1, 2. (a) Di tingki ni si Paulus, boasa godang halak na mamingkirhon taringot parhatobanan dohot haluaon? (b) Ise do Silehon haluaon na didok si Paulus?

DI ABAD na parjolo lomo do roha ni halak tu pamarentaon ni halak Rom, ala jago nasida mamarenta jala bebas do rayatna dibahen. Alai, pamarentaon i boi maju ala godang do hatobanna. Hirahira 30 persen halak disi hatoban do. Alani i, jotjot do angka halak tingki i mamingkirhon taringot parhatobanan dohot haluaon, tarmasuk ma halak Kristen.

² Jotjot do si Paulus manurathon taringot haluaon. Alai, ibana ndang na laho paturehon portibi on. Gariada, ibana dohot godang halak Kristen tingki i marsitutu marbarita na uli jala mangurupi angka halak asa mangargai tobusan ni Jesus Kristus. Jadi, didok si Paulus do tu angka halak Kristen asa mangalului Silehon haluaon. Didok ibana, “Tuhan i do Tondi i; jala ia disi Tondi ni Tuhan i, disi do haluaon.”​—2 Kor. 3:17.

3, 4. (a) Aha do na dipaboa si Paulus andorang so didok ibana hata na di 2 Korint 3:17? (b) Aha do na ingkon taulahon asa mandapot haluaon sian Jahowa?

 ³ Di suratna na paduahon tu halak Korint, dipaboa si Paulus ma taringot si Musa. I ma tingki si Musa mulak sian Dolok Sinai dung pajumpang dohot surusuruan ni Jahowa. Marsinondang ma sisik ni bohina! Tingki diida halak Israel ibana, gabe mabiar ma nasida. Alani i, ingkon dibahen ma sada pangkuphupi tu bohina. (2 Mus. 34:29, 30, 33; 2 Kor. 3:7, 13) Didok si Paulus muse, “Alai disi mulak rohanasida mandapothon Tuhan i, buatonna ma pangkuphupi i.” (2 Kor. 3:16) Aha do lapatan ni i?

⁴ Di parsiajaran naung salpu, nunga taparsiajari molo Jahowa Sitompa saluhutna. Ibana do na boi bebas jala ndang porlu adong batasan. Jadi, tangkas ma di bagasan tondi ni Jahowa, adong do haluaon. Alai, didok si Paulus do molo naeng tadapot haluaon i, ingkon tapajonok do dirinta tu Ibana. Lapatanna, ingkon togu do paralealeonta tu Ibana. Tingki di halongonan, bangso Israel holan mangasahon pingkiran ni nasida sandiri. Ndang tarbungka roha dohot pingkiran nasida. Nasida holan mangihuthon lomo ni rohana sandiri.​—Heb. 3:8-10.

5. (a) Haluaon na songon dia do na dilehon Jahowa? (b) Sian dia taboto molo halak na dipenjarahon pe boi mangkilala haluaon i? (c) Sungkunsungkun aha do na laho taulas?

⁵ Haluaon na dilehon Jahowa ndang holan malua sian parhatobanan. Jala ndang boi jolma mangalehon haluaon sisongon i. Haluaon on mambahen hita gabe ndang be diparhatoban dosa, hamatean, dohot angka panombaon na so sintong. (Rom 6:23; 8:2) Mararga situtu do haluaon on! Gariada, boi do sasahalak mangkilala haluaon on, nang pe ibana gabe hatoban manang dipenjarahon. (1 Mus. 39:20-23) Haluaon on do na dihilala donganta si Harold King, na hea dipenjarahon saleleng martaontaon alani haporseaonna. Boi ma taida pengalamanna i di JW Broadcasting. (Ida ma di bagian WAWANCARA DOHOT PENGALAMAN > MARTAHAN MANGADOPI PARUNGKILON.) Saonari, taulas ma dua sungkunsungkun. Songon dia hita patuduhon na taargai do haluaon i? Aha do na ingkon taulahon ala nunga tadapot haluaon i?

6. Songon dia bangso Israel ndang mangargai haluaon na dilehon Jahowa?

⁶ Tingki tadapot hadiah na mansai arga, tontu gabe taargai do halak na mangalehon i. Alai, bangso Israel ndang mangargai haluaon na dilehon  Jahowa tu nasida. Pigapiga bulan dung ruar sian Misir, sai ditaringoti nasida do sipanganon na adong di Misir. Marungutungut do nasida taringot manna i ma sipanganon naung diparade Jahowa. Umlomo do roha ni nasida asa mulak muse tu Misir! Rumingkotan do di nasida dengke, ansimun, jelok, angka sayur, angka baoang sian haluaon dohot panombaon tu Jahowa. Alani i, gabe muruk situtu ma Jahowa tu nasida. (4 Mus. 11:5, 6, 10; 14:3, 4) Aha ma parsiajaranna tu hita?

