1-3. (a) Situasi aha do na diadopi angka na poso, jala dipatudos songon aha do i? (Ida gombar di mula ni parsiajaran.) (b) Aha do na boi mangurupi na poso di situasi songon i?

BAYANGKON ma molo naeng lao hamu tu sada di luat na dao. Ingkon marbus do tu inganan i. Dung sahat hamu di terminal, boi do hamu lilu ala godang do hape bus disi. Alai, ala nunga ditontuhon hamu tudia tujuanmuna, gabe diboto hamu ma bus dia na naeng pillithonmuna. Ndang pillitonmu bus na asing tujuanna.

² Parngoluan ni na poso dipatudos ma songon sahalak na naeng lao tu luat na dao i. Sipata olo do hamu lilu alani godang ni sipilliton. Alai molo nunga ditontuhon hamu tudia tujuanmuna, gabe mura ma hamu mambahen haputusan. Jadi, tudia do tujuanmuna?

³ Di parsiajaran on taalusi ma sungkunsungkun taringot i. Jala marhite parsiajaran on, diurupi ma hamu asa tongtong mambahen las roha ni Jahowa. Diurupi ma hamu songon dia mangihuthon poda sian Jahowa tingki naeng mamillit singkola, karejo, marhasohotan, manang  marianakhon. Jala asa marsitutu mangihuthon tujuanmuna na boi mambahen hamu lam jonok tu Jahowa. Molo tongtong hamu manomba Jahowa, dapotmuna ma pasupasu jala diurupi do hamu asa marhasil.​—Jaha Poda 16:3.

4. Aha na laho taulas di parsiajaran on?

⁴ Denggan do molo dibahen hamu tujuanmuna. Boasa? Taulas ma tolu alana. Alasan na parjolo dohot na paduahon, patuduhon molo marsitutu hamu mangihuthon tujuanmuna, gabe lam solhot ma paralealeonmuna tu Jahowa. Na patoluhon patuduhon boasa denggan manontuhon tujuan tingki poso dope.

5. Aha do alasan na ringkot boasa ingkon ditontuhon hamu tujuanmuna?

⁵ Sada alasan na ringkot, i ma ala hita laho patuduhon hamauliateonta tu Jahowa ala holongNa dohot sude pambahenanNa. Sahalak panurat Psalmen mandok, “Tung na denggan do mandok mauliate tu Jahowa . . . Ai angka pambahenanMu halongangan i do, ale Jahowa, mambahen ahu marlas ni roha, hinorhon ni angka pambahenanMu, marende ma ahu marlas ni roha.” (Ps. 92:2, 5, Bibel siganup ari) Pingkirhon ma sude na dilehon Jahowa tu hamu, songon ngolumuna, paralealeonmuna tu Ibana, Bibel, angka dongan di huria, dohot pangkirimon asa mangolu salelengna di Paradeiso. Tingki ditontuhon hamu tujuanmuna, na patuduhon hamauliateon do hamu tu Jahowa. Jala i boi mambahen hamu lam jonok tu Ibana.

6. (a) Aha do labana molo nunga ditontuhon hamu tujuanmuna? (b) Aha do citacita na boi dibahen hamu saonari?

⁶ Molo nunga ditontuhon hamu tujuanmuna gabe lam jonok ma hamu tu Jahowa. I ma alasan na paduahon. Apostel Paulus mandok, “Ai ndang na geduk Debata: Tung halupahononna ma na niulamuna dohot holong ni roha na pinatuduhonmuna tu Goarna?” (Heb. 6:10) Ndang dibatasi umur sadia asa boi manontuhon tujuan. Umpamana si Christine, tingki marumur 10 taon dibahen ibana do tujuan laho manjaha kisah hidup ni angka Sitindangi na marsihohot. Si Toby, tingki marumur 12 taon marcitacita do ibana manjaha sude isi ni Bibel andorang so tardidi. Si Maxim dohot itona si Noemi tardidi tingki nasida marumur 11 dohot 10 taon dope. Jala marcitacita do nasida asa boi mangurupi di Betel. Dilongkothon nasida ma formulir tu Betel di dinding jabu ni nasida, asa tongtong diingot nasida citacitana i. Molo hamu, aha do citacitamuna?​—Jaha Pilippi 1:10, 11.

