1-2. (a) Aha do cara na dibahen Sibolis laho mangoto-otoi angka jolma? (b) Aha do na laho taulas di parsiajaran on?

SIBOLIS, i ma “ama ni gabus”, nunga mangoto-otoi jolma sian mulana. (Joh 8:44) Umpamana, gabus taringot halak na mate jala didok muse mangolu dope tondi ni halak naung mate. Gabe godang ma ajaran dohot hasomalan na hombar tu gabus i. Alani i, piga-piga angka donganta ingkon “mampartahanhon haporseaon” sian nasa gogo ni nasida tingki adong keluarga manang sisolhotna na mate.​—Judas 3.

² Tingki di situasi sisongon i, aha do na boi mangurupi hamu asa marsihohot tu na diajarhon Bibel taringot hamatean? (Eps. 6:11) Songon dia hamu boi mangapuli jala patoguhon angka dongan na dipaksa asa dohot mangulahon hasomalan sisongon i? Di parsiajaran on, taulas ma tudu-tudu na dilehon Jahowa tu hita. Alai, jolo taulas ma aha na diajarhon Bibel taringot hamatean.

3. Aha do gabus ni Sibolis na parjolo, jala aha do na masa alani i?

³ Ndang lomo roha ni Debata mate jolma. Alai asa boi mangolu salelengna, ingkon unduk do si Adam dohot si Hawa tu parenta ni Jahowa. Didok, “Anggo sian hau parbinotoan ni na denggan dohot na roa, ndang jadi panganonmu; ai sadari dipangan ho sian i, sai na mate do ho.” (1 Mus. 2:16, 17) Alai, diela-ela Sibolis do si Hawa. Marhite ulok didok Sibolis ma, “Ndang na tutu hamu mate.” Porsea do si Hawa tu gabus ni Sibolis i. Ujungna, diallang ibana ma parbue ni hau i, jala dohot ma si Adam mangallang i. (1 Mus. 3:4, 6) Alani i, gabe mardosa jala mate ma sude jolma.​—Rom 5:12.

4-5. Aha do muse gabus ni Sibolis taringot hamatean?

⁴ Ujungna, mate do si Adam dohot si Hawa songon na  didok Jahowa. Alai, tongtong do Sibolis margabus taringot hamatean. Didok ibana muse, molo mate jolma, dagingna do na mate alai tondina tongtong do mangolu. Godang do jolma na dioto-otoi gabus ni Sibolis sahat tu saonari.​—1 Tim. 4:1.

⁵ Boasa godang halak porsea tu gabus ni Sibolis i? Diboto Sibolis do pangkilalaan ni jolma taringot hamatean. Ala laho mangolu salelengna do hita ditompa, ndang lomo rohanta mate. (Pjm. 3:11) Musu do hamatean i.​—1 Kor. 15:26.

6-7. (a) Boi do ditabunihon Sibolis hasintongan taringot hamatean? Patorang ma. (b) Songon dia hasintongan sian Bibel mangurupi hita asa unang pabiarhu?

⁶ Ndang boi ditabunihon Sibolis hasintongan taringot hamatean. Buktina, godang do saonari halak mamboto jala paboahon aha na diajarhon Bibel taringot halak naung mate dohot pangkirimon ni halak naung mate. (Pjm. 9:5, 10; Ul. 24:15) Hasintongan i mangapuli rohanta jala mangurupi hita asa unang pabiarhu taringot hamatean. Umpamana, ndang mabiar be hita tu halak naung mate jala taboto do ndang dihilala halak naung mate be agia aha. Taboto do muse ndang mangolu be nasida jala ndang boi nasida mambahen na jahat tu manang ise pe. Dos do nasida songon halak na renges modom. (Joh. 11:11-14) Jala ndang diboto halak naung mate be aha pe na laho masa. Nang pe nunga marratus taon nasida mate, alai dung dipahehe, hira na satongkin do i di nasida.

