1. Songon na dipaboa di Epesus 6:10-13, songon dia do Jahowa patuduhon holongna tu hita? Patorang ma.

DIPATUDU Jahowa do holongna tu naposona marhite mangurupi hita mangalo musunta, i ma Sibolis dohot suru-suruanna. Jala dipaboa Jahowa do taringot angka musu i tu hita dohot songon dia carana mangalo nasida. (Jaha Epesus 6:10-13.) Tontu on mambahen las rohanta. Molo unduk hita tu Jahowa jala marsihohot tu Ibana, boi ma hita marhasil mangalo Sibolis. Pos ma rohanta songon si Paulus na mandok, “Molo Debata do donganta, ise ma na boi mangalo hita?”​—Rom 8:31.

2. Aha do na laho taulas di parsiajaran on?

² Tontu ndang olo hita gabe suda tingki laho mamingkirhon taringot Sibolis dohot suru-suruanna. Alana na rumingkot di halak Kristen, i ma marsiajar taringot Jahowa jala manomba Ibana. (Ps. 25:5) Alai porlu do taboto angka aha do na diulahon Sibolis. Boasa? Asa unang gabe dioto-otoi Sibolis hita. (2 Kor. 2:11; surat na di toru.) Di parsiajaran on, laho taulas ma angka cara na dipangke Sibolis dohot suru-suruanna laho mangaliluhon angka jolma. Jala taulas ma muse songon dia asa boi hita marhasil mangalo nasida.

3-4. (a) Aha do spiritisme i? (b) Songon dia godang halak porsea tu spiritisme?

³ Dipangke Sibolis dohot suru-suruanna do spiritisme laho mangaliluhon angka jolma. Angka halak na mangulahon spiritisme mangangku boi mamboto jala mangulahon na so boi diboto jala diulahon halak na asing. Umpamana,  naeng mamboto aha na masa di ari na naeng ro marhite ramalan bintang. Na asing mangangku boi do nasida mangkatai dohot halak naung mate. Adong muse na mangulahon ilmu sihir dohot mandormai halak na asing. *

⁴ Saonari, godang do halak porsea tu spiritisme. Tingki disungkun angka halak di 18 negara di Amerika Latin dohot Karibia, sapartolu sian nasida porsea tu ilmu gaib, sihir manang mangaramal. Jala godang sian nasida na porsea boi mangkatai dohot tondi ni halak naung mate. Tingki disungkun muse angka halak di 18 negara di Afrika, lobi satonga sian nasida porsea tu sihir. Tontu didia pe hita tading, ingkon tapasiding do angka spiritisme. Alana marsitutu do Sibolis mangaliluhon angka jolma di “saluhut portibi on”.​—Pgk. 12:9.

5. Songon dia pangkilalaan ni Jahowa tu spiritisme?

⁵ Jahowa i ma “Debata ni hasintongan”. (Ps. 31:6) Alani i, sogo do rohana tu spiritisme. Didok Ibana do tu halak Israel, “Na so tupa adong jumpang di tongatongamu sahalak na pabolushon anakna manang boruna sian api, manang halak pangarunding manang sijujur ari, manang sitabasi ulok manang parsibalik mata. Manang sibahen panutupi, manang partondung, manang na manungkun begu ni na mate. Ai marbiasbias situtu do roha ni Jahowa mida saluhut halak, angka na mangulahon sisongon i, jala ala ni biasbias angka sisongon i pabalion ni Jahowa.” (5 Mus. 18:10-12) Tutu, ndang Patik ni si Musa be na diihuthon halak Kristen. Alai taboto do, ndang muba pangkilalaan ni Jahowa tu spiritisme.​—Mal. 3:6.

6. (a) Songon dia Sibolis mamangke spiritisme laho manusai angka jolma? (b) Hombar tu Parjamita 9:5, aha do hasintongan taringot halak naung mate?

⁶ Dipasingot Jahowa do hita asa pasidingkon spiritisme. Alana diboto Ibana, on do sada cara ni Sibolis laho mambahen susa angka jolma. Marhite spiritisme, digabusi Sibolis do angka jolma. Didok ibana mangolu dope tondi ni halak naung mate. (Jala Parjamita 9:5.) Dipangke Sibolis do spiritisme laho mambahen angka halak mabiar jala mandao sian Jahowa. Tujuan ni Sibolis, i ma mambahen angka halak na mangulahon spiritisme i porsea tu suru-suruan na jahat ndang tu Jahowa.

7. Aha do na dipaboa Jahowa tu hita?

⁷ Songon naung taulas, dipaboa Jahowa do aha na porlu taboto asa unang dioto-otoi Sibolis dohot suru-suruanna. Saonari taulas ma piga-piga cara na boi taulahon laho mangalo Sibolis dohot suru-suruanna.

