Didok si Diehl, ”Ndang dipaloas be ahu marjamita. Ndang adong na olo manjalang hami, jala gabe songon halak na dipabali ma hami di adopan ni nasida.”

⁷ Songon dia do si Diehl mangadopi i? Didok ibana, ”Diboto hami, ala ndang sala marhasohotan, tongtong do hami martangiang jala marhaposan tu Jahowa.” Nang pe ndang denggan pangantusion ni pigapiga donganta taringot pardongansaripeon, alai dipadenggan ma pangantusion ni nasida. Dung i, didapot si Diehl ma muse  sude hak na sumurungna i. Dipasupasu Jahowa do ibana ala marsihohot. * Tasungkun ma dirinta: ’Molo adong na mambahen na so tigor tu ahu, sabar do ahu jala paimahon Jahowa padengganhon i? Manang, marhaposan tu diringku do ahu jala mangalo na so tigor i?’—Poda 11:2; jaha Mika 7:7.

8. Boasa ndang denggan molo pintor tadok hita manang halak na asing mangkilala pangkorhon ni parniulaon na so tigor?

⁸ Molo didok hamu adong na mambahen na so tigor tu hamu di huria, ra sala do hatamuna i. Boasa? Jolma na mardosa do hita jala sipata sala do pangantusionta tu pigapiga situasi. Ra, ndang taboto aha na masa. Alai nang pe tutu pangantusionta i, tangiangkon ma i tu Jahowa, marhaposan tu Ibana, jala tongtong marsihohot. On mangurupi hita asa unang ”marmungutmungut” tu Jahowa.—Jaha Poda 19:3.

9. Ise do sitiruon na laho taulas di artikel on dohot di artikel na mangihut?

⁹ Marsiajar ma hita sian tolu naposo ni Jahowa na mangkilala pangkorhon ni parniulaon na so tigor. Di artikel on, taulas ma taringot pengalaman ni si Josep dohot hahana. Di artikel na mangihut, taulas ma songon dia Jahowa maradophon Raja Ahab, jala songon dia pengalaman ni apostel Petrus di Antiokia Siria. Tingki taulas angka sitiruon on, parrohahon ma songon dia hamu marhaposan tu Jahowa jala manjaga paralealeonmu dohot Ibana, tarlumobi molo adong na mambahen na so tigor tu hamu.

10, 11. (a) Situasi aha do na diadopi si Josep? (b) Tingki di penjara, aha do na diulahon si Josep?

¹⁰ Dihilala si Josep do pangkorhon ni parniulaon na so tigor sian halak na so ditanda. Alai, na mambahen lam hansit pangkilalaanna, i ma parniulaon na so tigor na dibahen hahana. Tingki marumur 17 taon, diboan angka hahana ma ibana jala digadis gabe hatoban di Misir. (1 Mus. 37:23-28; 42:21) Di Misir, didok do si Josep naeng mangulahon parmainanon tu sahalak borua. Gabe dipenjara ma ibana, nang pe ndang diulahon ibana songon i. (1 Mus. 39:17-20) Hansit do dihilala si Josep gabe hatoban, jala dipenjarahon hirahira 13 taon. Molo adong dongan sahaporseaon mambahen na so tigor tu hita, aha do parsiajaran sian si Josep?

¹¹ Tingki di penjara si Josep, sitahu anggur ni si Firaun pe dipenjara do.  Sada tingki, marnipi ma sitahu anggur i, jala diurupi Jahowa do si Josep patorangkon lapatan ni nipi i. Didok si Josep, laho malua nama sitahu anggur i sian penjara, jala karejo muse tu si Firaun. Dipatorang si Josep ma tu baoa i boasa dipenjara ibana. Dapotta do parsiajaran na ringkot, ndang holan sian na dihatahon si Josep, alai sian na so dihatahon ibana pe.—1 Mus. 40:5-13.

12, 13. (a) Sian dia do taboto molo si Josep ndang sai hohom maradophon situasina? (b) Aha do na so dipaboa si Josep tu sitahu anggur i?

¹² Jaha 1 Musa 40:14, 15. Ingot ma, ”na tarpangus [ditangkup]” do si Josep. Hata na di ayat on, lapatanna diculik. Sasintongna, ndang adong sala ni si Josep. Dipangido ibana ma tu sitahu anggur i asa paboahon on tu si Firaun. Aha do na tinujuna? Didok ibana, ”Asa diparuar ahu sian bagas on.”

¹³ Sai hohom do si Josep maradophon situasina i? Ndang songon i! Diboto si Josep, godang angka na so tigor na dibahen tu dirina. Alani i do umbahen na dipatorang ibana tu sitahu anggur i. Hirim rohana asa diurupi. Alai ingot ma, ndang disurat di  Bibel jala ndang dipaboa si Josep tu si Firaun manang tu ise pe, na digadis hahana ibana. Gariada, tingki naeng mardame angka hahana tu si Josep di Misir, dijangkon si Firaun do nasida jala ditogihon asa tading di Misir, mangkilala ”na denggan ni sandok tano” i.—1 Mus. 45:16-20.