⁷ Tontu satolop do hamu molo hasintongan taringot hamatean i, mura antusan, tangkas, jala masuk angkal. Jala imbar do i tu gabus ni Sibolis! Asing ni mangaliluhon angka halak, gabus i mambahen marlea Debata. Asa taboto aha do akibat ni gabus ni Sibolis i, taulas ma angka sungkun-sungkun on. Songon dia do gabus ni Sibolis mambahen marlea goar ni Jahowa? Songon dia do muse gabus i mambahen ndang arga tobusan ni Jesus? Jala songon dia i mambahen lam susa angka jolma?

8. Hombar tu Jeremia 19:5, songon dia do gabus ni Sibolis mambahen lea goar ni Jahowa?

⁸ Gabus ni Sibolis taringot halak na mate mambahen marlea goar ni Jahowa. Sada sian gabus i mangajarhon, molo halak na  mate disiksa di api na roko. Ajaran sisongon i mambahen lea goar ni Debata! Boasa? Alana, gabe dirimpu halak do molo Debata parholong i dos songon Sibolis na jahat. (1 Joh. 4:8) Songon dia ma pangkilalaanmuna taringot i? Alai na rumingkot, songon dia pangkilalaan ni Jahowa? Sasintongna, sogo do roha ni Jahowa tu angka na jahat.​—Jaha Jeremia 19:5.

9. Alani gabus ni Sibolis, aha do pengaruhna tu tobusan ni Jesus songon na dipaboa di Johannes 3:16 dohot 15:13?

⁹ Gabus ni Sibolis taringot hamatean mambahen ndang arga tobusan ni Jesus. (Mat. 20:28) Adong do muse gabus ni Sibolis na mangajarhon na tongtong dope mangolu tondi ni jolma naung mate. Molo tutu do i, tontu mangolu do jolma salelengna. Jala ndang porlu be dilehon Jesus tobusan asa boi hita mangolu salelengna. Alai taingot ma, tobusan ni Jesus i ma sada tanda holong na mansai balga na dipatudu tu sude jolma. (Jaha Johannes 3:16; 15:13.) Bayangkon ma songon dia pangkilalaan ni Jahowa dohot Jesus tu ajaran na mambahen ndang arga tobusan i!

10. Songon dia do gabus ni Sibolis mambahen lam susa angka jolma?

¹⁰ Gabus ni Sibolis mambahen jolma lam susa. Jotjot do didok tu natua-tua na mate ianakhonna, molo ianakhonna i nunga dialap Debata laho gabe suru-suruan di surgo. Alai ndang gabe tarapul roha ni nasida. Ajaran na sala taringot api na roko, gabe alasan ni gareja laho manutung angka halak na mangalo tu ajaran ni gareja i. Jala ditutung do nasida di tiang. Songon na didok buku Inkuisisi Spanyol (Dewan Pengadilan Katolik Spanyol), siksaan na dibahen angka pamimpin ni gareja i laho “patuduhon songon dia api na roko i”. Jala dibahen nasida pe songon i, asa marhamubaon do angka na mangalo tu ajaran ni gareja i asa unang disiksa nasida di api na roko tingki mate. Di godang luat, dijujui do angka halak asa mangargai jala manomba ompu ni nasida naung mate manang mangido pasu-pasu. Na asing dibahen do pelean asa unang muruk ompu ni nasida. Sasintongna, angka ajaran ni Sibolis do i jala ndang boi mangapuli. Gariada, on mambahen lam marsak manang mabiar angka jolma.

11. Songon dia do keluarga manang sisolhot manjujui hita asa mangulahon hasomalan na dihasogohon Debata?

¹¹ Ra, dijujui angka keluarga manang sisolhot do hita mangulahon hasomalan na dihasogohon Debata. Alai molo holong rohanta tu Debata dohot tu Hatana, gabe taronjar do rohanta asa unduk tu Ibana. Ra, dibahen nasida do hita maila, didok do ndang holong rohanta tu nasida. Jala didok nasida do muse, olo do gabe diganggu halak na mate i hita molo ndang taulahon hasomalan i. Molo songon i, aha ma na boi taulahon asa tongtong mampartahanhon haporseaonta? Taulas ma piga-piga prinsip ni Bibel na boi mangurupi hita.