7, 8. (a) Boasa gabe mura mambahen haputusan molo nunga ditontuhon hamu tujuanmuna? (b) Boasa sahalak na poso mamillit ndang kuliah?

⁷ Aha do alasan na patoluhon? Tingki poso, godang do na boi pillitonmuna. Umpamana, mamillit singkola, karejo manang na asing. Dipatudos do on songon tingki hamu di persimpangan ni dalan. Alai, molo nunga ditontuhon hamu tujuanmuna, ndang lilu be hamu. Suang songon i ma, molo nunga ditontuhon hamu tujuanmuna,  gabe mura ma hamu mambahen haputusan na denggan. Poda 21:5 mandok, “Sangkapsangkap [manang rencana] ni halak na padot manjadihon hadumaon situtu.” Lam tibu hamu manontuhon tujuanmuna, lam hatop ma hamu marhasil. I ma na dihilala si Damaris. Nunga ditontuhon ibana tujuanna tingki poso dope.

⁸ Juara do si Damaris tingki di singkola. Jala dapot beasiswa do ibana laho kuliah jurusan hukum. Alai, ndang dipillit ibana i. Boasa? Tingki poso hian dope ibana, dipillit do asa merintis. Didok ibana, “Hupillit do karejo na so pola godang suda tingkingku. Molo kuliah hian ahu, boi do dapothu godang hepeng. Alai gabe holan tu karejo ma suda tingkingku.” Nunga gabe perintis si Damaris saleleng 20 taon. Denggan do haputusan naung binahenna i. Di ingananna karejo, jotjot do ibana jumpang dohot godang pengacara. Ra, boi do ibana songon nasida molo kuliah hian. Alai diida ibana ndang sonang ngolu ni nasida. Las do roha ni si Damaris saleleng merintis jala sonang do ngoluna, ndang songon nasida.

9. Boasa tapujihon angka na posonta?

⁹ Tapujihon do marribu angka na poso di liat portibi on, ala nunga ditontuhon nasida tujuan na denggan. Diharingkothon nasida do paralealeonna tu Jahowa dohot tujuan ni nasida i. Marlas ni roha do nasida huhut tongtong marsiajar laho mangihuthon tudutudu sian Jahowa tingki mamillit singkola, karejo dohot mamutushon laho markeluarga. Didok si Salomo, “Marhaposan tu Jahowa ma ho sian nasa roham. . . . Sai Ibana ma tanda di nasa dalanmu, asa Ibana patigor angka dalanmu.” (Poda 3:5, 6) Holong do roha ni Jahowa tu hamu angka na poso! Arga do hamu di Ibana. Tontu linggomanNa, togutoguonNa, jala pasupasuonNa do hamu.

10. (a) Boasa ingkon taharingkothon marbarita na uli? (b) Songon dia carana asa lam denggan hamu marbarita na uli?

¹⁰ Molo diharingkothon hamu do laho pasonangkon Jahowa di ngolumuna, tontu marsitutu do hamu laho marbarita. Didok Jesus do asa “jumolo do baritahononhon barita na uli i”. (Mrk. 13:10) Jadi, mansai ringkot situtu do marbarita na uli di ngolumuna. Marsitutu do hamu asa lam denggan marbarita? Olo do hamu merintis? Songon dia molo ndang pola lomo rohamuna marbarita saleleng on? Jala songon dia carana asa lam denggan hamu paboahon haporseaonmuna tu na asing? Adong dua carana: Parade ma angka na porlu laho marbarita. Jala marsitutu ma paboahon tu halak taringot  Jahowa. Hilalaonmuna ma las ni roha molo marbarita.

