Lam Ringgas ma Hita Masipatoguan
“Masiantoan ma hita . . . , tung masipaingotan ma hita, jala lam i ma nian, ala lam jonok diida hamu ari i!”—HEB. 10:24, 25.
1. Boasa si Paulus manjujui halak Kristen di abad na parjolo asa lam ringgas masipatoguan?
DIPASINGOT si Paulus do halak Kristen di abad na parjolo. Didok ibana, “Masiantoan ma hita, masipajujuan tu haholongon dohot tu angka ulaon na denggan! Unang tatadingkon parpunguanta hian, songon na hinasomalhon ni na deba; tung masipaingotan ma hita, jala lam i ma nian, ala lam jonok diida hamu ari i!” (Heb. 10:24, 25) Ra, sungkunsungkun do roha ni nasida, boasa dijujui si Paulus asa lam ringgas nasida masipatoguan. Alai dung pigapiga taon, gabe diantusi nasida ma, nunga jonok panguhuman sian Jahowa tu Jerusalem. Ingkon ditadingkon nasida do kota i, songon naung hea didok Jesus. (Luk. 21:20-22; Ul. 2:19, 20) Panguhuman i masa di taon 70 M, i ma tingki halak Rom manaluhon Jerusalem.
2. Boasa hita ingkon lam ringgas masipatoguan?
2 Suang songon i ma situasinta saonari. Nunga jonok be ‘ari ni Jahowa na bolon jala na songkal sahali’. (Joel 2:11) Disurat panurirang Sepania do muse taringot tingkinta saonari, “Jonok na ma ari ni Jahowa na bolon i; jonok na ma i, jala silu situtu do i ro.” (Sep. 1:14) Alani i, ingkon “masiantoan ma hita, masipajujuan tu haholongon dohot tu angka ulaon na denggan!” (Heb. 10:24) Ingkon lam ringgas ma tasarihon angka donganta, asa boi hita masipatoguan.
ISE DO NA PORLU DIPATOGU?
3. Aha do na didok si Paulus taringot masipatoguan? (Ida gombar di mula ni parsiajaran.)
3 “Holsoholso di bagasan roha ni baoa patungki ibana, alai anggo hata na denggan pahinsahon rohana muse.” (Poda 12:25) Sude do hita porlu dipatogu. Tangkas do dipaboa si Paulus molo angka halak na jotjot patoguhon donganna pe porlu do dipatogu. Disurathon ibana do tu angka dongan na di Rom, “Ai masihol do ahu marnida hamu, anggiat tung tarlehon ahu tu hamu deba silehonlehon partondion, patoguhon rohamuna. On do tahe: Naeng dapotan hiras ni roha nang ahu sian hamu hinorhon ni haporseaonta bé.” (Rom 1:11, 12) Jadi, sahalak apostel songon si Paulus pe porlu do dipatogu.—Jaha Rom 15:30-32.
4, 5. Ise do na porlu tapatogu, jala boasa?
4 Saonari on, hita pe boi do patoguhon roha ni angka dongan na mangalehon gumodang tingkina tu Jahowa, songon angka perintis. Godang do sian nasida na marsitutu asa tongtong boi merintis. Songon i nang angka anggota Betel, pengawas wilayah dohot tungganeboruna, dohot angka na mangurupi di kantor penerjemahan. Godang do na ingkon ditadingkon nasida asa boi mangalehon gumodang tingkina tu Jahowa. Alani i, porlu do tapatogu nasida. Godang do muse angka dongan na so merintis be, alani pigapiga situasi. Tontu nasida pe las do rohana molo dipatogu.
5 Ise do muse na porlu tapatogu? Angka donganta na so marhasohotan, ala mangoloi Jahowa asa marhasohotan holan tu halak Kristen. (1 Kor. 7:39) Dipatogu do tungganeboru molo dipaboa tungganedolina holong ni rohana jala dipuji angka ulaonna. (Poda 31:28, 31) Angka donganta na susa alani paraloan manang na marsahit pe porlu do tapatogu. (2 Tes. 1:3-5) Lomo do roha ni Jahowa dohot Jesus mangapuli naposoNa na marsihohot.—Jaha 2 Tessalonik 2:16, 17.
ANGKA SINTUA BOI PATOGUHON HITA
6. Aha do na boi taparsiajari sian angka sintua songon na disurat di Jesaya 32:1, 2?
6 Jaha Jesaya 32:1, 2. Hita saonari mangolu di tingki na susa. Alani i, mura do gabe lungun jala metmet rohanta. Dipangke Jesus do angka donganta na miniahan dohot angka “induk”, i ma angka sintua na laho patoguhon hita. Angka sintua on ndang na laho “mangarajai” haporseaonta, alai na gabe “pangurupi” do nasida asa las rohanta. Lomo do roha ni nasida mangurupi hita asa marlas ni roha jala tongtong marsihohot.—2 Kor. 1:24.
