1. Dung mardosa jolma na parjolo, songon dia Jahowa patoguhon roha ni jolma?

SIAN mulai mardosa jolma na parjolo, Jahowa nunga gabe Debata na patoguhon roha. Dibahen Ibana do sada surirang na boi patoguhon jala gabe pangkirimon tu hita. Surirang i disurat di 1 Musa 3:15 na paboahon laho diripashon na ma Sibolis dohot angka ulaonna na jahat.​—1 Joh. 3:8; Pgk. 12:9.

2. Songon dia Jahowa patoguhon roha ni si Noak?

² Taparrohahon ma songon dia Jahowa patoguhon roha ni si Noak. Angka halak na mangolu di tingki ni si Noak, jotjot mangulahon na rorang. Holan ibana dohot keluargana do na manomba Jahowa. Boi do on mambahen ibana marmetmet ni roha. (1 Mus. 6:4, 5, 11; Jud. 6) Alai, dipatogu Jahowa si Noak asa tongtong manomba Ibana jala mangulahon na denggan. (1 Mus. 6:9) Dipaboa  Jahowa do tu si Noak na laho ripashononNa ma portibi na jahat i. Jala dipaboa do carana asa boi malua si Noak dohot keluargana. (1 Mus. 6:13-18) Jadi tutu do dipatogu Jahowa roha ni si Noak.

3. Songon dia Jahowa patoguhon roha ni si Josua? (Ida gombar di mula ni parsiajaran.)

³ Dipatogu Jahowa do muse si Josua tingki manguluhon bangso Israel tu Tano na Dijanjihon, jala mangadopi angka tentara na gogo sian bangso na adong disi. Diboto Jahowa do na holsoan roha ni si Josua. Jadi didok Ibana ma tu si Musa, “Dung i dokkon ma si Josua, asa pir tondina i jala marsihohot, ai taripar do anggo ibana manguluhon bangso on, jala ibana marbagihon tano naung niidam bahen partaliannasida.” (5 Mus. 3:28) Dung i, dipatogu Jahowa ma muse si Josua. Didok Ibana, “Nda nunga hudok tu ho: Pir ma tondim, jala marsihohot? Unang manonditnondit roham, jala unang tahuton, ai Jahowa Debatam do donganmu, manang dompak dia pe ho mangalangka.” (Jos. 1:1, 9) Tontu, gabe dipatogu do roha ni si Josua ala mambege hata on!

4, 5. (a) Songon dia Jahowa patoguhon angka naposoNa najolo? (b) Songon dia Jahowa patoguhon AnakNa?

⁴ Dipatogu Jahowa do punguan ni angka naposoNa. Umpamana, tingki halak Jahudi ditaban di Babel, dipaboa Jahowa do sada surirang na patoguhon roha ni nasida. Didok, “Unang ho mabiar, ai ahu do donganmu! Unang biahaton ho, ai ahu do Debatam: Ahu margogoihon ho huhut mangurupi ho, huhut maniopi ho marhitehite siamun ni hatigoranku.” (Jes. 41:10) Asing ni i, dipatogu Jahowa do angka halak Kristen di abad na parjolo, songon i nang hita saonari.​—Jaha 2 Korint 1:3, 4.

⁵ Dipatogu Jahowa do muse AnakNa. Dung tardidi Jesus, dibege ibana ma soara sian surgo na mandok, “On do Anakku, Haholongan i; halomoan ni rohangku do Ibana!” (Mat. 3:17) Tontu, on mambahen togu roha ni Jesus laho mangulahon ulaonna tingki di tano on!

6. Songon dia tudosan na dilehon Jesus patoguhon hita?

⁶ Ditiru Jesus do Amana laho patoguhon na asing. Dipaboa ibana do tudosan taringot bagian na dilehon sahalak induk tu naposona. Didok ibana do tu naposo na burju, “Denggan ma i; naposo na burju jala na satia do ho. Satia do ho mangaramoti na otik, ala ni i pasahatonku ma tu ho na godang. Ro ma ho, masuk ma ho, asa dohot ho marlas ni roha rap dohot ahu.” (Mat. 25:21, 23, Bibel siganup ari) Tudosanna i mambahen gabe togu angka siseanna jala marsihohot tu Jahowa!

7. Songon dia Jesus patoguhon angka apostelna, tarlumobi si Petrus?

⁷ Tingki marsoal angka sisean ni Jesus taringot ise na umbalga, sabar do Jesus maradophon nasida. Dijujui ibana do nasida asa marserep  ni roha jala rade mangurupi na asing. (Luk. 22:24-26) Taboto, hea do pigapiga hali si Petrus mambahen hasalaan. (Mat. 16:21-23; 26:31-35, 75) Alai tongtong do pos roha ni Jesus tu si Petrus. Dipatogu Jesus do ibana jala dilehon do tugas laho patoguhon angka dongan na asing.​—Joh. 21:16.