14. Tingki tahilala parniulaon na so tigor di huria, parange aha do na mangurupi hita asa unang paboahon i tu na asing?

¹⁴ Molo didok rohanta adong mambahen na so tigor tu hita di huria, ingkon manat do hita asa unang paboahon i tu na asing. Alai, molo adong donganta mangulahon dosa na balga, ingkon tapangido pangurupion sian sintua jala tapaboa tu nasida. (3 Mus. 5:1) Alai molo situasi i ndang dosa na balga, boi do hita mardame dohot donganta i jala unang tapaboa taringot i tu ise pe. (Jaha Mateus 5:23, 24; 18:15.) Molo masa sisongon i, sai marsihohot jala ihuthon ma prinsip ni Bibel. Olo do ra ndang taantusi situasi na masa, jala sasintongna ndang tu hita parniulaon na so tigor i dibahen. Ingot ma, ndang soal hita na sintong manang na ndang, mandok hata na pahansithon roha mambahen lam maol pasaehon parsoalan i. Tahilala ma las ni roha ala ndang tadok angka na so denggan taringot tu dongan sahaporseaonta! Molo marsihohot tu Jahowa dohot tu dongan sahaporseaon, boi ma tapasiding hasalaan sisongon i. Panurat ni psalmen mandok, adong do ”halak na sun burju marpangalaho”. Halak sisongon i ma ”na so olo mangkata tundal, na so olo mambahen hajahaton tu donganna”.—Ps. 15:2, 3; Jak. 3:5.

15. Aha do laba na dapot ni si Josep sian paralealeonna tu Jahowa?

¹⁵ Adong do parsiajaran na asing sian si Josep. Nang pe 13 taon mangkilala pangkorhon ni parniulaon na so tigor, tongtong do si Josep marhaposan tu Jahowa. (1 Mus. 45:5-8) Ndang hea disalahon ibana Jahowa. Tutu do, ndang dihalupahon si Josep sitaononna i, alai ndang gabe jut rohana. Na rumingkot, ndang dipaloas ibana hahurangan dohot hasalaan ni na asing mambahen ibana dao sian Jahowa. Ala marsihohot tu Jahowa, boi ma diida si Josep songon dia Jahowa patuduhon hatigoranNa jala mamasumasu ibana dohot keluargana.

16. Molo adong mambahen na so tigor tu hita di huria, boasa ingkon sai jonok hita tu Jahowa?

¹⁶ Tongtong ma taingot jala tajaga paralealeonta tu Jahowa. Unang ma tapaloas hasalaan dohot hahurangan  ni donganta mambahen hita dao sian Jahowa dohot huria. (Rom 8:38, 39) Molo adong mambahen na so tigor tu hita di huria, tatiru ma si Josep jala sai jonok ma tu Jahowa. Tiru ma songon dia pangkilalaan ni Jahowa taringot on. Molo nunga marsitutu hita pasaehon parsoalan i mangihuthon prinsip ni Bibel, tapasahat ma i tu Jahowa. Pos ma rohanta, padengganonNa do angka parsoalan di tingki naung ditontuhon.

17. Songon dia do hita patuduhon molo hita marhaposan tu ”Siuhumi liat portibi on”?

¹⁷ Ala di portibi na jahat on dope hita mangolu, ingkon taadopi do angka na so tigor. Sipata, olo do hita manang donganta mangkilala sisongon i di huria. Alai, unang ma gabe gale partondionmuna. (Ps. 119:165) Alani i, tongtong ma marsihohot tu Debata, martangiang, jala marhaposan tu Ibana. Ingot ma, alani hahuranganta, olo do ra ndang taantusi aha na masa. Tatiru ma si Josep jala unang ma paboahon angka hatorangan na so denggan na mambahen maol pasaehon parsoalan i. Tongtong ma marhaposan tu Jahowa, unang tu diri sandiri. Paima ma Ibana pasaehon parsoalan i. Dung i, dipasupasu Jahowa ma hamu songon si Josep. Pos ma rohamu tu Jahowa, ”Siuhumi liat portibi on”, na tongtong mangulahon na sintong, jala ”na tigor do luhut dalanna”.—1 Mus. 18:25; 5 Mus. 32:4.

18. Aha do na laho taulas di artikel na mangihut?

¹⁸ Di artikel na mangihut, taulas ma taringot dua naposo ni Debata na mangkilala pangkorhon ni parniulaon na so tigor. Jala on boi mambahen hita mangantusi songon dia serep ni roha dohot asi ni roha mangurupi hita maniru hatigoran na dipatudu Debata Jahowa.