8. (a) Aha do sada cara laho pasidingkon gabus ni Sibolis? (b) Songon dia do Psalmen 146:4 paboahon gabus ni Sibolis taringot halak naung mate?

⁸ Jaha ma Hata ni Debata jala rimangi. On ma sada cara na ingkon taulahon laho pasidingkon gabus ni Sibolis. Hata ni Debata dipatudos do i songon podang na tajom na boi pataridahon gabus ni Sibolis. (Eps. 6:17) Umpamana, sian Hata ni  Debata taboto do ndang boi halak naung mate mangkatai dohot halak na mangolu. (Jaha Psalmen 146:4.) Jala taboto do holan Jahowa do na boi mamboto aha na laho masa di ari na naeng ro. (Jes. 45:21; 46:10) Molo tajaha jala tarimangi Hata ni Debata ganup ari, gabe boi ma hita pasidingkon jala mangkasogohon angka gabus ni Sibolis.

9. Aha do angka ulaon spiritisme na ingkon tapasiding?

⁹ Pasiding ma angka ulaon spiritisme. Tontu ndang olo halak Kristen mangulahon ulaon na adong hubunganna tu spiritisme. Umpamana, ndang ro hita tu inganan na adong hubunganna tu spiritisme manang mangkatai tu halak naung mate. Songon na taulas di parsiajaran naung salpu, ndang dohot hita tu hasomalan taringot halak naung mate na mangajarhon mangolu dope tondi ni halak naung mate. Jala ndang olo hita mamangke ramalan bintang manang manungkun datu laho mamboto aha na masa di ari na naeng ro. (Jes. 8:19) Taboto bahaya do angka ulaon sisongon i. Dos do i songon na mangkatai langsung tu Sibolis dohot suru-suruanna.

10-11. (a) Aha na diulahon piga-piga halak di abad na parjolo dung mamboto hasintongan? (b) Hombar tu 1 Korint 10:21, boasa ingkon tatiru halak Kristen di abad na parjolo, jala songon dia hita mangulahon i?

¹⁰ Bolongkon ma angka barang na adong hubunganna tu ilmu gaib. Piga-piga halak Epesus di abad na parjolo mangulahon spiritisme. Alai dung mamboto hasintongan, marhamubaon ma nasida. Didok di Bibel, “Godang do sian nasida na hea mangulahon hadatuon mamboan angka buku naung pinapungu ni nasida jala ditutung nasida ma i di jolo ni natorop.” (Ul. 19:19) Marsitutu do nasida mangalo Sibolis dohot suru-suruanna. Nang pe arga, ditutung nasida do angka buku i. Sasintongna, boi do nasida mandapot godang hepeng sian i. Alai ndang  dilehon manang digadis nasida buku i tu halak na asing. Alana mambahen las roha ni Jahowa do na rumingkot di nasida.

¹¹ Songon dia hita boi maniru halak Kristen di abad na parjolo? Denggan do molo tabolongkon angka barang na adong hubunganna tu ilmu gaib. Umpamana jimat manang angka barang na dipangke manang na disimpan laho manjaga sasahalak sian suru-suruan na jahat.​—Jaha 1 Korint 10:21.

12. Aha do sungkun-sungkun na ingkon tapingkirhon tingki mamillit hiburan?

¹² Manat ma tingki mamillit hiburan. Sungkun ma dirimuna, ‘Hujaha do buku, majalah, manang cerita di Internet taringot ilmu gaib? Songon dia do molo musik, film, acara TV dohot video game? Adong do hubungan ni angka hiburan i tu spiritisme? Adong do di hiburan i na patuduhon vampir, zombie, manang tukang sihir? Sian angka hiburan i, gabe lomo do rohangku tu sihir, guna-guna dohot mamburai?’ Tutu, ndang sude cerita manang hiburan adong hubunganna tu spiritisme. Alai tingki mamillit hiburan, marsitutu ma pasidingkon aha na dihasogohon Jahowa. Jala, ‘sai marsitutu ma asa ias panggora ni rohanta’ di adopan ni Debata.​—Ul. 24:16. *

13. Aha do na unang sai tahatahon?

¹³ Unang ma sai tahatai taringot suru-suruan na jahat. Laho mangulahon on, tatiru ma Jesus. (1 Ptr. 2:21) Ala hea do Jesus di surgo, tangkas do ditanda ibana Sibolis dohot angka suru-suruan na jahat. Alai tingki ro ibana tu tano on, ndang  lomo rohana paboahon taringot angka ulaon ni Sibolis. Paboahon taringot Jahowa do na dihalomohon rohana. Jala ndang na laho paboa-boahon ulaon ni Sibolis ibana umbahen na ro tu tano on. Suang songon i ma hita, unang ma sai tahatai taringot suru-suruan na jahat. Alai angka “hata na denggan” manang hasintongan ma na sai tahatahon.​—Ps. 45:2.