12. Aha do piga-piga hasomalan na dihasogohon Debata?

¹² “Padao hamu ma dirimuna” sian hasomalan na dihasogohon Debata. (2 Kor. 6:17) Di negara Karibia, godang do halak porsea dung mate sasahalak adong do “beguna” jala didok boi do begu i mambalos hajahaton na hea dibahen angka halak tu ibana. Didok muse, “begu” i boi mambahen susa piga-piga halak. Hasomalan na asing di Afrika, molo mate sasahalak,  ingkon ditutup do angka kaca na adong di jabu i jala molo adong potona ingkon dipabalik do i tu dinding. Boasa? Didok nasida, asa unang diida halak na mate i be dirina! Tontu ndang porsea hita tu angka hasomalan i jala ndang dohot hita mangulahon i, alana gabus ni Sibolis do i!​—1 Kor. 10:21, 22.

13. Songon na didok Jakobus 1:5, molo ndang pos rohamuna tu sada hasomalan, aha do na ingkon ulahononmu?

¹³ Molo ndang pos rohamuna tu sada hasomalan manang ulaon, martangiang ma tu Jahowa mangido bisuk sian Ibana. (Jaha Jakobus 1:5.) Dung i, boi do di riset hamu taringot i di publikasinta. Molo porlu, boi do disungkun hamu angka sintua di huria. Tontu ndang dipaboa nasida aha na ingkon ulahononmu, alai boi do dipaboa nasida angka prinsip na adong di Bibel na boi mangurupi. Molo diulahon hamu i, gabe tarlatik ma pangantusionmuna jala gabe boi ma hamu “mamboto dia na sintong dohot na sala”.​—Heb. 5:14.

14. Songon dia carana asa unang tabahen tartuktuk halak?

¹⁴ “Ulahon hamu ma i saluhutna laho pasangaphon Debata. Unang ma gabe tartuktuk halak.” (1 Kor. 10:31, 32) Molo dohot hita tu sada hasomalan manang tu sada ulaon, pingkirhon ma pangkilalaan ni halak na asing tarlumobi dongan sahaporseaon. Unang ma tabahen nasida tartuktuk! (Mrk. 9:42) Jala unang ma tabahen sogo roha ni halak na so sahaporseaonta. Molo tapatudu holong jala lambok tapaboa tu nasida, on boi pasangaphon Jahowa. Unang ma taparoa-roa hasomalan ni nasida i. Ingot ma, ringkot do patuduhon holong! Molo denggan jala lambok hita maradophon nasida, ra boi do muba roha ni angka halak na marsogo ni roha tu hita.

15-16. (a) Boasa denggan molo diboto na asing taringot haporseaonta? Paboa ma sada contoh. (b) Songon dia hata ni si Paulus di Rom 1:16 boi mangurupi hita?

¹⁵ Patandahon ma dirimuna sahalak Sitindangi ni Jahowa. (Jes. 43:10) Gabe mura do hita mangadopi angka keluarga molo diboto nasida hita sisomba Jahowa. Songon si Francisco na tading di Mozambik. Didok ibana, “Dung marsiajar Bibel ahu dohot istriku si Carolina, pintor dipaboa hami do tu keluarga molo hami ndang dohot be tu ulaon pasangaphon halak naung mate. Ndang sadia leleng, diuji ma haporseaonnami tingki mate  kakak ni si Carolina. Somalna adong do acara na dibahen laho mandidihon bangke ni halak na mate i. Dung i diusehon ma aek na mandidihon i di sada inganan jala ingkon modom do angka sisolhotna di inganan i saleleng tolu borngin. On diulahon asa unang muruk tondi ni halak na mate i. Alani i, dijujui keluargana do si Carolina laho mangulahon i.”