8. Songon dia si Hiskia patoguhon angka panglima dohot angka halak Juda?

⁸ Tingki ndang adong dope sitiruon sian Jesus, angka naposo ni Jahowa pe nunga mamboto na ingkon masipatoguan do nasida. Umpamana si Hiskia. Tingki ro halak Assur laho manaluhon Jerusalem, dijou ibana ma angka panglima dohot angka halak, jala dipatogu do nasida. Alani i, gabe togu ma roha ni nasida umbege hatana.​—Jaha 2 Kronika 32:6-8.

9. Aha na boi taparsiajari sian si Job?

⁹ Boi do muse hita marsiajar sian si Job taringot patoguhon roha. Nang pe ibana sandiri porlu dipatogu, alai diajari ibana do halak songon dia patoguhon roha na asing. Didok si Job, lomo do rohana patoguhon jala mangapuli, ndang na laho mambahen hansit roha ni halak. (Job 16:1-5) Alai ujungna, ibana sandiri pe dipatogu si Elihu dohot Jahowa do.​—Job 33:24, 25; 36:1, 11; 42:7, 10.

10, 11. (a) Boasa boru ni si Jepta porlu dipatogu? (b) Ise do na boi tapatogu saonari?

¹⁰ Na porlu muse dipatogu i ma boru ni si Jepta. Tingki naeng marporang tu halak Ammon, marjanji do si Jepta tu Jahowa. Molo diurupi ibana asa monang, manang ise halak na parjolo manomu ibana ingkon lehononna do tu Jahowa. Ujungna monang do bangso Israel, jala halak na parjolo manomu ibana, i ma boruna na sasada i. Mansai lungun do roha ni si Jepta. Alai diingot ibana do janjina i, jala dilehon do boruna asa marhobas di Tabernakel saleleng ngoluna.​—Pangh. 11:30-35.

¹¹ Borat do on di si Jepta, alai umborat do on di boruna. Alai, rade do ibana mandalanhon janji ni amana i. (Pangh. 11:36, 37) Alani janji i, gabe ndang boi ibana marhasohotan jala marianakkon. Alani i, porlu do ibana diapuli jala dipatogu. Bibel mandok, “Laho do ganup taon angka boru ni Israel papujipuji boru ni si Jepta, halak Gilead i opatopat ari lelengna.” (Pangh. 11:39, 40) Molo tajaha pengalaman ni boru ni si Jepta on, gabe taingot ma angka dongan na so marhasohotan ala naeng mangalehon gumodang tu Jahowa. Porlu do tapuji jala tapatogu nasida.​—1 Kor. 7:32-35.

12, 13. Songon dia si Petrus patoguhon angka dongan?

¹² Di borngin andorang so mate Jesus, didok ibana do tu si Petrus, “O Simon, Simon nunga dipangido sibolis i, naeng segeonna hamu songon dahanon. Alai Ahu do manangiangkon ho, unang mintop haporsaonmi. Jala dung mulak sogot roham, pargogoi ma roha ni angka hahaanggim!”​—Luk. 22:31, 32.

¹³ Si Petrus ma sada sian na manguluhon huria Kristen di abad na parjolo. (Gal. 2:9) Dipatogu ibana do roha ni angka dongan marhite habaranionna di tingki Pentakoste dohot di tingki na asing. Dung martaontaon ibana gabe apostel, disurat ibana ma tu angka dongan, “Husurat do surat na jempek on . . . Na pasingothon do ahu tu hamu jala pasahathon panindangionku, paboa na on do asi ni roha ni Debata na tutu. Togu ma hamu jongjong disi.” (1 Ptr. 5:12, Bibel siganup ari) Surat ni si Petrus on boi patoguhon halak Kristen di tingki i. Jala hita pe saonari dipatogu do, huhut paimahon saut janji ni Jahowa!​—2 Ptr. 3:13.

14, 15. Songon dia angka buku na disurat si Johannes boi patoguhon hita?

¹⁴ Dohot do apostel Johannes manguluhon huria Kristen abad parjolo.  Disurat ibana do injil taringot ulaon ni Jesus tingki di tano on. Buku on patoguhon halak Kristen saleleng maratus taon sahat tu tingkinta saonari. Umpamana, holan di buku Johannes do tajaha hata ni Jesus na mandok molo tanda ni angka siseanna i ma holong.​—Jaha Johannes 13:34, 35.