14-15. (a) Boasa ndang porlu mabiar hita tu suru-suruan na jahat? (b) Aha do buktina na dijaga Jahowa do naposona saonari?

¹⁴ Unang ma mabiar tu suru-suruan na jahat. Di tingkinta saonari on, ra masa do hasusaan tu hita. Songon kecelakaan, sahit, manang hamatean di na so panagaman. Alai unang ma tadok suru-suruan na jahat na mambahen i. Didok di Bibel, tingki dohot parsorion na so panagaman boi masa tu hita sude. (Pjm. 9:11) Taboto do, umgogo do Jahowa sian suru-suruan na jahat. Umpamana, ndang diloas Jahowa dipamate Sibolis si Job. (Job 2:6) Di tingki ni si Musa, dipatudu Jahowa do huasona di jolo angka datu di Mesir. (2 Mus. 8:18; 9:11) Dilehon Jahowa do huaso tu Jesus laho manaluhon Sibolis dohot suru-suruanna jala mangusir nasida sian surgo. Satongkin nai, sampathononna ma nasida tu lombang na mansai bagas jala ndang boi be nasida manusai jolma.​—Pgk. 12:9; 20:2, 3.

¹⁵ Saonari, godang do bukti na patuduhon na sai dijaga Jahowa do naposona. Pingkirhon ma on: Marbarita do hita jala mangajarhon hasintongan di liat portibi on. (Mat. 28:19, 20) Hasilna, gabe godang ma halak na mamboto taringot gabus ni Sibolis. Sai marsitutu do Sibolis laho mangambati ulaonta marbarita, alai ndang tolap ibana mangulahon i. Alani i, unang ma mabiar hita tu angka suru-suruan na jahat. Pos ma rohanta, “manatap manonggor do mata ni Jahowa manatap sandok tano on humaliang, laho mangalehon gogo tu halak parroha na marsitiopan tu Ibana”. (2 Kron. 16:9) Molo setia hita tu Jahowa, boi do taadopi angka hasusaan na dibahen Sibolis dohot angka suru-suruanna tu hita.

16-17. Paboa ma sada pengalaman taringot patuduhon habaranion laho mangalo suru-suruan na jahat.

¹⁶ Ingkon barani do hita mangalo suru-suruan na jahat tarlumobi tingki muruk dongan manang keluarganta tu hita ala ndang taihuthon angka ulaon na dibahen nasida. Alai dipasu-pasu Jahowa do angka halak na patuduhon habaranion. Songon donganta si Erica na tading di Ghana. Marsiajar Bibel ma ibana tingki marumur 21 taon. Ala boru ni sahalak datu do si Erica, dijujui do ibana asa dohot mangallang jagal naung dipelehon tu ompu ni nasida naung mate. Ala ndang olo si Erica mangulahon i, didok keluargana ma on mambahen muruk tondi ni ompu ni nasida. Jala porsea do keluargana i, molo ndang diulahon i bahenon ni tondi ni ompuna i ma nasida rintik jala marsahit.

¹⁷ Dipaksa keluargana do si Erica asa dohot tu ulaon i. Alai tongtong do ndang olo ibana. Ujungna, diusir ma ibana sian jabu i. Alai ditogihon piga-piga Sitindangi ma ibana asa rap tading dohot nasida. Dipasu-pasu Jahowa do si Erica marhite mangalehon keluarga na baru, i ma angka dongan sahaporseaon na dos songon haha-anggi dohot ibotona. (Mrk. 10:29, 30) Nang pe gabe ndang diakkui keluarga jala ditutung angka barangna, tongtong do si Erica setia tu Jahowa. Tardidi ma ibana jala saonari nunga gabe perintis biasa. Ndang mabiar ibana tu suru-suruan na jahat. Didok si Erica, “Ganup ari, sai hutangiangkon do asa ditanda keluargangku Jahowa jala dihilala nasida ma las ni roha dohot hadameon ala manomba Debata na parholong.”

18. Aha do pasu-pasu na tadapot ala marhaposan tu Jahowa?

¹⁸ Ndang sai sarupa hasusaan na taadopi ala mampartahanhon haporseaonta. Alai, ingkon marsitutu do hita mangalo Sibolis dohot suru-suruanna jala marhaposan tu Jahowa. Molo taulahon i, dapotta ma godang pasu-pasu, jala ndang dililuhon gabus ni Sibolis be hita. Jala ndang mabiar be hita tu suru-suruan na jahat na mangambati hita manomba Jahowa. Alai na rumingkot, gabe lam togu ma parale-aleonta tu Jahowa. Didok si Jakobus, “Oloi hamu ma Debata. Alo hamu ma Sibolis, dung i lari ma ibana sian hamu. Pajonok hamu ma tu Debata, dung i pajonohonna ma tu hamu.”​—Jak. 4:7, 8.