1. Aha do na ingkon diulahon sude naposo ni Debata, jala boasa? (Ida gambar sampul.)

DIDOK Jesus tu angka siseanna “laho ma hamu, bahen ma saluhut halak sian nasa bangso gabe siseanku”. (Mat. 28:19) Sude naposo ni Debata lomo do rohana marsiajar songon dia marbarita ‘sian nasa gogo’ songon na ditonahon Jesus. (2 Tim. 4:5) On do ulaon na mansai ringkot saonari jala otik nai nama tingkina. Alai, sipata ndang mura mangalehon gumodang tingki tu ulaon i.

2. Aha do na boi mangambati hita laho marbarita sian nasa gogo?

² Godang do muse angka ulaon na asing na ringkot na mambahen suda tingki dohot gogonta. Ra, godang do tingki na tapangke laho manarihon angka na porlu di hita dohot di keluarganta. Asing ni i, olo do ala marsahit, depresi, manang ala lam matua. Alani i, songon dia do asa boi hita marbarita sian nasa gogo nang pe adong na mangambati?

3. Aha do na boi taboto sian hata ni Jesus di Mateus 13:23?

³ Unang ma metmet rohanta molo ndang boi talehon godang tingki laho marbarita. Diboto Jesus do, ndang sai boi sarupa tabahen songon na dibahen halak na asing. (Jaha Mateus 13:23.) Alai molo taulahon sude na dumenggan di ulaon marbarita, diargai Jahowa do i. (Heb. 6:10-12) Alai sipata, olo do ra didok rohanta boi do talehon godang tingki tu ulaon i. Di artikel on, laho taulas ma songon dia carana asa ulaon marbarita na rumingkot di ngolunta, mangalehon gumodang tingki, dohot asa lam denggan marbarita jala mangajari. Alai parjolo, taulas ma aha do lapatanna marbarita sian nasa gogo?

4. Aha do lapatan ni marbarita sian nasa gogo?

⁴ Lapatan ni marbarita sian nasa gogo, i ma marbarita  jala mangajari sian nasa tolapta. Alai ndang alani godang ni tingki na ingkon talehon. Na rumingkot di Jahowa i ma, aha do na mangonjar rohanta marbarita. Alani holongta tu Jahowa dohot tu halak na asing, taulahon ma sian nasa roha tugas na dilehon Jahowa. * (Mrk. 12:30, 31; Kol. 3:23) Lapatanna, tapangke ma gogo dohot na adong di hita di ulaon marbarita. Molo taargai do ulaon marbarita on, gabe taronjar ma rohanta laho marbarita tu godang halak.

5-6. Paboa ma sada contoh songon dia sasahalak boi tongtong manjumolohon ulaon marbarita nang pe godang ulaonna.

⁵ Bayangkon ma sahalak baoa na poso na lomo rohana margitar. Sai margitar do ibana tingki sadihari pe. Ujungna, gabe pargitar ma ibana di cafe tingki ari Sabtu dohot ari Minggu. Alai, ndang cukup gajina sian i. Alani i, karejo ma ibana muse di toko gabe kasir mulai sian ari Senin sahat tu ari Jumat. Nang pe gumodang suda tingkina karejo di toko i, alai sai tu musik do rohana. Hirim do rohana asa lam malo marmusik. Molo ndang karejo, dipangke ibana do tingkina laho marmusik.

⁶ Suang songon i ma, ra lomo do rohamuna marbarita na uli jala nunga jotjot hamu marlatik asa lam denggan marbarita. Alai ala godang ulaonmuna na asing, olo do gabe ndang boi dilehon hamu godang tingki laho marbarita. Alani i, ra gabe sungkun-sungkun do rohamuna, songon dia do carana asa tongtong manjumolohon ulaon marbarita.

7-8. Songon dia do hita boi maniru Jesus taringot marbarita?

⁷ Jesus ma contoh na dumenggan na boi tatiru taringot marbarita. Paboahon taringot Harajaon ni Debata do na rumingkot di ngoluna. (Joh. 4:34, 35) Mardalan do ibana marratus kilometer laho marbarita tu godang halak. Marbarita do  Jesus tu sude halak na dijumpangi manang didia pe. Tongtong do dijumolohon Jesus ulaon marbarita di ngoluna.