7. Songon dia si Paulus mangulahon poda na disurat di 2 Korint 6:1, jala songon dia hita maniru ibana?

⁷ Dijujui si Paulus do sude halak Kristen asa mangargai haluaon na dilehon Jahowa marhite AnakNa, Jesus Kristus. (Jaha 2 Korint 6:1.) Ala jolma na mardosa do tong si Paulus, susa do dihilala ibana. Alai, didok ibana, “Ai nunga dipalua patik ni tondi hangoluan na di bagasan Kristus Jesus do ahu sian patik ni dosa dohot hamatean.” (Rom 7:24, 25; 8:2) Songon si Paulus, tongtong ma taingot naung dipalua Jahowa do hita sian dosa dohot hamatean. Alani tobusan, gabe ias ma panggora ni rohanta laho manomba Debata jala marlas ni roha.​—Ps. 40:9.

8, 9. (a) Sipaingot aha do na dilehon si Petrus tu hita? (b) Songon dia sasahalak tarelaela mamillit na sala?

⁸ Ingkon mandok mauliate do hita tu Jahowa. Alai asing ni i, porlu do hita manat asa unang gabe taulahon na so denggan. Dijujui apostel Petrus do hita asa unang mangulahon na sala, nang pe taboto nunga tadapot haluaon i. (Jaha 1 Petrus 2:16.) Taingot ma aha na masa tu halak Israel tingki di halongonan. Sibolis jotjot mangelaela hita marhite angka na di portibi on songon pangkean,  sipanganon, siinumon,dohot angka hiburan. Dos do ibana songon pambahen iklan na mamangke artis na bagak laho manjujui hita asa manuhor angka barang, hape sasintongna ndang tahaporluhon barang i. Jadi, boi ma tarelaela hita laho mangulahon na sala.

⁹ Sipasingot na dilehon si Petrus on, marguna do tu hita tingki mambahen haputusan, songon mamillit singkola dohot karejo. Umpamana, angka na poso saonari dijujui do asa kuliah. Godang halak na mandok tu nasida molo lam timbo singkolana, lam denggan ma karejona, lam godang ma hepengna, jala lam godang ma halak na mangargai ibana. Marsitutu do halak patuduhon tu nasida na gumodang do dapotan hepeng halak na kuliah sian halak na holan tamat SMA. Jadi, godang do halak marpingkir molo kuliah boi mambahen gabe denggan parngoluon ni nasida. Alai, aha do na ingkon diingot angka na poso dohot angka natuatua?

10. Aha do na ingkon taingot tingki naeng mambahen haputusan tu dirinta sandiri?

¹⁰ Pigapiga halak marpingkir, ndang urusan ni halak aha na dipillit nasida. Jadi lomo ni nasida do mamillit aha na dihalomohon, saleleng i ndang mambahen ganggu panggora ni roha ni nasida. Ra, diingot nasida do hata ni si Paulus na mandok, “Boasa ingkon ambatan ni panggora ni roha ni halak ahu?” (1 Kor. 10:29, Bibel siganup ari) Nang pe bebas hita mamillit taringot singkola dohot karejonta, taingot ma adong do aturanna jala adong do pangkorhon ni haputusanta i tu ngolunta. I do alana, didok si Paulus do, “Saluhutna jadi do, alai ndang saluhut marguna; saluhutna jadi do, alai ndang saluhut patoguhon.” (1 Kor. 10:23) Jadi, aha na tahalomohon, ndang i na rumingkot.

11. Boasa hita dipalua Jahowa?

¹¹ Tingki dijujui si Petrus hita asa unang mangulahon na sala, dipaboa ibana do songon dia mangulahon na denggan. Carana, i ma gabe hatoban manang “naposo ni Debata”. Nunga dilehon Jahowa anakNa laho paluahon hita sian dosa dohot hamatean. Alani i, gabe boi ma hita mangalehon nasa ngolunta laho manomba Ibana.

12. Aha do na boi tatiru sian si Noak dohot keluargana?

¹² Cara na dumenggan patuduhon pangargaion tu haluaon i, i ma mangalehon gumodang tingki dohot gogo laho manomba Jahowa. Molo taulahon on, gabe boi ma tapasiding elaela dohot hisaphisap ni daging na adong di portibi on. (Gal. 5:16) Rimangi ma pengalaman ni si Noak dohot keluargana. Di tingki i, godang halak na jahat jala mangulahon na rorang. Alai ndang olo si Noak raphon keluargana mangihuthon i, jala ndang adong ro tu pingkiranna laho mangihuthon nasida. Marsitutu do nasida mangulahon na diparentahon Jahowa, i ma paulihon sada parau, papunguhon sipanganon dohot angka binatang, jala paingothon  godang halak taringot Aek na Sumar. “Dibahen si Noak ma sude, songon na tinonahon ni Debata tu ibana, songon i dibahen”. (1 Mus. 6:22) Ujungna, malua do si Noak dohot keluargana di tingki ro Aek na Sumar i.​—Heb. 11:7.