7, 8. Songon dia angka sintua patoguhon angka dongan marhite pangkataion dohot ulaonna?
7 Angka sintua boi maniru apostel Paulus na tongtong patoguhon angka donganna. Ditongos ibana do surat tu halak Kristen na di Tessalonik na susa alani paraloan. Disi didok, “Songon i do sian sihol ni rohanami di hamu 1 Tes. 2:8.
huhalashon hami do mangalehon tu hamu barita na uli na sian Debata; lobi tahe, dohot ma antong dirinami, ala naung huhaholongi hami hamu.”—8 Angka sintua boi patoguhon na asing marhite pangkataion. Alai cukup do holan i? Didok si Paulus do tu angka sintua di Epesus, “Ingkon urupanta do angka dongan na gale. Ingot hamu ma hata na nidok ni Tuhan Jesus, ai Ibana sandiri do mandok: ‘Martuaan do halak na mangalehon sian na manjalo.’” (Ul. 20:35) Rade do si Paulus mangulahon na dumenggan laho mangurupi angka donganna. Tarida do i sian pambahenanna. (2 Kor. 12:15) Suang songon i ma, angka sintua pe boi patoguhon jala mangapuli angka dongan. Jala ndang holan hata alai marhite parniulaon. On patuduhon na tutu do nasida manarihon hita.—1 Kor. 14:3.
9. Songon dia angka sintua boi denggan mangalehon sipasingot?
9 Laho patoguhon angka dongan, dilehon angka sintua do sipasingot. Boi do nasida marsiajar sian Bibel asa denggan mangulahon i. Gabe sitiruon na denggan do Jesus taringot on, i ma tingki ibana mangalehon poda tu angka huria di Asia Kecil dung hehe ibana sian hamatean. Adong do sipasingot na serius tu huria Epesus, Pergamos, dohot Tiatira. Alai andorang so dilehon sipasingot i, dipujihon Jesus do angka na denggan sian nasida. (Pgk. 2:1-5, 12, 13, 18, 19) Didok Jesus do tu huria di Laodikia, “Ai nasa na huhaholongi, angka i do hupinsang jala huajar. Antong, haringkothon ma na paubahon roha!” (Pgk. 3:19) Ditiru angka sintua do cara ni Jesus tingki mangalehon sipasingot.
NDANG HOLAN SINTUA NA BOI PATOGUHON NA ASING
Angka natuatua, diajari hamu do ianakhonmuna asa patoguhon na asing? (Ida Paragraf 10)
10. Songon dia hita sude boi patoguhon angka dongan?
10 Ndang holan sintua na boi patoguhon angka dongan na asing. Dijujui si Paulus do asa sude halak Kristen mangkatahon ‘na denggan asa dapotan uli na umbegesa’. (Eps. 4:29) Ingkon tapingkirhon do songon dia carana asa boi mangurupi angka donganta. Disurat si Paulus do tu angka halak Heber na gabe Kristen, “Pargogoi ma tangan na gale dohot dugul na telluktelluk! Patigor ma dalan sidalananmu, asa unang tarsulandit pat na mengkatengkat, alai asa malum.” (Heb. 12:12, 13, Bibel siganup ari) Sude hita boi patoguhon angka dongan marhite pangkataionta, tarmasuk ma angka na poso.
11. Aha na mangurupi si Marta tingki mandele?
11 Adong donganta na margoar si Marta, na hea mandele. * Didok ibana, “Sada tingki martangiang ma ahu asa dipatogu. Dung i, jumpang ma ahu dohot sahalak donganta borua naung matua. Dipatudu ibana do holong dohot asi ni rohana tu ahu. I do nian na huhaporluhon. Dicaritahon ibana ma pengalamanna tingki mangadopi parsoalan songon na huadopi. Gabe ndang lungun be rohangku.” Ra ndang diboto donganta borua i, balga do pangkorhon ni pangkataionna i tu si Marta!
12, 13. Songon dia hita boi mangulahon poda na di Pilippi 2:1-4?