11, 12. (a) Aha do na porlu diparade hamu laho paboahon taringot Jahowa? (b) Songon dia sahalak na poso paboahon taringot Jahowa tu angka dongan singkolana?

¹¹ Ra, adong do sungkunsungkun ni dongan singkolamuna, “Tutu do Adong Debata?” Paradehon hian ma alus ni sungkunsungkun i. Ida ma video di jw.org/bbc. Pillit ma BUKU > NA POSO. Disi dapotmuna ma video na marjudul Na Didok Angka Donganmu—Tutu do Adong Debata. Video on mangurupi hamu asa boi mangalusi sungkunsungkun ni nasida. Jala boi ma dipangke hamu pigapiga ayat na denggan, songon Heber 3:4, Rom 1:20, dohot Psalmen 139:14. Molo dipangke hamu angka video on, gabe boi ma dialusi hamu godang sungkunsungkun.​—Jaha 1 Petrus 3:15.

¹² Paboa ma tu dongan singkolamuna asa mangida situs jw.org. I do na diulahon donganta si Luca. Tingki i, mangkatahatai ma angka donganna taringot agama. Diida ibana adong sada sijahaon na paboahon hatorangan na sala taringot Sitindangi Ni Jahowa. Nang pe biar rohana, dipangido ibana do tu guruna asa paboahon na sala do hatorangan di sijahaon i. Diloas guruna i ma ibana patorangkon haporseaonna, jala dipatandahon ibana ma situs jw.org di kalasna. Ujungna, gabe dibahen guru i ma PR tu angka muridna asa manonton video Marbisuk ma Hamu Mangadopi si Pangarehei. Tontu, las hian do roha ni si Luca ala nunga paboahon taringot Jahowa di singkolana.

13. Boasa hita ingkon marsitutu marbarita nang pe adong ambatambat?

 ¹³ Tingki adong ambatambat na diadopi hamu, unang ma gabe metmet rohamuna. Tongtong ma ingot tujuanmuna. (2 Tim. 4:2) Songon i ma si Katharina. Tingki marumur 17 taon, marbarita do ibana tu dongan sakarejona. Adong do na jotjot mangarehei ibana. Alai ndang gabe metmet rohana. Ala denggan parangena, gabe adong ma sada donganna na mamparrohahon i, i ma si Hans. Gabe dijaha ibana ma angka sijahaonta, marsiajar Bibel, jala tardidi. Ndang diboto si Katharina taringot i, alana tingki i nunga pinda be ibana. Jadi, dung 13 taon, songgot do rohana tingki ro tu sada parpunguan dohot keluargana, ala si Hans do na marjamita di tingki i! Tontu las hian do rohana ala marhasil do ulaonna najolo i.

14, 15. (a) Aha ma na ingkon ingotonmu molo adong na mamaksa hamu asa mangihuthon nasida? (b) Aha ma na boi ulahononmuna di situasi si songon i?

¹⁴ Di parsiajaran on, dijujui do hamu asa tongtong pasonangkon Jahowa jala manontuhon tujuan na denggan. Alai, godang do angka na poso na holan mamingkirhon songon dia asa marsonangsonang. Ra, dijujui do hamu asa mangihuthon nasida. Jadi, porlu do dipaboa hamu tu nasida taringot aha citacitamuna, jala unang ma halupahon i. Songon sahalak na di terminal i, olo do hamu naik tu sada bus, holan alani godang halak na las rohana naik tu bus i? Tontu ndang songon i!

¹⁵ Jadi, molo adong na mamaksa hamu asa mangihuthon nasida, aha ma na boi ulahononmuna? Pasiding ma angka situasi na boi mambahen hamu gabe tarelaela. (Poda 22:3) Pingkirhon ma pangkorhonna molo diulahon hamu na sala. (Gal. 6:7) Jala rade ma manjalo sipaingot. Tangihon ma poda ni natuatuamuna dohot angka dongan na gabe sitiruon di huria.​—Jaha 1 Petrus 5:5, 6.