¹⁶ Aha ma na diulahon si Fransisco dohot istrina? Didok si Francisco, “Ala holong do rohanami tu Jahowa jala lomo rohanami mambahen las rohana, ndang dohot hami tu ulaon i. Alai gabe muruk situtu ma keluarga ni si Carolina. Didok nasida, ndang diargai hami be halak na mate i jala didok muse ndang olo be nasida manjumpangi manang mangurupi hami. Ala naung dipatorang hami hian taringot haporseaonnami, tingki muruk nasida ndang pola be dipaboa hami muse taringot i. Alai adong do piga-piga sian keluarga na mamihak tu hami, jala gabe nasida do na patorangkon taringot haporseaonnami. Ujungna, ndang muruk be keluarga ni si Carolina, jala boi ma hami mardame. Jala adong do piga-piga na ro tu jabu mangido sijahaonta.” Alani i, unang ma maila hita mampartahanhon hasintongan taringot hamatean.​—Jaha Rom 1:16.

17. Aha do na boi taulahon tingki adong donganta na mate sisolhotna?

¹⁷ Tingki adong donganta na mate sisolhotna, marsitutu ma hita asa gabe ale-ale na ‘songon na marhahamaranggi di sitaonon’. (Poda 17:17, Bibel siganup ari) Songon dia carana asa boi hita gabe ale-ale tarlumobi tu angka dongan na dipaksa keluargana mangulahon hasomalan na dihasogohon Debata? Taulas ma dua prinsip ni Bibel na boi mangurupi hita laho mangapuli nasida.

18. Boasa tangis Jesus, jala aha na boi taparsiajari sian i?

¹⁸ “Tangis ma hamu dohot halak na tangis.” (Rom 12:15) Ra, ndang taboto aha na laho tadok tu halak na marhabot ni roha. Alai molo diida nasida dohot hita  tangis, diboto nasida ma na parduli do hita tu nasida. Tingki mate ale-ale ni Jesus, i ma si Lasarus, tangis do si Maria, si Marta, dohot na asing. Dung opat ari ro ma Jesus, jala dohot do ibana tangis, nang pe diboto ibana na laho paheheonna do si Lasarus. (Joh. 11:17, 33-35) Tingki tangis Jesus, on patuduhon songon dia pangkilalaan ni Jahowa tu hamatean ni si Lasarus. Jala, tingki diida nasida Jesus tangis, gabe tarapul ma roha ni si Maria dohot si Marta, ala diboto na holong do roha ni Jesus tu nasida. Suang songon i ma, tingki diboto angka donganta na holong do rohanta tu nasida, gabe tarapul do roha ni nasida ala adong angka dongan na parduli jala rade mangurupi.

19. Hombar tu Parjamita 3:7, aha do na boi taulahon laho mangapuli angka donganta?

¹⁹ “Adong do tingki hohom, adong do tingki mangkatai.” (Pjm. 3:7, Bibel siganup ari) Cara na asing laho mangapuli angka dongan na marhabot ni roha, i ma marhite manangihon nasida. Loas ma donganmuna i paboahon sude na di rohana jala unang ma jut rohamuna molo adong ‘hata na oto’ na didok nasida. (Job 6:2, 3) Ra marsak situtu do rohana ala dipaksa keluargana na so sisomba Jahowa. Alani i, togihon ma ibana rap martangiang. Pangido ma tu “Sitangihon tangiang” asa dilehon gogo dohot bisuk tu ibana. (Ps. 65:3) Molo pas do tingkina, boi do hamu rap manjaha Bibel manang boi do dijaha hamu kisah hidup na adong di publikasinta na boi patoguhon roha.

20. Aha na laho taulas di parsiajaran na mangihut?

²⁰ Tontu, mandok mauliate do hita ala mamboto hasintongan taringot hamatean dohot pangkirimon di ari na naeng ro tu halak naung mate! (Joh. 5:28, 29) Alani i, barani ma hita mampartahanhon hasintongan ni Bibel jala paboahon hasintongan i manang sadihari pe. Di parsiajaran na mangihut, taulas ma songon dia Sibolis mangaliluhon angka jolma marhite spiritisme. Jala taulas ma muse boasa ingkon tapasiding ulaon dohot hiburan na patuduhon spiritisme.