13. Aha do na diparentahon Jahowa tu hita?

¹³ Aha do na diparentahon Jahowa tu hita saonari? Ala sisean ni Jesus do hita, diparentahon do hita asa marbarita na uli. (Jaha Lukas 4:18, 19.) Saonari, dibahen Sibolis do godang jolma gabe lilu jala diparhatoban agama na so sintong, arta, dohot pamarentaon ni portibi on. (2 Kor. 4:4) Songon Jesus, boi do hita mangurupi godang halak asa mananda jala manomba Jahowa. Sada tugas na mansai ringkot do i. (Mat. 28:19, 20) Taboto do, ndang sai mura mangulahon i. Di pigapiga inganan, adong do halak na so olo mananda Debata, jala adong do na muruk tingki tapaboa barita na uli on. Alai porlu taingot, parenta ni Jahowa do i. Alani i, tasungkun ma dirinta, ‘Songon dia ahu mangalehon gumodang tingki dohot gogo tu Jahowa?’

14, 15. Aha do na diulahon godang naposo ni Jahowa? (Ida gombar di mula ni parsiajaran.)

¹⁴ Di tingki parpudi on, las do rohanta mambege godang angka donganta na so mangkaringkothon arta, jala gabe perintis. (1 Kor. 9:19, 23) Adong na merintis di huta ni nasida sandiri, alai adong do na pinda laho mangurupi huria na asing. Saleleng lima taon na parpudi on, adong lobi sian 250.000 halak na merintis, jala saonari lobi sian 1.100.000 halak na gabe perintis biasa. Tapujihon do nasida!​—Ps. 110:3.

¹⁵ Aha do na boi mangurupi nasida patuduhon pangargaion tu haluaon i? Parrohahon ma pengalaman ni si John dohot si Judith naung merintis di pigapiga negara saleleng 30 taon. Didok nasida, tingki dohot nasida tu Singkola Dinas Perintis taon 1977, dijujui do sude na di singkola i asa pinda tu luat na mangkaporluhon gumodang parbarita. Alani i, gabe jotjot do si John margantiganti karejo asa boi merintis. Jadi, ndang arta na diharingkothon nasida. Jala ujungna, laho ma nasida marbarita sahat tu luar negeri. Aha do na mangurupi nasida mangadopi ambatambat songon bahasa, inganan, dohot hasomalan na baru? Martangiang do nasida tu Jahowa asa diurupi mangadopi i. Songon dia do pangkilalaan ni nasida ala nunga merintis saleleng martaontaon? Si John mandok, “Huhilala, on ma ulaon na mansai denggan na hea huulahon.  Gabe songon Ama na parholong do Jahowa di ahu. Gabe tangkas ma huantusi ayat na disurat di Jakobus 4:8, ‘Pajonok hamu ma tu Debata, dung i pajonohonna ma tu hamu!’ Saonari, nunga hudapot be aha na boi mambahen sonang ngolungku.”

16. Songon dia angka donganta patuduhon pangargaion tu Jahowa?

¹⁶ Pigapiga donganta boi leleng merintis, songon si John dohot si Judith. Adong do na holan boi merintis ekstra alani situasi. Alai, godang do na rade mangurupi ulaon pajongjongkon inganan ni organisasinta. Umpamana, adong 27.000 donganta na ro mangurupi ulaon pajongjongkon kantor pusat di Warwick, New York. Adong na mangurupi saleleng dua minggu, adong na marbulanbulan, jala adong na sataon manang lobi. Godang do tingki dohot gogo na dilehon nasida asa boi mangurupi disi. Sitiruon na mansai denggan do nasida, ala marsitutu mamuji jala pasangaphon Jahowa, Debata Silehon haluaon!

17. Aha do na laho tadapot molo tapatudu pangargaion tu haluaon i?

¹⁷ Las do rohanta ala nunga mananda Jahowa jala mandapot haluaon ala manomba Ibana. Ingkon tapatudu ma na mansai arga do i di hita. Marsitutu ma hita mangalehon tingkinta dohot gogonta laho manomba Jahowa. Dung i, boi ma hilalaonta pasupasu na dijanjihon Jahowa, “Ai di sada ari malua do na tinompa i sian parhatobanan hamagoan i jala dohot nampuna haluaon hasangapon ni angka anak ni Debata.”​—Rom 8:21, Bibel siganup ari.