12 Disurat si Paulus do tu halak Kristen di Pilippi, “Molo tung adong apoapo marhitehite Kristus, dohot sosososo holong ni roha dohot parsaoran ni tondi, nang talup dohot asi ni roha, gohi hamu ma halalas ni rohangkon: Sada ma parrohahon hamu; sada ma haholonganmuna; saroha, sapingkiran ma hamu! Unang ma mardingkandingkan manang marhasangapon na rumar; alai sian toruk ni rohamuna be ma rajumi hamu donganmuna sumurung sian dirimuna! Unang ma na ringkot di hamu be matahon hamu, dohot ma na di dongan!”—13 Sude hita ingkon marsitutu asa mangurupi dongan na asing. Boi do hita mangapuli, manarihon, jala patuduhon asi ni roha asa boi patoguhon angka dongan.
SONGON DIA CARANA PATOGUHON NA ASING?
14. Songon dia carana hita patoguhon na asing?
14 Las do rohanta molo mambege sasahalak na hea taurupi marsiajar Bibel boi tongtong marsihohot tu Jahowa. Apostel Johannes manurathon, “On do las ni rohangku na umbolon: Molo hubege, diparangehon angka anakkonku hasintongan i.” (3 Joh. 4) Godang do perintis na mansai las rohana ala mangida sasahalak na diurupi marsiajar Bibel boi tongtong manomba Jahowa, manang gabe perintis. Jadi, molo adong perintis na marmetmet ni roha, boi do tapaboa angka na denggan naung diulahon nasida.
15. Aha na boi taulahon laho patoguhon donganta na tongtong marhobas tu Jahowa?
15 Godang pengawas wilayah dipatogu tingki dapotna surat sian angka dongan na marisi hata mandok “mauliate”. Boi do on tabahen tu angka sintua, misionaris, perintis, dohot anggota Betel, ala tongtong nasida marhobas tu Jahowa. Molo tadok mauliate, balga do pangkorhonna i laho patoguhon nasida, nang pe ndang tasadari i.
SONGON DIA HITA SUDE BOI MASIPATOGUAN
16. Aha do na boi taulahon laho patoguhon sasahalak?
16 Songon dia do molo maol mandok hata na denggan tu donganta? Sasintongna, ndang maol laho patoguhon angka donganta. Boi do hita holan mengkel suping tu sasahalak. Alai molo ndang dibalos ibana, ra na adong do parsoalanna. Jadi porlu do adong donganna mangkatai. Tangihon ma ibana asa tarapul rohana.—Jak. 1:19.
17. Aha do na boi patoguhon sahalak donganta na poso?
17 Adong sahalak donganta na poso na margoar si Henri. Jut do rohana ala pigapiga keluargana ndang be manomba Jahowa. Tarmasuk ma bapakna, na hea gabe sintua. Adong ma sahalak pengawas wilayah manarihon si Henri, jala ditogihon ma ibana minum kopi. Denggan do ditangihon ibana tingki si Henri paboahon na di rohana. Dung i, Psalmen 46, Sepania 3:17, dohot Markus 10:29, 30.
gabe diantusi si Henri ma, ingkon tongtong do ibana marsihohot. I do sada cara laho mangurupi keluargana asa mulak muse tu Jahowa. Tarapul do rohana tingki manjahaSude hita boi dipatogu jala patoguhon na asing (Ida Paragraf 18)
18. (a) Aha do na didok Raja Salomo taringot masipatoguan? (b) Aha do na diajarhon si Paulus tu hita?
18 Aha do na boi taparsiajari sian pengalaman ni si Marta dohot si Henri? Sude hita boi mangapuli jala patoguhon angka donganta. Raja Salomo mandok, “Mansai denggan do hata na toho di tingkina. Mata na marsinondang mambahen las roha jala barita na denggan pahipashon daging.” (Poda 15:23, 30, Bibel siganup ari) Adong do diparrohahon hamu sasahalak na marmetmet ni roha manang na lungun rohana? Boi do tajahahon Joujou Paboahon manang sijahaon sian situs jw.org tu ibana. Asing ni i, si Paulus mangajarhon tu hita, boi do marlas ni roha hita molo rap mangendehon pujipujian. Didok ibana, “Mardongan sandok hapistaran ma hamu masiajaran jala masipaingotan marhitehite angka ende psalmen, endeende pujipujian dohot ende partondion; endehon hamu ma Debata di bagasan rohamuna marroha hamauliateon!”—Kol. 3:16; Ul. 16:25.
19. Boasa mansai ringkot masipatoguan di tingkinta saonari, jala aha do na ingkon taulahon?
19 Ala nunga jonok ari ni Jahowa, ringkot do molo hita masipatoguan dohot angka dongan. (Heb. 10:25) Las do rohanta molo taihuthon songon na didok si Paulus, “Sai masipaingotan ma hamu jala masipauliulian, songon naung binahenmuna.”—1 Tes. 5:11.
^ par. 11 Goarna nunga diganti.