¹⁵ Tolu surat na dibahen si Johannes pe marisi hasintongan na mansai arga. Molo metmet rohanta alani hea mangulahon na sala, tarapul do rohanta tingki tajaha molo tobusan ni Jesus ‘paiashon hita sian nasa dosa’. (1 Joh. 1:7) Alai, molo tong dope ndang boi tahalupahon hasalaanta i, tarapul do rohanta tingki taboto na “umbalga do Debata sian rohanta”. (1 Joh. 3:20) Holan si Johannes do na hea manurat “haholongon do Debata”. (1 Joh. 4:8, 16) Jala di suratna na paduahon dohot patoluhon, dipuji ibana do halak Kristen na tongtong marsihohot “di bagasan hasintongan”.​—2 Joh. 4; 3 Joh. 3, 4.

16, 17. Songon dia si Paulus patoguhon halak Kristen najolo?

¹⁶ Si Paulus pe gabe sada sitiruon na denggan do taringot patoguhon angka dongan. Ndang sadia leleng dung mate Jesus, godang do angka apostel na tading di Jerusalem, ala disi do inganan ni punguan na mangaradoti organisasi. (Ul. 8:14; 15:2) Di tingki i, halak  Kristen di Judea marbarita na uli holan tu angka halak na porsea tu sada Debata. Alai, ditogutogu tondi parbadia do si Paulus asa marbarita tu halak Junani, Rom, dohot angka halak na manomba ganaganaan.​—Gal. 2:7-9; 1 Tim. 2:7.

¹⁷ Lao do si Paulus tu luat na saonari digoari Turki, jala lao do muse ibana tu Junani dohot tu Italia. Marbarita do ibana tu na so halak Jahudi, jala dipungka ibana ma huria Kristen disi. Ndang mura parngoluan ni halak Kristen di tingki i. Alana sai dialo godang halak do nasida. Jadi, porlu do nasida dipatogu. (1 Tes. 2:14) Di taon 50 M, ditongoshon si Paulus do surat na patoguhon roha ni angka dongan di huria Tessalonik. Didok ibana, “Na mandok mauliate do hami tongtong tu Debata siala hamu saluhutna; ai hutaringoti hami do hamu di tangiangnami. Ai ndang mansadi hami marningot ulaonmuna na sian haporseaon dohot halojaonmuna.” (1 Tes. 1:2, 3) Jala dipangido ibana do asa masipatoguan nasida jala disurat ma, “Sai masipaingotan ma hamu jala masipauliulian, songon naung binahenmuna.”​—1 Tes. 5:11.

18. Songon dia do punguan na mangaradoti patoguhon si Pilippus?

¹⁸ Di abad na parjolo dipangke Jahowa do punguan na mangaradoti laho mangurupi sude halak Kristen. Tarmasuk ma angka sintua na di huria. Tingki marbarita na uli si Pilippus tu halak Samaria, diurupi punguan na mangaradoti do ibana. Disuru ma si Petrus dohot si Johannes manangiangkon halak Kristen na baru asa diurupi tondi parbadia. (Ul. 8:5, 14-17) Gabe dipatogu do si Pilippus dohot halak Kristen na baru alani pangurupion sian punguan na mangaradoti.

19. Songon dia pangkilalaan ni halak Kristen najolo tingki manjaha surat sian punguan na mangaradoti?

¹⁹ Di tingki na asing muse, punguan na mangaradoti porlu mambahen haputusan na ringkot, i ma taringot sunat na hombar tu Patik ni si Musa. (Ul. 15:1, 2) Rap martangiang ma nasida mangido tondi parbadia laho manulingkiti Hata ni Debata. Gabe diputushon nasida ma ndang porlu be sunat. Ditongos nasida ma surat taringot i tu angka dongan di huria. Tingki dijaha angka dongan surat i, gabe “las ma rohanasida jala tarapul”.​—Ul. 15:27-32.

20. (a) Songon dia Punguan na Mangaradoti patoguhon hita sude? (b) Sungkunsungkun aha do na laho taulas di minggu na ro?

²⁰ Saonari, dipatogu Punguan na Mangaradoti Organisasi do angka na karejo di Betel, perintis istimewa, dohot hita sude. Songon halak Kristen di abad na parjolo, las do rohanta molo dipatogu. Jala di taon 2015, diparade nasida do buku Kembalilah kepada Yehuwa, laho patoguhon angka halak na manadingkon Jahowa. Jadi, hita pe boi do patoguhon na asing? Taulas ma i di minggu na ro.