⁸ Tatiru ma Jesus na sai rade marbarita na uli didia pe manang sadihari pe. Ingkon olo do hita berkorban laho marbarita na uli. (Mrk. 6:31-34; 1 Ptr. 2:21) Piga-piga donganta di huria adong do na gabe perintis istimewa, perintis biasa, manang perintis ekstra. Na asing, adong na marsiajar bahasa na baru manang pinda tu inganan na mangkaporluhon gumodang parbarita. Alai, godang do angka penyiar na ringgas na dohot tu ulaon marbarita. Otik manang godang na boi taulahon, ndang hea dipangido Jahowa lobi sian nasa tolapta. Lomo do rohana asa sude hita marlas ni roha paboahon “barita na uli na marmulia, na sian Debata na marlas ni roha”.​—1 Tim. 1:11; 5 Mus. 30:11.

9. (a) Nang pe adong karejona, songon dia do si Paulus mangkaringkothon ulaon marbarita? (b) Sian Ulaon ni Apostel 28:16, 30, 31, aha do na boi tatiru sian si Paulus?

⁹ Dibahen si Paulus do contoh na denggan taringot mangkaringkothon ulaon marbarita. Saleleng di Korint di pardalananna gabe misionaris na paduahalihon, ingkon karejo do si Paulus mambahen tenda ala naeng suda hepengna. Alai, ndang i na gabe rumingkot di si Paulus. Diulahon ibana pe i, asa boi do ibana tongtong marbarita tu halak Korint. Alana ndang olo ibana manjalo hepeng sian nasida. (2 Kor. 11:7) Nang pe ingkon karejo si Paulus, alai ulaon marbarita do na rumingkot di ibana. Di ari Sabbat pe, tongtong do ibana marbarita. Dung lam denggan muse situasina, lam jotjot do si Paulus marbarita. ‘Dipangke ibana do sude tingkina laho mamaritahon Hata ni Debata. Dipaboa jala dipatuduhon ibana do tu halak Jahudi na tutu Jesus i Kristus’. (Ul. 18:3-5; 2 Kor. 11:9) Dungkon i, tingki dipenjarahon ibana di Rom saleleng dua taon, marbarita do ibana tu angka halak na manjumpangi ibana jala dibahen do surat. (Jaha Ulaon ni Apostel 28:16, 30, 31.) Ndang dipaloas si Paulus manang aha pe mangambati ibana laho marbarita. Didok ibana, dung dijalo tugas on, “ndang marnaloja hami mangulahon i”. (2 Kor. 4:1) Songon si Paulus, nang pe tapangke tingkinta laho karejo boi do hita tongtong mangkaringkothon ulaon marbarita di ngolunta.

10-11. Nang pe marsahit, songon dia do hita boi marbarita sian nasa gogo?

¹⁰ Molo ndang boi hita marbarita sian jabu tu jabu ala naung matua manang marsahit, boi do hita marbarita marhite cara na asing. Halak Kristen di abad na parjolo tongtong do marbarita manang didia pe. Laho do nasida sian jabu tu jabu, tu pasar, jala marbarita do nasida tu “ganup halak na adong disi”. (Ul. 17:17; 20:20) Molo ndang tolap hita leleng mardalan, boi do hundul hita di inganan na godang halak lewat jala marbarita tu nasida. Manang, boi do hita mangulahon kesaksian tidak resmi, mambahen surat, manang kesaksian telepon. Godang do angka donganta na tongtong marlas ni roha ala boi marbarita nang pe marhite cara na asing.

¹¹ Nang pe marsahit, boi do hamu marbarita sian nasa gogomuna. Pingkirhon ma muse contoh ni si Paulus. Didok ibana, “Margogo do ahu di sude na masa, ala dilehon Debata do huaso tu  ahu.” (Plp. 4:13) Tingki marsahit si Paulus, dihaporluhon ibana do gogo i asa boi tongtong marbarita. Didok ibana ma tu halak Galatia, “Ala na marsahit i do ahu umbahen na boi paboahon barita na uli tu hamu.” (Gal. 4:13) Suang songon i ma, tingki marsahit pe boi do hita tongtong marbarita. Umpamana, marbarita tu dokter, perawat, manang tu halak na karejo di rumah sakit. Ra godang do sian nasida na so boi tajumpangi di jabu ni nasida.