16. Songon dia pengalaman ni si Christoph patuduhon na ringkot do marserep ni roha?

¹⁶ Dung tardidi sahalak donganta na margoar si Christoph, jotjot do ibana laho tu inganan olahraga. Jala, angka na poso disi manjujui ibana asa dohot tu sada kelompok olahraga. Dipaboa ibana ma i tu sahalak sintua. Dipaboa sintua i ma adong do bahaya ni i, alana lomo do roha ni halak disi asa gabe na umjago. Alai, tong do dohot ibana tu kelompok i. Lam leleng, diparrohahon ibana ma, karas jala bahaya do olahraga i. Mangkatai ma ibana muse tu angka sintua, jala dilehon nasida ma sipasingot sian Bibel. Didok si Christoph ma, “Dilehon Jahowa do sipasingot na denggan tu ahu. Hutangihon do i, nang pe porlu tingki laho mangulahon i.” Ala serep do roha ni si Christoph, gabe mura ma ibana manjangkon sipasingot. Molo hamu, rade do manjangkon sipasingot?

17. Aha do na dihalomohon Jahowa tu hamu angka na poso?

¹⁷ Didok di Bibel, “Antong marlas ni roha ma ho, ale dolidoli tagan di haposoonmu.” (Pjm. 11:9) Lomo do roha ni Jahowa asa marlas ni roha hamu di haposoonmuna. Di parsiajaran on, diajari  do hamu asa tongtong mangingot tujuanmuna, jala mangihuthon tudutudu sian Jahowa tingki mambahen haputusan. I do na boi palashon rohamuna. Jadi, molo saonari diulahon hamu i, hilalaonmuna ma panogunoguon, parlinggoman, dohot pasupasu sian Jahowa tu hamu. Rimangi ma sude sipasingot sian Bibel, jala ulahon ma poda on, “Sai, dipaingotingot roham ma Sitompa ho di angka ari haposoonmu.”​—Pjm. 12:1.

18. Songon dia asa unang disolsoli hamu haputusanmuna dung magodang? Caritahon ma sada pengalaman.

¹⁸ Ndang nihilala hatop do magodang angka na poso. Alai, godang do sian nasida na mambahen haputusan na sala. Manang, adong do na so martujuan ngoluna. Alai molo tongtong hamu marsitutu mangulahon citacitamuna na palashon roha ni Jahowa, gabe las ma rohamuna dung magodang. Songon i ma na dihilala si Mirjana. Tingki poso, malo do ibana di bidang olahraga. Digokhon do ibana asa dohot tu Olimpiade. Alai, ndang olo ibana. Merintis do na dipillit ibana. Lobi sian 30 taon, merintis do ibana raphon tungganedolina. Didok ibana molo hamoraon, hagabeon, hasangapon, i do na dilului halak, alai ndang boi i parohon las ni roha. Jala citacita na umdenggan, i ma mangalehon gumodang tingki tu Jahowa jala mangurupi angka halak asa mananda Ibana.

19. Aha do labana molo marsitutu hamu mangulahon citacitamuna sian tingki poso?

¹⁹ Sipujion do hamu angka na poso, alana nang pe godang ambatambat, marsitutu do hamu manomba Jahowa. Ditontuhon hamu do tujuanmuna, i ma mangkaringkothon ulaon marbarita di ngolumuna. Tongtong do diingot hamu tujuanmuna i. Ndang marisuang sude ulaonmuna i. Adong do angka dongan na mangkaholongi jala manarihon hamu. Jadi “tu Jahowa ma giling [manang pasahat] angka pambahenanmu, asa tulus angka sangkap ni roham”.