12. Aha do lapatanna “sada do tinuju ni matamuna”?

¹² Didok Jesus, “Panondang ni daging do mata. Molo sada do tinuju ni matamuna, marsinondang ma dagingmu.” (Mat. 6:22) Aha do lapatan ni hata i? Na didok Jesus dison, asa holan mamingkirhon sada tujuan jala ndang manimbil sian i. Jesus ma gabe sitiruon ala sai diharingkothon ibana do ulaon marbarita. Jala diajarhon ibana do tu angka siseanna asa tongtong mamingkirhon Harajaon ni Debata dohot ulaon marbarita. Alani i, tiru ma Jesus jala “jumolo ma lului Harajaon ni Debata dohot hatigoranna”.​—Mat. 6:33.

13. Aha do na boi mangurupi hita asa sai mamingkirhon ulaon marbarita?

¹³ Sada cara asa sai mamingkirhon ulaon marbarita, i ma mangorui tingki tu ulaon na so pola ringkot. Alani i, gabe boi ma godang tingkinta laho mangurupi halak mananda jala mangkaholongi  Jahowa. * Umpamana, boi do taorui tingkinta karejo asa gumodang tingkinta marbarita? Boi do taorui tingki laho rekreasi manang ulaon na asing na pasudahon tingki?

14. Aha do na diulahon donganta na suami istri asa boi mamangke gumodang tingki laho marbarita?

¹⁴ On ma na diulahon sahalak sintua na margoar si Elias dohot istrina. Didok ibana, “Ndang boi hami pintor merintis, alai dipingkirhon hami do carana asa boi mamangke godang tingki laho marbarita. Denggan ma diatur hami tingki dohot hepengnami. Umpamana, ndang dituhor hami angka na so pola ringkot, diorui hami do tingki rekreasi, jala dipangido hami ma tu bos di parkarejoan asa diorui tingkinami karejo. Hasilna, gabe boi ma hami marbarita tingki borngin, mangurupi gumodang halak marsiajar Bibel, jala boi ma hami marbarita dua hali saminggu di parsitongaan ni minggu. Las situtu do rohanami!”

15-16. Hombar tu 1 Timoteus 4:13, 15, songon dia carana asa lam malo hita marbarita? (Ida ma kotak “ Na Mangurupi Ahu Asa Boi Marbarita sian Nasa Gogo.”)

¹⁵ Cara na asing asa boi marbarita sian nasa gogo, i ma mangalatik caranta marbarita. Asa lam malo sasahalak di parkarejoanna, ingkon jotjot do ibana dilatik. Suang songon i ma hita, ingkon tongtong do hita marlatik asa boi lam denggan di ulaon marbarita.​—Poda 1:5; jaha 1 Timoteus 4:13, 15.

 ¹⁶ Alai songon dia carana asa lam malo hita marbarita? Parrohahon ma tudu-tudu na tadapot ganup minggu di Hangoluan dohot Pangkobasion ni Halak Kristen. Di parpunguan i, dilehon do tudu-tudu na boi mangalatik hita asa lam malo di ulaon marbarita. Umpamana, tingki ketua mangalehon pokok nasehat tu angka dongan na pasahathon bagianna, parrohahon ma nasehat i. Jala taulahon ma nasehat i tingki laho marbarita. Boi do tapangido pengawas kelompok, penyiar naung berpengalaman, perintis, manang pengawas wilayah mangurupi hita tingki marbarita. Molo lam denggan hita mamangke Angka Alat Laho Mangajari, gabe lam malo ma hita marbarita dohot mangajari. On boi mambahen hita lam marlas ni roha.

17. Aha do laba na tadapot molo tongtong hita marbarita sian nasa gogonta?

¹⁷ Sada hasangapon do di hita boi gabe “dongan saulaon” ni Jahowa! (1 Kor. 3:9) Dung “diboto hamu dia na rumingkot” jala sai manjumolohon pangkobasion ni halak Kristen, boi ma hamu manomba “Jahowa marhitehite las ni roha”. (Plp. 1:10; Ps. 100:2) Pos ma rohamuna, urupan ni Jahowa do hamu asa boi tongtong marbarita nang pe mangadopi angka hasusaan dohot sitaonon. (2 Kor. 4:1, 7; 6:4) Nang pe ndang boi godang na dilehon hamu, alai molo dilehon hamu na dumenggan boi ma hamu “marlas ni roha”. (Gal. 6:4) Tingki marbarita hita sian nasa gogonta, on patuduhon holongta tu Jahowa dohot tu angka dongan. Jala “molo diulahon ho i na paluahon dirim do ho dohot na manangihon ho”.​—1 Tim. 4:16.